GENESIS 29
29
Jakob Laban In ah a Tlung mi
1Jakob chu saklei ram ah a kal vima le, 2phâisen ah tikhurchawh kiangkam ah dawrâ rual thum an bawk nguainâk ram ah a va tleng chawlh rawh. Hi tikhurchawh lakah ran tla chu tak anna khawlh tâwn le, chu tikhurchawh nih chun lungphêng lian tak sinh a nei. 3Zeiliau zawng ah ranrual tla an va kal chun, an dâwngpu tla nih lung chu an ṭhial le, tî an tawih na; chun an sinh nawlh tâwn.
4Jakob nih dawrâ vêngtu tla rangah, “Hâwi le tla, zei lei mi me nan si?” ti hen, a deih na.
“Haran lei mi kan si,” ti hen, an sâng.
5“Nahor fapa Laban nan theih ma?” ti hen, a deih na.
Annih nih, “Theih ta a,” ti hen an sâng.
6Jakob nih, “A dam bei?” ti hen, a deih na.
“A dam rih, zauhnik a fanu Rakel khawm a pa ranrual hinah a hawngpi ko hi” ti hen, an sâng.
7Jakob nih, “Zei rangah tak nan khawlh tâ hen râwl nan tlattir na lo rih, nî a sâng thlo rih, ran tlungpi tik asi lo rih hi teh,?” a ti.
8“Hinah ranrual tla pumh ver na hen lung ṭhial asi lânlo chu ranrual tî kan tawih kho na lai lo,” an ti.
9Jakob nih a sawnh na liau chun Rakel khawm ranrual hen a hawng tleng bâk.
10Jakob nih Rakel chu, a pa ranrual tla hen a muh na le; tikhurchawh leiah a va kal le, lung chu a ṭhial le, dawrâ rual chu tî a tawih na. 11Churawhchun, a châwchawk le, â lâwm tuk le, a ṭap. 12“Kei chu na pa taksa tlâi, Rebek fapa kasi,” ti hen a simh.
A pa va simh ding hen Rakel chu a tek phêt. 13Laban nih a tupa Jakob thâwngthâng a theih rawh chun a tawng ding hen a va tek le, a kuah le a châwchawk, chun in ah a lûtpi rawh. Jakob nih Laban chu thil zeizawng chu a simh ver le, 14Laban nih, “Asi ma chu, ka taksa leh keimah thisen tak na si,” a ti. Jakob chu chunah thla khat bir a um.
Rakel leh Leah Ruangah Jakob nih
Laban Rian a Ṭuan Piak
15Laban nih Jakob sinah, “Ka taksa tlâi na si ruangah, ka rangah zei rian khawm na ka ṭuan piak ding asi lo. Lawh zeizat an pêk sele na duh?” a ti. 16Laban nih fanu panih a nei le, a upa dauh mi min chu Leah asi, a ngâksia dauh mi chu Rakel asi. 17Leah chu dâwt mêl a put le, Rakel chu a chuang dek, a mêl khawm a ṭha.
18Jakob nih Rakel a duh le, “Rakel umpi ding hen na ka pêk chun kum sarih na rian ka ṭuan lai,” a ti.
19Laban nih a sâng le, “Nangmah rang lo chu âu rang khawm ka pêk awtlo, hinah ka sinah um ko,” a ti. 20Jakob nih Rakel tawng ding ko hen kum sarih tiang a ṭuan, a duh ruang chun chu bang chu ni tâwmtê tluk cho hen a ngaih.”
21Churawhchun, Jakob nih Laban sinah, “A ni a tling rawh, na fanu hawng ka umpitir rawh,” a ti. 22Laban nih lâwinâk puai a tuah le, mikip a sâwm na. 23Sikhawmsele, chu zân chun, Rakel silo hen Leah chu Jakob rangah a pêk. Jakob nih chun a ihpi rawh. 24(Laban nih a fanu Leah rangah a to-awnu rang ding ah Zilpah a pêk.) 25A thâizîng khua a dei lânlo chu Jakob nih Leah asi ti a theih lo thlo. Laban sinah a va kal le, “Zei rangah hi hâwi hen na ka ti zia? Rakel tawng ding hen rian ka ṭuan mi lakah zei rangah na ka perpet?” a ti.
26Laban nih a sâng le, “A naunu nih a unu lânah pasal neih hi, hi ram dân asi lo,” a ti. 27Hi umhnâk dinhni kar khat hi lîm ding ngâk rih. Kum sarih dang ka rian na ka ṭuan piak asi chun Rakel khawm kan pêk lai,” a ti.
28Jakob nih rem a ti le, anna umhnâk zarhkar khat a lîm rawh chun, Laban nih Rakel chu a nupi siding hen a pêk rawh. 29(Laban nih a fanu Rakel rangah a to-awnu ding hen Bilhah a pêk.) 30Jakob nih a nupi Rakel chu a ihpi le, Leah ngâk hen a duh dauh. Laban rangah kum sarih rian a ṭuan piak nawlh.
Jakob nih a Ring mi Fa Tla
31LALPA nih Leah ngâk hen Rakel a duh dauh mi a muh le, Rakel chu fa ring lo hen a siam le, fa nei lo hen a um. 32Leah chu a râi le, fapa a ring le, “LALPA nih chun ka lawksawng zia a muh, tu chun ka pasal nih hawng ka dâwt dauh lai rawh,” a ti le; churuang chun a min ah Reuben#29.32 REUBEN: Hebrai ah hi min umzia chu ‘ka lawksawngnâk a muh’ tinâk asi. a sak. 33A râi le, fapa dang a ring nawlh. “LALPA nih fapa a hawng ka pêk nawlh khawmsele, dâwt ka tawng lo nget rih” ti a theih; churuangah a min ah Simeon#29.33 SIMEON: Hebrai ah hi min umzia chu ‘theih’ tinâk asi. a sak. 34A râi nawlh le, fapa dang a ring nawlh, “Ka pasal rangah fapa pathum ka ring piak rawh ruangah kanna umhnâk a bir khun lai rawh,” a ti le; a min ah Levi#29.34 LEVI: Hebrai ah hi min umzia chu ‘bir’ tinâk asi. a sak. 35A râi nawlh le, fapa dang a ring nawlh. “Tutan chu LALPA ka sawr lai rawh,” a ti le, a min ah Juda#29.35 JUDA: Hebrai ah hi min umzia chu ‘sawr’ tinâk asi. a sak. Churawhchun, a fa neih a dawng rawh.
Atualmente selecionado:
GENESIS 29: BCLBV
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Bawm Common Language Bible © Bangladesh Bible Society, 2004. All rights reserved.