Luke 2
2
Jesus Suana
(Matthew 1:18-25)
1Tua hun laitakin Augustus Kumpilianpa in Rome Kumpi ngamlian sung bup mihing kisimna omsak tu in thupia hi. 2Hi a masa phitbel mihing kisimna a kivawt hun laitakin Quirinius sia Syria ngam ngamuk mangpa ahi hi. 3Tua ahikom mihing simin amate khua tek ah min khum tu in pai uh hi.
4Joseph zongh Galilee ngam Nazareth khua panin Judea ngam Bethlehem khua, David Kumpipa suana munah hong pai hi. Joseph tua khua ah hong pai theina thu sia, ama in David ii suan ahihang ahi hi. 5Ama taw a kiteang tu dokzu a kipiasa ahi Mary taw min khum khawm tu in pai uh hi. Ama naungil omsa hi a, 6Bethlehem khua ah a taam sungin, a nausua tu hun cing hi. 7A tapaciil suak a, zin tun natu zinbuk awng nawn ngawl ahikom, puan taw a nau tunin khui ankuang sungah sial hi.
Tuucingte le Vantunglalangte
8Tua ngam ah tuucing pawlkhat om a, zan lai in a tuute cingin duisung ah ngiak uh hi. 9Vantunglalang khat amate kungah kilangh a, tuaciang Topa vaang amate tungah taang hi. Amate lau mama uh hi. 10Ahizong vantunglalang in, amate munah, “Lau heak vun. Mihing theampo atu, a lungdamhuai mama, lungdamna thupha no tungah puak tu in kong pai hi. 11Tuni mama in David khua ah note hong Hunpa — Christ Topa suak zo hi. 12Thumaan a hina na tel natu in, nausen khat puan taw kituun in, khui ankuang sungah kisial na mu tu uh hi,” ci hi.
13Thakhat thu in, vantunglalang honpi tua vantunglalang ii kungah kilangh a, Pathian pokna lasa uh hi.
14“Van a saangbelna ah
Pathian minthang tahen,
ama ii dik a sak leitung mihingte tungah
thinnopna om tahen!” ci uh hi.
15Vantunglalangte van ah a cia kik zawk uh ciangin, tuucingte khat le khat hi bangin kici uh hi, “Eite Bethlehem khua ah pai in, Topa hong sonsa thupiang sia en tawng,” ci uh hi.
16Tuaciang amate manlangin pai uh a, Mary, Joseph le khui ankuang sungah nausen kisial mu uh hi. 17Tuucingte in ama a mu uh ciangin nausen huvau vantunglalang ii sonsa teng son kik uh hi. 18A za theampo in tuucingte son thute lamdang sa uh hi. 19Mary in hi thute a vekpi in ciamtee a, thuk takin khuangaisun hi. 20Tuucingte zongh cia kik a, amate ii mu le a zaak thute hu in Pathian pokna lasa uh hi; vantunglalang ii son bang tatak ma ahi hi.
Jesus Min Kiphuak
21Nipi khat zawkciangin, nausen ii vunteap at tu hun hong theng a, ama ii naungil om ma in, vantunglalang ii piaksa min ahi Jesus ma phuak uh hi.#Thiam 12:3; Lk 1:31
Biakinn ah Jesus Ki aap
22Moses Thukham ii thupiak bangin Joseph le Mary te ii a kithiansua natu hun hong theng hi. Tua ahikom amate in patangno sia Topa tungah aap tu in Jerusalem ah paipui hi, #Thiam 12:6-8 23banghang ziam cile Topa thukham sungah: “Tapa suakciil peuma Topa atu in ki aap tu hi,” ci in ki at hi.#Pu 13:2,12 24Topa thukham sungah a om bangma in, amate in ngam vakhu kop khat ahibuale inn vakhu moi nii taw sangaw biakpiakna vawt tu in pai uh hi.
25Tua hun laitakin Jerusalem khua ah Simeon kici pasal khat om hi. Ama sia mihing pha Pathian kiita pa hi a, Israel te a kingup tu ngakin a om khat ahi hi. Thaa Thiangtho sia ama taw om a, 26Topa ii a ciamsa Messiah a mu mateng a thi ngawl natu in, thinmuanna pia hi. 27Thaa Thiangtho in lampui a, Simeon Biakinn sungah tum hi. A nu le a pa in patangno Jesus sia thukham zeksa teng vawt tu in, Biakinn sungah a paipui uh ciangin, 28Simeon in patang toai in, Pathian tungah lungdamko hi:
29“Tu in Topa awng,
nong kamciamna na kholet zo a,
na naseampa thinnuam takin,
hong lawnsak thei tu na hi zo hi.
30Ka mittang mama taw
nong tatna ka mu zo hi,
31tua thu mihing theampo ii
mu thei tu in na vawtkhol zo hi:
32Gentile te tungah na deina
a kipualaak natu le
na minam Israel mite tungah
minthanna a puak khuavak khat na hi hi.” ci hi.#Is 42:6; 49:6; 52:10
33Patang ii pa le nu in hi bangin Simeon ii a thuson a zaak uh ciangin lamdang sa uh hi. 34Simeon in amate thupha a piak zawkciangin, a nu Mary tungah hi bangin ci hi, “Hi patang sia Israel mite, tam mama ii a siatcip natu le, tam mama ii a kingup natu Pathian ii tealsa ahi hi. Ama sia mihing tam mama ii a langpan tu, Pathian ii lim lakna khat hi tu a, 35tuaciangin tua mihingte thinsung thuku theampo kipualaak tu hi. Tuaciang khuangaina in, namsau hiam khat bangin, nangma thin mama hong tamhsak tu hi.”
36-37Asher suan Phanuel ii tanu Anna a kici nupi meingong huai mama kamsaangnu khat om hi. Ama kum sali sung bek a pasal in nuntak pui a, tu in a kum sawmliat le kum li pha zo hi. Ama in Biakinn nusia ngeingawl a, sun taw zan taw Pathian bia in an tangin thungen hi. 38Tua hun laitak ma in, ama hong theng a, Pathian tungah lungdam a ko zawkciang, Jerusalem a suatak tu Pathian a ngakte theampo tungah patangno ii thu son hi.
Nazareth ah A Ciakikna
39Joseph le Mary in Topa Thukham zeksate a sep tu teng a sep zawkciang Galilee ngam Nazareth khua a inn uh zuan kik hi.#Mt 2:23 40Patang hong khang a hong hat hi; ama ciimna taw kidim a, tuaciangin ama tungah Pathian thupha om hi.
Patangno Jesus Biakinn sungah
41Jesus ii nu le pa sia Paisan Poai siim tu in, kum simin Jerusalem ah pai uh hi.#Pu 12:1-27; Thkna 16:1-8 42Jesus kum sawm le kum nii a phak ciangin, a pai ngei uh bangma poai siim tu in pai uh hi. 43Poai man ciangin inn ah cia kik tu in amate pai uh a, ahizong patangno Jesus sia Jerusalem ah taam hi. A nu le a pate in a he bua uh hi; 44amate in mihon sungah a om ma in ngaisun ahikom ni khat bup a pai zawk uh ciang a lawmte le a mealheakte kawm tengah zong uh hi. 45Amate in Jesus mu ngawl ahikom Jerusalem ah heak kikin zong uh hi. 46A ni thum ni ciangin biakinn sungah Jew syate taw tokhawm a thu ngai thu dongh in a om mu uh hi. 47Ama ii ciim kammal taw a zona te a za theampo in lamdang sa uh hi. 48A nu le a pa in ama a mu uh ciangin lamdang sa in, a nu in a tapa ii munah, “Ka tapa awng, banghangin hi bangin hong vawt ni ziam? Na pa le kei in, nang kong zawzonna in ka thin uh ngim mama hi,” ci hi.
49Ama in zo kik a, “Banghangin kei hong zong nu ziam? Ka pa inn sungah ka om tu a kul hunlam he ngawl nu ziam?” ci hi. 50Ahizong a nu le a pa in ama zo kikna thu a tel bua uh hi.
51Tua ahikom Jesus amate taw Nazareth ah heak kik a, tua munah amate thu ni in om hi. A nu in hi thute theampo a thinsung ah keam hi. 52Jesus sia a pumpi le ciimna ah hong khangto a, Pathian le mihingte tung panin maipha nga hi.#1 Sa 2:26; Pau 3:4
Atualmente selecionado:
Luke 2: SCB2
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Siyin Chin Bible © Bible Society of Myanmar, 2016