Luka 24
24
Iruka lya Yesu
(Mat 28:1-10; Mar 16:1-18; Yoh 20:1-10)
1Naasa nkonu ulya wepooka mfungare vakeenda alya mbangeny na ivishivishi lya ngama varie miri ilya ifwaamaa. 2Naasa vakakooya iwe llya lyikee ikunnye mbai lyammbutwa yoo mbangeny. 3Naasa vakaanga nafo valalollye-fo nnying'a ulya wa Nndumi Yesu. 4Nalyo kyikava elyi veefo vafulukyo nkindo ekyo, nalyo akakava vasero vavii vavasheya tiny varee soori timika-mikaa. 5Naasa vakatirwa mmbwerei vakafiikya fisangu si. Nawo vakavavia, “Yeu akee na muu nkyikyi elyi mwanduuya yaa ando a vafu?” 6Nnyakyikee-se yaa-fo, mmbo annduka! Kummbweny kilya alemuvia kulya Galilaya, 7eshambaa kya Mwana yeto wa nndu shaasa kyikee kirummbwe nanderambikyo efo maakony a vandu valyamari na idekapyo nsalabeny na elyi lya nkonu wa kararu nawuye iruka-ny. 8Nalyo vakakummbwa marero alya akwe. 9Nalyo vakawuya na kyeny vauka alya mbangeny. Vakandeongoya valya ikumi na umwi na valya vengyi mbony tilya toose. 10Naasa kwiifo Maria wa kulya Magdala, na Yoana, na Maria we maye wa Yakobo, na valya vengyi veryani nawo, mmbo valendevia vakiloshyony vakwe mbony tilya, 11nawo marero alya akavaviiya ni a urung'ani nta valaveerikye. [ 12Naasa Petro kakwiipoo keenda kulya mbangeny eerishaa, keemaiya-fo kalollya firami filya fyeni fyeerika, kawuya eetirwa ntamba kya kilya kyatanyika.]
Kyaaro kya yeenda Emau
(Mar 16:12-13)
13Nalyo akakava vandu vavii va efo nnang'ani yaawo na nkonu ulya mweni veefo vasheenda kundo kwa muriny nafo kwauka kulya Yerusalemu kusheendaa ando a saa ivii kufike-fo, na irina lya vayo ni Emau. 14Nawo vakava vareraany kya mbony tilya tiletanyika toose. 15Naasa, veefo vekapaa indo sumu na yuumburana, nalyo Yesu muni kasha nang'u, keenda aryani nawo. 16Na miso awo akasikywa nta valamanyi mmbwe. 17Nawe kavavia, “A ni marero eekyi mwavesana indo elyi mwiifo mushendaa?” Vakairisha vekushye fisangu fyawo. 18Na ulya umwi avangwaa irina lyakwe ni Kleopa kaalwa kambia, “A nnyewe kumuni kusheye na kunu Yerusalemu kukee muny, kwara kulamanya mbony yeto tiletanyika mikonu yei myaangu?” 19Nawe kavavia, “A mbony yeekyi?” Vakammbia, “Ni ta Yesu wa kulya Nasareti-te ekee nndu mwauya fisuku kaveva mwiidimi itana findo finiini, fyeetana na fyeerera kikalollyo ni Iruva na vandu woose va kunu urukeny. 20Na vakohani veru vaniini vakasanga na vandu veru va nrwe vakanrambikya-fo nandeutyo uvingo lweewaawa. Vakankapya nsalabeny. 21Neese mmbo lweembikye nsia lukaamba, we mmbwe yeto eekaa nawouwe vandu va Israeli. Na findo efyo firyani indo nkonu wa inu mmbwa kararu uka fyantanyika indo. 22Na kingyi-se ni vaka va kunu kweru vaangu valelwaawuta muu. Mmbo valefika kulya mbangeny elyi ngama nraasi. 23Nta valakooye-fo mwiili wa Yesu. Vakasha veshambaa ni vasu va Iruva vavakooya-fo vekooraa nawo paa, vakaamba, ‘Eefo na muu.’ 24Na vandu va kweru maata vakandesaiya alya mmbangeny vakakooya ni indo kyikai shaasa vaka valya vaamba, indi we muni mmballolya-fo.” 25Nawe kavavia, “Apaa vandu murung'ani, muvetiri na ngoo tikee shiroo ikusirya na filya fikee firere ni valya veawuya fisuku fyoose. 26A nshi indo kivekee kirummbwe Kristo nasonngwe indeliswa ukyiva yelo loose, navekwiiryany neefo usuriny lwakwe?” 27Nawe kapookya Mose na valya veawuya fisuku woose kavatambashuya mbony tikee shirere kyakwe ta efo mareiyony moose. 28Naasa vakaparikya kulya muriny kundo veshendaa. Nawe kakwaalwa sheelyi akundye yeenda na mbee. 29Vakamwiikyima vakaamba, “Kaa kweru mmbee, mashika kwiifo kushilaa.” Nawe kaanga neefo mmba kakaa nawo. 30Naasa kyikava elyi akee nawo rembo vashelyaa shonga, nawe keepoo nkate kaana Iruva, kaufisha-fisha fyenga kavaavya. 31Nalyo miso awo akaambuka vakamanya mmbwe. Veru, kavaverukya valakillolye-se.
32Vakaumburana wo veni na veni vakaamba, “Ate ngoo teru nteekeyaaka-aka kunu nnang'ani yeeru elyi eefo eereraa neese efo shia elutambashuyaa mbony tilya tikee shireiye?” 33Vakakwiipoo saa ilya sheni vakawuya na kulya Yerusalemu. Vakakooya valya ikumi na umwi, vakuumbye ando amwi, na valya vavandami nawo. 34Vakakooya veshambaa, “Nkya dede Nndumi annduka kakoora na Simon!” 35Nawo llyo valevaongoya mbony tilya ta efo shia na shaasa wo vammanya elyi afisha-fisha nkate ulya.
Yesu akoora na Vakiloshyony vakwe
(Mat 28:16-20; Mar 16:14-18; Yoh 20:19-23; Mav 1:6-8)
36Naasa veefo vereraa indo we muni kashesalala yoo nnang'ani yaawo. Kavavia, “Kaeny na ufoo!” 37Nawo vakamatuka vakatirwa mmbwerei, veeshi ni kirishe kya nndu mfu valolya. 38Nalyo kavavia, “A kimaruma ukasavaa indo nkyokyi? Mukavetirwa mmakusaro a nyinyira naambo-kyi?” 39Keloleny maako akwa na marende akwa mumanyi mmbwe yeny! Muveshilola mashika kirishe kya nndu mfu nkitiri mwiili nta mafua shaasa mushilollye yeny-fo. 40Ekyaamba indo kawoora maako akwe na marende akwe. 41Kakooya valandeedima iirikya deny kimaruma kya nsia uvatiri sanda na isongololo. Kavavia, “A ndesa mutiri kindo kyeelya yaa?” 42Nalyo vakaniingya kiparwe kya ikunga yookye. 43Kawarya kalya velollye. 44Naasa kavavia, “Marero alya akwa shilemuvia llya shekee neeni ng'u yaa. Mmbo kyikee kirummbwe kundeinutyo mbony tilya toose tikee shireiye efo uvavasony lwa Mose na Vakisuku na Saburi.” 45Nalyo kapooka ivasukuya kya mareiyo. 46Kavavia, “Ni indo-da kyikee kireiye Kristo nandelyiswa ukiva na iruka narukeny auka kwa vafu elyi lya nkonu wa kararu.” 47Nalyo kandekapwa weele kyikee kya irina lyakwe efo kwa vandu va masanga woose vaalashike efo nriminy vakooye ifwaaywa ulyamari lwawo, kipookya kunu Yerusalemu. 48Neeni mukavaany mmbo vakureekyi va mbony eti toose. 49Neeny shimurummyaa ekyo kyiledeeryo kyaasa ni Nde kishemoolokyaa kimukaye. Indi yeni kaeny kunu Yerusalemu kutani mwaningwa finya yuuka efo uwe.
Yesu arwa iruveeu
(Mar 16:19-20; Mav 1:9-11)
50Naasa kavauta kulya muriny kavafita kulya shia ya yeenda na Betania. Kaipoo maako akwe kavavikya mbora. 51Kyikava elyi eefo avavikyaa mbora kavauka karoswa na efo iruveeu. 52Nawo vakawuya na kulya Yerusalemu vatirwa ni nsia mwiingyi. 53Vakava vesindaa efo mmba ya Iruva kyeeri kyoose veshaarafumaa Iruva.
Atualmente selecionado:
Luka 24: MASNT00
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
New Testament in Kimashami © Bible Society of Tanzania, 2000.