Yowano 7
7
Yesu mwaya kuchiwanyino chaVisakila
1Kufuma haze, Yesu ahitanganyine muNgalileya. Kasakile kuhitangana muYuleyako, mwomwo vaYuleya vasakilenga kumujiha.
2Jino likumbi lyachiwanyino chavaYuleya chaVisakila lyapwile nakupandama hakamwihi.
3Shikaho, vandumbwenyi vamwambile ngwavo, Fuma kuno uyenga kuYuleya, mangana tumbaji twove nawa vakamone vilinga vyove uli nakulinga#7:3 MuchiHelase ngwavo, milimo uli nakulinga..
4Mwomwo kakweshi umwe mwazachila kupengeko, nge nasake vamutachikize hatoma. Nge weji kulinganga vyuma evi, lisolole kuli vaka-kaye.
5(Mwomwo chipwe vandumbwenyi kavamufweleleleko.)
6Ngocho Yesu avalwezele ngwenyi, Likumbi lyami kanda lihete, oloze enu kala likumbi lyamitela.
7 Vaka-kaye kaveshi kuhasa kumihungako, oloze Ami vanguhunga, mwomwo ngweji kuhananga unjiho wakwamba ngwami vilinga vyavo vyavipi.
8Enu kandukenu tuhu kuchiwanyino. Aminyi kangweshi kukanduka kuchiwanyino echi oholiliko, mwomwo likumbi lyami kanda lihete.
9Omu ahanjikile ngocho, himwasala kuNgalileya.
10Oloze omu vandumbwenyi vahetele kuchiwanyino, Ikiye nawa akandukileko, keshi chahatomako, oloze mukulisweka.
11VaYuleya vapwile nakumutonda-tonda kuze kuchiwanyino, nakulihwojola ngwavo, Ali kulihi?
12Kaha kwapwile kuhanjejeka chikuma hali Ikiye mukachi kalizavu. Vamwe ngwavo, Wamwenemwene, veka ngwavo, Chiku, ali nakuhungumwisa mazavu avatu.
13Oloze hawoma wavakwavo vaYuleya, naumwe ahanjikile hatoma hali Ikiye wauchi.
Yesu kuchiwanyino chaVisakila
14Jino hakuheta hakachi kachiwanyino, Yesu akandukile nakwingila muTembele nakunangula.
15Jino vaYuleya valikomokelele nakwamba ngwavo, Ou Mutu ananguka ngachilihi chakuzeneka kumunangula?
16Shikaho Yesu avakumbulwile ngwenyi, Kunangula chami kacheshi chAmiko, oloze chaUze angutuma.
17 Weshowo afwila kulinganga mwaya muchima waKalunga mwatachikiza kunangula chami nge chapwa chakuli Kalunga, nyi chapwa kuhanjika chAmi kaha.
18Ou ahanjika vyenyi kaha, asaka upahu wenyi kaha, oloze Ou asaka upahu waUze amutuma, apwa wamuchano, kaha muli Ikiye kamwatwama kuhengako.
19Ngwetu Mose amihanyine Jishimbi nyi? Oloze naumwe wenu alama Jishimbi wauchi. Nyi mwasakila ika kungujiha?
20Lize lizavu lyamukumbulwile ngwalyo, Ove uli nandemone! Iya ali nakusaka kukujiha?
21Yesu avakumbulwile ngwenyi, Ami ngwazatanga mulimo umwe, kaha muvosena munalikomokela.
22 Mose amihanyine kujihana — keshi nge chafuma kuli Moseko, oloze kuli vakakuluka — kaha mweji kujihananga haSambata.
23Nge mutu navamujihana haSambata mangana Jishimbi jaMose vazeneke kujizomboka, kaha munapihilila ika nayAmi hakulingisa mutu kupwa walambwe#7:23 MuchiHelase ngwavo, walambwe wosena. haSambata?
24 Kanda namuyulanga hakumona nameso kahako, oloze yulenunga nachiyulo chakwoloka.
Yesu Ikiye Kulishitu tahi?
25Jino, vamwe vakuYelusalema vambile ngwavo, Keshi Ikiye Ou vanasake kujihako?
26Kaha talenu, ali nakuhanjika hatoma, kaha nechi navahanjika nenyi chauchi. Nyi vaka-kuyula vanatachikiza vene ngwavo, Ou Ikiye Kulishitu, tahi?
27Oloze tunatachikiza oku afuma Ou. Omu mweza Kulishitu, naumwe mwejiva oku nafumu wauchi.
28Shikaho hakunangula muTembele, Yesu avilikile ngwenyi, Mwangutachikiza vene enu? Noku ngwafuma mwatachikizako? Kangwalijila Ami Iveneko, kaha nawa Uze angutuma apwa wamuchano, kaha Ikiye kamwamutachikizako.
29 Ami ngwamutachikiza, mwomwo ngwafuma kuli Ikiye, kaha Ikiye ángutuma.
30Shikaho vasakilenga kumukwata, oloze naumwe azamukile kumukwata wauchi#7:30 MuchiHelase ngwavo, Naumwe amunangikile livoko wauchi., mwomwo lwola lwenyi lwapwile kanda luchihete.
31Chipwe ngocho, vavavulu muze mulizavu vamufwelelele. Vambile ngwavo, Omu mwakeza Kulishitu mwakalinga vinjikizo vyavivulu kuhambakana evi nalingi Ou, tahi?
Navatuma vatu vakwate Yesu
32VaFwaliseu vevwile lize lizavu lili nakunyinyita vyuma evi hali Ikiye, kaha vapilishitu vavalemu navaFwaliseu vatumine vaka-kulama Tembele vamukwate.
33Jino Yesu ambile ngwenyi, Nangupwa nayenu tando yayindende, kaha nangukaya kuli Uze angutuma.
34 Namukangutonda, oloze kamweshi kukanguwanako. Kaha kuze nangukapwa Ami, enu kamweshi kukahasa kuyakoko.
35Ngocho vaYuleya valihwojwele mukachi kavo ngwavo, Nambe kuya kulihi numba etu tuhone kukamuwana? Nambe kuya kuli vaze valimwangila#7:35 Eli lizu ngwavo, Valimwanga, lyavuluka vaYuleya vaze vatwama mumafuchi eka. muli vaHelase akanangule vaHelase tahi?
36Natwale mulihi hakwamba ngwenyi, Namukangutonda, oloze kamweshi kukanguwanako, kaha ngwenyi, Kuze nangukapwa Ami, enu kamweshi kukahasa kuyakoko?
Tulwiji vameya akuyoyesa
37 Halikumbi lize lyalilemu lyakukumisa chiwanyino, Yesu emanyine nakutambakana ngwenyi, Weshowo ali nalipwila, eze kuli Ami anwenga.
38Ou mwangufwelela Ami, ngana omu aya Mazu-vasoneka-ajila, mutulo yenyi namukafumanga tulwiji vameya akuyoyesa.
39Jino ahanjikile ngocho nakuvuluka Shipilitu, Ou naveza kutambula vaka-kumufwelela, mwomwo haze Shipilitu apwile kanda vamutambule, kaha Yesu nawa apwile kanda vamuzezule nakusolola upahu wenyi wosena.
Chihandwa muli vatu
40Omu vevwile mazu awa, vamwe vamulizavu vambile ngwavo, Mwamuchano Ou Ikiye vene uze Kapolofweto.
41Vakwavo vambile ngwavo, Ikiye vene Kulishitu. Oloze veka nawa vambile ngwavo, Kumana Kulishitu mwakafuma kuNgalileya numba?
42KuMazu-vasoneka-ajila kumana kavamba ngwavo, Kulishitu mwakafuma kumbuto yaNdavichi, ku Mbetelema, mulimbo lize apwilenga Ndavichiko?
43Shikaho mulizavu mwapwile kulihandununa hali Ikiye.
44Vamwe vasakile kumukwata, oloze naumwe azamukile kumukwata wauchi#7:44 MuchiHelase ngwavo, Naumwe amunangikile mavoko wauchi..
Unjiho wavaka-kulama Tembele hali Yesu
45Jino vaze vaka-kulama Tembele vakindulukile kuli vapilishitu vavalemu navaFwaliseu. Vavahulishile ngwavo, Munahonena ika kumuneha?
46Vaka-kulama Tembele vavakumbulwile ngwavo, Kanda kupwe lyehi Mutu ahanjika nge Ou!
47Kaha vaFwaliseu vavakumbulwile ngwavo, Kumana nayenu nawa vanamyongo lyehi tahi?
48Kuli vaka-kuyula chipwe etu vaFwaliseu, kuli umwe namufwelela, tahi?
49Oloze eli lizavu lyazeneka kutachikiza Jishimbi, lyakwangula!
50 Nyikotemu — uze avangilile kuya kuli Yesu, hakupwa umwe wavaka-kuyula — avahulishile ngwenyi,
51Kumana Jishimbi jetu jeji kuhisanga mutu chakuzeneka kumwivwa nakutachikiza ovyo nalingi, numba?
52Vamukumbulwile ngwavo, Kumana nayove nawa uwakuNgalileya, tahi? Talatala kanawa kuMazu-vasoneka-ajila umone — kuNgalileya kakwalovoka kapolofwetoko.
53[Kaha vayile ou kuzuvo yenyi, ou kuzuvo yenyi.
Atualmente selecionado:
Yowano 7: LUE
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Bible Society of Zambia