MATEO 14
14
Tutꞌil a cham te Juan Akꞌichꞌjaꞌe
1Jich mismo tiempo a te Herodese te gobierno yuꞌun Galilea la yaꞌibe sluwaril skꞌoplal te Jesuse, 2sok jicha lijk yalbe yaꞌiyik te jꞌaꞌteletik yuꞌune:
—Jaꞌ me te Juan Akꞌichꞌjaꞌe, te chaꞌkuxemix tal te ba animaetike. Jaꞌ sluwaril te ay spoder ta spasel te milagroetike —xchi.
3Jich a yal, yuꞌun ayix kꞌaal te la stikon ta tsakel te Juane sok la yakꞌ ta chukel te prexo ta skaj te xHerodias, te yinam Felipe te jaꞌ yijtsꞌine. 4Yuꞌun te Juane la yalbe te Herodese:
—Ma lekuk te awinaminej te antse —xyut.
5Jich te Herodese yoꞌtanuk kꞌan smil te Juane, pero ya xiꞌ yuꞌun te genteetike, yuꞌun te genteetike yakꞌojik ta jkuenta te Juane, yuꞌun xchꞌuunejik te jaꞌ jꞌalwanej yuꞌun te Diose. 6Te kꞌalal la sta skꞌaalel te lokꞌ ta jaꞌbil te Herodese, la spas kꞌin. Te yantsil-al te xHerodiase tal ajkꞌotajuk ta sit te machꞌatik majanlanbil yuꞌune. Te Herodese bayal a skꞌupin te tutꞌil a ajkꞌotaj te achꞌixe. 7Jich a yalbe:
—Jamal ya kalbeyat ta stojol Dios, ya kaꞌbeyat chikan te tut ya akꞌanbone —xchi.
8Te achꞌixe jich albilix yuꞌun a te smeꞌe te jaꞌ ya skꞌanbey ta plato te sjol te Juan Akꞌ-ichꞌjaꞌe. 9Te Herodese lom triste kꞌajtaj yuꞌun. Pero komo yalojix ta jamal ta stojol Dios ta sit te smajanabe, la yal mantal te ya xꞌaꞌbot te tut ya skꞌane. 10La stikon mantal ta prexo te ya xbojbot ta lokꞌel sjol te Juane.
11La yakꞌik tal ta plato te sjole, sok la yaꞌbeyik ta skꞌab te achꞌixe. Te achꞌixe ba yaꞌbe ta skꞌab te smeꞌe.
12Te jnopojeletik yuꞌun te Juane tal yichꞌbeyik bael te stiꞌbalule. Ba smukik jilel. Patil ba yalbeyik yaꞌiy te Jesuse.
Te Jesuse la smakꞌlin joꞌmil ta jtul
13Te kꞌalal la yaꞌiybe sluwar te Jesuse te tuti kꞌotix ta pasele, och ta barko. Stukel nax a bajt ta jun luwar te jochole. Te genteetike, kꞌalal la snaꞌbeyik sluwaril, lokꞌik tal ta spꞌejel te jtejklumetike, sok beenik bael ta yokik te ba bajt te Jesuse. 14Te kꞌalal ko ta barko te Jesuse la yil te bayal genteetik teꞌa. La snaꞌbey yoꞌolil sbaik. Jich a slekutes te jchameletik te yikꞌolanik kꞌale.
15Te kꞌalal ya xꞌijkꞌubix a te kꞌinale, te jnopojeletik yuꞌun te Jesuse tal skꞌoponik. Jich a yalik:
—Mal kꞌaalix. Maꞌyuk machꞌa ay sna liꞌto. Tikonaix bael te genteetike, yuꞌun ya xba sman tut ya sweꞌik lum ba chꞌin kolonyaetike —xchiik.
16La sjakꞌ te Jesuse:
—Ma puersauk ya xlaj bajt. Aꞌbeya sweꞌel atukelik —xchi.
17La yalik:
—Maꞌyuk weꞌelil kichꞌojtik. Jaꞌ nax joꞌpejch waj sok chaꞌkojt chay —xchiik.
18La yal te Jesuse:
—Ichꞌbikon tal abi —xyut. 19Y la yaltalanbe te genteetike te ya snajkꞌan sbaik ta stenlejaltike. La stsak ta skꞌab te joꞌpejch waje sok te chaꞌkojt chaye, la skꞌelu moel te chꞌulchane, la yalbe kola yal Dios yuꞌun y la xeꞌtalan te waje. La yaꞌbe ta skꞌab te jnopojeletik yuꞌune y ba spuktalanbe te genteetike. 20Spisil a weꞌik asta noj te xchꞌujtike, y ay to xan a jil lajchayeb moch te sobrae. 21Te machꞌatik weꞌike ay wan joꞌmil ta jtul winketik. Ma ajtabiluk te antstike sok te untike.
Te Jesuse been ta baba mar
22Te kꞌalal laj yoꞌtanike, te Jesuse la stikonlan moel ta barko te jnopojeletik yuꞌune, yuꞌun ya xlaj nalaj kꞌaxel te ba mare. Te Jesuse jil to ta skꞌoponel te genteetike. 23Te kꞌalal lajix yoꞌtan ta skꞌoponel a te genteetike, mo bael ta wits, ba skꞌopon Dios ta stukel nax. Kꞌalal och te ajkꞌubale, stukel wolol te ba wits te Jesuse. 24Yan te barkoe ayix kꞌal ta ol mar a. Ben wokol ay kꞌael yuꞌun yukꞌilanel yuꞌun jaꞌ te barkoe, yuꞌun tulan ya xtenot sujtel yuꞌun te ikꞌe.
25Te kꞌalal nopol sakubix a te kꞌinale, te Jesuse tijilaj bael te ba ayike, yipal kꞌal ta beel ta baba jaꞌ. 26Kꞌalal la yilik te jnopojeletik te yipal ta beel ta baba jaꞌe, xchiik yuꞌun. Xꞌawlajan yuꞌun te xiꞌele, yuꞌun la skuyik ta chꞌulelal. 27Te Jesuse la skꞌoponlan ta ora:
—Ayuk spuersa awoꞌtanik. Joꞌon ya awile, ma xiꞌanik —xchi.
28La yal te jPedroe:
—Kajwal, teme jaꞌate, ala mantal te ya xbeenon tal ta baba jaꞌ te ba ayate —xchi.
29—Laꞌ —xchi te Jesuse.
Jich a ko bael ta barko te jPedroe, lijk bael ta beel ta baba mar stojliyej bael te Jesuse. 30Pero la yil te ben tulan te ikꞌe, tal xiꞌel ta yoꞌtan yuꞌun. Lijk mulek koel ta jaꞌ. Lijk awunuk:
—¡Tsakaon Kajwal! —xchi.
31Te Jesuse tsꞌin a stsakbe skꞌab ta ora, jicha yalbe:
—Maꞌyuk lek xchꞌuunel awoꞌtan ya kil. ¿Tuꞌun te ya xꞌaꞌabiyan awoꞌtane? —xchi.
32Kꞌalal moik bael ta barkoe, kom te ikꞌe. 33Jich te machꞌatik ayik ta barkoe la skejan sbaik ta sit te Jesuse. Jich a yalik:
—Yuꞌun nanix jaꞌat a te Xnichꞌanat te Diose —xchiik.
Te Jesuse la slekutes jchameletik ta Genesaret
34Te kꞌalal kꞌaxikix bael ta jaꞌ ae, lokꞌik kꞌoel ta slum Genesaret. 35Te machꞌatik teꞌeyik ae la snaꞌbeyik sba te jaꞌ te Jesuse. Jicha pujk bael ta alel ta spisil jtejklumetike, sok la yikꞌik tal ta stojol spisil te yaj-chamelike. 36La skꞌanbeyik pawor te jipuk nax ya spikbeyik a te stiꞌil te skꞌuꞌ-spakꞌe. Spisil te machꞌatik la spikbeyik te stiꞌil skꞌuꞌ-spakꞌe kolik ta chamel.
Atualmente selecionado:
MATEO 14: AMANNT
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Nuevo Testamento Tzeltal de Amatenango © Sociedad Bíblica de México, 2006.