Jɔ̀ɔŋ 5
5
Wo Jisɛ̀ naŋ sùngò wo felaa kɛ̀ɛ̀nɛ̀ŋ e sààŋ kpɔ̀ɔ̀kpɔɔ
1Eɓìèmàŋjɛ̀wɛ̀ tɛɛ̀, wo Jisɛ̀ naŋ kɔ̀ ko Jùlusɛ̀làm ko yèi aŋ Juùù nyaŋ yaà wa gììyè wɔŋ ɗaa nyiŋ nɔɔ̀ŋ bà guùŋ. 2Ko jawa gbeeì ko Jùlusɛ̀làm, ko pàtà yaào wa ko yèi kuwa wa e wùìyè. Anyùùŋ guuyà wa e wùìyè bi sùà e gbɛ̀ɛ̀ wɔŋ gbàngì aŋ ɓaawaa nyàŋ, yèè koɓɛ̀ bi kuwa wa maŋ tàamàŋ jɛ̀i e ɗì nɔɔnɔŋ. E dèè koɓɛ̀ bi e Hiɓulù mieɛ̀ sùà nàŋ yaà wa ko Bɛ̀zatà. 3Anyuùŋ sàaŋ zimgbe mààŋ anyuùŋ zììlè le fɛ̀ɛ̀ nyaŋ, anyuùŋ gò ɓɛ̀nɛ̀ŋ kààiŋ tɛ̀ɛ̀ nyaŋ, yèè anyuùŋ kpɔ̀ɔ̀kpɔɔ nyàŋ hawa wa e gbɛ̀ɛ̀ ko pàtà yaà. [Anyuùŋ sàaŋ nyàŋ e wùìyèɛ kɔɔ folo wa e wùìyèɛ wèè e mààŋ e yìwìà ko pàtài. 4Fòfoo maŋ ɗɔɔ kpàa bà màŋ maaŋ wa, kpeiŋ kɛ̀ wo màìkà Dayàa kɔ̀ào wa wo kàànè kàànè e wùìyèɛ. Yèè sèè wò kpɛɛyɛ̀ wa tii nyɛ̀nɛŋ, wo nyuùŋ sàaŋ jiɛ̀jiɛ̀ɔ sɛɛ̀ wa e wùìyè bi sùà wɔ, e sàaŋ gbiŋ nɔ̀uŋ wa e kɔɔ sùà è joeye.] 5Wo felaa bà yaào wa e wùìyèɛ kɔɔ wo yèɔ naŋ wa kpɔɔkpɔ̀ɔ̀ wèè maŋ doa kpɛ̀ùŋ guùŋ jɛ̀wɛ̀ zììyà jɛ̀wɛ̀ nɔɔnɔŋ le taai. 6Nààŋ wo Jisɛ̀ naŋ yɛ̀mɛ̀ wo felaaà yèè wò naŋ nyìmè kɛ̀ wò naàŋ sààŋ wèè e teenga mùnlaŋ, wò naŋ dàwè wo felaaà wààŋ, “Mùŋ manaŋ maŋ yɛ̀mɛ̀ e ɓòù?”
7Wo felaaà naŋ fàsàì wo Jisɛ̀ wààŋ, “Dàa, miŋ kuwà kià wò nyùùŋ gbiŋ wèè woim kpuumàŋ woim gbìàŋ è wùìyèɛ sùà sèè wo màikàa kaanaŋ kàànàŋ e wùìyèɛ. Sèè mìŋ nɔ̀ŋ kààmè e ɗewe wèè ka hnàŋ kao dè, wo nyùùŋ bà mààìm ko feìŋ wuŋ jiɛ̀ woo dè.”
8Wo Jisɛ̀ naŋ wòò wo felaaà wààŋ, “Yewà dìì, muŋ ɓemè wɔŋ ɓɛɛ mɔɔ̀ŋ muŋ ka.” 9Ko fɛɛ̀feìŋ wo felaaà naŋ jòèyè. Wò naŋ ɓèmè wɔŋ ɓɛɛuŋ nɔɔ̀ŋ yèè wò naŋ tɔ̀ɔ̀tù kààiŋ.
Ke ɗɔɔɛ̀ e keì lɛɛ̀ naŋ wa kaaìŋ lɛ è yaà wa ke Ɗɔ̀ɔ̀ Zòòlò aŋ Juùù nyaŋ diɛŋ. 10Nààŋ anyuùŋ gbeegbèè nyaŋ aŋ Juùù nyaŋ sùà naŋ yɛ̀mɛ̀ wo felaaà wo Jisɛ̀ naŋ sùngò wɔ wò yaà kòa sùà wɔŋ ɓɛɛuŋ nɔɔ̀ŋ, aŋ nauŋ woò nyààŋ, “Nàaŋ nàŋ yaà ke Ɗɔ̀ɔ̀ Zòòlò aŋ Juùù nyaŋ, e kìlà ke sàwà wiɛ̀ gò wi gè nyààŋ diɛŋ wèè wò nyùùŋ gbiŋ wo kòà wɔ̀ŋ ɓɛɛuŋ nɔɔ̀ŋ kè Ɗɔ̀ɔ̀ Zòòlò àŋ Juùù nyaŋ diɛŋ.”
11Kɛɛ wo felaaà naŋ nyiŋ fasàì wààŋ, “Wo felaaà naim sùngò wɔ naim woò wààŋ miŋ ɓemè wɔŋ ɓɛɛ miɔ̀ŋ miŋ kaaìŋ.”
12Kpeiŋ àŋ naŋ dàwè wo felaaà nyààŋ, “Ɓòò nàŋ yaà wo felaaà naum woò wààŋ muŋ nyɛ̀nɛ̀ŋ tɛɛ̀ wɔ?”
13Kɛɛ wo felaaà naŋ wa jòèyè wɔ nyimààŋ wa kɛ̀ ɓòò nàŋ yaà wa wò Jisɛ̀, esaɓù kɛ̀ e faaàŋ naŋ wa gàŋ, yèè wo Jisɛ̀ wò nyiŋ wa naàŋ fòlà e tɛɛ wò ka.
14Eɓìèmàŋjɛ̀wɛ̀ tii, wo Jisɛ̀ naŋ mɛ̀ɛ̀ŋ wo felaaà ko Saaŋ Zòòlò Dayài yèè wò nauŋ woò wààŋ, “Màŋ naàŋ jòèyà. Kɔ̀à kɛɛ ɓɔ̀ mùŋ nyɛ̀nɛ̀ŋ ɓɛìŋ màŋ kèì jùumù. Sèè mùŋ nyɛnɛŋ ɓɛìŋ e jùumù, e keì naanààŋ bà doum nàŋ kaaìŋ.”
15Kpeiŋ wo felaaà naŋ kɔ̀ yèè wò naŋ niŋ wòò anyùùŋ gbèègbèè aŋ Juùù nyaŋ kɛ̀ wo Jisɛ̀ nauŋ sùngò. 16Kpeiŋ àŋ naŋ tɔ̀ɔ̀tù wo Jisɛ̀ nìmila, esaɓù kɛ̀ wò naŋ wa jòèyè wo felaa wɛɛ̀ ke Ɗɔ̀ɔ̀ Zòòlò aŋ Juùù nyaŋ diɛŋ. 17Kɛɛ wo Jisɛ̀ naŋ nyiŋ fasàì wààŋ, “Wo Dèda miɔ̀ŋ kòò wò yaà toomo, weètii mìŋ kuwa ka tomo miàŋ pɛɛ.”
18Kpeiŋ anyùùŋ gbèègbèè aŋ Juùù nyaŋ naŋ wa ɗewè wèè aŋ jìwà wo Jisɛ̀ wèè esàɓù tìyèe. Nyààŋ wò naŋ wa pɔ̀ɔ̀ ke sàwà ke Ɗɔ̀ɔ̀ Zòòlò aŋ Juùù nyaŋ. Yèè nyààŋ wò naŋ wa ɓèmè wuŋ bi wèè yaà wo Dayà aŋ seenè.
E gàaŋ wo Jɔ̀àfèlàà Dayàa kuwa lɛ̀
19Kpeiŋ wo Jisɛ̀ naŋ nyiŋ fasàì wààŋ, “Miŋ woòiŋ e tɔɔɓaaà, miàim wo Jɔ̀àfèlàà Dayàa fè ɓɛ̀nɛ̀ŋ nyɛ̀nɛ̀ŋ è keì gbiŋ kùàŋ wùùmaim. Mìŋ nyɛnɛŋ nɔŋ e yèɛ mìŋ yɛmɛ̀ wo Dèda miɔ̀ŋ nyɛnɛŋ lɛ̀. 20Esaɓù wo Dèda miɔ̀ŋ mànàìm miàim wo Jɔ̀àfelaauŋ nɔɔ̀ŋ yèè wò tɔɔ̀ìm e yèɛ wuŋ bi wò nyɛnɛŋ lɛ̀. Wo Dèda miɔ̀ŋ doim nàŋ tɔ̀ɔ̀ maŋ nɛ̀ŋ gbeegbèè wèè nyɛ̀nɛŋ, yèè è doiŋ nàŋ foonò. 21Màànààŋ nɔŋ wo Dèda miɔ̀ŋ gè anyuùŋ fàa nyàŋ dìì yèè wo nyiŋ kìɛ̀ŋ wɔŋ nyiiŋ gèe, yɛi nɔŋ e ɗèwè guùŋ bi sùà miàim wo Jɔ̀àfelaauŋ nɔɔ̀ŋ kiɛ̀ŋ wɔŋ nyiiŋ gèe koɓɛ̀ wo nyùnɔ̀ɔŋ mìŋ manaŋ wɔ̀. 22Wo Dèdaà fè gbàì wò nyùùŋ, kɛɛ wò naŋ nyɛ̀nɛ̀ŋ miàim wo Jɔ̀àfelaauŋ nɔɔ̀ŋ wèè ka nɔ̀ŋ wo nyuùŋ gbàiɔ̀ wèè anyùùŋ nyaŋ gbiŋ. 23Wo Dèda miɔ̀ŋ manaŋ anyùùŋ nyaŋ gbiŋ aŋ kìɛ̀ŋ miàim wo Jɔ̀àfelaauŋ nɔɔ̀ŋ e ɓɛ̀ɛ̀jàa, màànààŋ nɔŋ àŋ kiɛ̀uŋ e ɓɛ̀ɛ̀jàa lɛ̀. Sèè wo nyùùŋ gbiŋ gè maŋhɛɛ wèè wo kìɛ̀ŋ miàim wo Jɔ̀àfelaauŋ nɔɔ̀ŋ e ɓɛ̀ɛ̀jàa, kɛ̀ wò gè maŋhɛɛ wèè wo kìɛ̀ŋ e ɓɛ̀ɛ̀jàa koɓɛ̀ wo Dèda miɔ̀ŋ naim tɔ̀ùŋ wɔ.
24“Mìŋ yààìŋ wòò e tɔɔɓaaà, anyùùŋ nyaŋ gbiŋ komo ke miè gbìaŋ miɛ̀ŋ yèè àŋ kɛɛnɛ̀ŋ e hààwe wo nyùnɔ̀ɔŋ naim tùɔ̀ŋ wɔ sùà, àŋ kuwa wɔŋ nyiiŋ gèe gò jùà. Aŋ naàŋ nyiŋ wa nàwèè gbaì, esaɓù kɛ̀ àŋ yèwà koɓɛ̀ e fàa àŋ kà koɓɛ̀ wɔŋ nyiiŋ gèe. 25Mìŋ yààìŋ wòo sùà e tɔɔɓaaà kɛ̀ e teenga do nàŋ hnè, yèè ngèè kòò è yaà naàŋ kià tɛ, anyuùŋ fàa nyàŋ do nàŋ kòmò ke mìè miàim wo Jɔ̀àfèlàà Dayàa. Yèè anyùùŋ nyaŋ do nyiŋ nàŋ kòmò nyaŋ do nàŋ nɔ̀ŋ wɔŋ nyiiŋ gèe sùà. 26Màànààŋ nɔŋ wo Dèdaà wuŋ bi nàŋ yaà ko tɔ̀ɔ̀tù wɔŋ nyiiŋ gèeɔ̀ lɛ, e ɗèwè guùŋ bi sùà wò naŋ nyɛ̀nɛ̀ŋ miàim wo Jɔ̀àfelaauŋ nɔɔ̀ŋ naŋ nɔ̀ŋ ko tɔ̀ɔ̀tù wɔŋ nyiiŋ gèeɔ̀. 27Yèè wò kìɛ̀ŋ miàim wo Jɔ̀àfelaauŋ nɔɔ̀ŋ e tɔ̀ɔ̀nyaàaŋ wèè ka gbàì anyùùŋ nyaŋ gbiŋ, esaɓù kɛ̀ miàŋ nàŋ yaà wo Jɔ̀àfèlàà Nyuùŋ Kpùnɔɔ̀ŋ. 28Tɛɛ̀ ɓɔ̀ è foonòiŋ wa nàwèè! E teengaà do nàŋ hnè, yèè anyuùŋ fàa nyàŋ gbiŋ maŋ hùaŋ màŋ sùà do nàŋ kòmò ke miè miɛ̀ŋ, 29e kìlà àŋ do nàŋ yèwè e fàaà dìì wɔŋ nyiiŋ gèeo sùà e yìwìà maŋ hùaŋ nyiŋ màŋ sùà. Anyùùŋ nyaŋ gbiŋ naŋ nyɛ̀nɛ̀ŋ maŋ kpèè siaŋ nyàŋ do nàŋ yèwè e fàaà dìì wɔŋ nyiiŋ gèeo sùà. Kɛɛ anyùùŋ nyaŋ gbiŋ naŋ nyɛ̀nɛ̀ŋ maŋ kpèè naanààŋ nyaŋ do nàŋ yèwè e fàaà dìì, yèè mìŋ do nyiŋ nàŋ kìlìè kiti diɛŋ wèè maŋ jùumù nyiŋ màŋ.
Anyùùŋ nyaŋ naŋ wòò e tɔ̀ɔ̀nyaàaŋ e nyaàiŋ dè wo Jisɛ̀
30“Miŋ fè ɓɛ̀nɛ̀ŋ nyɛ̀nɛ̀ŋ è keì gbiŋ wɔ̀ŋ kùàŋ wùŋ maim e fòfoo mìŋ manaŋ ka niŋ nyɛ̀nɛ̀ŋ. Wo Dèdaà naim tùɔ̀ŋ, yèè wuŋ nàŋ woàìm kɛ̀ dièsɔa mìŋ gbaì wo nyùùŋ. Sèè mìŋ gbaì wo nyùùŋ gbiŋ, mìŋ nyɛ̀nɛ̀ŋ niìŋ e tɔ̀ɔ̀nyaàŋ sùà. Miŋ fè niŋ nyɛ̀nɛ̀ŋ wèè ka fɔ̀ɔ̀yɛ̀ miàŋ bi kè jii.
31“Sèè mìŋ kiɛ̀ŋ ke mìè seì wèè miàŋ bì, e yèɛ mìŋ woà lɛ e fè è tɔ̀ɔ̀nyaàŋ. 32Kɛɛ wo nyùùŋ bà kòò wò yaào wo yèɔ naŋ nyìmè yèè wò naŋ woò kɛ̀ ɓòò nàŋ yààìm , e kìlà kà nyìmàŋ kɛ̀ ke mìè seìɛ wò naŋ kiɛ̀ŋ lɛ è yaà tɔ̀ɔ̀nyaàŋ e nyaàiŋ eim dè. 33Koɓɛ̀ Jɔ̀ɔìŋ nìŋ naŋ wa tùɔ̀ŋ aŋ keelaiŋ nyàŋ, yèè wò naŋ wa wòò e tɔ̀ɔ̀nyaàaŋ e nyaàiŋ eim dè. 34Miŋ gò tùlìà màŋ mìè seì maŋ ànyuùŋ kpùuŋ kiɛ̀ŋ maŋ jii wèè maŋ tɔ̀ɔ̀ è tɔ̀ɔ̀nyaàaŋ kɛ̀ ɓòò mìŋ yaà. Kɛɛ mìŋ naiŋ wòò maŋ keì mɛɛ̀ŋ wèè kɛ̀ wo Dayà naiŋ ɓɛ̀nɛ̀ŋ jòèye. 35Wo Jɔ̀ɔŋ yaà wa mààŋ e laumpò e yèɛ kiɛ̀ŋ e gbolòùŋ gbee, maŋ jiiiŋ màŋ naŋ wa fɔ̀ yèè nìŋ naŋ niŋ wa jikà wèè e teenga bà. 36Kɛɛ e yèɛ mìŋ nyɛnɛŋ lɛ̀ tɔɔ̀ janyai kɛ̀ ɓòò nàŋ yààìm wɔŋ dòmaŋ nyaaŋ joo bà wɔŋ yèɔ wɔ̀ŋ yaà e sɛmɛmaŋ wuŋ e ngèè pɛɛ nìàŋ e yèɛ naŋ wa nɔ̀ŋ tɔ̀ɔ niŋ e yìwìà e yèɛ wo Jɔ̀ɔŋ naŋ wa woò lɛ e nyaàiŋ eim dè. Maŋ keì bi zà nàŋ yaà e tòmoɛ̀ wo Dèdaà Dayà naim kiɛ̀ŋ wèè ka nyɛ̀nɛ̀ŋ lɛ. Maŋ keì mɛɛ̀ŋ nàŋ kiɛ̀ŋ maŋ mìè seì weèim, e kìlà màŋ tɔɔ̀ kɛ̀ wo Dèdaà Dayà naim tùɔ̀ŋ. 37Wo Dèdaà naim tùɔ̀ŋ wɔ wuŋ nàŋ gboo e tɔ̀ɔ̀nyaàaŋ weèim, kɛɛ nààŋ gbà kòò nìŋ kòmò wa kè mièuŋ nɛɛ̀ŋ ɔ̀ɔ̀ naŋ yɛ̀mɛ̀ wɔ̀ŋ dewàuŋ nɔɔ̀ŋ. 38Niŋ kuwà è hààwe kè miè gbìauŋ nɛɛ̀ŋ sùà, esaɓù kɛ̀ nìŋ naŋ gè maŋhɛɛ wèè naŋ hààwè wo yèɔ wò naŋ tùɔ̀ŋ wɔ. 39Nìŋ kpɛnɛŋ wɔŋ fɛ̀ì Dayàa, esaɓù nìŋ naŋ gongò kɛ̀ maŋ fɛi bi sùà nìŋ do nàŋ yɛ̀mɛ̀ wɔŋ nyiiŋ gèe gò jùà. Yèè wɔŋ fɛ̀ì guùŋ bi naŋ kìɛ̀ŋ ke mìè seì ko nɛ̀ɛ̀iŋ niìŋ e nyaàiŋ eim dè. 40Yèè yɛi nɔŋ è yaà nìŋ naŋ gè maŋhɛɛ wèè naŋ hnàŋ kò nɛ̀ɛ̀ŋ miìŋ wèè naŋ kɛ̀ɛ̀nɛ̀ŋ wɔŋ nyiiŋ gèe.
41“Miŋ fè yɛ̀ɛ̀mɛ̀ dòmaŋ wèè ànyuùŋ kpùuŋ àŋ doim tɛnɛ̀ŋ. 42Kɛɛ kà nyìmàŋ maŋ keì nyɛ̀nɛiŋ màŋ, yèè kà nyìmàŋ kɛ̀ niŋ kuwà è mànàŋ Dayàa màŋ jiiiŋ màŋ sùà. 43Mìŋ naŋ hnè ɓɔɔɓɔɔ mààŋ wo yèɔ wo Dèda miɔ̀ŋ naŋ tɔ̀ùŋ wɔ wèè ka dè e bɛ̀uŋ, kɛɛ nìŋ naŋ gè maŋhɛɛ wèè naim jàà kùàŋ dìì. Yèè sèè wo nyùùŋ bà wò hnàŋ wo yèɔ gboo e gààŋ wuŋ biɛ̀ sùà wɔ, nìŋ douŋ nàŋ jàà kùàŋ dìì. 44Nìŋ manaŋ e kèè aŋ dàwi tɛ̀nɛŋ, tii nàŋ fɔɔyɛ̀ìŋ maŋ jii. Niŋ fè kàmè è ɗewe wèè naŋ tuwò tɛ̀ɛ̀ wèè e nyɛ̀nɛ̀ŋ esaɓù wèè wò Dayà wuŋ guùŋ woiŋ tɛnɛ̀ŋ. Kpeiŋ kɛ̀ dièsɔa nìŋ naim naàŋ ɓɛ̀nɛ̀ŋ kɛ̀ɛ̀nɛ̀ŋ e hààwe sùà? 45Ɓɔ̀ nìŋ gongò kɛ̀, miàŋ nàŋ do wa nàwèè nàŋ wòò wo Dèda miɔ̀ŋ kɛ̀ nìŋ naŋ nyɛ̀nɛ̀ŋ maŋ keì naanààŋ. Wo Mòòze wo yèɔ nìŋ kuwa jii tùlia kɛ̀ wò doiŋ wa nàwèè nàŋ kpuumò wɔ, wuŋ nàŋ doiŋ wa nàwèè nàŋ jàà e keì ɗì. 46Sèè naŋ wa weè kɛ̀ɛ̀nɛ̀ŋ e hààwe wo Mòòze sùà, nìŋ heim weè nàŋ kɛ̀ɛ̀nɛ̀ŋ e hààwe ko sùà, esaɓù kɛ̀ wò naŋ wa sìngè wɔŋ fɛi e nyaàiŋ eim dè. 47Kɛɛ nìŋ naŋ gè maŋhɛɛ wèè naŋ hààwè e yèɛ wò naŋ wa sìngè lɛ, kɛ̀ dièsɔa nìŋ do nàŋ hààwè e yèɛ mìŋ woà lɛ?”
Atualmente selecionado:
Jɔ̀ɔŋ 5: WFESD
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Gola New Testament Translation and Literacy Project © Bible Society in Liberia, 2019.