Luke 13
13
Mawnate pan Na Kisiik kik buale Thi tu
1Tua hun laitakin, tua munah a om mihing pawlkhat in, sangaw biakpiakna pia in Pathian a bia Galilee mite Pilate ii a thalup huvau Jesus tungah son uh hi. 2Jesus in zo kik a, “Tua Galilee mite sia tuabangin a kithalup hu in, Galilee midangte sangin mawzaw ahi hunlam kilangh hi ci nuam na hi uh ziam? 3Hi ngawl het hi! A tatakin kong ci ciang, no zongh na mawna uh pan na kisiik kik bua uh le amate bangma in na thi tu uh hi. 4Siloam ah tausaang khat a cipsuk lai in, sawm le liat a thina thu bangbangin na ngaisun uh ziam? Hi mite in Jerusalem midang theampo sangin mawna lianzaw nei ahi hunlam kilangh hi ci in na ngaisun uh ziam? 5Hi ngawl het hi! A tatak kong ci ciangin no zongh na mawna pan, na kisiik kik bua uh le, amate bangma in na thi siat tu uh hi.”
A Nga Thei ngawl Theikung taw Thusonteena
6Tua zawkciang Jesus in hi thusonteena amate tungah son hi. “Khatvei lai in mihing khat ii sapithuan sungah theikung khat po hi. Ama in theinga vil tu in pai ahihang bangma a mu bua hi. 7Tua ahiciang huanthopa tungah hi bangin ci hi. ‘En in, theinga vil a ka pai zawk kum thum pha zo a, bangma mu ngawl khi hi. Phuktan in! lei tulsak tu in banghang kihoai ziam?’ 8Ahizong huanthopa in zo kik a, ‘Topa awng, kum khat sung teng na thutha heak lai in a kung kiimkot to in eaklei kong buak tu hi. 9Theikung sia hong nga le pha seseam hi, tuabang ahibuale na phuk thei tu hi,’ ” ci hi.
Sabbath Ni Jesus in Numei Koncip khat Damsak
10Sabbath ni khat Jesus in synagogue khat ah thuhilna nei hi. 11Tua munah numei khat thaa ngilo vei in, kum sawm le kum liat a ciina hi. Ama bawngcip in a dingmaam thei bua hi. 12Jesus in a mu ciangin biakpui a, “Numei awng na natna panin na suakta zo hi!” ci hi. 13A tungah a khut nga a, tuasia ciang thakhat thu in, dingmaam a, Pathian pok hi.
14Synagogue keam upa pa in Sabbath ni a, Jesus ii ciina a damsak hu in, a thin uuk hi. Tua ahikom mipite tungah, “Nipi khat sungah na ih sep natu ni luk om hi. Tua ahiciang, tua nite ah ciidam nga tu in hong pai tavun a, Sabbath ni in hong pai heak vun” ci hi.#Pu 20:9-10; Thkna 5:13-14
15Topa in zo a, “No mihing a kihitheamsakte awng! No sungah khat pawpo in, Sabbath ni in na khuital ahizong, na laa uh ahizong, tui pia tu in, a buk sung panin, pusua hi ngawl nu ziam? 16Tu in hi munah Abraham tanu khat Satan in kum sawm le kum liat kol bulin om hi. Sabbath ni in tua kolkhau panin suut tu in kilawm ngawl ziam?” ci hi. 17A zo kikna kammalte hu in, a ngalte a mai uh zum a, mipite ahile, a lamdang nasepnate tungah lungdam uh hi.
Ankamhtang taw Thusonteena
(Matthew 13:31-32; Mark 4:30-32)
18Jesus in, “Pathian Ngam sia bang taw kibang ziam? Bang taw ka teengat tu ziam?” ci in dongh hi. 19“Tuasia in hi bang hi. Mihing khat in ankamhcii tang khat la a lo sungah tu hi. A kung khangin, thingkung khat suak hi. Vacimte in a baak kawmah bu vawt uh hi,” ci hi.
Tol taw Thusonteena
(Matthew 13:33)
20Jesus in dongh kik a, “Pathian Ngam sia bang taw teengat tu khi ziam? 21Tuasia in hi bang hi. Numei khat in tol tawm la a, anvui khum khat dim taw hel in, a vekpi in pawm hi.”
Kongkha Ciak Thu
(Matthew 7:13-14; 21-23)
22Jesus in khuapi le khuanote kaantan kawmin, hilna nei a Jerusalem sang zuan hi. 23Pawlkhat in dongh a, “Topa awng, mihing tawm bek in ngupna nga tu ahi ziam?” ci hi.
Jesus in zo kik a, 24“Kongkha ciakna sungah na tum thei natu in, hanciam vun; banghang ziam cile mihing tam mamate in tum tu in hanciam tu a, a tum zo buatu uh hi. 25Inn nei pa in tho in, kongkha hong khak tu hi. Tuasia ciang doipua pan in, kongkha king in, ‘Topa kong hong hon ta'n,’ na ci uh hang, ‘No koisung pan hong pai ci hong he ngawl khi hi,’ ci tu hi. 26Tuasia ciang, ‘Nang taw annekhawm tuidawn khawmte khu hi, ka khuapi sung a thu zongh hong hil ni hi!’ na ci uh hi. 27Ahihang hi bangin hong ci tu hi. ‘Ka kung panin tai vun, mihing ngilote awng!’ hong ci tu hi.#Ps 6:8 28Noma teng doipua ah hong kipuavawk laitakin Abraham, Isaac, Jacob le kamsaang dangte sia Pathian Ngam sungah na mu uh ciang, bangza in kap in ha ngoai in om tu nu ziam! #Mt 22:13; 25:30 29Mihingte sia nisuana le nitumna, sak le thang panin hong pai tu a, Pathian Ngam sungah poai hong siim tu uh hi.#Mt 8:11-12 30Tuasia ciangin tu laitakin a nungkhakte hong masa tu a, tu laitakin a masate hong nungkhak tu hi,” ci hi.#Mt 19:30; 20:16; Mk 10:31
Jesus ii Jerusalem A itna
(Matthew 23:37-39)
31Tua laitak ma in Phariseete pawlkhat, Jesus kungah hong pai a, “Hi sung panin pusuak in, leidang mun khat zuan ta'n, banghang ziam cile Herod in nang hong that nuam hi,” ci hi.
32Jesus in zo a, “Noma pai tavun a, tua ngia tungah hi bangin ci tavun. ‘Tuni le zing ciangin, doai ka not tu a, ciina ka damsak tu hi, a ni thum ni ciangin ka nasep ka man tu hi.’ 33Ahihang tuni, zing ciang le thai ciangin ka pai tu kul hi. Jerusalem simngawl mundang ah kamsaangte kithalup tu ngeina om ngawl hi.
34“Jerusalem, Jerusalem awng! Nang in kamsaangte na thatlum a, Pathian kamtaite na deanglum uh hi! Akpui in a note a tha nuai ah a huai bangin, tamvei ma na mite ka huai nuam hi. Ahizong nong oai bua hi. 35Tua ahikom na Biakinnpi uh sia kinusia cip tu hi. A tatakin ka ci ciang, ‘Topa min taw hong pai pa tungah Pathian thupha tung tahen,’ na ci uh hun mateng kei nong mu buatu hi,” ci hi.#Ps 118:26; Jer 22:5
Atualmente selecionado:
Luke 13: SCB2
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Siyin Chin Bible © Bible Society of Myanmar, 2016