MARKA 11
11
Pazawkhaih Hoiah Jerusalem Ah Akun
(Mat 21:1-11; Luk 19:28-40; Jhn 12:12-19)
1Jerusalem vangpui to a hnaih o hruet hruet boah moa Bethfeih hoi Bethani vang taeng Oliv mae to a phak o. Jesuh mah a hnukbang longhnetto hma-ah patoeh moa, 2anih hnit khaeah, “A hma-ih kaom vang ah to caeh hoi ah. Na kun rumhoi mita mah doeh angthueng vaih ai ih apaeh o sut ih laa hrang cata to na hnuh hoi tih. Khram hoi aloa hiah angzoh hoi haih ah. 3Kami longlongto mah, ‘Tipongmaw totiah na sak hoi?’ tiah na dueng nahaeloa, ‘Angraeng#11:3 Angraeng tihae Ato tawnkung tiah doeh thuih thaih. mah angtoeng, kang thak phrat let han,’ tiah naa pae hoi ah,” tiah a thuih pae.
4Topongah a caeh hoi moa lamkrong ah to im maeto ih khongkha ah kangpaeh sut laa hrang cata to a hnuk hoi. Aqui to a khramh hoi nathuemah, 5toah kangdoe thoemto mah, “Timaw na sak hoi? Laa hrang caa aqui maw na khramh hoi?” tiah a naa pae.
6Anih hnit loa Jesuh mah lok taquk batih toengah a thuih pae hoi moa, to ih kaminawk mah a caehsak hoi. 7Laa hrang to loa Jesuh khaeah angzoh haih hoi, a nuiah kahni to baih pae o moa Jesuh loa angthueng. 8Kami paroeai mah loklam ah kahni to baih pae o, kalahnawk mah lawk thungih thingsabu to tuk o moa loklam ah a baih pae o toeng. 9A hma-ah ka caeh kaminawk mah doehsoe, ahnuk bangih ka baangnawk mah doehsoe, “Hosanna! Angraeng hmin hoiah kangzo loa Sithaw mah tahamhoihhaih paek na soe!#Sam 118:25-26 10Aicae ampa David Sangpahrang ih ukhaih prae kangzo to loa Sithaw mah tahamhoihhaih paek na soe! Hosanna!” tiah hangh o.
11Jesuh loa Jerusalem vangpui ah a phak, Tempal thungah akun moa hmuen cungriboih to a khet takui king. To-e niduemh ngawt boah pongah a hnukbang hlaihnet tonawk hoiah Bethani bangah to a caeh o.
Jesuh Mah Thaiduet Kung Tangoeng
(Mat 21:18-19)
12Akhawnbang, Bethani vang hoitoah amlaem o let nathuemah Jesuh loa zok amhlam pae. 13Jesuh loa kahla hoiah thaiduet kung aqam taburu ah ka om to a hnuk, topongah a thaih ka om hoi ka om ai to khet hanah a caehthuih. To-e toah a phak na-ah aqam khueh to a hnuk, kawmawtiah athaih tue ai pongah ni. 14Jesuh mah thaiduet thing to, “Mita mah doeh nang ih athaih to caa o hmah laih soe!” tiah a naa.
Ato to a hnukbangnawk mah a thaih o.
Tempal Ah Jesuh A Caeh
(Mat 21:12-17; Luk 19:45-48; Jhn 2:13-22)
15Jerusalem ah a phak o na-ah Jesuh loa Tempal thungah a caeh moa hmuenmae kaqan hoi ka zaw kaminawk boih to pathok kingking. Tangka taphrak kungnawk ih caboinawk hoi aapahu ka zawkungnawk ih anghnuthaih ih tangkhangnawk to doeh palaeng pae kingking. 16Moa Tempal salong ah hmuenmae ka phaw moa linglong tueknawk to doeh pakaa pae king bae. 17Topacoengah mipuinawk to patuk pae: “Cabu Kacai thungah Sithaw mah, ‘Ka im loa caeng kami congca hanih khophoehhaih im tiah kawk ah om tih,’ tiah tarik ah oh. To-e nangcae mah loa kamqu kamcanawk anghawkhaih hlungpuk ah na sak o,” tiah a naa pae.#Isa 56:7; Jer 7:11
18Qaihma kacoetanawk hoi Tawklok patukkungnawk mah ato to a thaih o na-ah Jesuh humhaih thaih ih lam to pakrong o. Anihcae mah Jesuh to a zit o parai, kawmawtiah Jesuh patukhaih ih mah mipui boih to palung daengh pae o pongah ni.
19A duembang phak na-ah Jesuh hoi a hnukbangnawk loa vangpui thung hoitoah tacawt o.
Thaiduet Kung Hoitoah Amtukhaih
(Mat 21:20-22)
20Akhawnbang khawnthaw ah loklam ah caeh o na-ah thaiduet kung to a hnuk o. Akung qoek ah tangzun khoekto angqo king. 21Piter mah hmuen ka thok to a dawn hlet let moa Jesuh khaeah, “Khen e, Patukkung, nangmah tangoeng ih thaiduet kung loa a duek rup boah,” tiah a naa pae.
22Jesuh mah anihcae khaeah, “Sithaw taanghaih tawn oah. 23Loktang kang thuih o: Ami doeh palung thungah oepvawthaih ih tawn aiah a thuih ih batih toengah angcoeng khaekhaeh tih, tiah ka taang loa hi maehung maepang khaeah, ‘Angthawk ah loa tuiculi ah krah ah,’ a tih cadoeh sak pae ah om tih.#Mat 17:20; 1 Kor 13:2 24Topongah kang thuih o: Kho na phoeh moa hmuen maemaeto na hnik o na-ah ka hak boah tiah taang oah, totibaloa na hnik o saqui to paek ah om tih. 25Nangcae mah nangdoet moa khophoeh o na-ah kami longlongto nuiah hnukmaahaih na tawnh o ih to tahmen oah; tona-ah ni vannui ih kaom nam Pa mah nangcae zaehaih ih to tahmen o toengh tih,” tiah a naa. 26(Mi kalah zaehaih to na tahmen o ai nahaeloa vannui ih kaom nam Pa mah doeh nangcae zaehaih to na tahmen pae o toengh mak ai.#Mat 6:14-15)
Akaatawnhhaih Kawng A Duengh O
(Mat 21:23-27; Luk 20:1-8)
27Jesuh hoi a hnukbangnawk to Jerusalem vang ah a phak o let bae. Jesuh to Tempal ah a caeh na-ah qaihma kacoetanawk, Tawklok patukkungnawk hoi kacoetanawk to angzoh o moa, 28Jesuh to, “Kawbatih akaatawnhhaih ih hoiah maw hibatih hmuennawk hae na sak? Mimah maw hi akaatawnhhaih hae na paek?” tiah a duengh o.
29Jesuh mah, “Lok maeto kang duengh o han moa na pathim o thaih nahaeloa kawbatih akaatawnhhaih ih hoiah maw hi hmuennawk hae ka sak tito kang thuih o han. 30Na thui oah: Johan mah baptisma paek thaih hanah akaatawnhhaih to naabanghoi ih maw a hak, Sithaw khae hoi-ih maw, tiaibaloa kami bang hoi-ih maw?” tiah a naa.
31Angmahcae hoi angmahcae to angaek o moa: “Kawbangmaw thuih o han? ‘Sithaw khae hoi-ih,’ ti nahaeloa anih mah, ‘Totisoe nahaeloa tipongmaw Johan to na taang o ai?’ ” na naa tih. 32To-e, ‘Kami khae hoi-ih,’ tih nahaeloa mipui to zit han oh bae, (kawmawtiah Johan loa tahma ni tito mi boih mah panoek o.) 33Topongah Jesuh khaeah, “Ka panoek o ai,” tiah pathim pae o.
Jesuh mah anihcae khaeah to, “Kai doehsoe loa kawbatih akaatawnhhaih hoiah maw hi hmuennawk hae ka sak tito kang thui pae o mak ai toengh,” tiah a naa.
Atualmente selecionado:
MARKA 11: AKNT2023
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Asang Khongso New Testament in Eastern Khumi © Bible Society of Myanmar, 2023.