Lucas 19
19
Jesusqa Zaqueoj wasinman rin
1Jesusqa Jericó llajtaman yaykuspa, llajta ukhunta pasasharqa. 2Chaypitaj uj qhapaj runa Zaqueo tiyakorqa. Payqa impuestota cobrajkunaj kurajninku karqa. 3Jinapi payqa Jesusta rejsiyta munarqa. Chaywanpis ashkha runakuna kasqankurayku mana rikuyta aterqachu, imaraykuchus Zaqueo moqo runalla karqa. 4Chayrayku usqhayta ñawparispa, sicómoro sach'aman wicharerqa, chaymanta rikuyta atinanpaj, imaraykuchus Jesús chayninta rinan karqa.
5Chantá chaynejta purishaspa, Jesusqa Zaqueota qhawariytawan nerqa: Zaqueo, usqhayta urayk'amuy. Kunan wasiykipi qhepakusaj, nispa. 6Jinapi usqhayta urayk'amuytawan, Zaqueoqa may kusisqa Jesusta wasinman pusaykorqa. 7Chaywanpis chayta rikuspa, tukuy runakuna thutuyta qallarerqanku: Kay runaqa juchasapaj wasinman yaykun, nispa.
8Chantá Zaqueo sayarispa, Jesusta nerqa: Tukuyta Kamachej Jesús, tukuy kapuwasqanpa khuskanninta wajchakunaman qosaj. Sichus pimantapis ch'awkiyaspa imatapis suwarqani chayqa, tawa jinatawan kutichipusaj, nispa.
9Jesustaj kuticherqa: Kunan p'unchay Zaqueopaj, wasi ayllunpaj ima qhespichina chayamun, imaraykuchus Zaqueoqa cheqapuni Abrahampa wawan kasqanmanta yachayta qon. 10Runaj Churenqa jamun, chinkasqa kajta mask'aspa, qhespichinanpaj, nispa.
Qolqemanta rijch'anachina
(Mt 25.14-30)
11Chay imakunata runakuna uyarishajtinku, Jesusqa uj rijch'anachinatawan nerqa. Jerusalén llajta qayllapiña Jesús kasqanrayku, paykuna yuyasharqanku Diosqa chaypacha kamachiyta qallarinanta. 12Chayrayku pay nerqa: Uj uyarisqa runa karu llajtaman risqa, kuraj kamachej churasqa kananpaj, chaymantataj kutimuspa, kamachiyta qallarinanpaj. 13Manaraj rishaspa, chay runa chunka kamachinkunata wajyasqa, sapa ujmantaj qolqeta jaywarisqa: Kutimunaykama kay qolqetaqa mirachiychej, nispa. 14Llajta masinkunatajrí payta chejnej kasqanku. Chayrayku, kachakunata qhepanta kachasqanku, ninankupaj: Mana munaykuchu chay runa kuraj kamachejniyku kananpaj, nispa.
15Chay runa kuraj kamachejña churasqa kaspa, llajtanman kutimpusqa. Chantá chay kamachinkunata wajyachisqa, tapunanpaj sapa uj chay qolqe jaywasqanwan mashkhatachus mirachisqanta. 16Ñawpaj kaj kamachi jamuspa, nisqa: Wiraqochi, qolqe jaywawasqaykitaqa chunka jinatawanraj mirachini, nispa. 17Kuraj kamachejtaj kutichisqa: Walejpacha, sumaj kamachi kanki. Chay pisillawan allinta ruwasqaykirayku, kunanmantapacha chunka llajtakunata kamachinki, nispa.
18Chantá qhepan kaj kamachiñataj jamuspa, nisqa: Wiraqochi, qolqe jaywawasqaykitaqa phishqa jinatawan mirachini, nispa. 19Kuraj kamachejtaj kutichisqa: Qanpis phishqa llajtakunata kamachillankitaj, nispa.
20Chantá chay ujninñataj jamuspa, nisqa: Wiraqochi, q'epichanapi wataspa, qolqeykitaqa jallch'aykorqani. Kayqa, jap'ikapullay ari. 21Rumi sonqo kasqaykirayku noqa manchachikorqayki. Qanqa mana qanpata kajta jap'ikapunki, mana tarpusqaykimantataj oqharillanki, nispa.
22Chantá kuraj kamachej nisqa: Qanqa mana allin kamachi kanki, jinataj nisqaykiwan qanllataj juchachakushanki. Sichus yacharqanki rumi sonqo kasqayta, mana noqaj kajta jap'ikapusqayta, mana tarpusqay kajta oqharisqayta ima chayqa, 23imaraykutaj chay jaywasusqay qolqeta mana bancoman churaykapuwarqankichuri? Ajinata kutimuspa, noqa qolqeyta interesnintawan orqhokapuyman karqa, nispa.
24Chantá kuraj kamachej chaypi kajkunaman nillasqataj: Paymanta chay qolqeta qhechuspa, pichus chunkatawan mirachejman jaywaychej, nispa. 25Paykunatajrí kutichisqanku: Wiraqochi, payqa chunka qolqetaña jap'ishan, nispa. 26Kuraj kamachejrí kutichisqa: Noqa niykichej: Kapuyniyojmanqa aswan ashkha qosqa kanqa, mana imayojmantatajrí, pisilla kapusqanpis qhechusqa kanqa. 27Jinallatataj, jaqay awqaykuna, pikunachus mana kuraj kamachej kanayta munarqankuchu, chaykunata kayman apamuspa, ñawpaqeypi wañurachiychej, nispa. Ajinata Jesús chay rijch'anachinata nerqa.
Jesús Jerusalenman yaykun
(Mt 21.1-11; Mc 11.1-11; Jn 12.12-19)
28Chayta niytawan, Jesusqa tukuypa ñawpaqenta purirerqa Jerusalenman rinanpaj. 29Chantá Olivos orqoj chimpanpi, Betfagué llajtaman, Betaniaman ima qayllashaspa, iskay yachachisqanta kacharqa: 30Qankuna jaqay chimpapi ranchoman rinkichej, chaypitaj uña burro watasqata tarinkichej, mayqenmanchus ni pi kunankama lloq'aykunrajchu, chayta. Chantá phaskaraspa, kayman aysamuychej. 31Sichus pipis tapusunkichej: Imaraykutaj phaskarashankichej? nispa, chayqa, qankuna kutichiychej: Wiraqochiyku Jesús kay burrota munan, nispa.
32Jinataj chay iskay yachachisqankuna rispa, Jesuspa nisqanman jina uña burrota tarerqanku. 33Burrota phaskarashajtinkutaj, dueñonkuna paykunata taporqanku: Imapajtaj chay burrota phaskashankichej? nispa.
34Paykunataj kuticherqanku: Wiraqochiyku Jesús kay burrota munan, nispa.
35Chantá chay yachachisqankunaqa burrota Jesusman aysamorqanku. Burroj wasanman qhatanankuwan caronaykuspataj, Jesusta lloq'aykucherqanku.
36Jesús burropi lloq'asqa chay ñanta rishajtin, chaypi tantasqa runakunaqa qhatananku p'achankuta mast'allarqankutaj, chayninta purinanpaj. 37Olivos orqoj kinrayman qayllaykushajtintaj, Jesusta tukuy qhatejkuna kusisqa qhaparispa, Diosta jatunchayta qallarerqanku, Jesuspa t'ukuna ruwasqata rikusqankumanta. 38Paykuna nerqanku:
Jatunchasqa kachun Diospa sutinpi jamoj kuraj kamachejqa.#Sal 118.26.
Janaj pachapi allin kawsay kachun,
jinallataj patapipis Dios jatunchasqa kachun, nispa.
39Chantá chay runakunawan khuska rej fariseokuna nerqanku: Yachachej Jesús, chayta nisqankurayku yachachisqaykikunata k'amiy ari, nispa.
40Jesustajrí kuticherqa: Sichus paykuna ch'inlla kankuman chayqa, rumikunañataj qhaparispa jatunchawankuman, nispa.
41Chantá Jerusalén llajta qayllaman chayaspa, Jesús llajtata rikuytawan, waqarikorqa. 42Paytaj nerqa: Mayta munayman kay p'unchayllapis reparanaykita qanpaj allinpi kawsakuy imachus kasqanta. Chaywanpis chayqa ñawiykimanta pakasqa kashan, manataj reparayta atinkichu. 43Jamoj p'unchaykunapirí awqaykikunaqa jallp'a moqokunata contraykipi oqharenqanku. Atipasunankupaj muyuykusonqanku, tukuynejmantataj ñit'iykamusonqanku. 44Chaymantataj paykuna thuñisonqanku, jinallataj qanpi tiyakojkunatapis wañurachillanqankutaj. Qanpi mana saqenqankuchu rumi patapi rumita, imaraykuchus mana reparakorqankichu Diosniyki qanta qhespichej jamushasojtin, nispa.
Jesús qhatojkunata Templomanta qharqon
(Mt 21.12-17; Mc 11.15-19; Jn 2.13-22)
45Chantá Jesusqa Temploj pationman yaykuspa, tukuy chaypi qhatojkunata qharqoyta qallarerqa. 46Nerqataj: Diospa Qhelqachisqanpi pay nerqa: Waseyqa noqawan parlarikuna wasimin.#Is 56.7. Chaywanpis qankuna suwa thapaman tukuchisqankichej, nispa.
47Chay p'unchaykunapi Jesús sapa p'unchay Temploj pationpi yachachej karqa. Jinapitaj kuraj sacerdotekuna, Diospa kamachisqanmanta yachachejkuna, llajtamanta kurajkuna ima imaynallamantapis payta wañuchiyta munasharqanku. 48Chaywanpis mana imanayta aterqankuchu, imaraykuchus tukuy runakuna Jesús imatachus yachachinanta uyariyta suyasharqanku.
Atualmente selecionado:
Lucas 19: DQPC
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Revisión Biblia Quechua Boliviano © Sociedad Bíblica Boliviana, 2017.