Lóka 2
2
Ɓɔkɔtɛana á Yéso
(Ɔna phɔtɔ Mat 1.18-25)
1Ka matú ndɔ, moamɛ angbóngbó á Ɓalɔ́ma Kaisáa Ogústɔ#2.1 Ogústɔ ɗátú moamɛ angbóngbó á Ɓalɔ́ma, kpanga ka saga nkama iɓɛ na ngianjaga gena (29) mosá á ɓɔkɔtɛana Yéso Kiísito, áosungia ka saga nkama na gena (14) mbusa á ɓɔkɔtɛana á Yéso Kiísito., áososea gea, ɓétangɛ ɓakpa ɓɔbu ɓunde ɓá ka nji bui nde a kusi á kɔkɔta nɛkɛ. 2Nndɔ ɗátú tanga á ɓakpa á k'ama mosá-mosá nnde ɗátɔtɔkɛani ka saga nde Kuɛníɔ ɗátú mɔkɔta á ka nji bui á Sulía. 3Kaɓondɔ, nkpa buakɛ ɗáge ka nji nɛkɛ á ɓɔkɔtɛana k'aphe á ɗundusa ina akɛ.
4Yɔsɛ́phu â phɔtɔ ɔmɛɛa ka ntanga-nji Najalɛ́ti nnde á ka Galiláya, áoga ojúa ka Bɛtɛlɛɛ́mu á ka Yudɛ́a, ntanga-nji ndea Moamɛ Daúdi. Nga, Yɔsɛ́phu ɗátú nto á k'ékombo nɛkɛ. 5Áoga oɗundusa ina akɛ n'índe á Malía nke á mbanje nɛkɛ n'ana éme. 6Ɓî ɗáɓátú phɔ́tɔ kó, ɓoaé áondonda Malía, 7áɔmɓɔkɔta ánge nɛkɛ, miki-mǒko, áonkombea na ngɔ́mbɛ, áɔmɔyia suɓi á ɔma á isa á ɓanyama. Nga, ɗáɓákátú n'ɔ́ma, k'éndu á ɓakɛni.
Malaéka na ɓaɓondigi-ɓamɔgɔgɔ
8Ka nji ndɔ, ɓaɓondigi-ɓamɔgɔgɔ ɗáɓátú ɓei. Kǐpha, ɗáɓáoɓondeaga etúge nɛɓɔ k'ɔ́ma á isa aɓɔ. 9Cɔ, malaéka nde ɓa Mɔkɔta áɔsɛnɛka mosá aɓɔ cɛɗɛ! Owanga á ɓophombia ndea Mɔkɔta áǒkomba. Kɔɓɔɓɔkɔ ángbó áɔ̌bɛɗa.
10Malaéka â ndiu ǒgea: «Ɓókoɓɛmbɛ na kɔɓɔɓɔkɔ. Nga, nenóbikíí na nyɔngɔ ánjá, á maseye phɛɛ, n'aɓande ka ɓakpa ɓɔbu. 11Kesande, Namisi aɓɔkɔtɛani kanu ka ntanga-nji ndea Daúdi. Ande Mɔkɔta Kiísito. 12Ɓomúbande yɛ ka mphangiɔ ndee. Ɓondondande mɔɛmba na ɓánkombei na ngɔ́mbɛ, na ɓámɔyi suɓi á ɔma á isa á ɓanyama.» 13Kɛ̌kɛndɔ, ɓamalaéka ɓásii ka toka na koba ɓáɔnsɛnɛkɛa daɓɔ malaéka, ɓáombeba Mokonga ɓe:
14Ɓoombia ka Mokonga, mmbé á na koba ee!
Ɓujɛjɛ ka ɓakpa nɛkɛ, ɓundɔ ěkondi ee!
15Cɔ, ɓî ɓamalaéka ɓéɗeketi ye ɓaɓondigi ka ja aɓɔ na koba, mpɔ ɓaɓondigi ɓáɔyɔngaga sɔsɔɓɛ aɓɔ te: «Ɓégɛni na Bɛtɛlɛɛ́mu, ɓɛ́ɔnɛ ka kema nde ageani kó, nnde Mɔkɔta asóphangi.» 16Cɔ, ɓáokamisaga gǎ, ɓáǒdonda Malía, Yɔsɛ́phu na ɓámɔyi mɔɛmba suɓi á ɔma á isa ɓanyama. 17Mbusa á ɔna miki, ɓáɔɛmbisa mbino nde malaéka ɗéngoɗi ka phɔa mɔɛmba ndee. 18Ɓakpa ɓɔbu ɓundɔ ɗáɓáɔ́ki nyɔngɔ nde ɓaɓondigi ɗáɓáɔtɔmiaga, ɓáoyayama. 19Malía â gǎkɛ kobisa nyɔngɔ ndɔ ka měma akɛ, áoianaga gǔ í. 20Cɔ, ɓaɓondigi-ɓamɔgɔgɔ ɓáoja, ɓáombeba na ɗokomisa á Mokonga ka kema bui nde ɗáɓáɔ́ki na ɔna í. Nga, ɗátɔtɔkɛani ɓíndɔ malaéka ɗěngoɗi.
Suá á Yéso ina
21Esa á ko ngianjaga isaɔ mbusa á ɓɔkɔtɛana akɛ, ɓáongusa ganja. Ɓáonsua ina akɛ Yéso, ɓíndɔ malaéka ɗáyɔngi, mosá á kumba á éme akɛ#Ɔna Ɓlw 12.3; Lók 1.31.
Bisa á miki Yéso ka Mokonga
22Esa á tokisa a ndiga ésomba, n'asóosia, ka ɓeana n'ɛɔphi ndea Mósa, Yɔsɛ́phu na Malía, ɓáonga na miki na Yɛusalɛ́ma, k'aphe á gɔɓa á nyɔngɔ nɛkɛ mosá á Mɔkɔta. 23Nga, a tɔ ɓíndɔ ɗáɓáɗundu k'ɛɔphi ndea Mɔkɔta: «Ánge-mǒko buakɛ, ɓámbisande ka mpɛphɛ ka phɔa á Mɔkɔta#Ɔna Jua 13.2,12.» 24Kaɓondɔ, ɓáophúia ka phɔa á miki, ɔphɛ́ɔ nde ɛɔphi ndea Mɔkɔta asosi: «Kaɓɛ ɓaniki á ɓamboe ɓaɓɛ, kaɓɛ ɓ'etítí ɓaɓɛ#Ɔna Ɓlw 12.8.»
Simɛɔ́ni ambebi Mokonga ka phɔa á Yéso
25Cɔ, nkpa moci ɗátú ka Yɛusalɛ́ma, ina akɛ Simɛɔ́ni. Ɗátú nto á koɗoni na nto á konda á Mokonga phɛɛ. Ɗáomɓondeaga Namisi á Ɓaisilaɛ́li. Měma á kanga ɓojeɗe ɗá kimoci na yɛ. 26Měma á kanga ɓojeɗe ɗámúbisi gea, kákuwɛku mosá á ɔna ka Kiísito mmbé Mɔkɔta anteki. 27Měma á kanga ɓojeɗe áonteka, ágɛ k'éndu á Mokonga. Wa, ɓaɓɔkɔti ɓáɔmbika na miki Yéso ka gɔɓa á nyɔngɔ nɛkɛ ɓíndɔ ɛɔphi ndea Mósa ayɔngi ka phɔa akɛ. 28Simɛɔ́ni áɔmbɛɗa miki ka njaga, áombeba Mokonga n'émbɔ ndee:
29«Mɔkɔta! Mpɔ ye tɔ eme mbɛɗanigi nɛkɔ ómoɗeketa négɛ ka ɓujɛjɛ.
Nga, mɔkɔ nɛkɔ atɔtɔkɛani.
30Kanyɔngɔ nde iso ani aɔni ɓoamia nɛkɔ,
31nnde ɗɔ́ɓɔngisigi k'íso á ɓakpa ɓɔbu:
32ande gea owanga ka phangia á ɓato á ka mokonda ɓɔbu,
n'ande phɔtɔ ɓoombia ka ɓato á ekuna nɛkɔ, Ɓaisilaɛ́li.»
33Ɓaɓɔkɔti á Yéso ɓáotangaaga ka kema nde Simɛɔ́ni ɗáɔyɔnga ka phɔa Yéso. 34Mpɔ, Simɛɔ́ni áobisa njaga gǔ aɓɔ, áongoɗea amakɛ Malía ɓe: «Eya, miki nde abiki gea, Ɓaisilaɛ́li ɓásii ɓáguande, ɓuangbo ɓâ gǎkɛ ǒmesia ka nyɔngɔ akɛ. Aɓande gǎkɛ mphangiɔ nde ɓakpa ɓáyande. 35Ande gea, kanisia á ka ɓɔsɔmɛa ndea suɓi á měma á ɓakpa aúbikanande. K'óɓɛ Malía, kokae á nyɔngɔ ndɔ aokiande ka měma ɓea ngɔa.»
Nke Ana mɔtu-nyɔngɔ ndea Mokonga
36Nke mɔtu-nyɔngɔ ndea Mokonga, ɗátú phɔtɔ k'ɔ́ma ndɔ, ina akɛ Ana, muna Phanuɛ́li, k'ékuna ndea Asɛ́li. Ɗátú phomi phɛɛ. Ɗáɓáiki na munyakɛ ɓasaga ngianjaga iɓɛ (7) k'éyamani á ka koseka akɛ. 37Mbusa índɔ, áojiga nke á kekusa na ka ɓî ɗájúsi ɓasaga nkama ngianjaga isaɔ na gena (84), n'a tɔ ɔbɛɗanaga k'éndu á Mokonga keiphe n'esa. Ɗáɔmɛma na ikaga kángá á eaga ka nyɔngɔ á mɛma á Mokonga. 38Ka mbenɔ ndɔ tɔ, áɔsɛkɛɗa mosá aɓɔ. Áombeba Mokonga, áɔtɔmiaga nyɔngɔ á miki Yéso ka ɓakpa ɓɔbu íɓundɔ ɗáɓáoɓondeaga gea Mokonga áamisɛ Yɛusalɛ́ma.
39Ɓágɔɓi ye moangɔ ɛ́ɔphi ndea Mɔkɔta, nnde ɗábisi ka nyɔngɔ á ɓaniki, Yɔsɛ́phu na Malía ɓáosikianaga ka nji nɛɓɔ Najalɛ́ti á ka Galiláya. 40Cɔ, miki ndɔ áɔmɔta, áokakamana ka měma, áotúma na kɔɓɔɔngɛ. Ɓonjánja-ékondi ndea Mokonga áoɓá ka yɛ.
Moganda Yéso k'éndu ndea Mokonga
41Cɔ, ɓaɓɔkɔti á Yéso ɗáɓáogaga na Yɛusalɛ́ma ka saga bui ka jaí á Pasáka#Ɔna Ɓlw 23.6; Tɔl 16.1-4. 42Ka jaí moci, ɓî Yéso ɗátú na ɓasaga nkama na ɓaɓɛ (12), ɓaɓɔkɔti akɛ ɓáonga ně na Yɛusalɛ́ma ɓíndɔ ɗátú asii nɛɓɔ. 43Ɓî jaí ndɔ asi ye, ɓáoja. Miki Yéso â tɔ ojiga na Yɛusalɛ́ma, abakɛ n'amakɛ ɓákáúbɛ. 44Ɓáokanisia te aotamba na ɓadakɛ. Ɓâ goto otamba esa moci, mpɔ, ɓáokpanga kaɓa akɛ ka nkíndí á ɓadaɓɔ na ɓakpa nde ɓáoúbanaga na ɓɔ, 45ɓákámɔnɛ. Kaɓondɔ, ɓâ goto oja na Yɛusalɛ́ma na ɓáonkaɓaga.
46Ɓánkaɓi ye esa isaɔ, ɓáondonda k'éndu á Mokonga n'aiki sɔsɔɓɛ á ɓagoisigi-ɛɔphi, n'aɔɓɔ́ka na úsianaga na ɓɔ. 47Ɓundɔ ɗáɓáɔmɔ́ka, ɓɔbu ɓáotangaaga ka nyɔngɔ á úbapha, na ɓoabi nɛkɛ. 48Cɔ, ɓî ɓaɓɔkɔti akɛ ɓámɔni ye, ɓáoianaga! Mpɔ amakɛ áongoɗea ɓe: «Hoo, miki nɛmɔ! Ekende osogi ně ɓende? Nga, eme n'abakɔ, měma asu atɔ́phɛngɛmani ka nkaɓɔ akɔ.» 49Áǒsikisia te: «Eke nde ɓoomokaɓea? Ɓókóoúba gea te, akeni néɓɛ suɓi éndu ndea Abɛ?» 50Ɓákáengekisɛ gǎkɛ cina á ɓoabi nɛkɛ.
51Mbusa, â ye tɔ oga na ɓɔ na Najalɛ́ti, n'aɔɓɔ́ka ɓaɓɔkɔti akɛ. Amakɛ áoamba nyɔngɔ ndɔ bui ánjá ka měma akɛ. 52Mpɔ Yéso áɔmɔta, â goto oɓá na kɔɓɔɔngɛ phɛɛ, nndɔ áɔmɓɔngɛa Mokonga na ɓakpa#Ɔna 1 Sam 2.26; Mɛn 3.4.
Atualmente selecionado:
Lóka 2: KMW
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2021, Wycliffe Bible Translators, Inc.