JOHN 5
5
Jesus Ɔkɔk Mbuŋɔ Ke Mben Ŋkpɔdiɔhɔ-Mmɔŋ Bethesda
1KE ŋkpɔ emi ema ekebe, usɔrɔ mme Jew edidu; ndien Jesus ɔdɔk aka Jerusalem. 2Edi mkpɔdiɔhɔ-mmɔŋ odu do ke Jerusalem, ekpere inua-otop erɔŋ; ekot enye ke usem Hebrew ete, Bethesda; inua-otop ition enyuŋ edu ke esit. 3Ata ediwak mbon udɔŋɔ, ye nnan, ye mbuŋɔ, ye mfumi, ena ke mme inua-otop oro. 4Koro angel Abasi esito ke enyɔŋ edi ke ini ke ini onyuŋ editimede mmɔŋ oro, ndien akpa owo udɔŋɔ emi ebemde iso oduk mmɔŋ oro eyekop nsɔŋidem. 5Owo kiet onyuŋ odu do emi mem-idem anamde enye isua edip ye efureta. 6Ke adaŋemi Jesus okutde enye anade do, onyuŋ ɔfiɔkde ete enye akana ntre anyan ini, Enye ete owo oro, Nte ɔdɔŋ fi ndikop nsɔŋidem? 7Owo mmem-idem ɔbɔrɔ Enye ete, Ɔbɔŋ, nnyeneke owo eke emende mi esin ke mkpɔdiɔhɔ-mmɔŋ kini etimerede mmɔŋ: edi nte ŋkaka, owo eŋwen ebem mi iso ɔsuhɔre. 8Jesus ete enye, Daha ke enyɔŋ, men mbri fo, saŋa. 9Ndien idahoro owo oro okop nsɔŋidem, onyuŋ emen mbri esie asaŋa.
10Ekedi sabbath ke usen oro. Ntre ke mme Jew edɔhɔ owo emi ekanamde udɔŋɔ okure enye, ete, Mfin edi sabbath; inenke fi ndikama mbri fo. 11Edi enye ɔbɔrɔ mmɔ ete, Owo emi akanamde mi ŋkop nsɔŋidem ɔdɔhɔ mi ete, Men mbri fo, saŋa. 12Mmɔ ebup enye ete, Anie edi owo emi ɔkɔdɔhɔde fi ete, Men mbri fo saŋa? 13Edi owo emi udɔŋɔ okurede enye ifiɔkke Enye emi ɔkɔdɔhɔde enye ntem: koro Jesus ama adaha, sia otu owo edude ke ɔtɔ oro. 14Edikem Jesus okut enye ke temple, onyuŋ ɔdɔhɔ enye ete, Sese, omokop nsɔŋidem; kunam aba idiɔk-ŋkpɔ, mbak se idiɔkde ikan oko edisim fi. 15Owo oro adaha ɔkɔdɔhɔ mme Jew ete, ke edi Jesus akanam imɔ ikop nsɔŋidem. 16Ndien ke ntak emi mme Jew esin Jesus enyin, koro Enye akanamde ŋkpɔ emi ke sabbath. 17Edi Jesus ɔbɔrɔ mmɔ ete, Ete Mi ke ananam utom tutu osim emi, 18Ami ke nnyuŋ nnam. Ke ntak emi mme Jew edɔdiɔŋ eyom Enye ndiwot, itoho koro abiatde sabbath ikpɔŋ, edi oto koro Enye okotde Abasi, ete, Ete Imɔ, anam idem ukem ye Abasi.
19Ntre ke Jesus ɔbɔrɔ mmɔ ete, Ke akpanikɔ ke ndɔhɔ mbufo, Eyen ikemeke ndinam baba ŋkpɔ kiet ke Idem Esie, ke mibɔhɔke se okutde nte Ete anamde; koro ŋkpɔ ekededi eke Ete anamde, kpa oro ŋko ke Eyen onyuŋ etiene anam. 20Koro Ete amama Eyen, omonyuŋ owut Enye kpukpru ŋkpɔ eke Enye ke Idem Esie anamde: Enye eyenyuŋ owut Eyen mme utom eke ekponde ekan emi, man enyene mbufo ndyɔ. 21Koro nte Ete anamde mme akpa-mkpa eset ɔnɔ mmɔ uwem, kpa ntre ke Eyen anam owo eke Enye amade odu uwem.
22 Ete inyuŋ ikpehe ikpe baba owo kiet, edi akayak kpukpru eribiere-ikpe esin Eyen ke ubɔk, 23man kpukpru owo ekpono Eyen kpa nte mmɔ ekponode Ete. Owo eke mikponoke Eyen ikponoke Ete emi ɔkɔdɔŋde Enye. 24Ke akpanikɔ ke ndɔhɔ mbufo, Owo eke ekopde uyo Mi, onyuŋ ɔbuɔtde idem ye Enye emi ɔkɔdɔŋde Mi, enyene nsinsi uwem, inyuŋ idukke ke ikpe, edi ama oto ke mkpa ebe oduk ke uwem. 25Ke akpanikɔ ke ndɔhɔ mbufo, Ini ke edi, onyuŋ ededi ama, eke mme akpa-mkpa edikopde uyo Eyen Abasi, ndien mmɔ emi ekopde eyedu uwem. 26Koro kpa nte Ete enyenede uwem ke Idem Esie, suk ntre ke Enye ɔkɔnɔ Eyen ndinyene uwem ke Idem Esie ŋko. 27Enye omonyuŋ ɔnɔ Eyen odudu ndidi ebierikpe, koro Enye edide Eyen Owo. 28Ekuyik ŋkpɔ emi, koro ini ke edi eke kpukpru mme andidu ke udi edikopde Enye uyo ewɔŋɔ edi; 29mmɔ emi ekanamde se ifɔnde eyewɔŋɔ eduk ke eriset uwem, mmɔ emi ekanamde se idiɔkde eyenyuŋ ewɔŋɔ eduk ke eriset ikpe.
30 Ami ŋkemeke ndinam baba ŋkpɔ kiet ke Idem Mi: adaŋa nte ŋkopde ke mbiere ikpe; ndien ubiere-ikpe Mi edi edinen; koro mbineke uduak idem Mi, edi mbine uduak Andidɔŋ Mi. 31Edieke ntiede ntiense mbaŋa Idem Mi, ikɔ-ntiense Mi idige akpanikɔ. 32Edi owo efen etie ntiense abaŋa Mi, ndien mmɔfiɔk nte ikɔ-ntiense eke enye etiŋde abaŋa Mi edi akpanikɔ. 33Mbufo ekedɔŋ eka ke ɔtɔ John, enye ama onyuŋ etie ntiense abaŋa akpanikɔ. 34Edi mbɔhɔ baba owo kiet ikɔ-ntiense; edi ntiŋ ikɔ emi man enyaŋa mbufo. 35John ekedi utuenikaŋ emi asakde onyiuŋ ayamade; mbufo ema enyuŋ enyime ndidara ke uŋwana esie ke ekpri ibio ini. 36Edi Ami mmenyene ikɔ-ntiense emi okponde akan eke John; koro mme utom emi Ete ɔkɔnɔde Mi ete nnam, kpa utom emi nnanam, mmɔ enyuŋ edi ntiense enɔ Mi, ete, Ete okosio Mi ɔdɔŋ. 37Ete emi ɔkɔdɔŋde Mi, Enye omonyuŋ edi ntiense ɔnɔ Mi. Akananam mbufo ikopke uyo Esie, inyuŋ ikwe mbiet Esie, 38inyuŋ inyeneke ikɔ Esie nte osuk oduŋde ke esit mbufo, koro mbufo inimke Enye emi Ete ɔkɔdɔŋde ke akpanikɔ. 39Mbufo eduŋɔre Ŋwed Abasi, koro mbufo esede ete mme imɔ imenyene nsinsi uwem ke esit; ndien edi enye edi ntiense ɔnɔ Mi. 40Ndien mbufo inyimeke nditiene Mi, man enyene uwem. 41Mbɔhɔ ubɔŋ ke ubɔk owo, 42edi mmɔdiɔŋɔ mbufo nte mbufo inyeneke ima Abasi ke esit mbufo. 43Mmedi ke enyiŋ Ete Mi, ndien mbufo idarake Mi: owo efen ama edi ke enyiŋ esiemɔ, mbufo eyedara enye. 44Mbufo edikeme didie ndinim ke akpanikɔ, kpa mbufo emi ebɔde ubɔŋ ke ubɔk kiet eken, ndien miyomke ubɔŋ eke otode ke Abasi kierakiet? 45Ekuse ete Ami nyetiŋ ikɔ ndori mbufo ke iso Ete: owo kiet do emi odoride mbufo ikɔ, oro edi Moses emi mbufo edoride enyin ke enye. 46Koro edieke mbufo ekponimde Moses ke akpanikɔ, mbufo ekponim Mi ke akpanikɔ koro enye ekewetde abaŋa Mi. 47Edi edieke mbufo minimke se enye ewetde ke akpanikɔ, mbufo edinam didie enim ikɔ Mi ke akpanikɔ?
Atualmente selecionado:
JOHN 5: ENA
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Efik Old Bible With Sectional Headings © Bible Society of Nigeria, 2013, 2019.