Bikambelo biki bikima 3
3
Petelo la Yoane baikya owʼotengu
1Petelo la Yoane baounda nda Tempelo ndʼekeke ea boondo, wete jefʼasato lʼokolo. 2Ko banto baotombʼeko bontʼomo oki lʼotengu lima likunju ja nyango ekae, ko baoloambya wengi mbile nda wiso wa Tempelo botangema wa Lituka, kela alombe lima bandotswa ndʼilombe nganji yʼisei. 3Akiʼndʼene Petelo la Yoane bayotswa ndʼilombe, aolalomba nganji yʼisei. 4Ko Petelo aoloaka baiso, lʼende la Yoane, ko aolokela, Otoalʼiso. 5Bontʼoko aolaala, ekiʼndʼolendezaka yomba limʼelʼiyo. 6Lolonde Petelo aolokela, Mpa lʼosolo la wolo, lolo yomba iatʼemi nkokaya we. Nda lina ja Yesu Masiya, owa Nazaleta, emalaka ko kenda. 7Ko aolokita la likata jʼelome, aoloemaza. Ko nkakoyoko bakaka bakae la bakese bakande baokema bolo. 8Ko aofumbwa, aolemala ko aokenda. Aolotswa lʼiyo nda Tempelo, ayokende, ayotambe, ko ayomemya Nzakomba. 9Ko bantʼauma baolena akendʼende ko amemyʼende Nzakomba. 10Ko baololongoza, ko baolena wete ale nkʼende okokitase nda wiso wa Lituka wa Tempelo, olombaki nganji yʼisei; ko baokamwa lʼekamwelo mongo ko baokakaza la joi likelamaki elʼende.
Lilako ja Petelo nda Tempelo
11Akatemelʼende Petelo la Yoane, bantʼauma baolikumwa elʼiyo nda mbalasai ea Solomo, bayokamwa kamo. 12Aki Petelo enaka ngoko, aokela banto wae, Banto ba Yisalaele, lokamwa la joi line lae? Ko lotoalʼiso, o nga iso tokenzakʼontʼone la mpamba ekiso la njelama ekiso lae? 13Nzakomba ea Abalayama la Yisaka la Yakoba, wete Nzakomba ea Baise bakiso, ayokumya Bona okande, Yesu: wete ende okiʼnyʼolekyaka ko okiʼnyʼotandolaka nda joso ja Pilato, nkʼakiʼndʼolangaka otungolʼende. 14Lolo inyo langanaki ende owʼoeko lʼowa Liongi, ko luolaki wete boomi owʼanto atungwʼelʼinyo. 15Ko loomaki Roi ea Loiko. Lolo Nzakomba oetolakʼende limʼele bawei. Ko iso tole bandenaki ba joi liko. 16Ko lʼimeezo nda lina likande bontʼone ondenʼinyo ko ondea inyo, akema bolo o nda lina likae; ko imeezo eko elʼende eoikya bontʼone lʼeikyelo ea kolongo nda joso likinyo bauma.
17Ko aeyoko, balongo, njea wete lokelaki joi liko la bosamba wa nkotola, o lʼinyo la bampifo bakinyo ngoko. 18Lolonde ndʼelenge ene Nzakomba aolieza baoyiʼako bakiʼndʼotelaka lʼemwa bia bateli bauma, wete Masiya ekae acwʼena elo. 19Ndʼewelʼeko loututala ndʼetema bekinyo ko lokengwana, kela baoyiʼobe bakinyo bafofyame, mpanga bikeke bia ncicima biye lima elongi ea Nkolo. 20Mpa ende atomʼelʼinyo Masiya Yesu, okiʼndʼobuzaka ndʼeloko ekinyo lima joso. 21Nda joi likae likeji wae loola oambʼende elaka nkʼekeke ea iezelo ea baoyiʼauma, ngoki Nzakomba otefelaka lima kalakala lʼemwa bia bateliʼakae bʼoeko. 22Mose aokela, Nkolo Nzakomba ifemaezʼinyo, limʼele balongo bakinyo, boteli omo ngolʼemi; lifokozʼende ndʼaoyiʼauma baʼendʼosangelʼinyo. 23Ko joi lifiela wae wengiʼonto, ngʼafokoza boteli oko, ifomelengana limʼelʼanto nye. 24Ko bateli bauma lima Samwele lʼiyʼandokimaki, baotela ko baokumya bembile bene. 25Inyo lole bana ba bateli, ko la ba bokolo boki Nzakomba olembaka lʼaise bakinyo, ekiʼndʼosangelaka Abalayama wae, Baoci bauma bʼokili bifosakema bokako wa swa o lʼanʼake. 26Aki Nzakomba oetolaka bosali okande limʼiwa, aolotoma elʼinyo nda joso, wete asakelʼinyo bokako wa swa, ekengolʼende wengiʼonto okinyo lima baoyiʼobe bakinyo.
Atualmente selecionado:
Bikambelo biki bikima 3: LOL87
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
La Bible en Lomongo © Societe Biblique de la R.D. Congo 1987