यूहन्ना 2
2
काना माएँ क्याहसाला पा़हमा पेहक्योगी ताम
1स्याहक्पु सुम तिङगी केच्या यिहम्बा। गालील माएँ साने़की काना माएँ क्याहसाकी खाङबा च्यी़ला पा़हमा येहकें। येशूगी आमाॱआङ ओ़ह पा़हमाला फेप्ती येहकें। 2येशू दाङ येशूगी स्याहप्च्यीया़ॱलाङ ओ़ह पा़हमाला पाहङज्येन क्याहप्ती येहकें।
3पा़हमाला तेर्केन्गी छ्याङ चो़हक्यो सोङबे येशूगी आमागी येशूला स्युहसीन, “कुहन्डुमकी-निङगुनी चो़हसीन दुबा!” 4ओहले दि सेन नाङदी येशूगी आमाला सुङ नाङसीन, “आमा, ङाहगी च्यि पेह कोहकें म़ेदी राहङगी ङाहला सुङ माहनाङ, च्यिबेमाना ङाहगी ती़हजी नाहरे थु लेप्ती म़ेह।” 5ओहजेला येशूकी आमागी योक्पुया़ला मासीन, “येशूगी च्यि सुङ नाङगेन ओ़हदीॱराङ पेहतोङ।”
6यहूदीया़की राहङला चाङमा ज़ोएँ ठिमकी तेहन्दाला ओ़हला लिटर क्याह च्यिचे स्योङगेन्गी तोहगी ज़ोक्यो फुम्बा ट़ूह थाल ज़्या़क्यो येहकें। 7येशूगी योक्पुया़ला सुङ नाङसीन, “ओ़ह फुम्बाया़ला छ्यु काङदोङ।” ओहले योक्पुया़गी फुम्बाया़ला काहङग्या काहङग्याराङ छ्यु काङ तेर्सीन।
8ओहले येशूगी खुङया़ला सुङ नाङसीन, “ता़हनी सिपाज्यी तेन्दी ख्याया़गी डेनगी गोबासाला ख्येर्ती प्रे़ह ङ्याम च्य़ूदोङ।” ओहले खुङया़गी सिपाज्यी ख्येर्ती गोबाला प्रे़ह ता़ च्य़ूसीन। 9ओहले गोबागी छ्यु प्रे़ह ताएँमुनी ओ़ह छ्यु छ्याङ काहल सिहन्ग्यो येहकें। ओ़ह का़हलेगी ओहङबा म़ेदी गोबाला क्यी़ह म़ेहबा येहकें, यिहॱनाङ फुम्बाला छ्यु काङगे योक्पुया़ला च्यिॱराङ क्यी़ह येहकें। ओहले गोबागी माहक्पा साम्बाला क़े क्याहप्ती मासीन, 10“लेहमेन मिहया़गीनी तोहङस्यो कुहन्डुमकी-निङगु स्यिहम्बु तेर्के ओहले मिहया़गी माहङबुराङ थुङ सिहन फान्ज्यो च्यी़राङ प्रे़ह याहल्ग्यो कुहन्डुमकी-निङगु तेर्के, यिहॱनाङ राहङगीनी ताहन्दा थुॱआङ थाम्ज्यी म़ेदी स्यिहम्बु कुहन्डुमकी-निङगु सी़दे ज़्या़ नाङग्यो दुबा!”
11मिहरोगी याहम्जेन छ्येवागी ताक्छेनया़ नाहङला दि तोहङस्यो ताक्छेन यिहम्बा। दि येशूगी गालील साने़की काना माएँ क्याहसाला जे नाङसीन। दि ल़ेहमु जेती मिहरोगी राहङगी ज़िज्यिद तेन नाङसीन, ओहले मिहरोकी स्याहप्च्यीया़गी मिहरो थो़ला यिह छ्य़ेसीन। 12ओ़ह तिङले येशू राहङगी आमा, नो़हया़ दाङ स्याहप्च्यीया़ ङ्याम्बु कफर्नहुमला फेप नाङसीन, ओहले स्याहक्पु तोबाज्यी ओ़हलाराङ ज़्य़ू नाङसीन।#मत्ती ४:१३
येशूगी छ्योखाङ चाङमा ज़ो नाङग्यो
(मत्ती २१:१२-१३; मर्क ११:१५-१७; लूक १९:४५-४६)
13यहूदीया़गी थार्पा छ्येपा लेप्च्ये पेहती येहकें, ओहले येशू यरूशलेमला फेप नाङसीन।#प्रस १२:१-२७ 14येशूगी छ्योखाङला लाङगो, ल़ूह दाङ दुङगुकुर चोङ तेहक्यो दाङ टाङगा च्ये़हप्केया़ला ज़ी़ नाङसीन। 15ओहले येशूगी थाक्पागी ताक्स्यु जे़दी ओ़हला येहकेन्की थाम्ज्यीलाराङ ओहले खुङगी ल़ूह दाङ लाङगोया़ॱलाङ छ्योखाङले ङेती ताङ नाङसीन, ओहले टाङगा च्ये़हगेनया़गी टाङगाया़ टाम्दी चोक्चीया़ लो़री क्याहप नाङसीन। 16ओहले येशूगी दुङगुकुर चोङगेनया़ला काप्क्येन नाङदी सुङ नाङसीन, “ख्याया़गी दि से़हया़ देलेगी ख्येर्ती सोङ! ङाहती याहपगी ज़िम्गाङला ख्याया़गी छोङ क्याहप्केन खाङबा माहज़ो़।”
17ओहले मिहरोगी स्याहप्च्यीया़गी सुङरापला प्रुहक्योगी दि केच्याया़ टेहम्बा साल्सीन, “ए, किन्ज्यो! राहङगी ज़िम्गाङगी तेहन्दाला ङाहती स्ये़गी ङाहगी निङ नाहङला मेहॱराङ पाहर्के।”#भज ६९:९
18ओहले यहूदी गोबाया़गी येशूला मासीन, “च्यि राहङला दि ल़ेहमु छ्या़ले जेच्येला ओङ येहबा ले? येहसीमाना ङ्यिहला याहम्जेन छ्येवागी ताक्छेन च्यी़ तेन नाङ ख़ूएँ ले?” 19ओहले येशूगी खुङया़ला सुङ नाङसीन, “दि छ्योखाङला रोम्दोङ, ओहले ङाहगी ङ्यिहमा सुम नाहङला दिला येहपाराङ ज़ोएँ।”#मत्ती २६:६१; २७:४०; मर्क १४:५८; १५:२९ 20ओहले यहूदीया़गी मासीन, “दि छ्योखाङ ज़ोज्येलानी लोह स्येह-टू़ह थो़क्यो येहकें!, ओहले च्यि राहङगी ङ्यिहमा सुमलाराङ दिला ज़ो थुप नाङगेन ले?”
21यिहॱनाङ येशूगी सुङ नाङग्योकी छ्योखाङदी मिहरो राहङदी कुसो यिहन्गे। 22येशू टोहङदे येहपाराङ सोम्बो ज्य़ा़ङॱनाङ फान्ज्यो मिहरोकी स्याहप्च्यीया़गी येशूगी सुङ नाङग्योकी दि स्याहल टेहम्बा साल्सीन, ओहले खुङया़गी सुङराप दाङ येशूगी सुङ नाङग्योकी स्याहलला यिह छ्य़ेसीन।
23थार्पा छ्येपागी ती़हजीला यरूशलेमला ज़्य़ू नाङगेमु येशूगी माहङबुराङ याहम्जेन छ्येवागी छ्या़लेया़ जे नाङसीन। दि थोङदी मिह माहङबुगीराङ येशूला यिह छ्य़ेसीन। 24यिहॱनाङ येशूगी खुङया़ला यिह-छ्य़े माहनाङ, च्यिबेमाना येशूगी मिह थाम्ज्यीगी सेम या़हबु जेती ङोह ख्येन्दी येहकें। 25मिहरोला मिहगी खोक्पा नाहङगी केच्याया़ या़हबु पेहती थुयी़ येहकें सोङबे सुज्यीगीॱआङ येशूला का़हन्दीॱआङ मिहगी तेहन्दाला मा कोहबा म़ेहबा येहकें।
Atualmente selecionado:
यूहन्ना 2: HYLM
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2023 (Active), Wycliffe Bible Translators, Inc. All rights reserved.