LEVÍTICO 8
8
Aaronwan churinkunawan t'aqasqa kasqanku
(Ex 29.1-37)
1Señor Diosmi Moisesta nirqan:
2–Pusay Aaronta churinkunatapas Ñoqawan Tupana Karpaman, apallaytaq p'achakunatapas, hawina aceitetapas, hucha pampachaypaq torillotapas, iskaynin anejotapas, mana qonchuyoq t'antantin canastatapas. 3Hinaspa llaqtantinta Karpa haykunaman huñuy, nispa.
4Hinan Moisesqa Señor Diospa payta kamachisqanman hina ruwarqan, chaymi llaqtaqa huñuykukurqan Karpa haykunaman. 5Moisestaq llaqtata nirqan:
–Señor Diosmi kay hina ruwanaypaq kamachimuwan, nispa.
6Hinaspan Moisesqa Aaronta churinkunatawan asuykachikuspa unuwan bañarqan. 7Chaymantataq Aaronta sotanawan churaspa chumpiwan wataykurqan. Hinaspataq capawan churaykurqan, chay patamantaq unkuwan churaykurqan, chaytataq unku chumpiwan wataykuspa unkuta mat'iykurqan. 8Chay patamantaq qhasqo-ch'uspata churarqan, chaypitaq churarqan Señor Diospa munaynin tapuna Urimta Tumimtawan. 9Hinaspanmi umanman churaykurqan uma k'uyunata, uma k'uyunamantaq qori llaphllata churarqan Señor Diospaq t'aqasqa kasqanta rikuchinanpaq. Chaykunatan ruwarqan Señor Diospa payta kamachisqanman hina.
10Chaymantataq Moisesqa hawina aceiteta hap'ispa ch'aqchurqan Karpata chaypi tukuy imaymana kaqtawan Señor Diospaq t'aqananpaq. 11Chay aceitetan qanchis kutita altar pataman ch'allaykurqan, hinaspan Señor Diospaq t'aqananpaq ch'aqchurqan altarta tukuy imaymanantinta, tiyanayoq puruñatapas. 12Hawina aceitetan Aaronpa umanman hich'aykuspa Señor Diospaq t'aqananpaq payta hawiykurqan. 13Chaymantataq Moisesqa Aaronpa churinkunata qayllaykachikurqan, hinaspan paykunaman sotanawan churaykurqan, chumpikunawan chumpiykachirqan, uma chukukunawanpas churaykurqan, Señor Diospa payta kamachisqanman hina.
14Hinamantataq hucha pampachaypaq torillota apachimurqan, Aaronwan churinkunawantaq umanman makinkuta churaykurqanku, 15chaymantataq chayta nak'arqan. Moisesmi yawarta hoqarispa altar waqrakunata dedonwan llusiykurqan altarta ch'uyanchananpaq. Wakin yawartataq altar chakiman hich'aykurqan, chay hinatan altarta ch'uyanchaspa Señor Diospaq t'aqarqan. 16Hinaspataq wiksa llika wirata hap'irqan, sullk'a k'ipchantapas, iskaynin ruruntapas chaykuna qayllapi kaq wirantinta, hinaspan Moisesqa chaykunata altar patapi ruphachirqan. 17Torilloq qarantawan aychantawan phusnuntawantaq ichaqa karpa-karpa hawapi ruphachirqan, Señor Diospa payta kamachisqanman hina.
18Hinamantataq Moisesqa ruphachina anejota apachimurqan, Aaronwan churinkunawantaq anejoq umanman makinkuta churaykurqanku, 19hinaspataq chayta nak'arqan. Moisesmi yawarta altar muyuriq qhataman hich'aykurqan. 20Chaymantataq Moisesqa anejota kuchurqarispa, ruphachirqan umanta, kuchurqarisqa aychata, wirata ima. 21Hinaspataq unuwan maqchirqan ch'unchulkunata chakankunatawan, hinaspan anejota llapallanta altarpi ruphachirqan. Chayqa ruphachina sacrificion, Señor Diospaq mikhuna ofrenda, sumaq q'apaynintaq Señor Diospa sonqonman chayarqan. Chaykunatan Moisesqa ruwarqan Señor Diospa kamachisqanman hina.
22Chaymantataq sacerdote churana hukkaq anejotawan apachimurqan, Aaronwan churinkunawantaq makinkuta churaykurqanku anejoq umanman. 23Chayta nak'aspataq Moisesqa yawarwan llusiykurqan Aaronpa paña ninrin ura puntata, paña makinpa mama dedonta, paña chakinpa mama dedontawan. 24Hinallataq Moisesqa Aaronpa churinkunata qayllaykachikuspa yawarwan llusiykurqan paña ninrinkuq ura puntanta, paña makinkuq mama dedonta, paña chakinkuq mama dedontawan. Wakin yawartataq Moisesqa altar muyuriq qhataman hich'aykurqan.
25Hinamantataq hap'irqan wirata, chupanta, wiksa llika wiratapas, sullk'a k'ipchantapas, iskaynin ruruntapas, chaykuna qayllapi kaq wiratapas, paña chakantapas. 26Hinallataq Señor Diospa ñawpaqenpi kaq mana qonchuyoq t'anta canastamanta hoqarirqan mana qonchuyoq t'antata, aceiteyoq q'apisqa tortata, llaphllallaña t'antatapas, hinaspan chaykunata churarqan wira pataman paña chakan patamanwan. 27Hinaspanmi llapanta Aaronpa makinman churinkunaq makinmanwan churaykurqan, hinan paykunaqa maywirqanku, chaymi maywisqa ofrenda Señor Diospaq haywasqa. 28Chaymantataq Moisesqa chaykunata makinkumanta chaskirqan, hinaspan altarpi ruphachina sacrificio patapi ruphachirqan. Chaykunaqa karqan paykunata sacerdote kanankupaq churana ofrendan, Señor Diospaq mikhuna ofrenda, sumaq q'apayninqa Señor Diospa sonqonmanmi chayarqan. 29Hinamantataq Moisesqa chay pechonta hap'ispa maywirqan, chaymi maywisqa ofrenda Señor Diospaq haywasqa. Chay pechonqa karqan sacerdote churana anejomanta Moisesman tupaqmi. Moisesmi chaykunata ruwarqan Señor Diospa kamachisqanman hina.
30Hinaspataq Moisesqa hawina aceiteta hoqarirqan, altar patapi kashaq yawartawan, hinaspan ch'aqchuykurqan Aaronman p'achanmanwan churinkunaman p'achankumanwan. Chay hinatan Señor Diospaq t'aqarqan Aaronta, p'achantapas, churinkunatapas, p'achankutawan.
31Hinaspan Moisesqa Aaronta churinkunatawan nirqan:
–Aychata chayachiychis Dioswan Tupana Karpa punkupi, hinaspa chay aychata chaypi mikhuychis canastapi kashaq sacerdote churana ofrendakunatawan, Aaronwan churinkunawanmi chayta mikhunqa, nispa Señor Diospa kamachisqanman hina. 32Aychamanta t'antamanta puchuqtataq ninaman kanapunkichis. 33Karpaman haykunamantaqa aman qanchis p'unchaynintin lloqsinkichischu, sacerdote churasqa kasqaykichis qanchis p'unchay hunt'akunankama. 34Kay p'unchay ruwasqatan Señor Diosqa kamachikurqan huchaykichis pampachasqa kananpaq. 35Karpa punkupin qanchis p'unchaypacha tutantin p'unchaynintin qhepakunkichis, ahinapin Señor Diospa kamachisqanta hunt'ankichis ama wañunaykichispaq. Ahinatan ñoqataqa kamachiwarqan, nispa.
36Hinan Aaronwan churinkunawan tukuy imaymanata ruwarqanku Señor Diospa Moiseswan kamachisqanta.
Atualmente selecionado:
LEVÍTICO 8: QUECUZ
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Revised Quechua Cuzco Bible © Peruvian Bible Society, 2004.