Luka 22
22
OMUTEGEKO GW’ABAHATE BA YEZU. — YUDA NAMUTUNDA. — YEZU NAGIRA UKARISTIA.
1Mbe olunaku lukuru lw’Azima, olukweta luti: Paska, lwaliga lwahikire hehi#22, 1 Lora Matayo 26, 2 na 26, 17.; 2abakuru b’abasaserdoti n’abandiki nibategekerana okwo balaita Yezu, nawe baliga nibatina abantu.
3Mbe isitani nilitaha muli Yuda, owe bayetaga bati: Iskaryota, omo mul’ikumi na babili. 4Nagenda nafumora n’abakuru b’abasaserdoti n’abakuru b’abantu, okwo alamubaha. 5Nibasemererwa, nibamulaganisya kumuha empilya. 6Naikiriza, nahiga omwanya gwo kumubaherezaho, embaga etaliho.
7Olunaku lw’Azima niluhika olwaliga lulagirwe kubagiraho Paska. 8Natuma Petro na Yohana ati: Nimugende mutuchumire Paska, tulye. 9Bonene nibagira bati: Okwenda tugichumire hai? 10Nabagira ati: Lora, ka mulagenda mu kikale, mukubugangana n’omuntu ogwo ategwire ensuha y’amenzi; mulamuruba mu nzu eyo alatahamo, 11kandi mugambire kan’enzu egyo muti: Angu Omukama akukutengera ati: Enzu eli hai, eyo ndaliramo Paska n’abahemba bange? 12Wenene alaboleka enzu mpango eyalire; n’imwo muchumire. 13Mbe nibagenda nibasanga nk’okwo yabagambire, nibasemeza Paska. 14Akatungu ka kahikire, naikara h’eliro n’abahemba be ikumi na babili. 15Nabagambira ati: Kwegonga nkayegonga kulya n’emwe Paska enu, ntakasasibwe. 16Kuba nkubagambira okwo kuruga hati ntakisuba kugilya, kuhika ehike mu bukama bwa Mungu#22, 16 Lora Matayo 26, 29.. 17Ka yakwasire ekikompe#22, 17 Lora Matayo 26, 21., nalamiriza, nagira ati: Mwanankure, mugabane mul’imwe. 18Kuba nkubagambira okwo ntakinwa ha bikuraba ha muzabibu, kuhika obukama bwa Mungu bwize#22, 18 Lora Matayo 26, 29.. 19Ka yakwasire omukate, nalamiriza, nahinzura, nabaha, nagira ati: Kinu nizo ngingo zange, ezikuherezibwa imwe; nimugire mutyo ha kunizukiraho. 20Nikwo atyo n’ekikompe, ka yamazire kulya, nagira ati: Ekikompe kinu ni mulago muhya mu nsagama yange, elisesekera imwe#22, 20 Lora Matayo 26, 28.. 21Nawe lora, omukono gw’akuntunda guli n’ene h’eliro. 22Nikwo, Omwana w’omuntu akugenda nk’omwo byategekirwe, nawe si omuntu akumutunda aligabona! 23Bonene nibatandika kubuzanya muli bonene bonka bati: Mul’itwe n’oha si akukola atyo?
EMPAKA MU NTUMWA. — YEZU NALAGA OKWO PETRO ALAMWEYOGA.
24Nihemuka empaka muli bonene z’asusene kuba mukuru muli bonene. 25Nabagambira ati: Abakama b’amahanga bagatwara mani, kai abakugagerera bakwetwa Barugaba. 26Nawe imwe bitaba bityo; nawe omukuru mul’imwe abe nka namuto; kandi atwere abe nk’omukozi. 27Si omukuru n’oha, aikere h’eliro nangu akukola? si n’aikere h’eliro? Mbe ine ndi hagati yanu nk’omukozi. 28Imwe n’imwe abasimbagirire n’ene mu kurozibwa kwange; 29ine nkubalinzya obukama, nk’okwo Tata yabundindize, 30niho mulye nimunwe h’eliro lyange mu bukama bwange, mwikere ha ngoma nimulamula enganda ikumi n’ebili za Israeli. 31Aho Omukama nagira ati: Simoni, Simoni, lora, isitani lyayenda kubayunga nk’engano; 32nawe ine nakusabira, kwikiriza kwawe kuleke kugeruka; kai n’ewe, k’olaba wahindukire, ogumye batabani banu#22, 32 Entumwa zona fu zikarozibwa. Petro akagwa, nawe ka yatamirwe, akagumya abezabo: niwe naba Papa wo kutandika, entwaliriza ya Yezu Kristu mu nsi.. 33Wenene namugira ati: Mukama wange, ine nemere kugenda n’ewe, naho hali mw’ibohero, naho hali mu kufwa. 34Wenene ati: Petro, nkukugambira, lero enkokoromi tekukokoroma, iwe otakayangire kasatu okw’okummanya. Nabagambira ati: 35Olwo nabatuma mutali na mufuko, n’ensaho, n’enketo, hatyo mukaburwa kintu? 36Bonene bati: Pai. Mbe nabatengera ati: Nawe hati ali n’omufuko, agutware, n’ensaho yona; kai atali nabyo, aguze enkanzu ye, agure embanda#22, 36 Yezu yayendaga kugamba ati: Hati obulemo bwatusyaka, mwemanye.. 37Kuba nkubagambira okwo ebyayandikirwe bili no kuhikibwa hal’ine, biti: Akabalirwa hamo n’abaheni. Kuba agange gali hehi no kuhwa. 38Bonene nibagira bati: Rugaba, lora, embanda ibili nzizi. Wenene nabagira ati: Byahika.
YEZU NAYOYERA ENSAGAMA HA KABANGA KA ZITUNI. — NIBAMUKWATA.
39Ka yahurukire, nagenda ha kabanga ka Zituni, nk’okwo yaliga amanyire; mbe abahemba be nibamuruba. 40Ka yahikire aho, nabagira ati: Nimulembereze, niho muleke kurozibwa. 41Kai wenene nabarugaho nairiraho nko kulasa ibale likahikaho; natez’ebizwi nalembereza, 42ati: Tata, raba noyenda, noniheho ekikompe kinu#22, 42 Lora Matayo 26, 39.; nawe kutaba kwenda kwange pai, nawe okwawe. 43Nawe mumalaika wo mw’igulu namubonekera namugumya. Wenene akakubwa naguma kulembereza. 44Olwoyera lwe niluba nk’engererezi y’ensagama, nilugerera ha nsi. 45Ka yarugire mw’ilembereza, akasuba ha bahemba be, nasanga banagire, obwo baliga bazubire. 46Nabagambira ati: Mukunagirizibwa ki? Nimwimuke, mulembereze, niho muleke kurozibwa.
47Yaliga akifumora, niyo n’embaga neiza; omo mul’ikumi na babili, owe bayetaga Yuda, abebemberere; nairira Yezu hehi, amunwegere. 48Nawe Yezu namugambira ati: Yuda, okutunda Omwana w’omuntu nomunwegera? 49Banu abaliga bamuliho ka babwene ebilagwa, nibamugira bati: Rugaba, si tutemy’embanda? 50Omo muli bonene natema omwiru w’omusaserdoti mukuru namuchwaho okutwi kw’obulyo. 51Yezu akasubamo nagira ati: Mutasubira. Ka yakwasire okutwi kwe, namukiza. 52Yezu nagambira abakuru b’abasaserdoti n’abakuru b’eklezia n’abagurusi abaliga bamwizireho, ati: Muli n’embanda n’amakoni nk’abakuza ha musuma. 53Aho naliga ndi n’emwe naku zona mw’eklezia, timwantereho ngaro; nawe hati ni katungu kanu na buhicha y’omwirima. 54Ka bamukwasire, nibamusagara mu nzu y’omukuru w’abasaserdoti; Petro namurubirira hara.
PETRO NAYEYOGA YEZU. — NIBAMUSEKERERA. — NAIKIRIZA OKW’ALI MWANA WA MUNGU.
55Nibahemba omuliro mu kibuga hagati, nibagwikaraho baguzongere, na Petro wena yaliga ali hagati yabo. 56Omuzana ogwo ka yamubwene aikere ha lumuri, namwetegereza, nagira ati: N’onu wena sanga ali nage. 57Wenene namweyoga nagira ati: Mukazi we, ine tinkumumanya. 58Niharabaho katungu, ondi namubona nagira ati: N’ewe wena oli wo muli aba. Nawe Petro nagira ati: Ye go, ine pai. 59Niharabaho katungu kuti k’esaha emo, ondi nayomereza nagira ati: Koto onu sanga ali nage; kuba na wenene ni Munagalilaya. 60Petro nagira ati: Nangu, tinkumanya ech’okutenga. Aho honka akifumora, enkokoromi nekokoroma. 61Omukama nayekebuka nalora Petro. Kandi Petro naizuka ekigambo ch’Omukama, echo yagambire ati: Enkokoromi etakagambire, okuneyoga kasatu. 62Petro nahuruka h’esazi, nalira muno.
63Abantu abaliga bali nage nibamusekerera nibamutera. 64Nibamufundikira ameso, nibamutera mu busyo, nibamubuza bati: Laga, ayakutera ni ga? 65Nibamuzuma ebizumi bindi bingi.
66Mbe, obwire ka bwachere, nibesoroza abagurusi b’abantu n’abakuru b’abasaserdoti n’abandiki, nibamusagara mu lukale lwabo, nibagira bati: Raba oli Kristu, notugambire. 67Nabagambira ati: Naho nkabatengera, hona timunikiriza; 68kai nkababuza, hona timukunsubiramo, kai timukunsindika kugenda. 69Nawe kuruga hati Omwana w’omuntu aliba aikere ha bulyo bw’amani ga Mungu. 70Bona nibagira bati: Mpaho oli Mwana wa Mungu? Wenene ati: Mwakigamba, kuba ndi wenene. 71Bonene nibagira bati: Tuchahigira ki mbona? Itwe abene twehulirira mu kanwa ke.
Atualmente selecionado:
Luka 22: KED1946
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
First published in 1946 by the White Fathers. Published online with the permission of the White Fathers.