Luka 21
21
Wana áhanyine pwevo watuliwe
(Mako 12:41-44)
1Jino omu Yesu andwile meso, amwene omu vaka-luheto vapwile nakuhaka mawana avo muchikasha chamawana.
2Kaha amwene pwevo watuliwe umwe muka-kukalikiza mwahakamo jimbongo jivali jajindende#21:2 Lumbongo lumwe vavulukile ngwavo Leputa, kulema chalwo nge fweto yakuzata lwola lumwe nakutambula likumi lyajo..
3Kaha ambile ngwenyi, Mwamuchano nangumilweza ngwami, Ou pwevo watuliwe muka-kuhutwa nahakemo vyakuhambakana vosena.
4Mwomwo vosena vanahake muchikasha chajimbongo mawana akusupukaho kuvyuma vyavo, oloze ikiye mukusuvala chenyi, nahakemo vyenyi vyosena, chiyoyelo chenyi vene.
Yesu mwavuluka kushiula Tembele
(Mat 24:1-28; Mako 13:1-23)
5Kaha omu vapwile vamwe nakushimutwila vyaTembele, nomu vayiwahishile namalolwa amwaza namawana akufuma kuli vatu, Ikiye ambile ngwenyi,
6Hakuvuluka evi munamono, nakukeza makumbi, omu kaveshi kukaseza lilolwa limwe halikwavoko hano, chakuzeneka kulyandumwina hamavu.
7Vamuhulishile ngwavo, Ove Muka-kunangula, evi navikasoloka mwaka uka? Nyi chinjikizo muka nachikapwa chakutachikijilaho omu navikapwa hakamwihi nakusoloka?
8Kaha avakumbulwile ngwenyi, Nyingililenunga kuchina navakamihungumwisa. Mwomwo vavavulu navakeza mulijina lyami nakwamba ngwavo, Yami vene Kulishitu, ngwavo, Lwola luli hakamwihi. Oloze enu kanda mukavakavako.
9Oloze omu namukevwa majita nakulifumbukila, kanda mukalizuzukilako. Mwomwo evi kuvanga vikavangile kusoloka, oloze kukuma changonde kacheshi kukapwa hahaze veneko.
Vize navikasoloka hamyaka yakukuminyina
10Kaha himwavalweza nawa ngwenyi, Lifuchi nalikafumbukila lifuchi likwavo, wangana naukafumbukila wangana ukwavo,
11kaha nakukapwa mindenda yayinene, nazala yakalombolombo namisongo yachihita kujingalila jeka najeka, kaha mwilu namukalovoka vyakwivwisa woma hamwe navinjikizo vyavinene.
12 Oloze shimbu kanda evi visoloke, navakamikwata nakumiyanjisa nakumihana kumavoko avaka-jisunangonga, nakutumenga, navakamitwala kumeso avamyangana navanguvulu halijina lyami.
13 Aha hakiko namukahasa kusolwela unjiho.
14 Shikaho kalikasenu mumichima yenu mukaunde, mukazeneke kuvangila kulongesa mwakulihakwila,
15mwomwo Ami nangukamihana uhashi namangana akuhanjika, aze navakahona vaka-kole jenu vosena kwimanyina chipwe kulingulula.
16 Kaha navisemi jenu navasongo jenu navayayenu navausoko wenu namasepa jenu navakamihana kumavoko avaka-kole, kaha vamwe venu navakavajihisa.
17 Navakamihunga kuli vosena halijina lyami.
18Oloze chipwe lukambu lumwe lwakumitwe yenu kalweshi kukajimbalako.
19 Hakujikiza nakuunda, hakiko namukayovokela#21:19 MuchiHelase ngwavo, hakiko nayikayovokela myono yenu..
Kushiuka chaYelusalema
20 Oloze omu namukamona Yelusalema vanayijingilika kumajita chelele ndo, haze vene tachikizenu ngwenu kushiuka chayo chili hakamwihi.
21 Haze vene vaze navakapwa muYuleya vakachinyine kujipili, vaze navakapwa mukachi kanganda vakafumemo, vaze navakapwa kumande, kanda vakengila mungandako.
22Mwomwo awa akiko makumbi akutenda, mangana vyosena vasoneka kumazu-vasoneka-ajila vakavitesemo.
23 Luvinda lwavaze navakemita, navaze navakamwisanga hamakumbi aze! Mwomwo hamavu nahakapwa vihuli vyavinene, nautenu hali vaka-lifuchi lino.
24Navakalindwomwoka kuuvela wajipoko jamikwale, navakavatwalanga muufunge mumafuchi osena, kaha Yelusalema navakayilyatangila kuli vaka-mafuchi palanga nomu nayikatesamo
Ngonde yavaka-mafuchi.
Kwiza chaMwanamutu
(Mat 24:29-35, 42-44; Mako 13:24-37)
25 Kaha halikumbi nahakakweji nahavatanganyika nahakapwa vinjikizo; hamavu, vaka-mafuchi navakalizakamina nakulizuzukila, mwomwo wachivumo chakalungalwiji nakukatuka chamakimba enyi.
26Vatu navakalezumukanga hawoma nahakulizakamina chikuma vize navikeza hano hamavu, mwomwo ngolo jamumelu navakajinyikisa.
27 Numba vakamone
Mwanamutu ali nakwiza mulivwi
nangolo naupahu waunene.
28Jino omu navikaputuka evi kusoloka, kolokenu nakutala mwilu, mwomwo kumisokola chili hakamwihi.
Chishimo chamukuyu
29Kaha avatelele chishimo ngwenyi, Talenu mukuyu, namitondo yosena.
30Heshoho nayisokolokela mweji kuyimonanga, kaha enu vavene mweji kutachikizanga ngwenu ngonde yaliyena yili lyehi hakamwihi.
31Ngocho nayenu nawa, omu namukamona evi vili nakusoloka, katachikizenu ngwenu, Wangana waKalunga uli hakamwihi.
32Mwamuchano nangumilweza ngwami, Chisemunwino chino kacheshi kukahitako, kuvanga vyosena evi vinasoloka.
33 Lilu namavu navikahita, oloze Mazu ami kaweshi kukahitako.
Pwenunga muvakuvanguluka
34Oloze zangamenunga kuchina michima yenu nayikalemuwa hakulisuula kuviseke vyaunyengwe nakupenda nakuzakamina vyachiyoyelo chino, kaha likumbi lize nalikamikasumuna nge kusovoka chamuheto, muvakuzeneka kulizánga.
35Mwomwo likumbi lize nalikakasumuna vosena vatwama hamavu hosena.
36Oloze pwenunga muvakuvanguluka lwola lwosena, lombenunga mangana mupwenga nangolo jakupululuka kuvyosena víli hakamwihi nakusoloka, mukemane kumeso aMwanamutu.
37Jino Yesu apwilenga nakunangula vatu muTembele hakumbi hakumbi, oloze naufuku ayilenga kupili yize vavuluka ngwavo Milive.
38Kaha chimenemene vatu vosena vejilenga kuli Ikiye kuTembele nakumwivwilila.
Atualmente selecionado:
Luka 21: LUE
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Bible Society of Zambia