ZAŊ 2
2
Yeesu kole kan wəra kumuy
1Hiti jəŋ wəra ɓasi adordə kel teŋa, kəɗwəy kəman gə ve kuli jəŋ giidə vil də Kaanaŋa, seŋka də Galileŋ. Nər Yeesu a jəŋ ada, 2anə Yeesu də *kaa gə guuduŋ a jəŋ aduubə də kaa gə minti yə a məntənəy da bə bi a hame kəɗwəy gəm. 3Kumuy bə atələələma təwaŋ wəra kəyaŋ, nər Yeesu əsəŋ bə wəətu minti: «Kumuy təwaŋ wəra kəəsi.» 4Yeesu minti: «Nərən, yaakan la kəm eŋ. Bə gan dərən cəərə joŋreŋa paapa te ba. Cəwa də joŋre katən kəm bay neke.» 5A waataŋ kaa kə joŋre gə minti adaŋ minti: «Kel gə minti wə waatənaŋ dəŋ ne keɗeŋ, aŋ jəy la.»
6To'osi kə kaanə Ziwifiŋ hətnəy gidiirə baade bə ji wəra *cetceti tiinə Pepeŋaŋ. Gud teŋa ta, gədərya bə ɗampə-ɗampe də pərki bə maltə-malte ada kənki. Gədərya məna ha'aŋ, kan gə giiduŋ ji wəra karman bə litər kəsi. 7Yeesu waataŋ kaa kə joŋreŋ minti: «Aŋ ɗostə gədərya toŋ la wəra də kan.» Kəya yə ɗustunu wəra perle-perle faɗi. 8Wə minti: «Aŋ ɗuu la gud kan teŋa hebkəna weseka, aŋ ɗee la a əyəy a hulum bə tiinə kaa kə aye kan a kaŋ.» Kəya yə ɗeŋ a əyu du faɗi. 9Wə gosoŋ kan té gə kolə-kole kumuy. Ko bə minti kumuy toŋ pəŋ duru da adaŋ, paapa də duru ba, səma də dər kaa kə joŋre gə minti a ɗuunu du daŋ. Kəya wə veɗgeŋ gedrə həlgəŋ da, 10wə əsəŋ bə wəətu minti: «Kaŋ keɗe ha'aŋ, yə ɓarse kumuy pisiŋ wəra kəm ajew. Bə minti kaŋ markaŋ ne wəra, yə əyəy naayaw toŋ kəm haa bədoona. Nəmtiŋ, tam ɗokoŋ kumuy pisiŋ hãã kəm hebkəna!»
11Haa kəya miɗi bə minti wə juunu giidə vil də Kaanaŋa, seŋka də Galileŋ. Wə haa miɗi bə ge dər bə cəərə abay nuutuŋ minti Yeesu məlaŋ guudu bə jəwa ajew aduubə də kumsuŋaŋ. Wə vəɗaŋ boblo nuutuŋ wəra haa bədoona ana, kaa gə guuduŋ koloŋ bə de guudu haa sə teŋ. 12Adordə kel teŋa kəyaŋ, wə sorkoŋ warna giidə vil də Kapernam na də anə nuru, kəsəənuŋ, daana kaa gə guuduŋ keɗe. Wə hətəŋ ada bə anə məka bagŋ.
Yeesu sarme kaa kə celeereŋ wəra giidə Kuli kə Pepeŋa
(Mat. 21.12-17; Mar. 11.15-17; Liki 19.45-46)
13Hi bə *kəɗwəy gə Paki kə kaanə Ziwifiŋ nəkaŋ wəra maŋ kəyaŋ, Yeesu kooroŋ warna Zeruzalem na. 14Giidə tiilim də *Kuli kə Pepeŋa, wə ɗeŋ a fele kaa kə celeere gə kəccəŋ, gə kaamaŋ daana gə anə abaakuŋ ada. Kaa kə məɗti soloy gə əstə-əsti je'-je'i ku tabul neeteŋa gəm. 15Kəya wə ɗampaŋ ajewɗeki saama, wə sarmaŋ kaa teŋ wəra keɗe giidə Kuli kə Pepeŋa, kaamaŋ də kəccəŋ keɗe'i gəm. Wə puktuŋ tabul kə kaa kə məɗti soloy wəra, soloy raytaŋ warna məna-məna. 16Wə əsəŋ bə waate kaa kə gusi abaakuŋa minti: «Aŋ harwə kar teŋ la warna keɗe, aŋ a kolon kuli kə Barən wəra kuli bə celeere ba.» 17Kəya cəərə *kaa gə guuduŋ haraŋ bə ɗiki cəərə kel gə minti a jəŋ warda gə jeerə-jeere minti: «Tay də Kuli nəmtiŋ ɗəman haa damdi cəwaŋ bə hogtona ana#2.17 Ps. 69.10.»
18Kaanə Ziwifiŋ əsəŋ bə law ku minti: «Miɗi bə minti tam jəw bə ge dər minti Pepeŋ aynam kəkəy bə ji kel teŋ, haa maa mo?» 19Yeesu minti: «Kuli kə Pepeŋ gara, aŋ caw la wəra, dər hiti soope ten hare yaŋ bə hursu wəra a kuɗuŋa gil.» 20Yə minti: «Kuliŋ gara, kaŋ laataŋ hor hor waaɗe cuuru kənki bə hursu, tam bə deye hebkəna minti hiti soope, tam hare bə hursu wəra!» 21Doloy ha'aŋ, wə wəətəy sam Kuliŋ haa cəərə kusru toki. 22Adordə minti Pepeŋ faŋ Yeesu warda adəwaldə də kaa kə mee-meŋ daŋ, cəərə kaa gə gud Yeesu haraŋ bə ɗiki cəərə kel té gə minti wə a wəətənəy diŋ. Kəya yə doŋ gud kel gə minti a wəra gə jeerə-jeere giidə Kefter kə Pepeŋa daana gə minti Yeesu a wəətənəy diŋ gəm.
23Dər kəɗwəy gə Pakiŋaŋ, Yeesu a jəŋ kəm Zeruzalema ada. Bə minti kaa ablaw asaŋ miɗi bə minti wə bə juutuŋ, yə doŋ guudu faɗi. 24Səma Yeesu doŋ gud kel neeteŋa ba, gud maa mo kaa kəsarkaŋ keɗe wəra də duru kaŋkaŋ. 25Wə a paapa də caadə minti hulum topə bəlam də kel neeteŋ la a tó ba, gud bə minti ɗiki bə ku tərməyiŋ wəra də duru.
Atualmente selecionado:
ZAŊ 2: KERNT05
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Texte de la Bible: Kera © Alliance Biblique du Tchad, 2004.