Yowani 18
18
Masadaadu mamiikanga Yisu
1Bu nde hamani uleele buuna, Yisu na bayihi ba nde baayeni na baasabuhi hu simu lina la mbenge a Sederoni. Huuna hwaba na ngundu miti mosi hu Yisu hakoti na bayihi ba nde. 2Yuda, wu akuti mu usumbasa Yisu, aba ayaaba mbuha moyiina. Mu toni ati, Yisu na bayihi ba nde baaba na ipfu hi ubaapfutana huuna. 3Ni mubuuna, Yuda habiti kabu li balwani, na bakeelisi, ba bakuutu ba banganga ba Nzambi na Bafarisi baatsindihi, na ayeni na bo hu ngundu miti. Bo baaba na bilwanili, na miinda, na minyangi.
4Bu Yisu haba hayaaba moosi ma maakayiila nde, nde ayidi na aleeli bo: «Na benu lili mu usaha?» 5Bo bafutili: «Yisu, musi Nazareti.» Yisu ni uleele bo: «Me ndyowu!» Yuda wu akasumbasa nde ni ŋaana haba na bo. 6Ŋa Yisu haleeli bo ti: «Me ndyowu», bo baafutihi mambimbisa, na baabwiidi ŋa toto. 7Yisu abwefuula bo: «Na benu lili mu usaha?» Bo baafutili: «Yisu musi Nazareti.» 8Yisu afutili bo: «Me ndeeli benu ti “me ndyowu.” Tso ni me benu lili mu usaha, nyahaani bana bayene.»
9Aba mu toni ukuhasa mikuma mi nde haleeli: «Me a hanyambasana muutu tso mumosi mu ba we ava me ve.» 10Simoni Peetelo wu aba na sabila apalisi nde, na ateti musalili a mukuutu banganga ba Nzambi, na akesi nde tswi la mbahala. Nduhi musalili mowuuna aba Malakusi. 11Ka Yisu ni uleele Peetelo: «Futala sabila a we hutso isupu hya nde. We li mu utsima ti me a hunywa mbuungu yi mapasi, yi Taata hamiivangimasa mu me ve?»
12Kabu li balwani na mukuutu a lo, na bakeedi ba Bayudaayo, baakangi Yisu na baahadi nde mikudu mu myoho.
13Bo baamabita nde huli Ane, wu aba buko bwa Kayifa. Kayifa aba mukuutu banganga ba Nzambi mu ilima mohiina. 14Ka Kayifa ni wu aviidi ndongi moyiniyi huli bakuutu ba Bayudaayo: «Hu li bubwe ti muutu mumosi kwidi ŋa mbuha a buli.»
Peetelo miitunala Yisu
15Simoni Peetelo na muyihi mukima baakaduukala Yisu. Muyihi mukima wuuna, aba ayabaana na mukuutu banganga ba Nzambi wa tsomi. Ni mubuuna, nde hakoti nzila mosi na Yisu hutso litandala la nzo mukuutu mo. 16Ka Peetelo asaali humbadi litandala, bebele na ikotili. Muyihi wu aba ayabaana na mukuutu mo, apali na atoyi na mukaasu wu akakeelese ikotili. Titswene, nde atumisi ukotese Peetelo. 17Buuna, Mukaasu wu aba keedi ikotili afuuli Peetelo: «We kaka a hali mumosi mu bayihi ba bahala molinili ve?» Nde aleeli: «Naana, a me ve!»
18Basalili na bakeedi ba baaba ŋaana, baaduuki mbahu mu makala, yi bo baakayoto mu toni a piyu. Peetelo kaka aba na bo na akayoto mbaahu.
19Mukuutu banganga ba Nzambi wa tsomi afuuli Yisu mu bayihi ba nde, na mu ndongisili a nde. 20Yisu afutili nde: «Me akatoyo payalala huli baatu boosi. Me akandongese tangu yoosi mu manzo ma lisambulu li Bayudaayo, na mu nzo a Nzambi hu Bayudaayo boosi bubaapfutana. Me a handeele pasi dyambu mu tswehi ve. 21Muhima we li mu uva me hyuhu mohiina? Fuula boosi ba baayuha ma me anzaabisa bo. Bo bayaabi moosi ma me andeele.» 22Yisu amana uleele buuna, mumosi mu bakeedi ba baaba ŋaana, ateti nde lipali na aleeli: «Buuna ni bu hwafwana mu ufutala mukuutu banganga ba Nzambi?» 23Yisu afutili nde: «Tso me miitoyo bubi, mwese ti ma me miindeele a mafwana ve. Na tso me miitoyo bubwe, muhima we miitete me?» 24Na Ana atsindihi nde wu bahada mikudu, huli Kayifa mukuutu banganga ba Nzambi.
25Simoni Peetelo aba ŋa litandala ŋaana mu uyoto mbahu. Baafuuli nde bunuubu: «We kaka, we a hali mumosi mu bayihi ba nde ve?» Nde atuni na aleeli: «A me ve.» 26Mumosi mu basalili ba mukuutu, ikuta hya wu Peetelo hakesi tswi, aleeli: «Me a hamoni we na nde hutso a ngundu miti ve?» 27Peetelo abwetunala nde. Na mu mawasa, tsusu akohili.
Yisu bamiibita ŋa busu bwa Pilato
28Bamata hu nzo a Kayifa, bo baabiti Yisu hu nzo mutumi ŋa hati a ngwali. Ba baabiti nde, a baakoti mu nzo ve, mu uvelesumaha na mu toni udya Paake. 29Ni mubuuna, mutumi Pilaato hasusihi hupedu a bo humbadi. Nde afuuli bo: «Mu ki dyambu benu lili mu ukese bahala molinili?» 30Bo baafutili nde: «Tso nde a hali muvangi a mambu mamabi ve, bisu a likiibehele we nde ve.» 31Ŋa yulu a ŋaana, Pilaato aleeli bo: «Benu mwakulu, volwani nde na tsundasaani nde we bu hu li Mikele mya benu.» Bayudaayo baafutili nde: «Bisu a lili na muswa mu uduba muutu ve.»
32Aba mu ukuhasa ma Yisu haleeli, bu nde halahi mu ki pila lipfu nde hukwila. 33Pilaato akoti mu nzo a nde, ateeli Yisu na afuuli nde: «We ni mutumi Bayudaayo?» 34Yisu afutili: «We mu we mwakulu leeli lo, vo ti bu bakima baaleeli we lo mu toni a me?» 35Pilaato ni ufutala nde: «Me kaka Muyudaayo ndi? Baatu ba tsi a we, na bakuutu ba banganga ba Nzambi bamiiyasumbasa we huli me. We ki dyambu asa?» 36Yisu ni ufutala: «Ipfumu hya me a hili hya tsi moyiniyi ve. Tso ipfumu hya me hikiiba hya tsi moyiniyi, kini basalili ba me bamiikalana me, mana bavelevahula me huli bakuutu ba Bayudaayo. Ka a buuna ve, ipfumu hya me a hili hya tsi moyiniyi ve.» 37Pilaato aleeli nde: «We mutumi we li?» Yisu afutili: «Ni we li mu uleele ti me “mutumi” ndi. Ka baabuta me, na ni me anza ŋa tsi mu utiila imbangi imbuli. Muutu wu abambana na imbuli, ubaayuha ma me ndi mu undeele.» 38Pilaato afuuli nde: «Imbuli ni hima?»
Yisu kondaayi lipfu
Pilaato amana uleele buuna, nde ayeni huli Bayudaayo na nde aleeli bo: «Me a handi mu umono dyambu tso limosi li ukotese nde ikondaayi ve. 39Ka benu na ipfu hya ti, pasi mukungi a Paake me ukaanyahula benu kondaayi mumosi. Benu litondi ti me nyahula benu mutumi Bayudaayo?» 40Na bo baabwefulaha: «Naana, a nde ve! Nyahula bisu Barabasi!» Kaahu Barabasi aba mutaani.
Atualmente selecionado:
Yowani 18: TSA
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© (Active), Wycliffe Bible Translators, Inc. All rights reserved.