JUAN 4
4
Samaria llactamanda huarmihuanmi, Jesusca parlashca
1Fariseocuna cashna ninajujtami Jesusca yachaj chayarca: “Jesusca, Juandapash yalitami yachajujcunataca charin, ashtacacunatami bautizajun” nishpa parlanajujtami uyashca carca. 2(Jesusca, na bautizajurcachu. Ashtahuangarin, Paipaj yachajujcunallami bautizanajurca). 3Shinamandami, Judea llactamanda llujshishpaca, Galilea llactaman cutin tigrarca.
4Chaiman tigrangapaca, Samaria llactatami, yalinapacha carca. 5Chashna rijushpami, Samaria llactapi tiyajuj Sicar shuti puebloman chayamurca. Chai puebloca, ñaupa taita Jacob, paipaj churi Joseman ricuchishca alpa quimiriapimi tiyajun. 6Chaipimi, Jacobpaj yacu pugyu tiyarca. Jesusca, ñanda rijushpa shaijushca cashpami, chai yacu pugyu quimiriapi tiyarirca. Ña chaupi punllashnallami carca.
7Chaipi tiyajujpica, Samaria llactamanda shuj huarmimi, yacuta llujchingapa shamurca. Chai huarmitami, Jesusca:
“Asha yacuguta ufiangapa carahuai” nirca.
8Paipaj yachajujcunaca, pueblopi micunata randingapami rishca carca. 9Yacuguta carahuai nijpimi, Samaria llactamanda huarmica cashna nirca:
“Canga judío cashca jahuachu ¿ñucatara yacuta ufiangapa mañahuangui? Ñucaca Samaria llactamanda huarmimi cani.” nircami.
(Judiocunaca, Samaria llacta gentecunahuanga napacha tandanajunllu carca) 10Shina nijpimi Jesusca, cashna nirca:
“Taita Dios, canman carangapa munajujtaca na yachanguichu. ‘Yacuguta carahuai’ nishpa maijan mañajujtapash, na rijsinguichu. Ñucata rijsishpaca, canmari yacuguta mañahuanguiman. Can mañajpica, causaita caraj yacugutami caraiman” nircami.
11Shina nijpimi chai huarmica cashna nijurca:
“Taitalla, yacuta imahuan llujchingapapash na charinguichu. Yacupash cai pugyupica, ucu ucupimari tiyan. Causaita caraj yacutacarin, ¿maimandashi charipangui? 12¿Ñucanchipaj ñaupa taita Jacobtapash, ashtahuan yali jatunllu capangui? Paimi, ñucanchiman cai pugyutaca carashca. Paipash, caimandami paipaj churicunahuan, paipaj animalcunahuan, yacuta ufiashpa causashca carca” nijurcami.
13Shina nijpimi Jesusca, cashna nirca:
“Maijambash cai yacuta ufiashpaca, cutin yacunayachingami. 14Ashtahuangarin, Ñuca carashca yacuta maijambash ufiashpaca, cutinga na yacunayachingachu. Ñuca carashca yacuguca, paipaj shungupimi causaita causagrichun carangapa llujshijuj pugyu yacugushna canga” nijurcami.
15Shina nijpimi chai huarmica cashna nirca:
“Taitalla, cutinga ama yacunayachingapa, cutinga ama caiman yacuta llujchingapa shamujungapa, chai yacuguta carahuailla” nircami.
16Shina nijpimi Jesusca:
“Cambaj cusatara pushashpa tigramugri” nirca.
17Shina nijpimi:
“Na cusayujchu capani” nirca.
Chaimandami Jesusca:
“‘Na cusayujchu cani’ nishpaca, na llullajunguichu. 18Canga, picha cusatami charishcangui. Cunan canhuan causajuj jarica, na cambaj cusachu. Chaitaca, na llullashpami nijungui” nijurcami.
19Shina nijpimi chai huarmica cashna nirca:
“Taitalla, Canga profetami cangui yarin. 20Ñucanchipaj ñaupa taitacunaca cai urcupimi Diostaca alicachin carca. Ashtahuangarin cangunaca: ‘Jerusalenbillami Diostaca alicachina’ ninguichimi” nijurcami.
21Shina nijpimi Jesusca cashna nirca:
“Taita Diostaca, na cai urcupilla, na Jerusalenbilla, alicachina punllacunami chayamugrin, chaitaca crinapachami cangui. 22Cangunaca, pita mañanajushcatapash na ali yachashpatami mañanajunguichi. Ashtahuangarin ñucanchica, ali rijsishpapachami mañanajunchi. Quishpirinaca judiocunamandami shamujun. 23Diospaj Espíritu yarichijpi, na nij tucushpalla ninanda alicachina punllacunami chayamuna carca. Chai punllacunami cunanga ña chayamushca. Chashna ninanda alicachijcunatami, Taita Diosca, Paita ninanda alicachinajuchun mascajun. 24Taita Diosca Espiritumi. Shina cajpimi, Diosta alicachijcunaca, espiritupi, na nij tucushpalla ninanda alicachina” nijurcami.
25Shina nijpimi chai huarmica, cashna nirca:
“Cristo shuti Mesías shamunataca yachapanimi. Pai shamushpami ñucanchiman tucuita villanga” nircami.
26Shina nijpimi Jesusca cashna nirca:
“Chaimari cani. Paihuanmi parlajungui” nircami.
27Chashna parlanajujpimi, Paipaj yachajujcunaca chayamurca. Chai huarmihuan parlajujta ricushpaca, ninandami manllarinajurca. Shina cashpapash: “¿Imatata tapujungui?” na cashpaca: “¿Imatata chai huarmihuanga parlajungui?” nishpaca, maijanllapash na tapurcachu. 28Chai huarmica, fundutapash chaipillata saquishpami, puebloman tigrarca. Chaipica, gentecunaman cashna nishpami villachijurca:
29“Jacuchi, shuj runaguta ricunguichi. Paica, imashna ñuca causashcatapash tucuitami nihuarca. ¿Nacha paica, Cristo imashi?” nijurcami.
30Shina nijpimi, chai pueblomanda llujshishpa, Jesuspajman shamunajurca. 31Chashna cangacamanmi, Jesuspaj yachajujcunaca:
“Rabí, micupayari” ninajurca.
32Shina nijpimi Jesusca:
“Canguna na rijsishca micunatami micungapa charini” nirca.
33Shina nijpimi, Paipaj yachajujcunaca caishuj chaishuj cashna ninajurca:
“¿Micunatachu pipash apamurca imashi?” ninajurca.
34Shina ninajujpimi Jesusca, paicunataca cashna nijurca:
“Ñuca micunaca, Ñucata cachamuj Taita munashcata rurashpa tucuchinami tiyajun. 35¿Nachu cangunaca: ‘Cozechana punlla chayamungapaca, chuscu quilla tiyanrami’ ninajunguichi? Ashtahuangarin Ñucami, cangunataca cashna nini: Chagra pambacunata vichai ricuichi. Ña fucushca, cozechanallami. 36Cosechajcunaca, paicuna granocunata tandachishcamandaca japingapachami. Chai fucushcacunataca, causaita causagrichunmi tandachin. Shina cajpimi tarpuj runapash, cozechaj runapash, ishcandillata ninanda cushijunajun. 37‘Shujmi tarpun, shujmi cozechan’ nishpa parlashcacunaca, chashnapachami. 38Canguna na tarpushca cajpipash, shujcuna tarpushcata cozechachunmi cacharcani. Shujcunami tarpurca. Shujcuna tarpushcaman yaicushpami cangunara tandachinguichi” nijurcami.
39Chai huarmi, “Ñuca imashna causashcatapash tucuitami nihuarca” nishpa villajpimi, Samaria llactapi causaj ashtaca gentecunaca Jesusta crinajurca. 40Shinamandami, Samaria llactapi causajcunaca, Jesuspajman shamushpa:
“Ashaguta ñucanchihuan caipi saquiripai” ninajurca. Shina ninajujpimi, ishcai punllata chaipi saquirirca.
41Chaipi cashpa Jesús villachijunda uyashpami, ashtahuan shujcunapash crinajurca. 42Shinamandami, chai huarmitaca cashna ninajurca:
“Cunanga, Pai villajundapacha uyashpami, na can villashcatalla crinajunchi. Paica, cai pachapi causajcunata Quishpichij Cristopacha cajtami yachanchi” ninajurcami.
Mandaj runapaj churitami Jesusca alichishca
43Jesusca, ishcai punlla jipami, chaimanda llujshishpa Galilea llactaman rirca. 44“Profetataca, chai llactamandallata cajpipash, na alicachinllu” nishpami, Jesusllata ña villashca carca. 45Ashtahuangarin Galilea llactaman chayajpica, chai llactapi causajcunaca, cushijushpami chasquirca. Pascua punllacunapi, Jerusalenbi Jesús imatalla rurajujta ricushca cashpami chashna chasquirca. Paicunapash, chaiman rishca cashpami, chaitaca ricushca carca.
46Jesusca, Galilea llactapi tiyajuj Caná shuti pueblomanmi, cutin tigramurca. Chaipimi, yacuta vinoman tigrachishca carca. Capernaúm pueblopimi, jatun mandaj churashca mandaj runapaj churica, huañunalla sirijurca. 47Judea llactamanda, Galilea llactaman Jesús tigramushcata uyashpami, chai mandaj runaca Jesuspajman shamurca. Shina shamushpaca:
“Ñuca churimi huañunalla sirijupan, paita alichingapa urai ripashun” nircami.
48Shina nijpimi Jesusca, chai runagutaca cashna nirca:
“Pipash na rurai ushanallacunata, jatun manllarinacunata rurashpa na ricuchijpica, Ñucataca na cringuichimanllu” nircami.
49Shina nijpimi jatun mandaj churashca mandaj runaca, cashna nirca:
“Ñuca churi nara huañujpillata uchalla urai ripashunyari, Apunchi Jesús” nircami.
50Shina nijpimi Jesusca cashna nirca:
“Rilla, cambaj churica ñamari ali tucushca” nijpimi chai runaca, Jesús nishcata crishpa tigrarca. 51Pai ña urai rijujpi, paipajta rurajcuna tuparimushpami:
“Cambaj churica, ñamari ali tucushca” nishpa villanajurca.
52Shina villachijpica:
“¿Ima pachata ña samachi callariparca?” nishpa tapurca.
Shina tapujpimi:
“Caina chaupi punlla yalishcallapimi, tabardillo ungüica yalirca” ninajurcami.
53Shina nijpimi: “Cambaj churica, ñami ali tucushca” nishpa, Jesús nijushcata taitaca yarijurca. Shinamandami paipash, paipaj huasipi tucuilla causajcunandi, Jesustaca crinajurca.
54Judea llactamanda, Galilea llactaman Jesús tigramushpami, pipash na rurai ushanallacunata rurashpa, caihuanga ña ishcaita ricuchijurca.
Atualmente selecionado:
JUAN 4: QVI16
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.