Markus 13
13
Nuarin-tas alupas 13.
1IS wat ahes anliin neom ahlap aien um alau ijo, is ika ehelen a natimi atahaijeg yin is ethi, Ak Natimi esege, almoi inhat alupas iji eigki im lep neom esjilid iji eigki!
2Is tas a Iesu, um ika ehelen, Nai idim almoi neom alupas iji eigki aiek; inyi ti amen inhat inyi ethi an taka hat, uhpu alcapdicraig asega.
3Is wat ateucse aien an nedoon Olivet an nuhup o neom ahlap, eris echim ahodai yin a Pitrus, im Jakobus, im Joanes, im Antrius, um ika,
4Asuptecnaig ehelema aiek, inyi yetpam nitai iji eigki an nahopan? im lep nev itai asjaaicnaig u nubutpotetvaig o itai iji eigki?
5Is tas ehele ra a Iesu, um atupun, um ika, Aminjinai caua aijaua va yi jim imyiahnag caua tah natimi:
6erupu ehcohos pam atimi inyi ahinag an nidak, um ika, Ek Kristo ainyak; erupu imyiahnag atimi inyi ahinag ara.
7Aku wit atahaijeg edoa aijaua, im lep intas vai edoa, jam jim imtitaig: inyi upyi eteuc nitai iji ehki; ja inyi ti fi auroauro um ahni itai.
8Erupu ati nedoa nup uran pece inyi ethi vai nup uran pece inyi eche, im lep nup uran nelcau inyi ethi vai nup uran nelcau inyi eche: etpu eteuc nomoi irai iji uari pece inyi ahinag, im lep numlaig has, im lep nehioehio u inliinmopoi atimi: et idim ahka um eres nitai iji eigki.
9¶ Akumu aminjinai caua aijaua: erupu ikni caua ara ehele ilpu atimi tas alep, im lep ehele ilpu atimi asjapicnaig; erupu aredei caua ara: uhpu imyiapan caua an nuhup u ilpu atimi alupas im ilpu atimarid vai nyak, nitai asuptecnaig imi ra.
10Uhpu idim uhup um asuptecnaig intas-upene ehele nup urai iji pece asega.
11Eru wit imyiapan caua ara, um ikni caua ehele ilpu atimi tas alep, akumu jim upyi hup aijaua, um ika, Inti asanhe akaija? um jim aktaktai intas: jam asaig ineigki ache uhpu alupai caua an naopan iyehki: eka eti tup ispamia tas aijaua, ja Nesgan Upene ache.
12Etpu alwai etoan tah mika eri atgei yin, im lep tah irai inhal o un; erupu edemda a ilpu hal ura vai ilpu atmil ura, um ika, eri atgei ra.
13Erupu amcel vai caua atimi asega va nidak: ja aien inyi ti adumoij aien, uhpu imyiatamaig yin.
14¶ Aku wit ecetai “nitai has esjilid ineig” aijaua, “et auahas itai,” is tas vaig a Tanyel naprofeta, naijivaig an nuarin ineig et itaup, (etmu aktaktai aien et esvi itai aien,) ara eri amen Jutaia ara an naopan iyehki, erumu aha pan irai lola edoon ara:
15aien inyi amen aien ijinies an neom o un, etmu jim asuol aien, um apan anliin neom o un mika yi leucse itai anliin neom o un:
16aien inyi amen aien uman, etmu jim adumoij pan aien mika yi leucse napelumai o un.
17Kaiheuc vai ra eri opouc ara, im lep ra eri alidai ilpu hal ura ara, ira adiat iji ehki!
18Akumu ugni Atua aijaua mika aki jim aha aijaua an mesese.
19Ira adiat iji ehki etpu eteuc nohocred, inyi esjilid irai ohocred asega an naopan iyehki is wat ago niji itai asega a Atua um uhum pam an naopan ineig, inyi ti lep eteuc nohocred inyi idivaig.
20El et eti ika a Atua yi eti elpat nadiat iji ehki, el erupu emesmas atimi asega: ja et ika aien yi eti elpat nadiat iji ehki, va atimi iji eig is ehtai ra aien.
21An naopan iyehki el et ika ehelemia tah natimi, Almoi aijaua, Iesu mun eigki; ka, Iesu mun naico; jim eteuc an tas o un aijaua:
22erupu ehcohos pam a ilpu Kristo efaifa im ilpu profeta efaifa, um ago niji auritai ehka im niji itai imyiali, mika eri imyiahnag ilpu atimi ehtai ra, ja inyi ehka.
23Jam aminjinai caua aijaua: ek mun idim upyi hup ainyak um asuptecnaig niji itai asega ehelemia.
24¶ Ira adiat iji ehki et wit ti pan itac nitai ohocred vaig ineig, etpu aupat nagesega, um eti alahala vai inmohoc;
25etpu etjo inmoijeuv an nohatag, um lep ahcatina niji emda an nohatag.
26Erupu ecet Inhal o natimi ara an naopan iyehki, inyi yetpam aien an nepeig an nohatag, etpu esjilid nemda o un im natimi alupas o un.
27Etpu abrai ilpu agelo o un aien, mika eri asjapicnaig ilpu atimi ehtai ra o un ara irai iji uari pece asega, ahes an nahaijin nobohtan, um yetpan an nahaijin nohatag.
28Akumu atahaijeg aijaua intas ecsipece va nateg: Et wat ehcodaig um elegelege nerin, eka ato aijaua, nikavaig, et mun ubutpotet u inlidija:
29et idim ucco, aku wit almoi nitai iji eigki aijaua, akumu ato aijaua, nikavaig, et mun ubutpotet nelcau o Atua, an neucse neom marom.
30Et inivaijec ineig ek asaig ehelemia ainyak mika, Inyi upyi hup um ahni nitai iji eigki asega, ja erupu emesmas natimi an naopan ineig.
31Etpu yetpan an tid iran nohatag im nobohtan: ja inyi ti yetpan an tid iran intas unyak.
32¶ Ja et eti ato nadiat iyehki im nuarin-nadiat iyehki tah natimi: um eti ato tah ilpu agelo an nohatag, um eti ato Inhal o Atua, et ato ache a Etmak.
33Akumu aminjinai caua aijaua, um aiji, um alaigaheni: eka eti ato aijaua naopan yetpam u nitai iji ehki.
34Et idivaig natimi et ethi a Inhal o natimi, et apan aien itac acen, um ude neom o un, um ika ehele ilpu aheca o un eri ohuun, um asuptecnaig ehele atimi asega nauritai imi ra, um tas ehele natimi aminjinaig neom mika yi aminjinaig upene aien.
35Akumu aminjinai caua aijaua: eka eti ato aijaua naopan ineig inyi adumoij pam a natimi alupas an neom, an jupura, ka an nijihgan nepeig, ka an nahlaig u injaa, ka an nuhialeg:
36va yi jim auroauro aien um ham, um ecet caua numjegvaig.
37Intas ineig ek asaig ehelemia ainyak, ek lep asaig ainyak ehele atimi asega, Akumu aminjinai caua aijaua.
Atualmente selecionado:
Markus 13: VAO63
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Vanuatu Bible (Intas Etipup) © United Bible Societies, 1863, 2019.