ಮತ್ತಾಯೆ 6
6
ಬಡವೆರೆಗ್ ಸಹಾಯ
1“ಜನೊಕುಲು ತೂವೊಡು ಅಂದ್‌ದ್ ನಿಕ್ಲೆನ ಧರ್ಮಕಾರ್ಯೊನು ಅಕ್ಲೆನ ಎದುರುಡು ಮಲ್ಪೆರೆ ಬಲ್ಲಿ. ಅಂಚ ಮಲ್ತರ್ಡ ಪರಲೋಕೊಡುಪ್ಪು ನಿಕ್ಲೆನ ಅಮ್ಮೆರೆಡ್ದ್ ನಿಕ್ಲೆಗ್ ಫಲ ತಿಕ್ಕಂದ್.
2“ಅಂಚಾದ್ ಈ ದಾನ ಮಲ್ಪುನಗ ನಿನ ಎದುರುಡು ಕೊಂಬು ಉರ್ಪಾವಡ. ಜನೊಕುಲೆಡ್ದ್ ಪುಗರಿಕೆ ಪಡೆಯೊಡು ಅಂದ್‌ದ್ ಕಪಟಿಲು ಸಭೆತ ಮಂದಿರೊಲೆಡ್ಲಾ ಸಾದಿದ ಮೂಲೆಡ್ಲಾ ಅಂಚ ಮಲ್ಪುವೆರ್. ಅಕುಲು ತನ್ಕುಲೆಗ್ ಬರೊಡಾಯಿ ಫಲ ತಿಕ್ಕ್‌ದಾಂಡ್ ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ. 3ಈ ದಾನ ಕೊರ್ನಗ ಗುಟ್ಟುಡು ಉಪ್ಪಡ್. ನಿನ ಬಲತ್ತ ಕೈ ಮಲ್ತಿನವು ದತ್ತ ಕೈಕ್‌ಲಾ ತೆರಿಯಂದೆ ಉಪ್ಪಡ್. 4ಗುಟ್ಟುಡು ಕೊರ್ಪಿ ದಾನೊನು ತೂಪಿನ ನಿನ ಅಮ್ಮೆ ನಿಕ್ಕ್ ಪ್ರತಿಫಲ ಕೊರುವೆ.
ಪ್ರಾರ್ಥನೆದ ಬಗೆಟ್
(ಲೂಕೆ 11:2-4)
5“ನಿಕುಲು ಪ್ರಾರ್ಥನೆ ಮಲ್ಪುನಗ ಕಪಟಿಲೆ ಲೆಕ್ಕ ಮಲ್ಪಡೆ. ಜನೊಕುಲು ತೂವೊಡು ಅಂದ್‌ದ್ ಅಕುಲು ಸಭೆತ ಮಂದಿರೊಲೆಡ್ಲಾ ಕೂಡು ಮಾರ್ಗೊಲೆಡ್ಲಾ ಉಂತೊಂದು ಪ್ರಾರ್ಥನೆ ಮಲ್ಪೆರೆ ಬಯಕುವೆರ್. ಅಕ್ಲೆಗ್ ಪ್ರತಿಫಲ ಅಪಗನೇ ಪಡೆದಾತ್ತ್ಂಡ್ ಪನ್ಪಿನೆನ್ ನಿಕ್ಲೆಗ್ ನಿಜಾದ್ ಪನ್ಪೆ. 6ಆಂಡ ಈ ಪ್ರಾರ್ಥನೆ ಮಲ್ಪೊಡಾಂಡ ನಿನ ಕೋಣೆದುಲಯಿ ಪೋದು ಬಾಕಿಲ್‌ನ್ ಮುಚ್ಚೊಂದು ನಿನ ಉಡಲ್‌ಡ್ ಉಪ್ಪು ನಿನ ಅಮ್ಮೆರೆಗ್ ಪ್ರಾರ್ಥನೆ ಮಲ್ಪುಲ. ಉಡಲ್‌ಡುಪ್ಪು ನಿನ ಅಮ್ಮೆ ನಿಕ್ಕ್ ಪ್ರತಿಫಲ ಕೊರುವೆ.
7“ಆಂಡ ಪ್ರಾರ್ಥನೆ ಮಲ್ಪುನಗ ಪಿದಯಿದ ಜನೊಕುಲೆ ಲೆಕ್ಕ ಪಂಡಿನೆನೇ ಪನಡ; ಅಕುಲು ಮಸ್ತ್ ಪಾತೆರ್‌ಂಡ ತನ್ಕುಲೆ ಪ್ರಾರ್ಥನೆನ್ ದೇವೆರ್ ಕೇನ್ವೆರ್ ಅಂದ್‌ದ್ ಎನ್ನುವೆರ್. 8ಅಂಚಾಯಿನೆಡ್ದ್‌ ನಿಕುಲು ಅಕ್ಲೆನ ಲೆಕ್ಕ ಆವಡೆ. ನಿಕುಲು ನಿಕ್ಲೆನ ಅಮ್ಮೆರೆಡ ನಟ್ಟೊನುನೆಡ್ದ್ ದುಂಬೇ ನಿಕ್ಲೆಗ್ ಎಂಚೆಂಚಿನ ಅಗತ್ಯದವು ಪನ್ಪಿನವು ಆಯಗ್ ತೆರಿದುಂಡು. 9ಅವೆಡ್ದಾವರ ನಿಕುಲು ಇಂಚ ಪ್ರಾರ್ಥನೆ ಮಲ್ಪೊಡು.
‘ಪರಲೋಕೊಡುಪ್ಪು ಎಂಕುಲೆ ಅಮ್ಮೆರೇ, ನಿನ ಪುದರ್ ಪರಿಶುದ್ಧ ಆವಡ್.
10ನಿನ ರಾಜ್ಯ ಬರಡ್,
ನಿನ ಚಿತ್ತ ಪರಲೋಕೊಡು ಆಪಿಲೆಕ್ಕನೇ ಭೂಲೋಕೊಡ್ಲಾ ಆವಡ್.
11ಎಂಕುಲೆ ದಿನದಿನತ ಪಡಿನ್ ಎಂಕ್ಲೆಗ್ ಇನಿ ಕೊರ್ಲ.
12ಎಂಕ್ಲೆಗ್ ತಪ್ಪು ಮಲ್ತಿನಾಕುಲೆಗ್ ಎಂಕುಲು ಮಾಪು ಮಲ್ಪುಲೆಕ್ಕ,
ಎಂಕ್ಲೆನ ತಪ್ಪುಲೆನ್ಲಾ ಮಾಪು ಮಲ್ಪುಲ.
13ಎಂಕ್ಲೆನ್ ಶೋಧನೆದ ಉಲಯಿ ಸೇರಾವಂದೆ, ಕೇಡ್‌ಡ್ದ್ ಎಂಕ್ಲೆನ್ ತಪ್ಪಾಲ.’
14“ನಿಕುಲು ಜನೊಕುಲೆ ತಪ್ಪುಲೆನ್ ಮಾಪು ಮಲ್ತರ್ಡ ಪರಲೋಕೊಡುಪ್ಪು ನಿಕ್ಲೆನ ಅಮ್ಮೆ ನಿಕ್ಲೆನ ತಪ್ಪುಲೆನ್ ಮಾಪು ಮಲ್ಪುವೆ. 15ಆಂಡ, ನಿಕುಲು ಜನೊಕುಲೆ ತಪ್ಪುನು ಮಾಪು ಮಲ್ಪಂದೆ ಪೋಂಡ ನಿಕ್ಲೆನ ಅಮ್ಮೆ ನಿಕ್ಲೆನ ತಪ್ಪುಲೆನ್ ಮಾಪು ಮಲ್ಪುಜೆ.
ಉಪವಾಸ
16“ಉಪವಾಸ ಮಲ್ಪುನಗ ಕಪಟಿಲೆ ಲೆಕ್ಕ ಮೋನೆನ್ ಬಾಡಾವೊಡ್ಚಿ, ತನ್ಕುಲು ಉಪವಾಸೊಡುಲ್ಲ ಅಂದ್‌ದ್ ಜನೊಕುಲೆಗ್ ತೋಜಾವೆರೆಗಾದ್ ತನ್ಕುಲೆ ಮೋನೆನ್ ವಿಕಾರ ಮಲ್ತೊನ್ವೆರ್. ಅಕ್ಲೆಗ್ ತನ್ಕುಲೆ ಫಲ ಅಪಗನೇ ತಿಕ್ಕ್ಂಡ್ ಅಂದ್‌ದ್ ನಿಕ್ಲೆಗ್ ಸತ್ಯಾದ್ ಪನ್ಪೆ. 17ಆಂಡ ಈ ಉಪವಾಸ ಮಲ್ಪುನಗ ತರೆಕ್ ಎಣ್ಣೆ ಪಾಡೊಂದು ಮೋನೆನ್ ದೆಕ್ಕೊನ್ಲ. 18ಇಂಚ ಮಲ್ತ್ಂಡ ಈ ಉಪವಾಸೊಡುಲ್ಲ ಪಂಡ್ದ್ ಜನೊಕುಲೆಗ್ ತೋಜಂದೆ ಇತ್ತ್ಂಡಲಾ ಉಡಲ್‌ಡ್ ಇತ್ತಿ ನಿನ ಅಮ್ಮೆರೆಗ್ ಈ ಉಪವಾಸೊಡುಲ್ಲ ಪಂಡ್ದ್ ತೋಜಿದ್ ಬರುವ. ಉಡಲ್‌ದ ಉಲಯಿ ನಡಪುನೆನ್ ತೂಪಿನ ನಿನ ಅಮ್ಮೆ ನಿಕ್ಕ್ ಪ್ರತಿಫಲ ಕೊರ್ಪೆ.
ಗಂಟ್ ಕಟ್ಟಡೆ
(ಲೂಕೆ 12:33,34)
19“ಭೂಲೋಕೊಡು ಗಂಟ್ ಮಲ್ತ್ ದೀವೊನಡೆ; ಮುಲ್ಪ ಪುರಿ ಪತ್ತ್‌ದ್ ಕಲೆಂಗಿಡ್ದ್‌ ಹಾಳಾದ್ ಪೋಪುಂಡು; ಮೂಲು ಕಲ್ವೆರ್ ಮಾಟೆ ಕುರೆದ್ ಕಂಡೊನುವೆರ್. 20ಆಂಡ ಪರಲೋಕೊಡು ಗಂಟ್ ಮಲ್ತ್ ದೀವೊನ್ಲೆ; ಅಲ್ಪ ಪುರಿ ಪತ್ತ್‌ದ್ ಕಲೆಂಗಿಡ್ದ್‌ ಹಾಳಾದ್ ಪೋಪುಜಿ; ಅಲ್ಪ ಕಲ್ವೆರ್ ಮಾಟೆ ಮಲ್ತ್‌ದ್ ಕಂಡೊನುನಲಾ ಇಜ್ಜಿ. 21ನಿನ ಗಂಟ್ ಇತ್ತಿನಲ್ಪನೇ ನಿನ ಮನಸ್ ಉಪ್ಪುಂಡತ್ತಾ?
ಬೊಲ್ಪು ಕೊರ್ಪಿ ಕಣ್ಣ್
(ಲೂಕೆ 11:34-36)
22“ಕಣ್ಣ್ ಶರೀರೊಗು ತುಡರ್ ಆದುಂಡು. ಇಂಚ ಉಪ್ಪುನಗ ನಿನ ಕಣ್ಣ್ ಸರ್ತ ಇತ್ತ್ಂಡ ನಿನ ಇಡೀ ಶರೀರಲಾ ಬೊಲ್ಪಾದುಪ್ಪುಂಡು. 23ಆಂಡ ನಿನ ಕಣ್ಣ್ ಪಡಿಕೆ ಆದಿತ್ತ್ಂಡ ನಿನ ಶರೀರಲಾ ಕತ್ತಲೆ ಆದುಪ್ಪು. ಅಂಚಾನಗ ನಿನಡುಪ್ಪು ಬೊಲ್ಪೇ ಕತ್ತಲೆ ಆದಿತ್ತ್ಂಡ ಆ ಕತ್ತಲೆ ಏತ್ ಪಂಡ್ದ್ ಪನೊಲಿ.
ದೇವೆರೆ ಆಸ್ತಿ
(ಲೂಕೆ 16:13; 12:22-31)
24“ಏರ್ಲಾ ರಡ್ಡ್ ಯಜಮಾನನ ಚಾಕ್ರಿ ಮಲ್ಪೆರೆ ಸಾದ್ಯ ಇಜ್ಜಿ. ಆಯೆ ಒರಿಯನ್ ಪಗೆ ಮಲ್ತ್‌ದ್ ಬೊಕ್ಕೊರಿಯನ್ ಪ್ರೀತಿ ಮಲ್ಪುವೆ. ಇಜ್ಜಾಂಡ ಒರಿಯನ್ ಎಡ್ಡೆ ಮಲ್ತೊಂದು ಬೊಕ್ಕೊರಿಯನ್ ತಾತ್ಸಾರ ಮಲ್ಪುವೆ. ನಿಕುಲು ದೇವೆರೆನ್ಲಾ ಕಾಸ್‌ನ್ಲಾ ಒಟ್ಟುಗು ಸೇವೆ ಮಲ್ಪೆರೆ ಆವಂದ್.
25“ಈ ಕಾರಣೊಗಾದ್ ನಿಕ್ಲೆ ಪ್ರಾಣೊಗು ಒವೆನ್ ತಿನೊಡು, ಒವೆನ್ ಪರೊಡು, ನಮ ಶರೀರದ ರಕ್ಷಣೆಗ್ ಒವೆನ್ ಪೊದೆತೊನೊಡು ಅಂದ್‌ದ್ ಚಿಂತೆ ಮಲ್ಪಡೆ ಅಂದ್‌ದ್ ನಿಕ್ಲೆಗ್ ಪನ್ಪೆ. ವಣಸ್‌ಡ್ದ್ ಪ್ರಾಣ ಮಿತ್ತ್‌ದವು, ಅಂಗಿ ಕುಂಟುಡ್ದು ಶರೀರ ಮಿತ್ತ್‌ದವು ಆದುಂಡತ್ತಾ?” 26ಬಾನೊಡು ರಾಪಿನ ಪಕ್ಕಿಲೆನ್ ತೂಲೆ, ಐಕುಲು ಬಿತ್ತುಜ, ಕೊಯ್ಪುಜ, ತುಪ್ಪೆಲೆಡ್ ದಿಂಜಾವೊನುಜ. ಆಂಡಲಾ ಪರಲೋಕೊಡುಪ್ಪು ನಿಕ್ಲೆ ಅಮ್ಮೆ ಐಕ್ಲೆನ್ ತಾಂಕ್‌ದ್ ಕಾಪುವೆ. ಐಕ್ಲೆಡ್ದ್ ನಿಕುಲು ಏತೋ ಹೆಚ್ಚ್‌ದಾಕುಲತ್ತಾ? 27ಚಿಂತೆ ಮಲ್ತ್ ಮಲ್ತ್‌ದ್ ನಿಕ್ಲೆ ಶರೀರೊಡು ಒಂಜಿ ಮೊರಂಗೆ ಉದ್ಧ ಆವೆರೆ ಏರೆಡ್ದಾವು?
28“ಉಂದತ್ತಂದೆ ನಿಕುಲು ಅಂಗಿ ಕುಂಟುದ ಬಗೆಟ್ ಚಿಂತೆ ಮಲ್ಪುನು ದಾಯೆ? ಕಾಡ್‌ದ ಪೂ ಬುಲೆಪಿನ ರೀತಿನ್ ತೂದು ತೆರಿಲೆ. 29ಐಕುಲು ಬೆನ್ಪುಜ, ನೂಲು ನೆಯ್ಪುಜ, ಆಂಡಲಾ ಆ ಪೂಕುಲೆಡ್ ಒಂಜೆಕ್ಕ್ ಉಪ್ಪು ಅಲಂಕಾರ ಅರಸು ಆದುಪ್ಪು ಸೊಲೊಮೋನುಗು ತನ ಮಾತ ಮೈಮೆಡ್ ಉಪ್ಪುನಗಲಾ ಇತ್ತ್‌ಜಿ ಅಂದ್‌ದ್ ನಿಕ್ಲೆಗ್ ಪನ್ಪೆ. 30ಓ ಒಂತೆ ನಂಬುನಾಕುಲೇ, ಇನಿ ಇತ್ತ್‌ದ್ ಎಲ್ಲೆ ದಿಕ್ಕೆಲ್‌ದ ಪಾಲಾಪಿ ಕಾಡ್‌ದ ಪಜಿರ್‌ಗ್ ದೇವೆರ್ ಇಂಚ ಪೊದೆಪಾವೆಡ ಅವೆಡ್ದ್ ಏತೋ ಹೆಚ್ಚಾದ್ ನಿಕ್ಲೆಗ್ ತುತ್ತಾದ್ ಪೊದೆಪಾವೆ ಅತ್ತಾ?
31“ಇಂಚ ಉಪ್ಪುನಗ ಒವೆನ್ ತಿನೊಡು? ಒವೆನ್ ಪರೊಡು? ಒವೆನ್ ಪೊದೆತೊನೊಡು? ಅಂದ್‌ದ್ ಚಿಂತೆ ಮಲ್ಪಡೆ. 32ನೆಕ್ಕ್ ಮಾತೆಕ್ ಪಿದಯಿದ ಜನೊಕುಲು ತುಲ್ಲುವೆರ್. ಉಂದು ಮಾತ ನಿಕ್ಲೆಗ್ ಬೋಡಂದ್‌ದ್ ಪರಲೋಕೊಡುಪ್ಪು ನಿಕ್ಲೆನ ಅಮ್ಮೆರೆಗ್ ತೆರಿದುಂಡು. 33ಅಂಚಾದ್ ನಿಕುಲು ದುಂಬತ್ತ ದೇವೆರೆ ರಾಜ್ಯೊನು ಬೊಕ್ಕ ಆಯ ನೀತಿನ್ ಬಯಕ್ಲೆ. ಉಂದೆತ್ತ ಒಟ್ಟುಗು ಮಾತಲಾ ನಿಕ್ಲೆಗ್ ತಿಕ್ಕುಂಡು. 34ಅಂಚಾದ್ ನಿಕುಲು ಏಲ್ಲೆದ ಚಿಂತೆ ಮಲ್ಪೊಡ್ಚಿ. ಏಲ್ಲೆಗ್ ಎಂಚಿನ ಬೋಡು ಅವು ಏಲ್ಲೆನೇ ಚಿಂತೆ ಮಲ್ಪುಂಡು. ಆ ಪೊರ್ತುದ ಕಾಟ ಆ ಪೊರ್ತುಗೆ ಯಾವು.
Atualmente selecionado:
ಮತ್ತಾಯೆ 6: ತುಳು
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
New Life Literature