PA'JARIANG 6
6
Kaja'dallanna rupataua
1Ri wattunna pila' katambang siagang a'la'bammo ri sikontu linoa rupataua, siagang nilassukammo ana'-ana' bainea, 2nicini'mi ri sikamma rewataya angkanaya ga'ga-ga'ga ngasengi anjo tuloloa. Jari nabuntingimi ke'nanga anjo tulolo massing nangaia ke'nanga. 3Nakanamo Batara, “Tena naKupa'biangi rupataua attallasa' satunggu-tungguna; musti matei ke'nanga. Appakkaramula ri kamma-kammaya anne tenamo nakkulle la'bi ri 120 taung umuru'na.” 4#Pml. 13:33 Ri anjo jammanga siagang ri le'ba'na anjo, nia' tau sannaka lompona ngaseng kalenna ri lino. Anjo ke'nanga ana'-ana' battu ri sikamma anjo tulolo a'buntinga siagang rewata-rewataya. Anjo tau lompoa ngaseng kalenna masahoroki niasseng siagang iami pahlawang-pahlawang lompo ri jammang riolo.
5 #
Mat. 24:37; Luk. 17:26; 1Pet. 3:20 Naciniki Batara antekamma ja'dala'na sikamma rupataua ri lino. Tuli ja'dala'na ngaseng pikkiranna ke'nanga. 6Assesse'lalammi lanri Napa'jarina ke'nanga siagang Naboli'na ammantang ri lino. La'ba sikalimi nyawaNa, 7sa'genna Nakana, “LaKuancuruki anjo rupatau le'baka Kupa'jari, kammayatompa sikamma jangang-jangang siagang olo'-olo' maraengannaya, lanri assesse' lalangKu ampa'jari ke'nanga.” 8Mingka sannangi pa'mai'Na Batara mae ri Nuh.
Nuh
9-10 #
2Pet. 2:5
Iaminne riwaya'na Nuh. Nia' ana'na tallu bura'ne, iamintu Sem, Yafet siagang Ham. Tena nagaukangi Nuh panggaukang salaya, siagang kale-kalenna bawang tau baji' ri anjo jammanga. Sibajiki sikali siagang Allata'ala lalang tallasa'na. 11Mingka sikontu tau maraengannaya ja'dala' ngasengi ri paccini'Na Allata'ala. Jai sikali panggaukang palla' kajariang ri kere-keremae. 12Nacinikimi Allata'ala anjo linoa, na sangnging kaja'dallang mami Nacini', lanri sikamma rupataua ja'dala' ngasemmi lalang tallasa'na.
13Nakanamo Allata'ala ri Nuh, “Le'ba'mi Kupattantu angkana laKubuno ngasengi sikontu apa-apa attallasaka. LaKuancuru' ngasengi ke'nanga siagang apa niaka lalang lino, nasaba' anne linoa rassimi panggaukang palla' nagaukanga ke'nanga. 14Appare'mako se're kappala' kayu ia kassaka pare'na. Apparekko kama'-kamara' lalang ri anjo kappalaka, nampa nulapisi' siagang tere' pantaranganna siagang lalanganna. 15Anjo kappalaka pareki 133 metere' la'buna, 22 metere' sangkara'na, siagang 13 metere' tinggina. 16Parekangi pattongko' anjo kappalaka, siagang pareki 44 sentimetere' bellana anjo pattongkoka battu ri rinring-rinrinna. Pareki a'lonjo tallu pammantanganga ri anjo kappalaka, siagang sarei se're pakke'bu' ri sa'rinna.
17LaKupabattui a'ba lompoa untu' angngancuruki sikamma apa attallasaka ri lino. Lamate ngasengi sikontu apa niaka ri lino, 18mingka erokKa' appare' parjanjiang siagang ikau. Antamakko ri anjo kappalaka siagang bainennu, siagang ana'-ana'nu kammayatompa massing bainenna ke'nanga. 19-20Angngerangko antama' ri anjo kappalaka massing tassikayu laki siagang gana battu ri sikontu rupanna jangang-janganga kammayatompa olo'-olo' maraengannaya, sollanna tena namminawang ancuru' ke'nanga. 21Angngerang tongko sangka' rupa kanre untu' lanakanrea anjo olo'-oloka.” 22#Ibr. 11:7 Nagaukang ngasemmi Nuh anjo sikontu apa Napassuroanga Allata'ala mae ri ia.
Atualmente selecionado:
PA'JARIANG 6: MAK
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
@LAI, 1999