MATEU 23
23
Yeesu aleentsar Bafariseu, ni bapican-ulua
(Mar 12.38-40; Lúk 11.37-54; 20.45-47)
1Din, a Yeesu ja indënd bañaan ni bafetsul: 2“Bapican-ulua ni Bafariseu, bu tsoar tsi pëtsoari Moises. 3Nda roon ngëko ngi bu kë ja ind ngi bëlieng, nda roon ngul, ndë mob tsi ngul, maa ind tsúuts ro ngi bu kë ro ngi. Par bu ka ja, te bë ri ka ro. 4Bu ja ba tan itan iritsal, iñats yi pëyunts, bu ka lapan yul bañaan, maa bukul bërier bukul, bu ri ka ŋal pëkërara yul, ŋal ni pëkuanj. 5#Mat 6.1 Ulú 6.8 Ngëp 15.38Bu ka ro ngëko bukul bëlieng pa pëwinaa tsi bañaan. Unk, bu kë waanës igaangëni ngëtsua bukul, bu kë rëmban imbiantëmb iŋi-bëtiem bukul. 6Bu ŋal ilas icäk tsi ngëfesta; a di ito-ijuki, bu ka ŋal itsoari icäk; 7a ba ŋal puu wëlaa mboos tsi pëncum, ni bañaan puu ru bukul pëja: #23.7 Rabi oo Rabuni, aci përim tsi uliingu ugërek, ko wi pa pac wi aci, Najukan oo Nawiak. Rabi! 8Maa ind, ind tsuuts rua Rabi, naloole rin ci-un Najukan ind, par ind bëlieng nda tsaar këtsaar. 9Te ind tsë ru ñaan tsi umundu asin ind, par naloole rin ci-un Asin ind, nul nan cii di batsi. 10A ne rua bawiak, par naloole rin ci-un Nawiak ind, Këristu. 11#Mat 20.26,27; Mar 9.35; 10.43,44; Lúk 22.26Nan pei pëci nawiak tsi ind, ka ci ni kan këmand indi. 12#Lúk 14.11; 18.14Nan diangi beenul, në welanaa; a na welani beenul, në riangaa.
Yeesu ja, pëkat ibats tsi ngëko ngëcumal
13Cay bapican-ulua ni Bafariseu, ind banguungu! Par nda ja nda roon nduu ríc bañaan Pësien batsi tsi këkës bukul. Maa ind bërërind nda ri ka niaj, nin pëwëtan biki kan këmand biki pëniaj ba niaj.
14 # 23.14 Ilon ifëlal in picana yi kaats përim pëmënts pi. [Cay bapican-ulua ni Bafariseu, ind banguungu! Par nda ja nda roon nduu yankëna bacätsëndan-bayën bukul ngëko ito bukul; a nda ja nda roon nduu yampan bëñaan, pa pëpibandar. Wul ka wun ndu tsua ulaci-un pe wi pëjuats.]
15Cay bapican-utsus ni Bafariseu, ind banguungu! Par nda ja nda roon nduu yaana irëk ni utsia, pa pëtsu ñaan na ci nafets-bëga nawalu; a nu ba pëci ank, ndë tsuul na pe ind pëci ñaan nfeernu, ngëyaas ngëtëb.
16Cay ind ban tsua biki bawiak a nda ciind bakuel! Par nda ja nda roon nduu ja: ‘Uci ñaan baaja pa tsëko-tsëyëman, umënts wan cits un ci wi ko; maa uci ñaan baaja pa uwëru tsëko-tsëyëman, aka përo ko wi na baaja wi.’ 17Ind baranj-ibats a nda ciind bakuel! Woom pe wun pëci uwiak: uwëru, oo tsëko-tsëyëman tsi kan jëntsan tsi uwëru? 18A nda ja nda roon nduu ja kak: ‘Uci ñaan baaj na tsi bëgij, umënts wan cits un ci wi ko; maa uci ñaan baaj na tsi bëtseend ban ci bi tsi bëgij, aka përo ko wi na baaja wi.’ 19Bakuel bamënts biki! Woom pe wun pëci uwiak, bëtseend oo bëgij bi kan jëntsan bi bëtseend? 20Wul ka wun, nan baajnee tsi bëgij, abaajna tsi bëgij, ni tsi ko un ci wi bëlieng tsi bul. 21A nan baaj nee tsi tsëko-tsëyëman, abaaj na tsi tsëko-tsëyëman, ni tsi nan ciinee tsul. 22#Isa 66.1; Mat 5.34A nan baaj nee tsi batsi, abaaj na tsi pëtsoari Nasien-batsi, ni tsi nan tsoari tsi pul.
23 #
Ija 27.30
Cay bapican-ulua ni Bafariseu, ind banguungu! Par nda ja tsi kara ifa untaaja ngëko pi umbaantu, ni iru, ni msaboola, ndë wël kaloole, ndë bër ko un pe wi pëka bëkat tsi ulua, un ci wi bëmabal, ni kayëk-ipës, ni kamob-tsi-ko. Ngëmënts ngí aka përoaa, te nda rits wët përo nganduka ngunk. 24Ind ban tsua biki bawiak a nda ciind bakuel! Nda ja nda roon nduu cíjan ubarëm, ndë yoor ungilëm!
25Cay bapican-ulua ni Bafariseu, ind banguungu! Par nda ja nda roon nduu jëntsan bafetsu karaani ni përialaani; maa ri bametsu, i cum ni kaca ngëko bañaan ni karí-ko. 26Nafariseu, nakuel namëntsi! Jëntsani bërun bametsu karaani, din bafetsu ka jënts buts.
27 #
Ngë 23.3
Cay bapican-ulua ni Bafariseu, ind banguungu! Par nda naam pi ibuk in faacana yi, a i wina i wara di utsand; maa di bametsu, i cum imua bacäts ni ngëkoraar mtsopi bëlieng. 28Ind buts, nda ja bañaan teen ind, ndë ci bamabal tsi këkës bukul; maa di bametsu, nda cum kanguungu ni ngëko-kamabats.
29Cay bapican-ulua ni Bafariseu, ind banguungu! Par nda ja nda roon nduu niew ibuk bayëlia, nduu warandan ibuk bamabal; 30a nduu ja: ‘Uci ngë ro maatir uwal basin nja ngë bitse ka ro ro pëloole ni bukul, tsi katul pëñaak bayëlia.’ 31Unk, nda ci tsi pëpiban bërier ind nda ci babuk bañaan ban fiŋ biki bayëlia. 32Bi u ci bank, nda moban tsi përo ank aa ndë pean ngi basin ind!
33 #
Mat 3.7; 12.34; Lúk 3.7 Ko wi nda ci wi ngëko-pëtsats, uraasa ngëkarar! Um bi ndu buer bun tsi pëlacana pa nfeernu? 34Wul ka wun, a wëtani ind bayëlia, ni bameko, ni bapican-ulua. Nduu fiŋ balon, ndë rieŋ balon di kruus; uja tsi kato-kajúki ind, ndë tucan balon; uja tsi përaasa, ndë natsara bukul koo noor-nooran. 35#Uju 4.8 2Bën 24.20,21Unk, pëñaak bandoots biki ko ka kakar ind, pul pan tula pi tsi utsia, pëkur-ni tsi pëñaak Abel, namabal, te tsi pëñaak Sakaria, abuk Barakia, ni nda fiŋi pëpën tsi tsëko-tsëyëman pëya tsi bëgij. 36Mán leents ind ucär: Ngëmënts ngan bëlieng kee nga baandë-ni bañaan ntsari.
Yeesu akaandër Jerusalem
(Lúk 13.34-35)
37Jerusalem, Jerusalem, wi na njai m doon ku fiŋ bayëlia, a kë tap ba yëlee biki tsi wi, ni ilaak aa bu ka cäts! Ngëyaas um, ngnja ngun n doon ka ŋal pëjukëlën upätsu, pi ugúk kë jukëlën pi ngëbuk tsi utsia ibaakëla; maa nda ŋalats! 38#Jer 22.5Nda teenan-e! Kato ind abërara ind kajënts! 39#Iya 118.26Par, ma n ja ind, tsi inkri, nda katse ka winin, te ndë yaa ndë ja: ‘Mbeenira tsi nul na mbii tsi katim Ajug!’”
Atualmente selecionado:
MATEU 23: KPKNT
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Le Nouveau Testament en langue Manjaku © Alliance Biblique du Sénégal, 2020.