LEVÍTICO 10
10
Nadabpa Abiupa huchallikusqan
1Aaronpa churin Nadabwan Abiuwanmi incienso q'apachinankuta hap'ispa sansata churarqanku. Chaykunaman inciensota churaspataq Señor Diosman mana haywana ninata haywarqanku, Diospa kamachisqanta mana kasukuspa. 2Hinan Señor Diosqa ninata kachamuspa paykunata rupharparichirqan, chaymi Señor Diospa ñawpaqenpi wañurqanku. 3Hinaqtinmi Moisesqa Aaronta nirqan:
–Kay hina sucedenantan Señor Diosqa ñawpaqtaña niwarqanchis:
Qayllaykamuwaqniykunamanqa ch'uya kasqaytapunin rikuchisaq,
llaqtaypa qayllanpiqa lliphlli-kayniytan rikuchisaq, nispa.
Aarontaq upallakullarqan. 4Chaymantataq Moisesqa Aaronpa tion Uzielpa churin Misaelta Elzafantawan waqyaspa nirqan:
–Hamuychis, karpamanta wawqeykichiskunata karpa-karpa hawaman horqoychis, nispa. 5Paykunataq asuykuspanku, Moisespa nisqanman hina p'achankuwan p'istuykuspa karpa-karpa hawaman ayakunata wanturqanku.
6Hinan Moisesqa Aarontapas churin Eleazartapas Itamartapas nirqan:
–Aman chukchaykichista t'ampayachinkichischu, amallataq p'achaykichistapas llakipi kasqata rikuchinapaq llik'ikunkichischu, paqtan wañuwaqchis, lliw llaqtantinpaqtaq Señor Diosqa k'arakta phiñakunman. Israel aylluntin wawqeykichiskunan ichaqa waqayta atinku Señor Diospa ruphaykachisqanmanta. 7Aman Dioswan Tupana Karpaman haykunamantapas lloqsinkichischu, wañuwaqchismi, hawina aceitewan Señor Diospaq t'aqasqa kasqaykichisrayku, nispa.
Hinan paykunaqa Moisespa nisqanman hina ruwarqanku.
Sacerdotekunaq imakunatachus ruwanankuna
8Señor Diosmi Aaronta nirqan:
9–Aman qanpas, churiykikunapas Ñoqawan Tupana Karpaman haykunaykichispaqqa vinotapas ima machachikuq ukyanatapas ukyankichischu, paqtan wañuwaqchis. Mirayniykichiskunaqa chaytan wiñaypaq hunt'ashallanqakupuni, 10qankunaqa reqsinaykichismi imachus ch'uya ñoqapaq kaqta, imakunataqchus runapaq kaqtapas, hinallataq reparankichis qhellitawan mana qhellitawanpas. 11Tukuy kamachisqay simikunatan Israel runakunaman yachachinkichis, chaykunatan ñoqaqa qankunaman Moiseswan willachirqaykichis, nispa.
12Moisesmi Aaronta qhepaq churin Eleazarta Itamartawan nirqan:
–Señor Diospaq mikhuna ofrendakunamanta qhepaq ruru ofrendata hap'iychis, hinaspa mana qonchuyoq t'antata ruwaspa altar qayllapi mikhuychis, chay ofrendaqa ancha ch'uyan. 13Chay ofrendan Señor Diospaq mikhuna ofrendakunamanta qanmanpas churiykikunamanpas tupan, chaymi karpaq ch'uya kanchanpi chaytaqa mikhunkichis. Chhaynatan Señor Diosqa kamachiwarqan. 14Hinallataqmi qanpas churiykikunapas ususiykikunapas maywisqa pechonta t'aqasqa chakantawan karpaq ch'uya kanchanpi mikhunkichis. Chaykunaqa qanmanmi churiykikunamanwan tupasunkichis Israel runakunaq sumaq kawsay ofrendankunamanta. 15Paykunan mikhuna ofrendata hina wirakunata apamuspa chay maywisqa pechonta, chay t'aqasqa chakantawan, maywispa Señor Diosman haywanqaku. Chaykunaqa qanmanmi churiykikunamanwan tupashallasunkichispuni, Señor Diospa kamachisqanman hina, nispa.
16Moisesmi tapukurqan hucha pampachaypaq orqo cabramanta, hinaspan yacharqan ruphapusqantaña. Chaymi Aaronpa qhepaq churin Eleazarta Itamartawan Moisesqa phiñasqa nirqan:
17–¿Imanaqtintaq hucha pampachaypaq ofrendatari mana karpaq ch'uya kanchanpichu mikhurqankichis? Chayqa ancha ch'uyan, chaytan Señor Diosqa qorqasunkichis llaqtaq huchallikusqanta pampachachinapaq. 18Qhawariychis, manan yawarqa Karpapi Ch'uya Cheqasman apaykusqachu karqan, chaymi ñoqaq kamachikusqayman hina qankunaqa chay ofrendata karpa kanchapi mikhunaykichis karqan, nispa.
19Aarontaq Moisesman kutichirqan:
–Kunanmi Señor Diosman haywanku huchanku pampachaypaq ofrendatapas ruphachina sacrificionkutapas, ichaqa qonqayllan ayayoq kapuni. Ñoqataqchus hucha pampachay ofrendata kunan mikhuyman karqan chayqa, ¿Señor Diospaq kusikunanpaqchu chayqa kanman karqan? nispa. 20Chayta uyarispataq Moisesqa manaña ima nispapas nipurqanchu.
Atualmente selecionado:
LEVÍTICO 10: QUECUZ
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Revised Quechua Cuzco Bible © Peruvian Bible Society, 2004.