Mateo 2
2
Bënni nayajni'i yajyu'ke Jesús
1Bi'i Jesús guulj'bi yëdz Belén, ki gia'a yeego Judea, dza kati Herodes guke bënni gnabe'e yëdz'a, la dza niiz guladxiine Jerusalén bënni nayajni'ik'de, za'ke zga ga rlen gbiidz, 2ati gulunaabe:
—¿Gaxh zue' bënni rnabe' kieke bënni Judea, bënni'a zia'a buudx guulje? Koma ble'i'tu'ba bla'ba bëëlj kie' lena'a za'tu tziijilaadxi'tu'ne.
3Herodes bënni rnabe' grë'tzke bagi'i kati byëën'de le ni, len lekz'ka' ben kieke yugute'ke bunach ki yëdz Jerusalén. 4Ati gnabe'e luliidze yugute'ke bënni tunabe'i'de pxuuz len bënni useed xhba kie' Dios, len bnaab'de leke gaxh rala gaalje le' Mesías. 5Leke gle'ke le':
—Lu yëdz Belén ki yu Judea; koma ka bzooje bënni be'e diidza ulaaz kie' Dios:
6“Ati li' yëdz Belén, ki yu Judá,
ti naku we'en'du'tit
ladji yëdz blou ki yu ni,
koma lu yëdz kiu' urooje tue' bënni gnabe'e,
le' gun'chi'e bënni yëdz kia' Israel.”
7Na' Herodes baga'chi'z bliidze bënni nayajni'ik'de'a, bnaab'de leke dxia'a'tit gakaxh'tek chi guk blui'lau'ba bëëlj ni. 8Chi nak ka' psë'le'e leke yëdz Belén, len gudxe leke:
—Gultziaj ni', len gultzajnaab yugute' ka nak kieebi bi'dau'a, len kati udzëëli'li'bi, guldudixhji'i neda, naar tziija lekz'ka' ki tziijilaadxa'bi.
9Buudx gulayëën'de le gne' bënni rnabe'a, bënni'a nayajni'ik'de'a gulagie'le'e nëëz zjake. Ati bëëlj'a bua'a gulale'i'de'ba bla'ba nanëër'ba lau'ke, nakati yajlëëzr'ba ga zuaabi bi'dau'a. 10Kati bënni nayajni'i ni gulale'i'de'ba bëëlj'a, guludziiji'tzki'de. 11Na' gulayaazie nu'yu'u len gulale'i'de'bi bi'dau'a len xhna'bi María; len guluzechu xhiib'ke gulayiijilaadxi'ke'bi. Gulusaalje gi'in kieke len gulunëëdzje kieebi oro, len yaal, len mirra. 12Gdëëd'a lu yeel gdixhji'i leke ki tir ludëëde ga zue' Herodes, ati nëëz yubl zawake laadz'ke.
Gulaxhunj'ke yajake lu yu Egipto
13Kati bënni nayajni'i chi zawake, tue' gbaaz la'ay kie' Xan'ru yajlui'lau'e len José lu yeel len gudxe le': «Gyas, gde'la'bi bi'dau'a len xhna'bi ati bxhunj gyaj Egipto. Na'z bga'an nakati kixhji'ir'da' li', koma Herodes ugiilje'bi bi'dau'a ki gdëëd'de'bi.»
14José gyase len gde'le'bi bi'dau'a len xhna'bi, ati chi'dzë'ël gularooje zjake yëdz Egipto, 15ga gulakua'ke nakati gut're Herodes. Le ni guk naar guk ka gne' Xan'ru lu ne'e bënni be diidza ulaaz kie': «Ki yëdz Egipto buliidza'ne bënni Xi'ina.»
Herodes gnabe'e ki ludëëd'de'bi bi'dau'
16Kati guk'be'i'de Herodes ki bënni nayajni'ik'de'a gulaziye'ide le', bdze'i'tzki'de len gnabe'e ki ludëëd'de'bi bi'i nakua'bi lu yëdz Belén len gdu ga zelau rnabe', yugute'bi bi'i chi dzë'ë'bi chop iz len bi'i nawe'enrk'bi, tzka dza chi guk gulagixhji'de le' bënni nayajni'ik'de'a. 17Ka yajtzaag le bzooje Jeremías bënni be'e diidza ulaaz kie' Dios:
18«Byën tu chi'i lu yëdz Ramá,
yëla rbëëdx len yëla rulëëni.
Raquel'a rbëëdx'nu kiek'bi bi'i kieenu
len ti re'eni'nu nu wi'xhën lenu
koma chi natk'bi.»
Guludxiine lu yëdz Nazaret
19San gdëëd gutie' Herodes, tue' Gbaaz La'ay kie' Xan'ru yajlui'lau'e len José lu yeel lu yëdz Egipto len re' le': 20«Gyas gde'la'bi bi'dau'a len xhna'bi len guluwaj yëdz Israel, koma chi glat'ke bënni'a gle'en'de ludëëd'de'bi bi'dau'a.»
21Na' José gyase, gde'le'bi bi'dau' ni len xhna'bi len ye'wake yëdz Israel. 22San kati gnëëz'de kie' Arquelao rnabe'e lu yu Judea xhlatje xuuze Herodes, guudxi'de tziije ni'; ati lu yeel gdixhji'de le Xan'ru, na' gde'le'e nëëz ziije gia'a yeego ki Galilea. 23Kati bdxiine'a, yajsue' yëdz Nazaret. Le ni guk naar yajtzaag le gulanake bënni glui'ke diidza ulaaz kie' Dios: ki Jesús si' le', bënni Nazaret.
Atualmente selecionado:
Mateo 2: PZD
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© Sociedad Biblica de México AC