Lyuk 24
24
Di Grev Ɛmti
(Matyu 28:1-10; Mak 16:1-8; Jɔn 20:1-10)
1Ali Sɔnde mɔnin bifo do klin, di uman dɛn bin dɔn rich na di grev. Dɛn kɛr di spays we dɛn bin dɔn miks rɛdi. 2Wɛn dɛn rich na di grev, dɛn si se di ston we bin kɔba di grev domɔt nɔ kɔba am igen. 3Wɛn dɛn go insay di grev, dɛn nɔ si Masta Jizɔs in bɔdi. 4Aw dɛn de wɔndrin bɔt wetin bi, wantɛm dɛn si tu man dɛn we wɛr brayt brayt klos kam tinap klos dɛn. 5Dɛn fred ɛn butu dɛn fes na grɔn. Di man dɛn aks dɛn se, “Wetin mek una de luk fɔ pɔsin we gɛt layf pan dɛn wan we dɔn day? 6Jizɔs nɔ de na ya, i dɔn rayz frɔm di grev. Una mɛmba wetin i bin dɔn tɛl una wɛn i bin de wit una na Galili? 7I bin se dɛn go ol Mɔtalman Pikin ɛn an am gi dɛn wikɛd pipul we go kil am, ɛn bɛr am, bɔt i go rayz frɔm di grev di de we mek tri.”
8Da sem tɛm de, dɛn mɛmba wetin Jizɔs bin tɛl dɛn, 9dɛn kɔmɔt na di grev, go bak na tɔŋ ɛn tɛl Jizɔs in ilɛvin lanin bɔy dɛn ɛn ɔl di ɔda pipul dɛn we bin de wit Jizɔs, wetin bi. 10Na Meri we kɔmɔt Magdala, Joana, Meri we na Jems in mama, ɛn di ɔda uman dɛn we bin de wit Jizɔs; na dɛn bin tɛl Jizɔs in lanin bɔy dɛn wetin bi. 11Bɔt di lanin bɔy dɛn nɔ bin biliv bikɔs dɛn bin min se na nɔnsɛns di uman dɛn de tɔk. [ 12Bɔt Pita rɔn go na di bɛriŋrɔn, i tinap ɛn luk insay di grev. I si di klos we dɛn bin tek rap Jizɔs in bɔdi insay di grev, bɔt i nɔ si Jizɔs in bɔdi. I tɔn bak go nain os de wɔndrin wetin bi.]
Dɛn De Go na Ɛmeɔs
(Mak 16:12-13)
13Di sem de, tu man dɛn we bin biliv pan Jizɔs bin de go na wan vilej we nem Ɛmeɔs. Frɔm Jerusɛlɛm to dis vilej ya na sɛvin mayl. 14Di tu man dɛn bin de tɔk bɔt ɔl wetin bin jɛs bi na Jerusɛlɛm. 15Wɛn dɛn tu de tɔk, Jizɔs go nia dɛn ɛn bigin waka wit dɛn. 16Di tu man dɛn si Jizɔs, bɔt i tan lɛkɛ se sɔntin nɔ mek dɛn no se nain. 17Jizɔs aks dɛn se, “Wetin una de tɔk bɔt naw we una de waka go?”
Di tu man dɛn jɛs tinap saful, dɛn at pwɛl. 18Wan pan dɛn tu we bin nem Klio pas se, “Tinkya, na yu wangren na trenja we nɔ no wetin dɔn bi na Jerusɛlɛm, dɛn de ya we jɛs pas?”
19Jizɔs aks dɛn se, “Wetin bi?”
Dɛn se, “Dɛn tin we bi to Jizɔs we kɔmɔt Nazarɛt. Na bin prɔfɛt we sho pipul Gɔd in pawa bay aw i bin de tɔk ɛn di wɔndaful wok dɛn we i bin de du. 20Wi bigman dɛn we de mek sakrifays fɔ pipul sin ɛn wi bigman dɛn we de rul na di tɔŋ kɛr am go bifo Paylet mek i sɛntɛns am fɔ mek dɛn kil am; dɛn mek dɛn nel am pan di krɔs ɛn kil am. 21Wi bin abop se na dis man we nem Jizɔs, Gɔd dɔn sɛn fɔ kam fri Izrɛl. Ɛn pan tap ɔl dat, tide mek tri de sins we ɔl dɛn tin ya bi. 22Pantap dat igen, sɔm pan dɛn uman we de wit wi mek wi wɔnda. Dɛn go na di bɛriŋrɔn dis mɔnin, 23bɔt dɛn nɔ si Jizɔs in bɔdi na di grev. Wɛn dɛn kam bak, dɛn tɛl wi se i bin tan lɛkɛ dɛn de drim, nain dɛn si enjɛl dɛn de, di enjɛl dɛn tɛl dɛn se Jizɔs nɔ day, i gɛt layf. 24Sɔm pan wi kɔmpin dɛnsɛf go na di grev ɛn dɛn mit am lɛkɛ aw di uman dɛn kam tɔk, bɔt dɛn nɔ si Jizɔs.”
25Jizɔs tɛl dɛn se, “Una nɔ gɛt sɛns, una at fɔ biliv ɔl wetin dɛn prɔfɛt bin dɔn tɔk! 26Una nɔ no se di Mɛsaya bin fɔ sɔfa dɛn tin ya fɔ mek i go ɛvin go gɛt ɔna?” 27Jizɔs bigin wit Mozis ɛn dɛn ɔda prɔfɛt ɛn ɛksplen ɔl wetin dɛn rayt na Gɔd in Buk bɔt am.
28Wɛn di tu man dɛn bin dɔn de rich klos di vilej we dɛn bin de go, Jizɔs mek lɛkɛ se in de pas di vilej, 29so di tu man dɛn beg am fɔ slip na di sem os wit dɛn. Dɛn se, “Lɛ wi ɔl slip na ya bikɔs di tɛm dɔn let.” So Jizɔs go wit dɛn. 30Wɛn dɛn sidɔm fɔ it, Jizɔs tek di bred ɛn pre pan am, i kɔt kɔt am, dɔn i sheb am gi dɛn. 31Wɛn Jizɔs du dat, wantɛm i tan lɛkɛ dɛn yay opin, dɛn no se na Jizɔs insɛf de wit dɛn, bɔt da sem tɛm de, Jizɔs jɛs lɔs pan dɛn. 32Dɛn bigin tɔk se, “Nɔto dat mek sɔntin tɔch wi at wɛn i bin de tɔk ɛn wɛn i bin de ɛksplen wetin dɛn rayt na Gɔd in Buk, wɛn wi de kam?”
33Dɛn grap wantɛm ɛn go bak na Jerusɛlɛm, dɛn mit di ilɛvin lanin bɔy dɛn ɛn sɔm ɔda pipul gɛda wan ples. 34Dɛn tɛl di tu man dɛn se, “Wi Masta dɔn rayz frɔm di grev ɛn i dɔn sho insɛf to Saymɔn!”
35Na de di tu man dɛn tɔk wetin bi to dɛn na rod wɛn dɛn bin de go Ɛmeɔs ɛn aw dɛnsɛf no se na Jizɔs wɛn i sheb di bred gi dɛn.
Jizɔs Sho Insɛf to In Ilɛvin Lanin Bɔy dɛn
(Matyu 28:16-20; Mak 16:14-18; Jɔn 20:19-23; Apɔsul Dɛn Wok 1:6-8)
36Da sem tɛm de we dɛn de tɔk, Jizɔs jɛs tinap midul dɛn ɛn se, “Mek una gɛt kol at!”
37Dɛn skyad ɛn fred, dɛn min se na gost dɛn si. 38Jizɔs aks dɛn se, “Wetin mek una de fred ɛn una de wɔnda udat dis? 39Una luk mi an ɛn mi fut, na mi sɛf sɛf dis. Una tɔch mi ɛn luk mi gud fashin bikɔs gost nɔ gɛt bɔdi ɛn bon lɛkɛ mi.”
40Wɛn Jizɔs dɔn tɔk to dɛn, i sho dɛn in an ɛn in fut. 41Wetin dɛn yɛri ɛn wetin dɛn si mek dɛn gladi sote dɛn wɔnda if na tru. Jizɔs aks dɛn se, “Una gɛt ɛnitin fɔ it na ya?” 42Di lanin bɔy dɛn gi am ros fish. 43I tek di fish ɛn it am bifo dɛn ɔl yay.
44Jizɔs tɛl dɛn se, “Wɛn a bin de wit una, a bin dɔn tɛl una se ɔltin we Mozis ɛn dɛn prɔfɛt bin rayt ɛn ɔl wetin dɛn rayt na di Sambuk bɔt mi, mɔs bi.”
45Jizɔs opin dɛn ed fɔ mek dɛn ɔndastand wetin dɛn rayt na Gɔd in Buk. 46I tɛl dɛn se, “Dɛn rayt se di Mɛsaya gɛt fɔ sɔfa ɛn i go rayz frɔm di grev di de we mek tri. 47Fɔseka di tin we i du ɛn se, una fɔ go na Jerusɛlɛm fɔs, dɛn ɔlɔbɔt na wɔl, go tɛl pipul fɔ lɛf fɔ sin ɛn da tɛm de Gɔd go padin dɛn sin. 48Unasɛf dɔn si ɔl dɛn tin ya ɛn una fɔ tɛl ɔda pipul bɔt dɛn. 49A go sɛn wetin mi Papa dɔn prɔmis to una. Bɔt una wet na Jerusɛlɛm sote una gɛt pawa we kɔmɔt ɛvin ɛn kɔba una lɛkɛ kɔba klos, bifo una go.”
Jizɔs Go na Ɛvin
(Mak 16:19-20; Apɔsul Dɛn Wok 1:9-11)
50Jizɔs waka wit in lanin bɔy dɛn kɔmɔt Jerusɛlɛm ɛn i de bifo dɛn sote dɛn rich Bɛtani. Wɛn dɛn rich de, i es in an ɔp ɛn blɛs dɛn. 51As i de blɛs dɛn so, i go ɔp na ɛvin. 52Di lanin bɔy dɛn nil dɔŋ bifo am fɔ wɔship am, dɔn dɛn go bak na Jerusɛlɛm wit gladi. 53Dɛn bin de go na Gɔd in Os ɔltɛm go prez Gɔd.
Atualmente selecionado:
Lyuk 24: KRIO13
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Krio Bible © The Bible Society of Sierra Leone, 2013.