Chɛ̄nɛ̍se̍ē 7
7
Mɛ̄lɛ̄ka̍ tɛ̄ɛ̄mbu̍u̍ chi̍e̍ēŋndo̍ a̍ mɛ̄ŋmā hūna᷄ŋ
1Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Nu̍u̍wā āā, “Lu̍ɛ̍i̍ o̍ dɛ̄ndɔ̄ɔ̍ ni᷄ŋ nya̍ yu̍ŋgu̍ nu̍mndo̍ fa̍ū. Kāni̍ fu̍u̍le̍, wāŋnda̍ o̍ chi̍e̍ēŋndo̍ ni᷄ŋ fa̍ū, mɛ̄ɛ̍ nūm mi̍ Sa̍a̍lu᷄ŋ wa̍nā sa̍kpō nda̍ tɛ̄ɛ̄ŋ. 2Chu̍a̍ vīsīa̍a̍ cho̍ ā dīāndāā ya̍ o̍ hɔ̄l la̍ ki̍nɛ̍i̍, su̍u̍ o̍ su̍u̍ ku̍ndāla̍ŋ sālā ŋɔ᷄mmɛ̍ū, ō pīāāndōo̍ a̍ ō lāāndōo̍. Ndu̍yɛ̍, mā chu̍a̍ vīsīa̍a̍ cho̍ vi̍sīāā dīāndāā ya̍ o̍ hɔ̄l te̍ wa̍, su̍u̍ o̍ su̍u̍ ā ŋīɔ̍ɔ̍ŋ ŋi̍ɔ̍ɔ̍ŋ, ō pīāāndōo̍ a̍ ō lāāndōo̍. 3O̍ ko̍ŋ kɔ̍ɔ̍lī, mā chu̍a̍ yōūwa̍ su̍u̍ o̍ su̍u̍ ku̍ndāla̍ŋ lā ŋɔ᷄mmɛ̍ū, ō pīāāndōo̍ a̍ ō lāāndōo̍. O̍ ko̍ŋ, mā lo̍ nyāā yōōmāā yɛ̍ yi̍a̍a̍ ha̍ā māndā le̍ mā hu᷅ŋ wa᷅ yɛ̄i̍ye̍ o̍ chi̍e̍ēŋndo̍ chōo̍ kpo̍u̍. 4I̍ cho̍ pīɔ̍ɔ̍ tūsī o̍ chi̍e̍ēŋndo̍ chōo̍ o̍ pālɛ̍i̍ ī ŋɔ᷄mmɛ̍ū bɛ̄ŋgu̍. Pīɔ̍ɔ̍ chō sīā le̍ pālɛ̍i̍ be̍le̍-hi̍ɔ̍ɔ̍lu̍ a̍ nyūmnda̍ŋ be̍le̍-hi̍ɔ̍ɔ̍lu̍. Nyɛ̄ o̍ nyɛ̄ yōōmāā ya̍ I̍ to̍o̍si̍a̍a̍ I̍ cho̍ nda̍ dīū pa̍ku̍.” 5Mi̍ Nu̍u̍wā to̍sā nyɛ̄ o̍ nyɛ̄ fe̍e̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l ndu̍.
6Nu̍u̍wā wa̍ wɔ̄sīla̍ŋ kɛ̄mɔ̄ɔ̍ lē ŋɔ᷄mpu᷅m (600), mi̍ pīɔ̍ɔ̍ a̍ mɛ̄ŋnda̍ŋ mā kāndū hūnɔ̄ɔ̍ o̍ chi̍e̍ēŋndo̍ chōo̍. 7Mi̍ Nu̍u̍wā lu̍ɛ̍ī o̍ dɛ̄ndɔ̄ɔ̍ ni᷄ŋ nda̍ pūa̍a̍ ndūa̍a̍, a̍ la̍a̍ ndɔ̄, a̍ lāāndāā pūa̍a̍ ndūa̍a̍, le̍ mā chīnda̍, ā vi᷅ o̍ mɛ̄ŋmā hūnāāmā māŋ ni᷄ŋ te̍. 8O̍ ko̍ŋ kɔ̍ɔ̍lī, vīsīa̍a̍ cho̍ vīsīāā dīāndāa̍ Mɛ̄lɛ̄ka̍ o̍ hɔ̄l la̍ ni̍, a̍ vīsīa̍a̍ cho̍ vi̍sīāā dīāndāā le̍ wa̍, a̍ yōūwa̍, a̍ nyɛ̄ o̍ nyɛ̄ yōōmāā, 9nda̍ kpo̍u̍ ma̍ lūɛ̄ī o̍ dɛ̄ndɔ̄ɔ̍ ni᷄ŋ a̍ ŋi̍ɔ̍ɔ̍ŋ ŋi̍ɔ̍ɔ̍ŋ, ō pīāāndōo̍ a̍ ō lāāndōo̍, nda̍ Nu̍u̍wā wa̍ā, mɛ̄ɛ̍ Mɛ̄lɛ̄ka̍ dīmu̍l ndu̍ yɛ̍. 10O̍ ko̍ŋ kɔ̍ɔ̍lī, mɛ̄ɛ̍ pālɛ̍i̍ ī hīōū ī ŋɔ᷄mmɛ̍ū mi̍ pīɔ̍ɔ̍ kāndu̍ sīa̍a̍, mi̍ mɛ̄ŋnda̍ŋ mā kāndū hūnɔ̄ɔ̍.
11-16Mi̍ pīɔ̄ɔ̄ bɛ̄ndū bɛ̍ndōo̍ būlī o̍ ha̍la̍ bu᷅. Mi̍ mɛ̄ŋma̍ cho̍ o̍ lɛ̄ŋnde̍ŋ bɛ̄ŋgu̍ wa̍ŋ mā būlī bā o̍ bā o̍ chi̍e̍ēŋndo̍ chōo̍. Wɔ̄sī Nu̍u̍wā chi̍ŋa̍ wɔ̄sīla̍ŋ kɛ̄mɔ̄ɔ̍ lē ŋɔ᷄mpu᷅m ndo̍ (600), pāŋgi̍i̍ di̍i̍ŋ ndūɛ̍i̍ o̍ wɔ̄sī kōŋ ni᷄ŋ mālɔ̄ tɔ̍ a̍ lē ŋɔ᷄mmɛ̍ū, pāa̍le̍ le̍ŋ pīɔ̄ɔ̄ bɛ̄ndōo̍ ho̍ō ō kāndu̍ sīa̍a̍ ni̍, mi̍ mɛ̄ŋnda̍ŋ mā kāndū chi̍e̍ēŋndo̍ chūa̍a̍. Kɛ̍ pāa̍le̍ pīɔ̍ɔ̍ kāndu̍ le̍ŋ si̍a̍a̍ le̍ŋ, Nu̍u̍wā ni̍, a̍ pūa̍a̍ ndūa̍a̍, Si̍ɛ̄m a̍ Ha̍ām a̍ Cha̍fɛ̍tī, a̍ Nu̍u̍wā la̍a̍ ndɔ̄, a̍ lāāndāā ya̍a̍wa̍a̍ pūa̍a̍ ndūa̍a̍, nda̍ a̍a̍ lu̍ɛ̍i̍nu᷄ŋ ni᷄ŋ fɛ̍lɛ̍ŋ o̍ dɛ̄ndɔ̄ɔ̍ ni᷄ŋ. Nda̍ ni̍, a̍ vīsīāā yōndūa̍a̍ su̍u̍ o̍ su̍u̍, a̍ vīsīāā chi̍e̍e̍ ni̍ŋnda̍ su̍u̍ o̍ su̍u̍, nyɛ̄ o̍ nyɛ̄ yōōmu̍, a̍ su̍u̍la̍ŋ le̍nde̍ yɛ̍ yɛ̍. Yōūwa̍ ni̍, a̍ nyɛ̄ o̍ nyɛ̍ nɔ̍ kūmba᷅ŋnda̍ŋ, a̍ su̍u̍la̍ŋ le̍nde̍ yɛ̍ yɛ̍, nda̍ kpo̍u̍ nda̍ a̍a̍ lu̍ɛ̍i̍nu᷄ŋ ni᷄ŋ o̍ dɛ̄ndɔ̄ɔ̍ ni᷄ŋ. Nyɛ̄ o̍ nyɛ̍ cho̍ nyɛ̄ yōōmāā, ma̍ hūŋ nāa̍ Nu̍u̍wā chu̍a̍ ā ŋīɔ̍ɔ̍ŋ ŋi̍ɔ̍ɔ̍ŋ, ma̍ lūɛ̄ī o̍ dɛ̄ndɔ̄ɔ̍ ni᷄ŋ. Mi̍ nyɛ̄ o̍ nyɛ̄ yōōmāā lūɛ̄ī le̍nde̍, ō pīāāndōo̍ a̍ ō lāāndōo̍, mɛ̄ɛ̍ Mɛ̄lɛ̄ka̍ dīmu̍l Nu̍u̍wā yɛ̍. Mɛ̄ɛ̍ nda̍ chīi̍ lūɛ̄īyɔ̄ɔ̄ mi̍ Mɛ̄lɛ̄ka̍ Ya̍a̍wɛ̄ɛ̄ o̍ ki̍ndā dīo̍o̍. Mi̍ pīɔ̍ɔ̍ sīā, mbo̍ sīā, mbo̍ lō sīa̍a̍ mbo̍ kūā pālɛ̍i̍ be̍le̍-hi̍ɔ̍ɔ̍lu̍ a̍ nyūmnda̍ŋ be̍le̍-hi̍ɔ̍ɔ̍lu̍.
17Mi̍ pīɔ̍ɔ̍ a̍ mɛ̄ŋnda̍ŋ mā hīāū lāchī a̍ hūnɔ̄ɔ̍ o̍ chi̍e̍ēŋndo̍ chōo̍ le̍ pālɛ̍i̍ be̍le̍-hi̍ɔ̍ɔ̍lu̍, mī mā hēl a̍ dɛ̄ndɔ̄ɔ̍, mī mā hēl. Mi̍ mā lō hēlɔ̄ɔ̍ ha̍a̍a̍ mi̍ dɛ̄ndɔ̄ɔ̍ hēl pɔ̍ pɔ̍ o̍ chi̍e̍ēŋndo̍ chōo̍. 18Mi̍ mɛ̄ŋnda̍ŋ mā hīāū lāchī a̍ hūnɔ̄ɔ̍ o̍ chi̍e̍ēŋndo̍ chōo̍, mi̍ dɛ̄ndɔ̄ɔ̍ hēl, mbo̍ hēl. 19Mi̍ mɛ̄ŋnda̍ŋ mā lō hūnɔ̄ɔ̍ mi̍ mā hēl, mi̍ mā mīāl pēmbūŋ vīlɛ̄ŋ ŋ̄ bɛ̄ndo᷄ŋ kpo̍u̍ o̍ chi̍e̍ēŋndo̍ chōo̍. 20Mi̍ mā lō hēlɔ̄ɔ̍ mi̍ mā mɛ̄ī pēmbo᷄ŋ lēbɛ̄ŋgu̍ le̍ nɛ̄īyo̍ bi̍di̍i̍ŋ a̍ lē dīi̍ŋ. 21Nyɛ̄ o̍ nyɛ̄ yōōmāa̍ wa̍ o̍ chi̍e̍ēŋndo̍ chōo̍, yōūwa̍ ni̍, a̍ vīsīāā chi̍e̍e̍ ni̍ŋnda̍, a̍ vīsīāā yōndūa̍a̍, a̍ wāŋndā chīe̍e̍ya̍ kpo̍u̍, ma̍ wū pa̍ku̍. Mɛ̄ɛ̍ a̍ wa̍ o̍ dɛ̄ndɔ̄ɔ̍ ni᷄ŋ la̍tu̍lu̍ a̍ Nu̍u̍wā wa̍ ma̍ lō. 22Nyɛ̄ o̍ nyɛ̄ yōōmāa̍ wa̍ o̍ lɛ̄ŋndē vēsɛ̍i̍le̍ŋ chōo̍, nda̍ kpo̍u̍ ma̍ wū. 23Nyɛ̄ o̍ nyɛ̄ yo̍o̍mu̍ fo̍kɛ̄ o̍ chi̍e̍ēŋndo̍ chōo̍, wāŋndā chīe̍e̍ya̍ ni̍, a̍ vīsīa̍a̍, a̍ nyɛ̄ o̍ nyɛ̄ yōōmāa̍ wa̍ o̍ chi̍e̍ēŋndo̍ chōo̍, a̍ yōūwa̍, mi̍ Mɛ̄lɛ̄ka̍ bāsū nda̍ o̍ chi̍e̍ēŋndo̍ chōo̍ mɛ̍ɛ̍u̍. A̍ lo̍ yōōmū wa̍, mɛ̄ɛ̍ a̍ wa̍ o̍ dɛ̄ndɔ̄ɔ̍ ni᷄ŋ a̍ Nu̍u̍wā la̍tu̍lu̍ wa̍. 24Mɛ̄ŋnda̍ŋ mā lo̍ o̍ chi̍e̍ēŋndo̍ chōo̍ ha̍a̍a̍, mɛ̄ɛ̍ mbo̍ kūā pālɛ̍i̍ kɛ̄mɛ̄ a̍ be̍le̍-ŋu̍ɛ̍ɛ̍nu̍ (150) ma̍lāŋ ma̍ ka̍ndū to̍lɔ̄ɔ̍.
Atualmente selecionado:
Chɛ̄nɛ̍se̍ē 7: YM
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Kisi Bible © Bible Society in Liberia, 2015.