Lukas 12
12
ONTOPORUA 12.
Omakumagido gi iri na gi iri.
1Aantu ojendji sho ja gongara apeshe mpo, ja ratacan’ike, Jesus h’okua shimbike okuronga aarongua je: Angareni ontaku haafariseji, nokutja eruado rjauo.
2Oshoka inapu orama tsha, tshi itatshi ko oroka uo, itapu ningua tsha mofuci, shi itatshi ka tshiuika uo.
3Shi mua popja meemurema, sho otatshi ku uvicirua muujerere, shi tamu popi momakutsi ike meni meendunda, sho otatshi ki igidua kombanda heendunda.
4Otii mu rombuere, ne ookuume kandje: inamu tira mbeja, mba taa dipaga ouara orutu, ndere komesho ja njengua okuninga tsha.
5Ndere nda ara ndi mu urukire ngu mu nokutira: tireni, ngu ta vuru, sho a dipaga, okuumbira uo moheri. Eno, andi mu rombuere, oh’ike ngu tireni.
6Omandjua gaari itaga randua ouara nani nomapeni gaari? Ndere Karunga ka dimbua nand’orimu’ike po.
7Nomafufu go meemutse deni ageshe oga jarurua. Inamu tira ano, oshoka ne omu vure unene omandjua ogendji.
8Otii mu rombuere: Keshe ngu to okorora ndje paantu, nOmuna guOmuntu ote ke mu okorora miipaci jaajengeli ja Karunga.
9Ndere ngu ti idimbike ndje paantu, ota ki idimbikirua miipaci jaajengeli ja Karunga.
10Nde keshe ngu ta popi ohapu, ndji ha toga Omuna guOmuntu, ota ka diminua po ngaa, ndere ngu ta tsheke Ombepo Ondjapuki, ita diminua po tshivarerue.
11Nge taa mu fara meesinagoga no komarenga no kaakuaniirua, inamu mbandara, shi tamu ka jamukura nenge ongiini tamu ka popja.
12Oshoka Ombepo Ondjapuki otahi mu rombuere ngaa petango ndioka shi tamu popi.
13Gumue a zire mongundu haantu, te mu garikana: Muongi, rombuera mumuameme a topore na ngaje uuciga.
14He ta ti: Mentu nguee, ore a tura ndje po, ndi ninge omupanguri, ngaje omutopori guuciga ueni?
15Nde ta rombuere aantu ajeshe: Tareni, ne mu angere oruisho, oshoka nando omuntu e nerooro, omuenjo gue kagu neue kiinima je.
16Mpa h’ote ja rongo nejere, ta ti: Omuntu omujamba okua ri e nepja, ndi ri niirja ojindji.
17Ti ipopire momuenjo gue: Ngashiingika ote ningi tshike? Kandi nomashisha okupungura iirja jandje.
18Nde ta ti: Otandi ningi ngii: ote teja po omashisha gandje, nde te tungurura po ge vure nga. Muka omo nduno ndi ture iirja jandje niinima jandje ajishe.
19Nga’te rombuere nduno omuenjo guandje, te ti: Muenjo guandje, nena oua pungura iinima ojindji ja guana eemuvo odindji. Vururukua, rja, nguee to nu, nguee to kara ku na mbudi ha tsha.
20Nde Karunga te ke mu rombuera: Raji nguee, uusiku ngaa mbu to ka purua omuenjo guohe. Iinima johe, mbi ua pungura, jo komesho otaji ka ninga ja re nduno?
21Otsho uo ngaa ngii tatshi ningua omuntu, ngu ti igongere omariko, he ke shi omujamba pu Karunga.
Iimpuju jouara.
22Nde kaarongua je ta ti: Ano andi mu rombuere, inamu kara mua mbandara keemuenjo deni, nokutja otamu ri tshike nenge korutu nokutja amu zara tshike!
23Omuenjo ogu vure eendia, norutu oru vure eenguuo.
24Tareni omakora, kaga kuna, kaga teja, kage neendunda nomashisha, ndere Karunga ote ga paruca. Ne omu ga vure pu cike peni?
25Ore mokati keni ta vuru okuguedera ko, nand’ona kembadara, keevura de di ninge odindji?
26Ndere nge hamu njengua kiinima mbi iitshonatshona, otshike mua mbandarera iikuauo?
27Tareni omanjanganjanga, shi taga mene. Kaga ronga, go kaga tunga, ndere andi mu rombuere: na Salomon muene muurenga ue aushe ka ri a zarekua ngashi rimue po.
28Karunga, ngu ha zareke ngii omuidi, ngu gu ri nena meputa, nde ngura tagu umbirua meziko, ne ote mu zareke nduno unene mu gu vure, janenguni mehiteero ne.
29Ano inamu pura ue: otatu ka rja tshike, ss’atu nu tshike, inamu kara niimpuju jouara.
30Oshoka ajishe mbi aapagani ojo haa kongo; Sho oku tshi mbi mua pumbua.
31Ndere komesho gajishe kongeni otshirongo tshe nehuko rje, jo ajishe iikuauo onamu ji guederua po ouara.
32Ino tira, tshinkoti otshitshona nguee, oshoka Sho a hara e mu pe uukuaniirua ue.
33Randiceni po atshishe shi mu na, ne mu gandje omagano na tsho. Iningireni uupunda, mbu kau kurupa, neriko meguru, ndi kari shura po, mu itamu ja aafuci, mo itamu tuku ontuko.
34Oshoka hu ku na eriko rjeni, eemutima deni oko uo di ri. Kareni mua taatara.
Kareni mua taatara.
35Kareni mua zara omapaja miija jeni, neenjeka da samekua di kuateni miikasha jeni.
36Opo mu f’aantu, mba ja tegerera muene, nge ta garuka a he kohango, nde ne, nge te ja ta konkora, mu mu egururire nzijanzija,
37Aapija aanerago oombo, mba muene ta ada pokuja kue, ja taatara. Tshiri, andi mu rombuere, h’oti izareke, te ja kaatumbike kotshiriro, nde te ja jakura.
38Nge te ja uusiku nenge ongura onene, nde te ja ada po ngii, oje nerago aapija mbo.
39Ndere tshiueni uo, muene guegumbo ngeno kua e tshi otundi, mu hamu ja aafuci, ando ta kara tshiri a taatara, egumbo rje kari ruue po.
40Ano kareni uo mui irongikida, oshoka Omuna guOmuntu one ja potundi, ndji kamu tshi.
41Petrus h’ote mu pura: Muene, omeere gano oto ge epururire sse ike nenge uo aantu ajeshe?
42Muene ta ti: Oguni po ano omurangeri guegumbo omudiginini homunandunge, ngu a turua po ku muene a pangere aapija je, opo e ja pe iiparuca, je je erekerua, pecimbo euanaua?
43Omunerago tshiri omupija, ngu ta adikua po, ta rongo ngii pokuja kue.
44Tshiri, andi mu rombuere, ote mu ningi erenga rj’ iinima je ajishe.
45Ndere omurangeri nguija, ngeno ti ipopire momuenjo gue: Muene guandje ite ja nzija, nde ta tameke okudenga aapija je aarumentu naakiintu, ta ri, he ta nu, nde ta korua.
46Tshiri, muene guomurangeri nguija mesiku rjokuja, ng’ine mu tega no potundi ndji ke tshi, one mu shashara, nde te mu pe otshipeua tshe mu mbeja, mbi inaji iteera.
47Ndere omupija, ngu a tshiua eharo rja muene, ndere ini irongikida, he ina ronga keharo rje, ona peua omadengo ogendji.
48Ndere ngu ke ri tshi, nde a ronga shi tshe ereka okudengu’ike, ita ka mona egeero enene ndija. Ku keshe ngu a peua otshindji, otshindji uo natshi ka purua, na ngu a peua erooro, ote ri pangurirua uo, e vure nguija.
49Onde ja, ndi dogere omuriro muujuni, ano nda ara uo gu ririme mo.#12:49 Jesus a hara ekondjo, ha uuheci. Ngu a hara ehiteero, na kembadarere ehiteero.
50Ondi nokutshatshua netshatsho, rjo tari ciminika ndje ri guanicue.
51Omua ruka ngeno, ngaje onde ja ndi etere uujuni ombiri? Aaue, andi mu rombuere, etopokacano tuu.
52Oshoka okuza konena jatano taa ka kara megumbo rimue ja topoka, jatatu na jaari, jaari na jatatu.
53She a topoka nomona omumati, nomona a topoka na she, otsho ngii hina nomukadona nomukadona na hina, hinamueno notshitenjua notshitenjua na hinamueno.
54H’okua rombuere uo aantu, ta ti: Nge tamu mono otshikogo atshi piti kuuninginino, ohamu ti nzija: Ovura otahi ja, tsho otsho ngaa.
55Nge tamu uvu ombepo tahi zi kuumbugantu, ohamu ti: Uupju au ja, tsho otsho ngaa.
56Ooneruado ne, mu tshi okutokora okutara keguru nuujuni, ndere okunongera erara ndika otshike kamu ku tshi?
57Otshike itamu tokora uo mu ne ojene shi tshu uka?
58Nge to hi nomutondi guohe komupanguri, kembadara mondjira u tshiue okuijageka, opo ke ku fare komupanguri, nd’omupanguri te ku gandja ngeno komupija, nd’omupija, te ku edirira meemango.
59Andi ku rombuere, muka ito zi mo ue, manka ino futa okapeni okashugunina.
Atualmente selecionado:
Lukas 12: KWM
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Omission Heklesia Ekatolika, 1951. Namibian Catholic Bishops Conference.