LUCAS 24
24
Jesús causarishcamanda
(Mat. 28:1-10; Mar. 16:1-8; Juan 20:1-10)
1Semana punlla callari tutamandatami, Jesusta pambashca utujuman chayamunajurca. Chai huarmicunataca, shuj huarmicunapash cumbashpami, paicunallata rurashca mishquilla ashnajun jambicunata apashpa shamunajurca. 2Paicuna chayashpaca, utujuta jarcashca rumita suchuchishcatami ricurca. 3Utujuman paicuna yaicushpaca, Apunchi Jesustaca na tarircachu. 4Paicuna ninandapacha manllarishpa shayanajujpica, ishcaipura runacunami, punchapamba churajunata churajushca paicunapaj shayanajushca pushtupi ñapash shayarimurca. 5Chai huarmicunaca, ninandapacha manllarishpa, alpaman chayajta cumurijpimi, chai runacunaca, cashna tapurca:
“Causajujtaca, ¿imashpata huañushcacunapaj chaupipi mascaj shamunguichi? 6Paica na caipichu, ñami causarishca. Galilea llactapi cangunahuan purijushpa, villashcatami yarina canguichi, 7Chaipica: ‘Runa Aichayuj tucushca Ñucataca, juchayu runacunaman japichijpi, chacatai tucushpa huañunapachami cani. Ashtahuangarin, quimsa punllahuanga causarishallami’ nishpami villajurca” ninajurcami.
8Shina nijpimi chai huarmicunaca, Jesús villajushcata yarinajurca. 9Jesusta pambashca utujumanda tigrashpami, chunga shuj yachajujcunaman, caishuj catijcunamambash ima tucushcata tucuita villanajurca. 10Magdala pueblomanda Mariapash, Juanapash, Jacobopaj mama Mariapash, shuj huarmicunapashmi, tucui imalla tucushcataca apostolcunaman villanajurca. 11Chai huarmicuna villashcacunaca juizu illajcuna ninajushcashnalla cajpimi, paicunaca na crinajurca. 12Ashtahuangarin Pedroca ucha jatarishpami, Jesusta pambashca utujuta ricungapa calparca. Utuju ucuta ricushpami, fachacunalla tiyanajujta ricurca. Shina tucushcata ricushpami, ninanda manllarishpa Pedroca, huasiman tigrajurca.
Emausman rina ñambimi Jesusca ricurishca
(Mar. 16:12-13)
13Chai punllallatami, Jesusta crijpuramanda ishcai runacunaca, uchilla Emaús puebloman rinajurca. Chai puebloca, Jerusalenmandaca, chunga shuj kilometro canapimi tiyajun. 14Paicunapurami chai punllacunapi, tucui ima tucushcatapash parlashpandi rinajurca. 15Shinallata, parlarishpa imatapash nirishpandi rinajujpimi, Jesusca paicunapajman quimirishpa, pacta ri callarirca. 16Ashtahuangarin, paicunapaj ñavica quilpashcashna cashpami, Jesustaca na rijsirca. 17Paicunataca cashna nirca:
“¿Imatata cangunapura chashna parlarishpandi rinajunguichi? ¿Imashpata chashna llaqui llaqui canguichi?” nircami.
18Shina nijpimi, paipuramanda Cleofas runaca, cashna nirca:
“Cunan punllacunapi, Jerusalenbi ima tucushcatapash ¿Canllachu caru llactamanda shamushca cashpa, na imatapash yachangui?” nircami.
19Shina nijpimi Jesusca:
“¿Imacunata tiyarcayari?” nirca.
Shina tapujpimi cashna ninajurca:
“Nazaret pueblomanda Jesusmandami parlanajunchi. Paica, ninan ushaihuan profeta cashpami, Taita Diospaj ñaupajpi, tucui gentecunapaj ñaupajpipash, imata rurangapapash, villangapapash, ninan ushaita charirca. 20Paitaca huañunapachami nishpami, mandaj sacerdotecuna, ñucanchi llactata mandajcuna japishpa cujpi, chacatashpa huañuchirca. 21Ñucanchica, Paimi Israelcunata quishpichinga yashpami shuyanajurcanchi. Shina yajpicarin, cunanga ñami Paita huañuchishcapash quimsa punlla tucun. 22Shina cajpipash ñucanchipuramanda huaquin huarmicunami nara ali punllayajpillata, Jesusta pambashca utujuta ricungapa rishca. Paicuna villangapa shamujpimi manllachircanchi. 23Jesusta na tarishpa shamushpami: ‘Angelcunatami muscuipishna ricurcanchi’ ninajurca. Chai angelcunami: ‘Jesusca ña causajunmari’ nishpa villashca carca. 24Shina villajpimi, ñucanchipuramanda huaquingunaca, chai pambashca utujuta ricungapa rirca. Chaipica, chai huarmicuna villashcashnami paicunapash ricurca. Ashtahuangarin Jesustaca, na ricushcachu carca” ninajurcami.
25Shina nijpimi Jesusca cashna nirca:
“¡Juizu illajcuna! ¡Profetacuna tucuita villashcatapash na tucui shunguhuan crijcunamari canguichi! 26Punchapamba llactaman Cristo yaicugringapaca, ¿nachu chashna llaquita apanapacha carca?” nircami.
27Chai jipami Moisesmandapacha callarishpa, tucuilla profetacuna imata villashcata catishpa, tucuilla quilcacunapi Paimanda imata nijushcata, paicunaman villajurca. 28Paicunaca, maiman rinajushca chai uchilla pueblomanmi chayarca. Ashtahuangarin Jesusca, caruman rijunshnallami yaligrijurca. 29Ashtahuangarin, paicunaca na richun saquishpami:
“Caipi ñucanchihuan pacarilla. Ñami chishashca, amsayagrinmari” ninajurca.
Shina nijpimi Jesusca, paicunahuan chaipi saquirirca. 30Paicunahuan micungapa ña tiyarishpaca, tandata japishpa, Diosta pashi nishpami, chaupishpa paicunaman cararca. 31Shina carajpimi, paicunapaj ñavica pascarijshna ricushpa, Jesús cajta rijsinajurca. Ashtahuangarin Jesusca, paicunapaj ñaupajmanda ñapash chingarcallami. 32Shina chingajpimi, paipura cashna nirinajurca:
“¿Nachu Dios quilcachishca Shimita ñucanchiman villashpandi shamujushpaca, ñucanchi shungupi chayajta rimarca?” ninajurcami.
33Paicunaca ucha jatarishpami, Jerusalenman tigranajurca. Ña chayashpaca, Jesuspaj chunga shuj yachajujcunataca, shujcunandi tandanajushpa tiyanajujtami japigrirca. 34Chaipi tiyanajujcunaca:
“Apunchi Jesusca causarishcapachamari. Simonmambash ricurishcami” ninajurcami.
35Shina ninajujpimi, chai ishcaicunaca, ñambi ima tucushcatapash, tandata chaupishpa carajpira rijsishcatapash villanajurca.
Paipaj yachajujcunamanmi Jesusca ricurishca
(Mat. 28:16-20; Mar. 16:14-18; Juan 20:19-23)
36Paicunapura chashna parlanajujpillatami Jesusca, paicunapaj chaupipi ñapash shayarimushpa:
“Cangunapajca, ali causai tiyachun” nirca.
37Paicunaca, espiritutamari ricunchi yashpami, ninanda manllarishpa chujchunajurca. 38Ashtahuangarin Jesusca cashnami nirca:
“¿Imashpata cangunaca, cashna manllarinajunguichi? ¿Imashpata cangunapaj shungupica chashnatara yarinajunguichi? 39Ñuca maquicunata, Ñuca chaquicunata ricuichilla, Ñucallatami cani. Tacarishpapash ricuichilla, espirituca, aichatapash, tullutapash na charinllu, Ñucataca cangunallata ricunajunguichimi” nircami.
40Shina nishpallami, Jesusca maquicunatapash, chaquicunatapash ricuchijurca. 41Paicunaca manllarishpa cushijushca cashpapash, nara crircachu. Shina cajpimi:
“Ima micunagupash ¿nachu tiyan?” nishpa, tapurca.
42Shina tapujpimi, piji cusashcaguhuan, balun mishqui shinlliyashcaguhuan caranajurca. 43Jesusca chaita japishpami, paicunapaj ñaupajpi micurca. 44Paicunataca cashnami nirca:
“Cangunahuan purijushpallatami, cashna nishpa villajurcani: Moisés mandashcapipash, profetacuna villashcapipash, salmocunapipashmi, tucui imalla pactanapacha cashcata Ñucamanda quilcashca tiyajun” nircami.
45Shina nishpami, Dios quilcachishca Shimicunapi imata nijushcatapash yachai ushachun, yuyaita pascarca. 46Paicunataca cashnami nirca:
“Quilcashcapica, chashnapacha tucunatami villajun. Chashna villashcashnami, Cristoca huañuchi tucushpa quimsa punllahuanga, huañushcacunapaj chaupimanda causarinapacha carca. 47Shinallata, juchata saquishpa Diosman tigrarichi nishpa paipaj shutipi villachunmi, Jerusalenmanda callarishpa, tucui llactacunaman cachanga. 48Cangunaca cai tucuita ricushcacunami canguichi. 49Ñuca Taita cangunaman ninan ushaita ‘carashapachami’ nishcataca, Ñucami cangunaman cachamusha. Ashtahuangarin, cangunaca jahua pachamanda chai ushaita chasquingacaman, Jerusalén pueblopi shuyanguichilla” nircami.
Jahua pachaman Jesús tigrashcamanda
(Mar. 16:19-20)
50Chai jipami, Betania pueblocaman pushashpa, maquita jahuaman churashpa, paicunataca bendiciajurca. 51Shina bendiciajushpami, paicunamanda anchurishpa, jahua pachaman apajpi rirca. 52Shina cajpimi paicunaca, Jesusta ninanda alicachishpa, cushijushpa Jerusalenman tigranajurca. 53Shinallata, paicunaca punllandimi Diospaj huasipi, Taita Diosta ninanda alicachishpa catinajurca. Chashna cachun.
Atualmente selecionado:
LUCAS 24: QVI16
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.