Génesis 16
16
Ismael te yal Agar
1Te Sarai te yinam Abram ma x'alaj; ja'uc me to ay scriada, egipcia-ants, Agar sbiil. 2Jich yu'un te Sarai la yalbey te Abram:
—Awiloj bit'il Dios ma xyac' te ya x'alajon. Jich yu'un wocoluc, joina ta wayel te jcriada, jich wan ay calatac ya jta ta swenta —xi'.
Jich te Abram la xch'uunbey sc'op te Sarai. 3Jich yu'un te Sarai la yic' tel te Agar, te scriada ja' te egipcia-antse, la yac'bey yinamin te Abram, ja' te smamlale. C'axix lajuneb ja'wil a te bit'il nainem ta sq'uinal Canaán te Abrame. 4Jich la sjoin ta wayel te Agar, la yic' yal. C'alal la sna' stojol te bit'il yic'ojix yal, la stoy sba ta stojol te Sarai. 5Jich yu'un te Sarai la yalbey te Abram:
—Ja'at me ta awenta te bit'il ay jwocol. La cac'bat ajoin ta wayel te jcriada; ja'uc me to, te bit'il yic'ojix yal, ma'yuc jc'oplal ta yo'tan. Dios me ya yac' ta na'el stojol mach'a smul, teme ja'ate, o teme jo'one —xi'.
6Jich yu'un te Abram la yalbey te Sarai:
—Ay ta ac'ab te acriada, chican awo'tan bi ya ac'an ya apasbey —la yut.
Jich yu'un te Sarai bayal jajch' yilbey yo'tan te Agar, jich loc' ta anel ta stojol. 7Taot yu'un te ch'ul abat yu'un Dios ta jochol taquin q'uinal, nopol ta sloq'uibja' ay ta sbelal Shur. 8Albot yu'un:
—Ja'at Agar, te scriadaat Sarai, ¿banti talemat, soc banti ya xbaat? —utot yu'un.
—Anel yacon ta stojol te Sarai, ja' te cajwale —xi' te Agar.
9Albot yu'un te ch'ul abat yu'un te Cajwaltique:
—Sujt'an bael ta stojol awajwal, ch'uuna mandal ta stojol —la yut.
10Te ch'ul abat yu'un te Cajwaltic jich la yalbey xan:
—Ya me quesmantesbat ats'umbal ta patil,
tsobol ya xc'ot, ma xju' ta ajtayel.
11Melel awic'ojix awal, soc ya me x'alajat.
Te querem ya x'ayin,
Ismael sbiil ya xc'ot awu'un,
yu'un yaiyoj stojol te Cajwaltic te bit'il ay awocole.
12C'ajc' me yo'tan ya xc'ot,
ya me scontroin spisil yantic,
soc ya me xcontroinot yu'unic.
Ja'uc me to, muc' me ya xc'ot ta yolilic,
manchuc me ma jichuc yo'tan te yermanotaque —xi' sc'oplal yu'un.
13Jich yu'un te Agar la yac'bey sbiil te Cajwaltic te c'oponot yu'une: “Diosat te spisil ya awile”, xi' c'ot yu'un. Yu'un la yal: “¿Melel bal te cuxulon to te bit'il la yilon te Diose?” xi'. 14Jich yu'un, ja' “Sloq'uibja' yu'un te cuxul Dios te ya yilone”, xi' sbiil c'ot. Ay ta olil be yu'un Cades soc yu'un Bered.
15Ayin yal te Agar te ja' snich'an te Abrame.#Gá 4.22. Ismael sbiil c'ot yu'un te snich'an ayin ta swenta te Agar. 16Ay waqueb yo'winic (86) ya'wilal a te Abram c'alal ayin yal te Agar, te Ismael sbiile.
Atualmente selecionado:
Génesis 16: TZOXCH
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Biblia en Tzeltal de Oxchuc y Tenejapa © Sociedad Bíblica de México, A.C., 2001.