Mateo 5
5
Yoku nɔ fiɛmi
1Benɛ Yesu na asafo ɔ, e kuɔ kɛ ya yoku ɔ nɔ, nɛ e ya hi si. E kaseli ɔmɛ ba e ngɔ, 2nɛ e bɔni mɛ ni tsɔɔmi ke:
Buajɔmi nitsɛ
(Luka 6.20-23)
3“A gbaa ninɛmɛ nɛ le kaa mumi mi ohiafohi ji mɛ ɔ:
se a nɔ ji hiɔwe matsɛ yemi ɔ nɛ.
4“A gbaa ninɛmɛ nɛ yeɔ kɔmɔ ɔ:
se Mawu maa jɔɔ a bua.
5“A gbaa ninɛmɛ nɛ he jɔ ɔ;
se a ma na nɔ nɛ Mawu wo si ɔ.
6“A gbaa ninɛmɛ nɛ a suɔmi nya ni ji kaa a pee
nɔ nɛ Mawu suɔ ɔ:
se Mawu ma ha a maa to kɛ bua jɔmi.
7“A gbaa ninɛmɛ nɛ naa ni kpahi mɔbɔ ɔ,
se Mawu maa na mɛ mɔbɔ.
8“A gbaa ninɛmɛ nɛ a tsui mi tsɔ ɔ;
se a maa na Mawu.
9“A gbaa ninɛmɛ nɛ kpataa a:
se a ma tsɛ mɛ Mawu bimɛ.
10“A gbaa ninɛmɛ nɛ a waa mɛ yi mi ejakaa a peɔ
Mawu suɔmi nya ni ɔ:
se a nɔ ji hiɔwe matsɛ yemi ɔ nɛ.
11“A gbaa nyɛ ke nihi jɛ nyɛ nɛ a wa nyɛ yi mi nɛ a ngɔ nya kɛ tu munyu yaya tsuaa munyu yaya ngɔ si nyɛ ejakaa ye kaseli ji nyɛ ɔ. 12Nyɛ nya nɛ nyɛ bua nɛ jɔ; ejakaa hiɔwo ngua ngɛ ha nyɛ ngɛ hiɔwe; ejakaa ja a wa gbali nɛ sɛ nyɛ hlami ɔ yi mi.”
Ngo kɛ la
(Marko 9.50; Luka 14.34-35)
13“Nyɛ ji ngo kɛ ha adesahi tsuo. Se ke ngo nya nyu gbo ɔ, mɛni a kɛ maa wo lɛ ngo ekohu? E he be senami hu, ja a tsɛ pue he nɛ nimli naa nɔ.
14“Nyɛ ji la ha je ɔ tsuo. Ma nɛ a bɔ ngɛ yoku nɔ ɔ, e be nyɛe maa laa. 15Jeha nɛ ɔ hu, nɔ ko su we kane kɛ mɛ́ sowe sisi: se mohu e kɛ maa kane tso nɔ, nɛ e tsoo haa nihi nɛ ngɛ we ɔ mi tsuo kulaa. 16Ja nɔuu nyɛ ha nyɛ la nɛ tso ngɛ nimli a hɛ mi konɛ a na nyɛ ni peemi ni kpakpa amɛ nɛ ɛ wo nyɛ tsɛ nɛ ngɛ hiɔwe ɔ hɛ mi nyami.
Mlaa he nitsɔɔmi
17“Nyɛ ko susu kaa imi Yesu i ba Mose mlaa aloo gbali ɔmɛ a tsɔɔmi ɔmɛ gumi; i bɛ mɛ gumi, se i ba nɛ ma ba gbe nya. 18Niinɛ, i ngɛ nyɛ dee ke: Be abɔ nɛ hiɔwe kɛ zugba ngɛ lolo nɛ ɔ ɔ, kpɔ kake loo ngu nyafii pe kulaa be mlaa a mi jee ja a gbe nihi tsuo kulaa nya. 19Lɔ ɔ he ɔ, nɔ tsuaa nɔ nɛ ma tɔ kita nɛ ɔmɛ a kpɛti nyafii kake nɔ, nɛ e maa tsɔɔ ni kpahi ke a pee ja a, e maa pee nyafii pe kulaa ngɛ hiɔwe matsɛ yemi ɔ mi; se nɔ tsuaa nɔ nɛ yeɔ mlaa a nɔ nɛ e tsɔɔ ni kpahi hu ke a pee ja a, e maa pee nɔ ngua ngɛ hiɔwe matsɛ yemi ɔ mi. 20I ngɛ nyɛ dee ke: Ke nyɛ dami ɔ pa we mlaa tsɔɔli ɔmɛ kɛ Farisifo ɔmɛ a nɔ ɔ, nyɛ be hiɔwe matsɛ yemi ɔ mi sɛe kulaa.”
Mukliimifumi he nitsɔɔmi
21“Tse nyɛ nu kaa a de blematsɛmɛ ɔmɛ ke: ‘koo gbe nɔmlɔ, se nɔ tsuaa nɔ nɛ maa gbe nɔmlɔ ɔ, a kɛ lɛ maa ba kojolɔ ɔ hɛ mi.’ 22Se i ngɛ nyɛ dee ke: nɔ tsuaa nɔ nɛ muklii mi fuɔ e nyɛmi (yaka a), a kɛ lɛ maa ba kojolɔ ɔ hɛ mi; nɛ nɔ tsuaa nɔ nɛ deɔ e nyɛmi ke: ‘Yaka nɔmlɔ’ ɔ, a kɛ lɛ maa ba gua ngua a hɛ mi; nɛ nɔ tsuaa nɔ nɛ tsɛɛ e nyɛmi ke kuasia nɛ he be senami ɔ, e maa ye abosiami a je la a mi yami fɔ? 23Lɔ ɔ he ɔ ke o kɛ o nike ni ma Mawu hami ngɛ bɔ sami latɛ ɔ hɛ mi, nɛ o kai ngɛ lejɛ ɔ kaa o nyɛmi kɛ mo kpɛti ngɛ sane ko ɔ, 24si o nike ni ɔ ngɛ lejɛ ɔ ngɛ bɔ sami latɛ ɔ hɛ mi, nɛ o ya nɔuu nɛ o kɛ o nyɛmi ɔ ya kpata lolo, konɛ o kpale ba nɛ o kɛ o nike ni ɔ ba ha Mawu.
25“O kɛ o pɛbilɔ ɔ nɛ tsa mla benɛ nyɛ ngɛ blɔ ɔ nɔ kɛ yaa a, ke pi ja a, nyɛ lejɛ ɔ sumi nɔuu ɔ e maa ngɔ mo ngɔ ha kojolɔ ɔ, nɛ lɛ hu e maa ngɔ mo ngɔ ha tsɔlɔ ɔ, nɛ a maa wo mo tsu mi. 26Niinɛ, i ngɛ mo dee ke: O be lejɛ ɔ jee kɛ yaa si o maa wo nyagbe pɛsɛwa a.”
Gbapuɛmi he nitsɔɔmi
27“Tse nyɛ nu kaa a de blematsɛmɛ ɔmɛ ke: ‘Ko puɛ gba!’ 28Se i ngɛ nyɛ e nɔ dee: Nɔ tsuaa nɔ nɛ hyɛɛ yo nɛ e he peɔ lɛ akɔnɔ ɔ, e yeɔ fɔ ejakaa e kɛ lɛ puɛ gba momo ngɛ e tsui mi. 29Ke o hiɛ ɔ nɔ hɛngmɛ haa o peɔ yayami ɔ, hia nɛ o sake ngɔ fɔ he; ejakaa e hi ha mo kaa o nɔmlɔ tso ɔ he nɔ́ ko laa pe nɔ nɛ a ma sake o nɔmlɔ tso mluku ɔ tsuo ngɔ fɔ abosiami a je la a mi. 30Nɛ ke o hiɛ ɔ nine haa o peɔ yayami ɔ, poo, nɛ o sake ngɔ fɔ he; ejakaa e hi ma mo kaa o laa o nine kake pe nɔ́ nɛ a maa ngɔ o nɔmlɔ tso mluku ɔ tsuo ngɔ wo abosiami a je la a mi.”
Gbamipomi he nitsɔɔmi
(Mateo 19.9; Marko 10.11-12; Luka 16.18)
31“A de hulɔ ke: ‘Nɔ tsuaa nɔ nɛ fieɔ e yo ɔ, sa nɛ e ha lɛ hemi womi.’ 32Se imi lɛɛ, i ngɛ nyɛ dee ke: Nɔ tsuaa nɔ nɛ fieɔ e yo nɛ pi ajuama bɔmi he ʼi ɔ, lɛɛ e yeɔ fɔ kaa e haa yo ɔ bɔɔ ajuama ke e ya gba ekohu; nɛ nyumu nɛ ya ngɔɔ lɛ ɔ hu puɛɔ gba.”
Kitakami he nitsɔɔmi
33“Tse nyɛ nu hulɔ kaa a de blematsɛmɛ ɔmɛ ke: ‘Ko ka kita gu, se mohu ye o kita amɛ a nɔ ha Nyɔmtsɛ ɔ.’ 34Se imi lɛɛ i ngɛ nyɛ dee ke: Nyɛ ko ka kita kulaa! Nyɛ ko ka hiɔwe, ejakaa Mawu matsɛ sɛ ʼi, 35loo zugba, ejakaa Mawu nane si sɛ ʼi, loo Yerusalem, ejakaa e ji matsɛ ngua a ma. 36Ko ka o yi tete, ejakaa o be nyɛe yi bwɔmi kake, ehiɔ loo eyumu, maa pee. 37Ke nyɛ ke: ‘Ee’ ɔ, e pee: ‘Ee;’ nɛ ke nyɛ ke: ‘Dɛbi’ ɔ, e pee: ‘Dɛbi’; nɔ́ kpa ko nɛ pe enɛ ɔ ɔ, je abosiami dɛ mi.”
Peemi kɛ nanemitomi he nitsɔɔmi
(Luka 6.29-30)
38“Tse nyɛ nu nɛ a de ke: ‘Hɛngmɛ ngɛ hɛngmɛ nane mi,’ (kɛ) ‘lungu ngɛ lungu nane mi.’ 39Se imi lɛɛ i ngɛ nyɛ dee ke: Nɔ nɛ maa pee nyɛ yayami ɔ, nyɛ ko pee lɛ ngɔ to nane mi; se ke nɔ ko gba o hiɛ ɔ nɔ tue mi ɔ, plɛ kake ɔ hu ha lɛ. 40Nɛ ke nɔ ko ngɔ mo kɛ ya kojomi he nɛ e ya sama mo ngɛ o gugue tade he ɔ, ha nɛ e ngɔ o hiɔwe tade ɔ hulɔ. 41Nɛ ke nɔ ko nyɛ o nɔ ke o kɛ lɛ nɛ ya si tomi nya kake ɔ, o kɛ lɛ nɛ ya enyɔ. 42Ha nɔ nɛ ngɛ mo nɔ́ bae ɔ, nɛ nɔ nɛ ngɛ hlae nɛ o pa lɛ nɔ́ ko ɔ, koo nyɛ lɛ he.”
Henyɛli a suɔmi
(Luka 6.27-28; 6.32-36)
43“Tse nyɛ nu nɛ a de ke: ‘Suɔ o huɛ nɛ o nyɛ o henyɛlɔ.’ 44Se imi lɛɛ, i ngɛ nyɛ dee ke: Nyɛɛ suɔ nyɛ henyɛli, nyɛɛ sɔle ha nihi nɛ waa nyɛ yi mi ɔ, 45enɛ ɔ ma ha nyɛ ma plɛ nyɛ tsɛ nɛ ngɛ hiɔwe ɔ bimɛ, ejakaa e haa e pu jee ngɛ nimli yayamihi kɛ nimli kpakpahi a nɔ, nɛ e haa hiɔmi nɛɛ haa dali kɛ yayami peeli. 46Se ke nyɛ suɔ ninɛmɛ nɛ suɔ nyɛ ɔ, mɛni hiɔwo nyɛ ngɛ? Anɛ to tsuli ɔmɛ tete pee we ja nɔuu lo? 47Nɛ ke nyɛ ngaa nyɛ nyɛmimɛ kɛkɛ ɔ, anɛ nyɛ pee nɔ́ ko tsɔ pe bɔ nɛ sa peemi lo? Anɛ wɔ jali ɔmɛ tete pee we ja nɔuu lo? 48Lɔ ɔ he ɔ nyɛɛ hi kɛ pi si, kaa bɔ nɛ nyɛ tsɛ nɛ ngɛ hiɔwe ɔ hu hi kɛ pi si ɔ.”
Atualmente selecionado:
Mateo 5: DAN77
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Dangme New Testament © United Bible Societies, 1977.