Yoane 18
18
Ekandelo ea Yesu nda lisala
(Mt 26.47-56; Mk 14.43-50; Lk 22.47-53)
1Aki Yesu osilʼotefela baoyiʼako, ende lʼakimiʼakae baolola, ko baofenda ikeji ya Kidelona, ko baolotswa nda lisala liki eko, ende la bakimiʼakae. 2Ko Yudasa ondoangelakʼende eaki itenelʼiko: eki Yesu otakanaka lʼakimiʼakae eko betakana beuke. 3Yudasa akolaki boloi wa soldats lʼasali limʼele nkanga ya joso la Bafalusi, baocwʼeko la totswa la benoi, ko la bifeko biʼetumba. 4Yesu aolea baoyiʼauma bacwʼokelama elʼende, aolola, ko aolauola, Ondasʼinyo na? 5Baoloamba, Yesu owa Nazaleta. Yesu aolakela, Emi nde nkʼende. Ko Yudasa ondoangela, akemi eko lʼiyo. 6Akiʼndʼokelaka, Emi nde nkʼende, baolututa, ko baokwa ndʼamoici. 7Aolauola lenkina, Ondasʼinyo na? Baolokela, Yesu owa Nazaleta. 8Yesu aolamba, Nsangelakʼinyo, emi nde nkʼende; nkina londasʼemi, kela bane bakende; 9la ncina wete joi likiʼndʼotefelaka likelame, Limʼelʼiyo baki wʼonkaaka ncicweyʼomoko. 10Simona Petelo, oki lʼifaka yʼetumba, aolosolʼiko, ko aokota bokwala owa nkanga ea joso mongo, ko aotena litoi likae jʼelome se. Lina ja bokwala oko wete Maluko. 11Yesu aokela Petelo, Uteya ifaka ndʼekofa; ekala eki Fafa onkaaka, la mpao-mela eko nde?
Yesu nda joso ja Anasa
12Nkako boloi wa soldats, la capitaine lʼasali bʼa-Yuda baokanda Yesu ko baolotungya, 13ko baolotomba eka Anasa nda joso, ende oki bokilo owa Kayafa, nkanga ea joso mongo nda mbulʼeko. 14Kayafa wae ende osangelaki Ba-Yuda wae eonga wete bontʼomoko awe ndʼeloko eʼantʼauma.
Anganelo ea Petelo
(Mt 26.69-70; Mk 14.66-68; Lk 22.55-57)
15Simona Petelo lʼokimi omo baokima Yesu. Nkanga ea joso mongo aolea bokimi oko, ko ende aolotswa la Yesu ndʼilombe ya nkanga ea joso mongo. 16Lolo Petelo aolemala ndanza ntutama la wiso. Nkako bokimi oko oki nkanga ea joso eaka, aolola, ko aotefela lʼomoto ondesanyaki wiso, ko aolotsweya Petelo. 17Nkako bomoto ondesanyaki wiso aokela Petelo, Wʼofa omo owʼakimi bʼontʼone? Ende akela, Emi mpʼokimi okae nye. 18Bakwala la basali bakemi eko, ko baambolaki tsa ta baala, ndʼewelʼeki mpio; ko boka tsa; koko Petelo akemi lʼiyo ko ende oka tsa ngoko.
Nkanga ea joso mongo aoluola Yesu biuo
(Mt 26.59-66; Mk 14.55-64; Lk 22.66-71)
19Nkanga ea joso mongo aoluola Yesu ndʼeloko ea bakimi bakae ko la lilako likae. 20Yesu aoloamba, Njotefeela banto bʼokili ndʼesayenge; ndakaki banto nda sunangonga wengiʼaefa, ko nda Tempelo, etakana Ba-Yuda bauma; ko ncitefela joi limoko ja lokuko. 21Onjuolʼemi lae? Wʼauolʼiyo bandokaki baoyi bakiʼmʼasangelakʼiyo. Bala, bane bea baoyi bakiʼmʼotefelaka. 22Akiʼndʼotefelaka baoyiʼane bosali omo akemi eko, ko asakolaki Yesu lotaka, akela, Ene wae elenge endamba we nkanga ea joso mongo? 23Yesu aoloamba, Nga ntefelaki bobe, sanga bobe boko; lolo nkina bolotsi, onsakola lae? 24Nkako Anasa aolotoma ntungama ele Kayafa nkanga ea joso mongo.
Petelo aolangana Yesu lenkina
(Mt 26.71-75; Mk 14.69-72; Lk 22.58-62)
25Simona Petelo akemi ko oka tsa. Baolokela, We ngoko ole omo owa bakimi bakae? Aolangana, akela, Emi mpʼokimi okae nye. 26Omo owʼakwala ba nkanga ea joso mongo, oki eoto eʼonto oki Petelo otenaka litoi, akela, Ncikenaki we nda lisala lʼende nde? 27Petelo aolangana lenkina; ko nkakoyoko nsoso eoeka.
Yesu nda joso ja Pilato
(Mt 27.1-2, 11-14; Mk 15.1-5; Lk 23.1-5)
28Baoloza Yesu limʼele Kayafa, ko baolotomba nda Pretoire. Eki wae ekyelo ea jefa. Iyo mongo ntabotswa nda Pretoire nyango bafoekwa boeko, lolo bale elambo ea Efendelo. 29Ndʼewelʼeko Pilato aolola elʼiyo, ko akela, Likambo liakʼinyo bontʼone na? 30Iyo baoloamba, Nga bontʼone ntaki bokeli owʼobe, siki ntatolekyʼende ele we. 31Nkako Pilato aolakela, Inyo mongo lokolʼende, ko lotenele likambo likande, elengʼele Esekyelo ekinyo. Ba-Yuda baolokela. Iso tofekama wae tofoomʼonto; 32ngoso joi likelamaki liki Yesu otefelaka, akiʼndʼeneyaka elenge ea iwa i endʼowa.
33Nkako Pilato aoluta nda Pretoire ko aoleta Yesu ko aolokela, La we, ole Roi ea Ba-Yuda? 34Yesu aoloamba, Otefela joi line limʼele we mongo, nkina bamo bakosangelaki liko ndʼeloko ekami? 35Pilato aolamba, La emi nde bosi Yuda? Banto bʼese eke mongo la nkanga ya joso bakolekyaki elʼemi; joi liki wʼokelaka na? 36Yesu aolamba, Likulaka likami lifa limʼokili bone; nga likulaka likami liki limʼokiliʼone, siki basaliʼakami baunaki wae mpolekyame ele Ba-Yuda: lolo aeyoko fele likulaka likami lifa limʼendo. 37Pilato aolokela, Siki nde wʼole Roi? Yesu aolamba, Wondokela wae emi nde Roi. La ncinʼene mbotswaki, ko la ncinʼene njoya ndʼokili, wae nsangelʼanto nsosolo. Wengiʼonto ole owa nsosolo, okoza lolaka lokami. 38Pilato aolokela, Nsosolo eko ele na?
Pilato aomeka lotungola Yesu
(Mt 27.15-31; Mk 15.6-20; Lk 23.13-35)
Koko akiʼndʼotefelaka joi line, aolola lenkina ele Ba-Yuda, ko aolakela, Mpenʼekwa ea likambo elʼende nye. 39Lolo inyo lole la lolendezo wae ntungwelʼinyo bontʼomoko ndʼekeke ea elambo ea Efendelo; lolanga nde ntungwelʼinyo Roi ea Ba-Yuda? 40Nkako baobeleza, bakela, Afa bontʼone; lolo Balaba. Ba-laba aki bofunji.
Atualmente selecionado:
Yoane 18: LOL87
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
La Bible en Lomongo © Societe Biblique de la R.D. Congo 1987