Mavanga 7
7
Etyene aviidi ikumbu
1Mukuutu banganga ba Nzambi ni ufuula Etyene: «Mambu ma bali mu uleele mu we, mali ma mbuli?» 2Etyene afutili: «Bataata na baana ba ngu ba me, yuhaani! Nzambi yi muyusu ayamonehele huli kaaha a bisu a benu Abrahami, ŋa nde haba hu itanzi hya Mezopotami. Nde ayamonehele na nde, tswamina nde mu uyatsahala hu musyenge a Harani. 3Na Nzambi aleeli nde: “Mata mu tsi a we na buli la we, na yene hu tsi yi me umwese we#Mba 12.1.” 4Abrahami amati mu tsi a bisu Kaledeya na ayatsahala hu musyenge a Harani. Na, humbisa lipfu la taata a nde, Nzambi atsindihi nde mu tsi yi benu lili mu yo loloyi. 5Huuna, Nzambi a havidi nde iloho tso imosi ve, tso ibuha hi ususa hulu ve. Mu tangu moyina, Abrahami a haba na mwana ve. Ka Nzambi ti asiidi nde lahi li uva nde tsi. Nde asiidi nde ka lahi ti, bikiisa bya nde sa bibaha yo.
6Nzambi aleeli Abrahami bunuubu: “Bikiisa bya we byutsahala mu tsi bumwenyi, hu bu ukitusa bo baviha. Huuna bu unyongese bo mu makama mana (400) ma bilima. 7Ka me utsundasa tsi yi yi ukitusa bo baviha. Humbisa, bo bu upala mu tsi bumwenyi na bu usalila me mu tsi mo yiniyi#Mba 15.13-14; Pal 3.12.” 8Titswene Nzambi akuti lahi na Abrahami mu iliimbu hya ketili. Ni mu buuna, Abrahami haketi Isaki wu nde habuti, mu ilumbu hya poombo hi hyaduuki mbutili a nde. Isaki kaka pila mosi aketi Yakobi, na Yakobi kaka aketi bakaaha ba bibandu kuumi na byole bi Isereli.
9Bakaaha ba bibandu baaba na nyengi a Yosefi, baasumbisi nde mu ukitusa nde muviha na baabiti nde hu tsi a Ngipiti. Ka Nzambi akumbisi nde. 10Nzambi apalisi nde hutso munyongi. Nde aviidi Yosefi hyese mu ubaha buyedi ŋa busu bwa Falahoni, pfumu a Ngipiti. Falahoni asilisi Yosefi, na abyalisi nde mutumi a tsi a Ngipiti yoosi na ŋa yulu nzo a pfumu yoosi.
11Na limbunga laayabwa mu tsi a Ngipiti yoosi na mu tsi a Kanana. Lo laabehi munyongi wu afulala iteesi, na bakaaha ba bisu a baakabwebaha byudya ve. 12Bu Yakobi hayuhi ti hu Ngipiti hwaba na byudya, nde atsindihi bakaaha ba bisu huuna tsindaha la tsomi, mu uyasumba byudya. 13Mu tsindaha la mole, Yosefi ayayabaana huli bakulu ba nde. Buuna Falahoni abwani bakulu ba Yosefi, na ayabi huni nde hamati. 14Titswene Yosefi atsindihi baatu mu uyavolo taata a nde Yakobi, na ibandu hya nde hyosi. Bo aba litangu maku tsambu baatu bataanu (75). 15Yakobi ayeni hu tsi a Ngipiti, te bu nde hakwidi, napa bakaaha ba bisu. 16Baabiti bamvumbi ba bo hu bula bwa Siseme, na baadiihi bo mu ngila yi Abrahami hasumbi mu mbongo huli baana ba Hamoli, hu bula bwa Siseme.
17Bu tangu yi ukuhasa lahi li Nzambi hasiidi huli Abrahami yaba bebele, baatu ba bisu baakabutasana na baapfuni hu ulahi hu tsi a Ngipiti. 18Ilumbu imosi, baatsahisi pfumu wu munyatihi wu atumi tsi a Ngipiti. Nde a hatsikihi Yosefi ve. 19Pfumu mowuuna apfuti ibandu hya bisu, na unyongese bakaaha ba bisu. Nde atumisi bo mu utimba bikenyi bya bo mana byo bikwa.
20Ni mu tangu moyiina, baabuti mwana mumosi nduhi Moose. Nde aba mwana wu mubwe ŋa busu bwa Nzambi. Baabungili nde mu batsungi batatu mu nzo a taata a nde. 21Mu tangu yi baatimbi nde hu mbadi, mukasu mumosi, mwana a Falahoni atoli nde, na abungili nde we mwana a nde mwakulu. 22Ni huuna, Moose hayihi nzaabili yoosi ya bisu Ngipiti. Nde abahi matwala ma manene mu bitoyili na mu mavanga ma nde. 23Bu Moose hatoosi maku mana (40) ma bilima, nde atsimi uyamono baana ba ngu a nde ba ibandu, bisu Isereli. 24Nde amoni musi Ngipiti mumosi, mu ubeete musi Isereli. Moose avolili nde milembe. Na mu ufutala pindu, Moose adubi musi Ngipiti mowuuna. 25Moose atsimi ti baana bangu a nde bisu Isereli, bu utsikaha ti Nzambi tondi usalila nde mu uyobolo bo. Ka bo a baakatsikaha tso hole ve. 26Ŋa ngwali, Moose amono bisu Isereli boole mu ulwana, nde atondi ufutala hyenze ŋa hati la bo. Nde aleeli bo: “Benu ti baana ba ngu lili. Ka mu hima lili mu ulwana benu mo na benu mo?” 27Ka muutu wu akwamisi wuna, atsindihili Moose na uleele nde: “Na asoolo we mu uba mukuutu na nzonzi ŋa hati la bisu? 28We kaka me tondi uduba, we bu we aduba musi Ngipiti matsiha?” 29Moose ayuha buuna, nde abati na ayatsahala hu tsi a Madyani. Huuna, nde abuti baana boole ba babahala#Pal 2.3-10,11-15,21-22; 18.3-4.
30Bilima maku mana (40) bivyoho, pofi mumosi ayamonehele na Moose hutso a kumu a nzala, bebele na isyelo hya Sinayi. Pofi ayamonehele mu ludi la mbaahu, li laakalulaha mu muti nga matsyende. 31Moose akimuhi bu nde hamoni imono-miisu mohina. Ka bu nde hakayasusaha mu utsikaha ŋa bebele, nde ayuhi ndaha a Pfumu yaleeli: 32“Me ni Nzambi bakaaha ba we, Nzambi ya Abrahami, ya Isaki na ya Yakobi!” Bu hakatsula likamba mu boomo, Moose a habweyehele utala ve.
33Pfumu aleeli nde: “Kuula bikoodi bya we mu miilu, mu toni ati, mbuha yi we ateleme, yili mbuha ya ngidi. 34Me amono buni bali mu unyongese baatu ba me hu tsi a Ngipiti. Me anzuha mibima mya bo na me anza mu uyobolo bo. Bunuubu yene! Me tondi utsindaha we hu tsi a Ngipiti#Pal 3.1-10.” 35Moose mowunuwu, wu bisu Isereli banyanzi na uleele: “Na asoolo we mu uba mutumi na nzonzi?” Nzambi atsindaha nde mu uba mukuutu na muyobili, mu likumbasa la pofi wu ayamonehele na nde mu mbaahu mu muti nga matsyende#Pal 2.14. 36Ni Moose apalisi bisu Isereli hu Ngipiti, na ubaavanga bimangu na bilimbu mu tsi moyiina. Nde asiidi buuna kaka, hu Mubu wu abenge na hu kumu a nzala, mu maku mana (40) ma bilima#Pal 7.3; 14.21; Mat 14.33. 37Ni Moose mowunuwu kaka, abweleele huli bisu Isereli ti: “Nzambi upalisa ŋa hati la benu mumbihuli we me, wu uba inama hya buli la benu#Pfu 18.15,18 .” 38Ŋa yulu a ŋana, bu buli la baatu ba Isereli laba laakuukama hu kumu a nzala, nde ni wu akateleme na bakaaha ba bisu. Nde aba kaka na pofi wu akatoyo na nde ŋa yulu isyelo hya Sinayi. Nde ayaki mambu ma monyi ma Nzambi, mu utosele bisu#Pal 19.1—20.17; Pfu 5.1-33. 39Ka bakaaha ba bisu baabisi usiingala nde. Bo baanyasuli nde hutso mutima, bo baafutihi hu Ngipiti#Mat 14.3. 40Bo baayaleele Aloni: “Vangila bisu binza-nzambi bi byukaabita bisu. Mu toni ati, bisu a liyabi ki dyambu laamiibwila Moose wu apalisa bisu mu Ngipiti ve#Pal 32.1.” 41Bo baavangi ifwita hya mwana a ngombe, na bo baaviidi bungodu huli ifwita mohiina. Bo baasangili mavanga ma myoho mya bo#Pal 32.2-6mu kinya. 42Ka Nzambi atehili bo mbisa, na anyahi bo bayusa bamvwelele ba hu yulu, we bu baasonehe mu muhanda mimbihuli:
“Buli li Isereli, mu mbuli, ni huli me
benu laayeholo banyama na bungodu bukima,
mu maku mana (40) ma bilima hutso a kumu a nzala?
43Naana, benu laabiti binza-nzambi bya benu:
nzo a ngooto ya Molooke,
benu laabiti ifwani hya mvwelele a benu Refani.
Ni bifwita bya benu bi laavangi mu myoho mya benu,
mu ukongemene na usalila byo.
Ni mu buuna, me utsindaha benu lala mu buviha
na tsi a Babylooni#Amo 5.25-27.”
44Hutso a kumu, bakaaha ba bisu, baaba na nzo a ngooto, huuna hwaba na kasu a ngidi ya lahi la Nzambi. Baatungi yo we bu Nzambi havidi tumili huli Moose, mu uduukala ifwani hi nde hamoni. 45Humbisa, baaviidi nzo mo a ngooto, huli tungi li laakaduuka bakaaha ba bisu. Bo baabiti yo, ŋa bo baaba hutso lituma la Yosuwa. Bo baabiti yo mu tsi yi bo baapatuli huli baatu bakima, ba Nzambi habingi ŋa busu bwa bo. Yo yakwilili huuna nate mu tangu a pfumu Davidi. 46Davidi abahi hyese hya Nzambi, na avondi nde muswa mu utunga mbuha yi bikiisa bya Yakobi byukasambila Nzambi. 47Ka monwani, ni mwana a nde Soolomo atungili nde yo. 48Ka Nzambi a Pungu, a hubaatsahala mu manzo ma baatu baatunga mu myoho mya bo ve. We bu baasonehe mu buuku li mumbihuli:
49“Pfumu aleeli: ‘Yulu ni kiti ipfumu hya me,
na toto ni isuusili hya me hya miilu.
Ki pila a nzo litondi utungala me?
Ŋa ki mbuha me utwala upuma?
50Me ni wu avanga bi byosi mu myoho mya me#Esa 66.1-2!’”
51Benu baatu ba lili na mitswe ngolo. Mitima mya benu mili ngototo, na matswi ma benu maakinda mu mambila ma Nzambi. Benu libaabisa usiingala tangu yoosi Livupu la Ngidi! Benu lili we bakaaha ba benu! 52Ki mumbihuli bakaaha ba benu baavelitsuta? Bo baadubi boosi ba baayayabisa nziili a wuuna wu asungama. Na bunuubu, nde ni wu benu laayehuli na laadubi. 53Benu laayaki mikele mya Nzambi mu likumbasa li bapofi, na benu a laakeeli myo ve.»
Baadubi Etyene mu mamanya
54Baatu ba pfuundu banzonzi baadasuhi hu ulahi, bu baayuhi mambu momaana. Mu toni a mambu ma Etyene, bo baakakwete miinyu ma bo na kesi yoosi. 55Ka nde, bu haba wu aluula mu Livupu la Ngidi, atali hu yulu. Nde amoni muyusu a Nzambi, na Yisu ateleme ŋa mbahala a Nzambi. 56Nde aleeli: «Yuhaani, me ndi mu umono mayulu bwasi, na Mwana a Muutu ateleme ŋa mbahala a Nzambi!» 57Bo baafulihi mu mifudi, na bo baadibuhi matswi ma bo. Bo boosi mu itwadi baayitumini ŋa yulu a nde. 58Bo baapalisi nde hu mbadi musyenge, na baalangi nde mamanya mu toni uduba nde. Bambangi baasiisi bikutu bya bo ŋa miilu mi mufudu mbahala mumosi nduhi Sahuli, mu ukeelese byo. 59Bu baakalanga nde mamanya, Etyene akasambila bunuubu: «Pfumu Yisu, yaka ilunzi hya me!» 60Titswene nde atsokimi na afulihi mu mifudi: «Pfumu, sa bo kolo-kolo mu lisumu molinili!» Bu nde hamani uleele buuna, nde amani muvumu.
Atualmente selecionado:
Mavanga 7: TSA
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© (Active), Wycliffe Bible Translators, Inc. All rights reserved.