MATEO 12
12
Te jnopojeletike la skꞌokꞌik sjol triwu ta skꞌaalel kuxo-oꞌtan
1Jich yorail a te Jesus sok te jnopojeletik yuꞌune beenik kꞌaxel ta yol triwualtik ta skꞌaalel kuxo-oꞌtan ae. Te jnopojeletike wiꞌnajik. Jich a lijk skꞌoktalanbeyik sjol te triwue sok la xkꞌuxbeyik te sbakꞌe. 2Te fariseoetike la yilik te tut yipalik ta spasele sok jich a yalbeyik te Jesuse:
—Ilawil te jnopojeletik awuꞌune. Yipalik ta spasel te tut ma spas ta pasel ta skꞌaalel kuxo-oꞌtane —xchiik.
3La yal te Jesuse:
—¿Ma wan awilojuk ta Sjun Dios te tut la spas te jDavid te kꞌalal ay ta wiꞌnal sok te sjoꞌtake? 4Och ta templo yuꞌun te Diose sok la sweꞌik te chꞌul waj te pachal ta stojol te Diose. Pero ma spas ya sweꞌik te chꞌul waje, jaꞌ nax ya spas ya sweꞌik stukel te saserdoteetike. 5¿O maꞌyuk awilojik te mantaliletik yuꞌun te jMoisese, te tutꞌil makꞌ skux yoꞌtanik yuꞌun yaꞌtel ta templo ta skꞌaalel kuxo-oꞌtane te saserdoteetike, sok maꞌyuk ta mulil yuꞌun? 6Ya kalbeyex te liꞌay to te tut mas mukꞌ yuꞌun te temploe. 7Te jaꞌexe ma anaꞌojbeyikuk sluwaril te tut tsꞌibabil ta Sjun te Diose:
“Jaꞌ ya jkꞌan te ya xkꞌuxutaywanexe. Ma jaꞌuk ya jkꞌan te milbil majtane”, xchi me.
Te yuꞌunuk ya anaꞌbeyik sluwarile, makꞌ ya alebeyik smul te machꞌatik maꞌyuk smulik te jichuke. 8Jich te Nichꞌanile, jaꞌ ajwalil yuꞌun te skꞌaalel kuxo-oꞌtane —xchi te Jesuse.
Jtul winik te makꞌ snik sba te skꞌabe
9Jich a kꞌax bael te Jesuse. Kꞌot te ba sinagoga yuꞌunike. 10Ay jtul winik teꞌa te makꞌ snik sba te skꞌabe. Ay machꞌatik yipalik ta smaliyel te tut ya spas te Jesuse. Sok la sjojkꞌobeyik:
—¿Me ya wan spas ta lekutesel jchameletik ta skꞌaalel te kuxo-oꞌtane? —xchiik.
11Te Jesuse la yalbe:
—¿Tut xchaex te jaꞌexe? Teme chꞌay koel ta chꞌen kojtuk te akarnerae ta skꞌaalel te kuxo-oꞌtane, ¿me makꞌ wan xba alokꞌesik? 12Te jtul winike mas tulan skꞌoplal stukel ke te jkojt karnerae. Jaꞌ yuꞌun ya spas ta pasel te tut lek ta skꞌaalel te kuxo-oꞌtane —xchi te Jesuse. 13Jich a yalbe te winike:
—Jacha te akꞌabe —xyut.
Te kꞌalal la xjach te skꞌabe, jicha lekub. Pajal a kꞌot sok te jchꞌix xan skaꞌbe. 14Jich te fariseoetike lokꞌik bael, ba snopik te tut ya yut ya smilik te Jesuse.
Tut xchi skꞌoplal yuꞌun Dios te Jesuse
15Kꞌalal la yaꞌibe sluwaril te Jesuse, lok bael teꞌa. Bayal genteetik la stsꞌakliyik bael. Te Jesuse la slekutes spisil chameletik. 16Sok la yalbe mantal te genteetike te makꞌ ya spukbeyik skꞌoplale. 17Jich a yal skuenta yuꞌun jich ya xkꞌot ta pasel te tut la yalbe jilel skꞌoplal te namey jꞌalwanej yuꞌun Dios te jꞌIsaias sbiile te jich a yale:
18“Teꞌ ay te kabat te tꞌujbil kuꞌune. Jaꞌ te kꞌux ya kaꞌi ta koꞌtan sok ben jun koꞌtan yuꞌun. Ya me kaꞌbe ta yoꞌtan te Espíritu kuꞌune. Jich me ya spuk ta alel ta stojol spisil nasionetik te tutꞌil toj ta pasele. 19Ma ba xꞌawun, makꞌ me stoy skꞌop, ma me xyakꞌ ta aꞌiyel sluwar skꞌop ta kayaetik. 20Makꞌ slajin skꞌasel te jalal te kꞌasbilixe. Sok ma slajin stupꞌel te xmechail kꞌakꞌ te kꞌun nax yipal ta tilele. Max laj yoꞌtan jaꞌ to teme la yakꞌix ta pasel te tut toj ta pasele, 21jaꞌ to teme yipinej yoꞌtanik spisil te nasionetike ta skuenta te abat kuꞌune”, xchi te Diose —xchi te jꞌIsaiase.
Ya yalik te Jesuse yichꞌojbe spoder te pukuje
22Ay a yikꞌik bael ta stojol Jesus jtul winik te ay pukuj ta yoꞌtane. Ma xlokꞌ skꞌop y chokuben yuꞌun. Te Jesuse la slekutes. Jicha kꞌopoj te winike sok la yil kꞌinal. 23Spisil te genteetike cham a yaꞌiyik. Jich a lijk yalik:
—¿Me jaꞌ wan te stsꞌumbal jDavid te ya jmalitike? —xchiik.
24Te kꞌalal la yaꞌiybeyik sluwaril te fariseoetike, jich a yalik yuꞌun:
—Te winik to jaꞌ ay ta skuenta Beelzebu te mero statal-pukuj. Jicha ya slokꞌes te pukujetike —xchiik.
25Te Jesuse la snaꞌ te tut ya yal ta yoꞌtanike. Jich a yaltalanbe:
—Te machꞌatik jtul nax rey ay yuꞌunike, teme ya xat sbaike sok teme ya slijk skontrain sbaike, te me ya sjim sbaik ta spisilik a. Jaꞌ jich euk te machꞌatik jun nax jtejklum ayike, o te machꞌatik jun nax na ayike, teme ya xat sbaike, ma xjalajik ta balmilal yuꞌun. 26Jaꞌ jich euk, ¿me ya wan xjuꞌ ya slokꞌes sba stukel te pukuje? Teme jich ya spase, stukel nax ya skontrain sba abi. ¿Tutꞌil kꞌan jalajuk ta aꞌtel teme jiche? 27Te jaꞌexe ya awalik ta skuenta Beelzebu te ya jlokꞌes pukujetike. Teme jich te tut ya awalike, ¿machꞌa ta skuenta te ya slokꞌes pukujetik te jnopojeletik awuꞌunike? Teꞌ chikan a te ma jichuk te tut ya awalike. 28Pero te joꞌone ya jlokꞌes pukujetik ta skuenta te Espíritu yuꞌun te Diose. Teꞌ chikanix ta ilel ta jamal a te lijkix ta mantal ta awolilik te Diose.
29“Jich teme ay machꞌa yoꞌtanuk ya skꞌan yochintaybe sna te kꞌakꞌal winike teme ya skꞌan yichꞌbe bael te tut ay yuꞌune, jaꞌ nail ya xchukbe te yok-skꞌabe. Jich me ya xjuꞌ ya yelkꞌan bael te stutik yuꞌune.
30“Te machꞌa ma junuk yoꞌtan kuꞌune, yuꞌun nanix skontraon abi. Te machꞌa makꞌ sjoyinon ta tsobawe, ja jimaw abi.
31“Jaꞌ yuꞌun ya kalbeyex te ya xjuꞌ ya spasbot perdon yuꞌun spisil smulik te ya spas te genteetike sok spisil stoyba-kꞌopik te ya xlokꞌ ta stiꞌike. Yan teme ya stoyba-kꞌoptayik te Chꞌul Espiritue, ma xjuꞌ ya spasbot perdon yuꞌun stukel. 32Teme ay machꞌa ya skontra-kꞌoptay te Nichꞌanile, ya xjuꞌ ya spasbot perdon yuꞌun. Yan te machꞌa ya skontra-kꞌoptay te Chꞌul Espiritue ma xjuꞌ ya spasbot perdon yuꞌun stukel te jayeb kꞌaal kuxul liꞌ ba balmilale ni jaꞌuk ta patil ni ta sbajtel kꞌinal.
Te teꞌe ya xnaꞌbot sba a ta skuenta te site
33“Chapaik lek te teꞌe, jich me lek te sit ya yakꞌ. Yan teme ma chapbiluk leke, ma tsaꞌamuk sit ya yakꞌ. Jich te teꞌe ya anaꞌbeytik sba ta skuenta te site. 34Te jaꞌexe pajalex sok stsꞌumbal tiꞌawal chanetik. ¿Tutꞌil kꞌan lekuk te akꞌopike te ma tsaꞌamuk te awoꞌtanike? Te tut nojel ta koꞌtantike ya xchiknaj ta jkꞌoptik. 35Te machꞌa lek te yoꞌtane lek te tut ya yal lokꞌel ta stiꞌe. Yan te machꞌa ma tsaꞌamuk te yoꞌtane ma lekuk te tut ya yal lokꞌel ta stiꞌe. 36Sok ya kalbeyex awaꞌiyik, spisil ta jpꞌal kꞌop te ma xtuun te yaloj ta stiꞌ te genteetike ya me xjojkꞌobot te tut ora ya sta yorail yuꞌun Dios te ya xꞌilbot yaꞌtelike. 37Jaꞌ chikan te tuti awalojik ta juju-tul ta balmilale teme ya xjilex ta libre yuꞌun, o teme ya xbaex ta kastigo yuꞌune —xchi te Jesuse.
Te gente la skꞌan yilbeyik seña spoder te Jesuse
38Ay fariseoetik sok maestroetik yuꞌun te mantaliletike la yalbeyik te Jesuse:
—Maestro ya jkꞌantik te yauk awaꞌbotik kiltik seña milagro —xchiik.
39La sjakꞌ te Jesuse:
—Te genteetik to ma tsaꞌamuk yoꞌtanik sok ma junuk yoꞌtanik ta stojol Dios. Jaꞌ nax ya skꞌan yilik seña milagro. Pero ma xꞌaꞌbot yilik. Jaꞌ seña ta stojolik kꞌoem te Jonas te antibo jꞌalwanej yuꞌun te Diose. 40Jich te Jonase anin ta xchꞌujt mukꞌul chay oxeꞌ kꞌaal sok oxeꞌ ajkꞌubal. Jaꞌ jich euk te Nichꞌanile ya me xmujk oxeꞌ kꞌaal sok oxeꞌ ajkꞌubal.
41“Te kꞌalal ya sta yorail ya xꞌilbot yaꞌtelik te genteetik te kuxulik te ora to, teꞌ me ayik euk te jniniveetike. Jaꞌ me ya yalbeyik smulik kꞌoem, yuꞌun te jniniveetike la sujtes yoꞌtanik yuꞌun smulik te kꞌalal albot yaꞌiyik skꞌop Dios yuꞌun te Jonase. 42Sok teꞌ me ay euk te ants te ay ta reyil ta nasion ta stojil sur. Jaꞌ me ya yalbe smulik kꞌoem euk te machꞌatik kuxulik ta balmilal te ora to. Porke lom jakal a tal te antse yuꞌun tal yaꞌi bael tut ay spꞌijil te Salomone. Te machꞌa liꞌ ay te ora to jaꞌ mas mukꞌ ay yuꞌun te Salomone.
Te pukuje ya xchaꞌoch xan te ba lokꞌ tale
43“Kꞌalal ya xlokꞌ ta yoꞌtan gente te pukuje, ya xbeen ta takin kꞌinal yuꞌun ya sle ba ya xkux yoꞌtan. Teme maꞌ stae, ya snop ta yoꞌtan: 44“Ya sujton bael ta jna te ba lokꞌon tale”, xchi. Te kꞌalal sujt bael teꞌae, jochol ya xkꞌo stabey te yoꞌtan te gentee, jich tutꞌil na te lek mesbil sok lek chapbile. 45Jich ya xba sle xan tal jukeb xan sjoy te kꞌax ma tsaꞌamuk yaꞌtelik. Spisilik ya xꞌoch snaimbey yoꞌtan te gentee. Kꞌax ma tsaꞌamuk ya sujt te gentee tutꞌil te nail toe. Jich me ya xkꞌot te genteetik te kuxulik ta balmilal te ora to te ma tsaꞌamuk yoꞌtanike —xchi te Jesuse.
Te smeꞌ sok yijtsꞌinab te Jesuse
46Te Jesuse yipal to ta kꞌop ta stojol a te bayal genteetike te tal te smeꞌe sok te yijtsꞌinabe. Tekꞌatik jul ta amakꞌ, ya skꞌan ya skꞌoponik te Jesuse. 47Ay machꞌa ba yalbe te Jesuse:
—Te ameꞌ sok te awijtsꞌinabe tekꞌatik ta amakꞌ. Ya skꞌan skꞌoponat —xchi.
48Te Jesuse la yalbe te machꞌa ba yale:
—¿Machꞌa a te jmeꞌe sok te kijtsꞌinab ya awale? —xchi. 49Jich a yakꞌ ta ilel ta skꞌab te jnopojeletik yuꞌune sok la yal:
—Jaꞌ to jaꞌ jmeꞌ sok jaꞌ kitsꞌinab ta spisilik. 50Porke machꞌauk a te ya spas te tut ya skꞌan yoꞌtan te jTat te ay ta chꞌulchane, jaꞌ kitsꞌinab sok jaꞌ jmeꞌ kꞌoem —xchi te Jesuse.
Atualmente selecionado:
MATEO 12: AMANNT
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Nuevo Testamento Tzeltal de Amatenango © Sociedad Bíblica de México, 2006.