Bambata Pai 1
1
Pa fu zegino na aboro
1Ho rago aenge ni Mbori afu ngbangbaturũ na kpotosende. 2Kpotosende ki du ni ku he ni kina kungba ha, kina bitimo ki du auru dudungura rago dunduko; ga Mbori Toro ki niyanga ayanga ri aime.
3Mbori ki ya, “Imarago dú adu”; imarago ki du. 4Mbori ki bi imarago ya si ni wene he; Mbori ki kpara imarago ti bitimo. 5Mbori ki yambu rimo imarago nga Uru, ko ki yambu rimo bitimo nga Yuru. Nyemu ki du na wiso, si ki ngia bambata uru.
6Mbori ki ya, “Ari dú adu bebere aime, ka kparaka ime ti ime.” 7Mbori ki fu ari ki kparaka gu ime nadu tii ari ti gu ime nadu ku ri ari. Si ki du wo. 8Mbori ki yambu rimo ari nga Ngbangbaturũ. Nyemu ki du na wiso, si ki ngia ue uru.
9Mbori ki ya, “Gu ime du tii ngbangbaturũ si dúngura tihe ku rogo ba sa, ugu rago kúru.” Si ki du wo. 10Mbori ki yambu rimo ugu rago nga Kpotosende, ko ki yambu rimo gu dunguradungura ime nga Baime. Mbori ki bi he ya si ni wene he. 11Mbori ki ya, “Kpotosende dunduko bátika kurukuru ahe, nga agu rũkurũku ahe namaa tungaha, na agu angua nazuka zuzuhe du na tungaha rogo ho ngba arikaha.” Si ki du wo. 12Kpotosende ki batika kurukuru ahe nga agu rũkurũku ahe namaa tungaha ngba arikaha, na agu angua nazuka zuzuhe du na tungaha rogo ho, ngba arikaha. Mbori ki bi he ya si du ni wene he. 13Nyemu ki du na wiso, si ki ngia biata uru.
14Mbori ki ya, “Imaahe dú rogo gu ariyo nga ga ngbangbaturũ ka kparaka uru ti yuru; si dú tipa yuguyugupai a na tipa regbo ahe na tipa arame na tipa agarã, 15si dú tipa imaahe a rogo gu ariyo nga ga ngbangbaturũ ka hasa rago ku auru kpotosende.” Si ki du wo. 16Mbori ki fu gu bakere imaahe du ue, gu bakere he ka zoga uru, na gu umba imahe ka zoga yuru; ko ki fu akerekuru a. 17Mbori ki moi ra rogo gu ariyo nga ga ngbangbaturũ ami nihasi rago ku auru kpotosende, 18ki zogo uru na yuru a, ko akparaka imarago ti bitimo. Mbori ki bi he ya si ni wene he. 19Nyemu ki du na wiso, si ki ngia biama uru.
20Mbori ki ya, “Ime bátika agu agbiro kpaima nawo awo du na unga ni dungu ra, azire ki guku auru kpotosende rogo gu ariyo nga ga ngbangbaturũ.” 21Mbori ki fu gu kikindigi anya ime, na agu agbiro dunduko du na unga nawo awo nga agu ra ime nabatika ra ni badungu ra, ngba arikara, na agu azire dunduko du na apupora ngba arikara a. Mbori ki bi he si ni wene he. 22Mbori ki fu maku fu ra, ki ya, “Oni zúga ki nge ange ki hiki gu ime du rogo abaime yo, azire ningé ange ku auru kpotosende a.” 23Nyemu ki du na wiso, si ki ngia bisue uru.
24Mbori ki ya, “Kpotosende bátika unga anya ngba arikara: nga zogozogo anya na agu ra nagbe tira sande na anya nvuo nga ga kpotosende ra ngba arikara.” Si ki du wo. 25Mbori ki fu agu anya nga ga kpotosende ra ngba arikara, na agu anya nga zogozogo ra ngba arikara, na agu agbiro dunduko nagbe tira sande ngba arikara. Mbori ki bi he ya si ni wene he.
26Mbori ki ya, “Ani fú boro ni kpiarani, wa kina rani; i zógo atĩo baime, na azire ari, na agu anya nga zogozogo ra, na kpotosende dunduko na agu agbiro dunduko nagbe tira sande.” 27Mbori ki fu boro ni kpiako, kpia Mbori Mbori afu ko ni; kumba na de ko afu yo. 28Mbori ki fu maku fu yo, Mbori ki ya fu yo, “Oni zúga azuga, ki nge ange, ki hisi kpotosende berewe ki zogo ho; ki nikindo auru agu atĩo du baime yo na auru azire ari na gu unga anya dunduko nawo awo auru kpotosende.” 29Mbori ki ya, “Oni ngére, mi fu ngbatunga rũkurũku ahe dunduko fu roni namaa tungaha du auru kpotosende dũ, na agu angua dunduko nazuka zuzuhe nga gu du na tunga rogo ho; si adú fu roni ni riahe. 30Mi fu ngbatunga kpe kurukuru ahe dunduko ni riahe fu agu anya du auru kpotosende dũ, na fu agu azire ari yo dũ, na fu agu agbiro dũ nagbe tira sande nga agu ra du na unga dunduko.” Si ki du wo. 31Mbori ki bi agu ahe dunduko ko amangi he, oni ngére, si ki du ni wene he gbe. Nyemu ki du na wiso, si ki ngia sita uru.
Atualmente selecionado:
Bambata Pai 1: ZB1978
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
La Sainte Bible en Zande © Alliance Biblique Universelle, 1978.