Saŋ 6
6
Mbúurú yí iippa a jénní ana ya
(Saame Maccëe 14.13-21 ; Marka 6.30-44 ; Lúkkë 9.10-17)
1Filoon fi baaha, Yéesú húussé laahi Galile fa na wonuu ɓal laahi Tiberiyat ra, saañce ɓúgí yínëe. 2Bi olu ɓëewë kimtaanna na paŋ ɗi, ɗi na wahil jéríɗɗë rë, dúukël ow ñeete tala. 3Lahaꞌ ri ra, ɗi lappe daŋ, tookke a taalibe yi. 4Baaha, ɗeef feedi yëwúɗɗë na wonuu Paak ra leɓohte. 5Ɓéyrëꞌ Yéesú afi, ɗi otte ɓëewí caakute níi caak na ayu ɗii na. Tígí daaha, ɗi meelte Fílíp won tih : « Yen ay lomee mbúuríi mín ñëmíɗ ɓëewí ƴee dih ? » 6Ɗi hom olsohi Fílíp, daa tah ɗi wonaꞌ ri ɗah ; ɗeef ɗi yúhté yee nay ri page ra níi wocce. 7Fílíp won ɗi tih : « Wuti yen lah hélsí tam ɗúmléh wë koon#6.7 hélsí tam ɗúmléh wë : Di gerek, bíníyú ɗeh : dëñé tíméer ana (200). Dëñé yínë, daa ganjarma yíníl légéy súrgë bis múlgús., ii mín lom mbúurú níi wa ɓéeɓ lah wuti ƴaha ñiip. »
8Tígí daaha, ow kay di taalibe yi, Anndere koy-yaafi Simoŋ Peer won ɗi tih : 9« Lahte kúkëyí kúɗté mbúurú loorso#6.9 loorso : Wa peppi man pep bele nen. Wa hom yugusuu mbúurú. iip a jén ana deh, ndaa wa ay taaɓe ɓëewí caakki ƴee yih ? » 10Yéesú won wa tih : « Wëní wë took. » Ɗeef tígë húmú caakke gaawa. Wonuu wa baaha ra, wa tookute. Ɓëewí ƴaalla húmú në rë warutee mit ow júnní iip (5.000).
11Yéesú ɓeɓpe mbúurëe, símpé Koope, woraꞌte wa ɓëewë. Ɗi ɓeɓpe jénë hente ɗaaha ɓal, woraꞌte wa ɓëewë níi ow fi ow waa na ɓéeɓ lahte ƴi doyte ri. 12Ñamuu wa ɓéeɓ níi wa laalute ra, Yéesú won taalibe yi tih : « Négíríi wooñnjiida, yin ɓan naa yah. » 13Négírúu wooñnjiidi mbúurú yí iippa ñamu ɓëewë rë, wa líiffé dama sabboo a dama ana. 14Ola olu ɓëewë kimtaana paŋ Yéesú rë, tahte wa wonu tih : « Ɓëyí bee daa yonentaa húmú wonu biti waɗtee ac ëldúnë rë kaah ! » 15Bi yúh Yéesú biti ɓëewë yuluu hami daaha tík ɗí buuri wa, ɗi hécíilté lappe daŋa, ɓani afi njunduŋ.
Tílí Yéesú sun fi mulaa
(Saame Maccëe 14.22-33 ; Marka 6.45-52)
16Sos naꞌin, taalibe yi Yéesú cépúté ɓúk laaha. 17Wa haalute gaal na húusú laaha yullute waal Kafarnawum. Koo elekke affi wa, ɗeef Yéesú ɗeefray wa doom. 18Bi gaan ngilaaw ma, mulii laaha yampe na hégíƴëh. 19Sayuu taalibe ya níi wa homute yii mitte kilomet iip mbée pëenë filiɓ laaha ra, wa séenúté ow na tíl sun fi mulaa, ɗeef Yéesú daa na ac waa na gaala ; wa yípútée tíit. 20Ndaa Yéesú won wa tih : « Ngënë tíití ! Yaa soꞌ ! » 21Tígí daaha, taalibe ya homu woni ɗi haal gaala, wa yípútée teer tígë na suu wa koon ɗa.
Ñama na onaꞌ pes ɗa
22Yíilëꞌ Koo kéy fín fë, dúukëlí ɓëewë húmú tasu ɓúk laaha ra húmú olute biti gaal yínë kut daa húmú daaha aaꞌ fin ; te wa yúhúté biti na suu taalibe ya ra, Yéesú ñéerëey a wa filiɓ gaala ; wani affi wa kut daa suu. 23Tígí daaha, lahte gaalli koluu Tiberiyat ayute teerute hëbís tígë húmú ñamuu wa mbúurëe, bee símëꞌ Yíkëe Koope ra. 24Bi olu wa biti ɗi fi Yéesú a taalibe yi húmúy në, wa haalute gaalli ƴaaha, na suu Kafarnawum saami.
25Ɗeefuu wa ri ɓúgí yíníi laaha ra, wa meelute ri wonu tih : « Fu ac dee kiri ɓahaa ? » 26Ɗi won wa tih : « Mee ron won kaaf ka ra ee : wëerté sëꞌ biti mbúurëe ñamu ɗon níi looyon maƴce ra daa tah ɗon na saamu soꞌ, ndaa biti ɗon yúhú iti fi kimtaanni soꞌ neh. 27Ngënë mëkí ñami ay míllée yah. Lah mëkí bee na onaꞌ pesa na ɗúméh rë kay, bee nay mii onee soꞌ mi Koy-ɓëeꞌ rë. Baap-Koo yeɗte soꞌ sañ-sañi baaha. » 28Wa meelute ri wonu tih : « Koope fahaꞌ biti fun paŋ légéyí bih ? » 29Ɗi won wa tih : « Légéyë seh Koope ɗon na ra biti ɗon gém soꞌ mi ɓëeꞌ ɗi wol ri ra. » 30Wa wonu ri tih : « Fay fun teeɓe kimtaani bi níi tah fun gém ɗë ? Fay page yii bih ? 31Caacci yen ñamute maan#6.31 maan : Wa peppi sewte, wa man pëndë miraa nen. Daa wa ñama húmú on Koope ɓëy Israyel koluu wa Ésíp homute luufa níi hente kíil sabay iniil (40) ra. luufa ti di bíníyúu rí Téerëe bitih : “Ɗi onte wa yii ñamun wa, yii kolaꞌ sun-Koo.”#Saame Kolohi koyyi Israyel Ésíp 16.4, 15 ; Kañaa ya 78.24 » 32Yéesú won wa tih : « Mee ron won kaaf ka ra ee : Mëyíis neh daa onaꞌ ñama kolaꞌ sun-Koo ra, Baasoꞌ daa na on ɗon ñami kah-kah fa kolaꞌ sun-Koo ra. 33Ñama na onaꞌ Koope ra, daa ri bee kolaꞌ sun te na on ɓëewë pesa na ɗúméh rë. » 34Tígí daaha, wa wonu Yéesú tih : « Ɓahaa on fun ñami ƴaa faraah. » 35Ɗi won wa tih : « Daa mi ñama na onaꞌ pesa ra. Ɓëyí ɗeefiɗ soꞌ wocce yaaɓ, ɓëyí gém sëꞌ wocce sifiroh. 36Mi wonte ron ri : ɗon olute soꞌ ngëeƴ, ndaa ɗon kaaꞌuute gémí sëꞌ. 37Ɓëyí Baasoꞌ on soꞌ ri ɓéeɓ ay soo ɗeefiɗ, te ɓëyí ɗeefiɗ soꞌ mii rii lík, 38ndah mi cépëy feey fa paŋi yee fahaꞌ mi ra, ndaa paŋi yee fahaꞌ ɓëeꞌ wol soꞌ ra. 39Yee fahaꞌ ɓëeꞌ wol soꞌ ra nék daa ri beh : mi ɓanti ñak ow yínë di ƴee déŋéen ɗí soꞌ ra, ndaa mi waɗ waa këllë këllë ɓúudé yiin nay túkkíyé ëldúnë rë. 40Yee fahaꞌ Baasoꞌ ra daa ri bitih : ɓëyí yeel soꞌ mi Koy ka ɓéeɓ te ri gém sëꞌ, ɗi liil pesa na ɗúméh rë, mi këlíɗ ɗí ɓúudé yiin nay túkkíyé ëldúnë rë. »
41Wona won Yéesú biti daa ri ñama kolaꞌ sun ɗa, tahte yëwúɗɗë në úlúm-úlúmú hanndal ki wa 42wonu tih : « Yaa Yéesú koy Suseef neh hanaa ? Yen yúhú boffi a yaafi ! Ɗi wonaꞌ biti ɗi kolaꞌ sun ɗíh ? » 43Yéesú won wa tih : « Yéfí yee na wonu ron hanndal kon ɗa. 44Ow mínéh sëe ɗeefiɗ hém Boffa wol soꞌ ra yejeh ri soo na ; te soꞌ, may këlíɗ ɓëyí baaha ɓúudé yiin nay túkkíyé ëldúnë rë. 45Yonente ya bíníyúté yii beh : “Wa ɓéeɓ, Koope ay waa teeɓ.”#Saame Isayii 54.13 Ɓëyí síkírëh Boffa ɓéeɓ te keloh woni, ɗeefiɗte soꞌ. 46Baa homay won biti ow ëlíɗté Boffa. Soꞌ fa kolaꞌ Koope na ra kut daa mi ot ɗi. 47Mee ron won kaaf ka ra ee : ɓëyí gém sëꞌ liilte pesa na ɗúméh rë. 48Daa mi ñama na onaꞌ pes ɗa. 49Caaccee ke ron ñamu maana luufa ra húlúy ë ? 50Ndaa ɗee man ñama kolaꞌ sun ƴee ra, ɓëyí ñam na ɓéeɓ ii húl. 51Daa mi ñama kolaꞌ sun, na onaꞌ pes ra. Ɓëyí ñam na ñami ƴeh, fay pes faw. Ñama nay mii onee ra daa faan soꞌ ; may rii onaꞌ nda ɓëewë pes. »
52Unna won Yéesú ƴaa ra tahte yëwúɗɗë ɓéyrúté unni wa sun, na capuu hanndal ki wa wonu tih : « Ɓëyí bee mínëꞌ yen yeɗ faani ɗí níi yen ñam ? » 53Ɗi won wa tih : « Mee ron won kaaf ka ra ee : ɗon ñamuy na faan soꞌ mi Koy-ɓëeꞌ te ɗon hanuy na ñif mi soꞌ, ɗon ii naa liil pesa. 54Ɓëyí ñam na faan soꞌ te ri han na ñif mi soꞌ, liilte pesa na ɗúméh rë te may rii këlíɗ ɓúudé yiin nay túkkíyé ëldúnë rë. 55Faan soꞌ ñamaɗ kah-kah, ñif mi soꞌ han kah-kah. 56Ɓëyí ñam na faan soꞌ te han na ñif mi soꞌ, ɗi pokohte soo na te mi pokohte ɗii na. 57Baasoꞌ fa wol soꞌ ra ee pes ɗa, te daa ri tah mi na pes ; ti ɗaaha nen, ɓëyí ñam na faan soꞌ, daa may tahe ɗi pes. 58Ñama kolaꞌ sun-Koo ra daa reeni. Ɓani ƴee húmú ñamu caaccee ke ron húlú rë maduy. Ɓëyí ñam na ñami ƴah, fay pes faw. » 59Na yëeddëꞌ Yéesú unni ƴaa ra, ɗeef ɗi húmú filiɓ tígë na ɗaguu yëwúɗɗë Koope ra, di Kafarnawum.
Taalibe ya heguu ra
60Síkírúu wë Yéesú níi wocce ra, i ow caak di taalibe yi wonu tih : « Unna won ɗi ra neɓeh keloh ! Wa ay tahuu ɗíh ? » 61Bi yúhíɗ Yéesú afi biti taalibe ya úlúm-úlúmú wona won ɗi unni ƴaa ra, ɗi won wa tih : « Baa daa ñogol ɗon a ? 62Ɗon ot soꞌ mi Koy-ɓëeꞌ mi saye sun nimil tígë kolaꞌ mi raa, ɗon ay page yih ? 63Ruuhi Koope daa na onaꞌ pes. Ow tikkiyay yin. Unna won mi ɗon ra kolaꞌ Ruuhi Koope na, te daa wa na tah ow pes. 64Ndaa i ow ɗon na gémúy sëꞌ. » Ƴaaha ɓéeɓ, ɗeef Yéesú maañcee yúh ɓëewë gémúy rí rë, a ɓëeꞌ nay rii yaaye ra. 65Ɗi ɓaatte won tih : « Yii baa daa tah mi won ɗon biti ow mínéh sëe ɗeefiɗ, hém Baasoꞌ tahreh ri ri. »
66Kolaꞌte baaha, ow caak di taalibe yi heguute, wocute ñéerëꞌ a ri. 67Tígí daaha, Yéesú won taalibe yi sabboo a ana ya tih : « A ɗon, ɗon nampi fahuuy saañ neh a ? » 68Simoŋ Peer loffe ri won tih : « Yíkëe, fun ay ñee tal wah ? Daa fu na won unna na kúɗ ow pesa na ɗúméh rë. 69Fun gémúté, te fun yúhúté biti daa fu Ɓëyí selaa ɗúhëꞌ Koope na ra. » 70Yéesú won wa tih : « Daa mi tanis ɗon fi sabboo a ana ya neh a ? Añcaŋ, ow yínë ɗon na seytaane gaan ! » 71Ɗeef ɗi wonaꞌ Yudaas koy Simoŋ Iskariyot. Ɗi fi Yudaas, nonaꞌ ri taalibe yi sabboo a ana ya níi, daa ri nay rii yaaye.
Atualmente selecionado:
Saŋ 6: NDV
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© Wycliffe Bible Translators, Inc. All rights reserved.