João 8
8
1Maibee Jesus baa iha foho Oliveira. 2Iha fali aban dadeer saan nakukun, Nia ba iha area Uma Kreda Boot nian. Ema barak mai haleu nia. I Nia tuur tiha hodi hanorin sira.
3Tempu nee, iha feto kaben nain ida nebee ema kaer toman bainhira nia halo sala adulteriu ho ema nebee laos nia laen. Mestri relijiaun balu ho ema Farizeu balu lori nia ba Jesus. I sira obriga feto nee hamriik iha sira nia oin. 4I sira hatete ba Jesus dehan, “Mestri, feto ida nee, ema kaer toman bainhira nia halo relasaun seksual ho ema nebee laos nia kaben. 5Tuir Moisés nia lei sira, iha ukun fuan ida nebee dehan, ‘Ema kaben nain nebee halo relasaun seksual ho ema nebee laos nia kaben, tenki tuda ho fatuk too mate.’ Tuir Ita Boot, oinsaa?”#Levitiku 20:10; Deuteronomio 22:22-24 6Sira koko lasu Nia, para sira bele foo sala hodi hamonu Nia.
Jesus la hataan kedas, maibee Nia hakruuk hodi hakerek ho Nia liman fuan iha rai. 7Sira husu bebeik ba Nia. Entaun Nia hamriik hodi hatete ba sira dehan, “Hanesan nee, se hosi imi sira iha nee, ema nebee nunka halo sala, husik nia mak foti fatuk hodi tuda uluk para kastigu feto nee.” 8Depois Nia hakruuk fali, hodi hakerek iha rai.
9Bainhira sira rona Nia koalia nunee, sira hotu moe. Tanba iha sira nia laran, sira hatene katak sira mos halo sala. Entaun sira ida-idak sai hosi nebaa, komesa hosi katuas too foin-sae. Tuir mai, hela deit Jesus ho feto nee. 10Entaun Jesus hamriik fali hodi husu ba feto nee, “Sira hotu iha nebee? La iha ema ida iha nee hodi foo sala no kastigu o, ka?”
11Feto nee hataan, “La iha, Nai.”
I Jesus hatete ba nia dehan, “Hau mos la kastigu o. Fila ona ba uma. Maibee keta haluha, la bele halo sala tan!”]#7:53-8:11:Biblia lian Gregu nebee antigu liu no nebee diak liu, la hakerek istoria nee. Sekulu 10, istoria nee foin hakerek iha eskritura lian Gregu.
Nai Jesus hanesan naroman hodi leno ema iha mundu nee
12Depois Jesus koalia tan ho ema barak nee dehan, “Hau mak naroman hodi leno ema iha mundu nee. Ema nebee tuir Hau la moris iha nakukun, maibee nia hela iha naroman nebee lori moris loloos.”#Mateus 5:14; João 9:5
13Iha ema Farizeu balu nebee protesta dehan, “O sai sasin kona ba O nia aan rasik, ka? Nee la bele! Tanba tuir ita nia lei, tenki ema seluk mak sai sasin ba ema seluk, laos ema nee rasik. Nunee ami la simu, no la fiar.”#João 5:31
14Jesus hataan, “Maski Hau foo sasin ba Hau nia aan rasik, maibee Hau nia sasin nee, loos. Hau rasik mak hatene Hau mai hosi nebee, i atu baa nebee. Imi la hatene Hau mai hosi nebee i atu baa nebee. 15Imi tesi ema nia lia tuir ema nia hanoin, maibee Hau la uza ema nia sasukat hodi tesi ema nia lia. 16Se Hau tesi ema nia lia tuir Hau nia sasukat, entaun nee loos. Tanba Hau la tesi lia mesak, maibee Hau halo buat hotu-hotu hamutuk ho Hau nia Aman nebee haruka Hau mai. 17Keta haluha, tanba hakerek iha imi nia lei relijiaun dehan, ‘Se iha ema sasin nain rua nebee koalia hanesan, nee loos ona.’ 18Nunee laos Hau mesak deit mak foo sasin kona ba Hau nia aan. Tanba Hau nia Aman nebee haruka Hau mai mos sai sasin kona ba Hau.”
19Sira husu, “O nia Aman iha nebee?”
Jesus hataan, “Imi la konhese Hau, entaun imi mos la konhese Hau nia Aman. Tanba se imi konhese duni Hau, imi mos konhese Hau nia Aman.”
20Buat sira nee hotu, Jesus foo hatene ba sira bainhira Nia hanorin iha Uma Kreda Boot, besik fatin nebee iha kaixa oferta. La iha ema ida kaer Nia, tanba Nia tempu seidauk too.
“Hau sei baa fatin ida nebee imi la bele baa”
21Jesus koalia tan ba sira dehan, “Hau sei husik hela imi, hodi baa fatin seluk. Imi sei buka Hau, maibee buka la hetan, tanba imi la iha direitu atu baa fatin nee. I bainhira imi mate, imi sei lori imi nia sala rasik.”
22Ema Judeu nia boot sira husu ba malu dehan, “Nia koalia saida mak nee? Nia atu oho aan, ka? Tan Nia hatete, ‘Imi la bele baa fatin nee.’ ”
23Jesus foo hatene ba sira dehan, “Imi hosi mundu iha kraik. Maibee Hau hosi lalehan iha leten. Imi ema hosi mundu nee. Maibee Hau laos ema hosi mundu nee. 24Nee mak ohin Hau hatete, imi sei mate lori imi nia sala rasik. Se imi la fiar dehan, Hau mak Kristu, nebee Maromak haruka ona mai, bainhira imi mate, imi sei mate ho imi nia sala sira rasik.”
25I sira husu, “O nee see?”
Jesus hataan, “Hau foo hatene ona hosi hahuu, see mak Hau.#8:25:Lian Gregu iha nee, bele iha signifikadu rua. Ida mak: ‘Hau foo hatene kedas ona hosi hahuu.’ Ida seluk tan mak: ‘Tanba saa Hau koalia ba imi?’ 26Iha buat barak mak Hau bele foo sai kona ba imi. Imi iha sala barak. Maibee Hau la hatudu ida nee. Ida nebee haruka Hau mai nee, se Nia koalia, Nia koalia buat loos deit. Hau foo hatene ba ema iha mundu nee, buat nebee mak Hau rona ona hosi Nia.” 27(Nia koalia nee kona ba Nia Aman iha lalehan, maibee sira la komprende.)
28Jesus koalia tan, “Bainhira imi hasae ona Hau, Ema Oan, iha ai krus, foin imi komprende katak, Hau nee Kristu. Hau la halo buat ida hosi Hau nia aan rasik, maibee Hau hanorin deit buat nebee Aman iha lalehan hanorin ona mai Hau. 29Ida nebee haruka Hau mai nee sempre hamutuk ho Hau. Nia nunka husik Hau mesak, tanba Hau sempre halo tuir Nia hakarak.”
30Bainhira Jesus foo hatene buat sira nee, ema barak fiar ba Nia.
“Imi mak Abraão nia jerasaun”
31Entaun Jesus hatete ba ema Judeu sira nebee fiar ba Nia nee dehan, “Se imi moris halo tuir nafatin Hau nia Liafuan, i imi aprende hosi Hau, maka imi sai Hau nia eskolante duni. 32I imi bele hatene lia loos. I lia loos nee mak hasai imi hosi atan i liberta imi.”
33I sira protesta dehan, “Ami laos ema nia atan! Ami Abraão nia jerasaun! Tanba saa mak O dehan fali ami sei hetan livre?”#Mateus 3:9; Lucas 3:8
34Entaun Jesus hatete ba sira, “Hau koalia nee, loos. Tanba ema hotu nebee halo sala, sai ona sala nia atan. 35Maibee baibain nunee: atan sira laos oan rasik hosi patraun nia familia. Patraun nia oan deit mak simu nia riku-soin. 36Entaun, se Hau mak Maromak nia Oan, nebee hamoos tiha imi nia sala sira hotu, imi livre ona, i la sai tan sala nia atan. Ho nunee, imi hetan liberdade duni, i la presiza tuir tan sala nia hakarak.
37Hau hatene ona imi sira nee mak Abraão nia jerasaun. Maski nunee, maibee imi sei buka dalan hodi oho Hau, tanba deit imi lakohi simu Hau nia hanorin. Nee tanba iha imi nia laran, la iha ona fatin hodi rai Hau nia Liafuan. 38Hau foo hatene buat sira nebee Hau haree ona, nebee Hau nia Aman hatudu ona mai Hau. I imi halo tuir buat nebee imi rona hosi imi nia aman sira.”
“Imi nia aman mak diabu”
39Sira hataan dehan, “Ami Abraão nia jerasaun.”
Jesus foo hatene dehan, “Se imi Abraão nia jerasaun duni, imi tenki tuir nia hahalok. 40Maibee Abraão la halo buat aat hanesan imi halo nee. Tanba imi sempre buka dalan hodi oho Hau. Afinal Hau mak foo hatene ba imi buat nebee loos, nebee Hau rona hosi Maromak. 41Imi nia hahalok hanesan imi nia aman nia hahalok.”
Maibee sira protesta dehan, “Ami nee, laos oan nebee ami nia inan hili. Ami nia aman ida deit mak Nai Maromak.”
42Jesus hatete ba sira dehan, “Se Nai Maromak mak imi nia Aman duni, maka imi tenki hadomi Hau. Tanba Hau mai hosi Nia, i Hau agora iha nee. Hau la mai tuir Hau nia hakarak rasik. Maibee Hau mai, tanba Nia mak haruka Hau mai. 43Tanba saa mak imi la komprende Hau nia koalia nee? Nee tanba imi mak lakohi rona!
44Imi nia hahalok hanesan diabu, tanba imi gosta halo tuir diabu nia hakarak. Hosi hahuu kedas nia oho door ema. Nia kontra buat nebee loos, tan nia la simu buat loos hotu-hotu. Se nia bosok teen, nee ba nia baibain. Tan nia nee, bobar lia door, no bosok-teen hotu nia huun.
45Hau foo hatene buat nebee loos, maibee imi la fiar mai Hau. 46Hosi imi nee, see mak bele hatudu evidensia katak Hau halo sala ruma? Se Hau koalia loos, nusaa mak imi la fiar Hau?
47Nai Maromak nia ema rona Nia Liafuan. Maibee imi nee la mai hosi Maromak, nee mak imi lakohi rona mai Hau.”
“Molok Abraão iha, Hau iha tiha ona”
48Ema Judeu nia boot sira hataan, “Ami dehan loos duni. Tan ami dehan ona, O nee, laos ema Judeu isin, maibee O ema Samaria. Espiritu aat tama iha O.”
49I Jesus hataan, “Espiritu aat la tama iha Hau. Hau respeita Hau nia Aman iha lalehan, maibee imi la respeita Hau. 50Hau la gaba Hau nia aan rasik. Maibee iha Ida mak hakarak hatudu Hau nia naroman-nabilan. Husik Nia mak desidi, se Hau koalia nee loos ka sala.
51Hau nia Liafuan loos duni! Ema nebee rona no halo tuir Hau nia Liafuan nee, sei la mate.”
52Rona nunee, ema Judeu nia boot sira dehan ba Nia, “Agora ami hatene ona katak O koalia hanesan ema bulak, tanba espiritu aat tama ona iha O. Abraão rasik mate, no Maromak nia profeta sira uluk nee mos mate. Maibee O dehan, ‘Ema nebee rona no halo tuir Hau nia Liafuan, sei la mate.’ O bulak duni! 53O hanoin, O boot liu Abraão nebee mate tiha ona? Ka o boot liu Maromak nia profeta sira nebee mate tiha ona nee? O nee see fali?”
54Jesus hataan, “Se Hau mak gaba Hau nia aan rasik, maka ema la simu. Afinal laos Hau mak foti Hau nia aan rasik, maibee Hau nia Aman mak foti aas Hau. Nia nee mak imi dehan, imi nia Nai Maromak. 55Maibee imi la konhese Nia. Hau mak konhese Nia. Se Hau dehan Hau la konhese Nia, Hau bosok-teen hanesan mos imi. Maibee Hau konhese duni Nia, i Hau mos halo tuir Nia Liafuan. 56Imi nia aman Abraão haksolok bainhira nia hein atu haree Hau fila mai. Nia haree tiha ona, i nia haksolok tebes.”
57Ema Judeu nia boot sira dehan, “O nia tinan seidauk too 50, maibee O dehan O haree ona Abraão. Nee loos, ka?”
58Jesus hataan, “Loos! Molok Abraão iha, Hau iha tiha ona.”
59Entaun, ema sira nee foti fatuk atu tuda Nia, tanba Nia foti nia aan hanesan ho Maromak. Maibee Nia sai subar tiha hosi Uma Kreda Boot nia area.#João 5:18
Atualmente selecionado:
João 8: BTDT
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2024 Wycliffe Timor-Leste.