Lukas 23
23
ONTOPORUA 23.
Jesus ta pangurua.
1Otshingongi atshishe tsho otatshi cikama; he ta farua ku Pilatus.
2Mpaa taa shimbike itshee okumupopa, taa ti: Nguk’otue mu mona ta pijaganeke aantu jetu ngu, oti indike okufenderera omukuaniirua, sho ta ti, nokutja ohe Kristus omukuaniirua.
3Pilatus te mu pura ano, ta ti: Ngueje omukuaniirua guaajuda? He ti i mo, ta ti: Ongashi to ti.
4Pilatus ta rombuere aapristeri aakuruntu naantu: Kandi uete ondjo mu he.
5Jo taa geje, taa ti: Ota pijaganeke aantu nokuronga mu Judea atshishe okuza ku Galilea sigo oohu.
6Sho a huvu ohapu Galilea, te mu pura: Ngueje omugalileji?
7Sho a huvu nduno, Jesus okua zi kotshirongo tsha Herodes, te mu unzire ku Herodes, ngu a ri ku Jerusalem momasiku nga.
8Herodes sho a mono Jesus, okua kara a panderera. Okua arere nare e mu mone, oshoka okua adikua a huva ojindji ja Jesus, a hitur’ike itshee Jesus ta ningi otshirongankondo momesho ge.
9Ndere pojindjijindji mbi ta purua ku Herodes, ita jamukura mo nand’ohapu himue.
10Aapristeri aakuruntu naanongo jomambo taa cikama mpo, jo taa hi ngaa taa popo.
11Hotsho ano Herodes uo a shimbike okumudina, he naantu je, h’ote mu zarekica onguuo ontokere, he ta tshekua nduno, nde te mu undura po a tshune ku Pilatus.
12Uuna ndoka Herodes na Pilatus ja pacana uukuume; nare oja ri je nacanene ondumbo.
13Pilatus ti icana aapristeri aakuruntu naarangeri n’aantu, nde ta ti ku jo:
14Omuntu nguka mue mu eta ku ngaje ong’omupijaganeki guaantu, nde tara, onde mu kundana momeshe geni, nd’ine mona mo nand’ondjo mu he ha mbi ajishe mue mu popere.
15Na Herodes itshee ina mona mo tsha mu he; onde mu tuma ku he, nde tara, h’ina ninga tsha shi ngeno tsha guana okumudipagica.
16Onda ara ano ndi mu dengice, nga’ndi mu mangurure mo.
17H’okua ri e nokumangurura mo gumue potshituci.
18Nd’ongundu ahishe tahi igida ong’eui rimuike, tahi ti: Nguka na ze po, Barabas ohe u tu mangururire mo.
19Nguka a ri a hedirirua meemango moru epijaganeko e ri tameka motshirongo no moru edipago.
20Pilatus h’otsho ta popi itshee na jo, oshoka okua ri ngeno a hara a mangurure mo Jesus.
21Jo taa higida itshee unene, taa ti: Mu arera, mu arera komutshigakano!
22Porutitatu ta hi mo, ta ti: Okua ninga tshike otshineji? Ngaje kandi uete mo otshikoro tshokusa mu he, ano andi mu dengic’ike, ngaje ndi mu mangurure mo.
23Ndere taa mu ciminike nokujogerera nokuigida pombanda, a harerue komutshigakano. Ehigido rjauo rja ning’enene ri vure po.
24Naangashiingika Pilatus ta tokora, tshi ningue keharo rjauo.
25H’ote ja pe mo nguija, ngu a ri a hedirirua mo moru edipago nepijaganeko, ngo ngu ji indire, nde ta gandja Jesus ngashi ja ara.
Jesus ta arerua komutshigakano.
26Sho je mu fara ko, oja kuata gumue, Simon omukereni, ngu kua ta zi mepja, taa mu tsike omutshigakano, e gu umbate a randura Jesus.
27Ongundu onene haantu naakiintu taa randura ko, taa mu ririre, jo taa mu kemene.
28Jesus h’ota pungurukire ku jo, ta ti: Jakiintu jo mu Jerusalem, inamu ririra ndje, aaue, iririreni n’ojene naanona jeni.
29Oshoka esiku onari ja, omuntu mu ne j’a tje: aanerago aakiintu mba kaa vara, nomara nga inaga vara, nomagundji nga inaga jamica.
30Omuntu he ta shimbike okuigida keendundu, ta ti: Ihumbireni mu sse, no kiingandundu: Tu siikireni!
31Oshoka omuti omutarara nge tagu ningua ngaaka, omukukutu ando ngiini?
32Aarumentu jaari ji iri, aakorokoshi oja farua ko puamue na he, ja ka dipague uo.
33Sho ja ciki keshara, ndi tari tiua eshara rjeenkue deemutse, oje mu arera komutshigakano, naakorokoshi mbejaka, gumue korurjo, mukuauo kokumosho.
34He Jesus ta ti: Tate, ja dimina po, oshoka kaa tshi shi taa ningi. Jo taa hitoporere eenguuo de nokuduumbira iihogororico.
35Aantu taa cikama mpo nokutara ko. Aakuruntu taa mu njana, taa ti: Okua kuacere jakuauo, nena ni ikuacere muene, he ng’oKristus, omuogororua gua Karunga.
36Naakuiita otsho taa mu tsheke, mba je engene ko je mu pe omeja omaruru.
37Jo taa ti: Nguej’ano, ng’omukuaniirua guajuda ikuaca muene!
38Pombanda he opua turua otshireji, tsha tshangua motshigereki no moshilatina no motshihebereji: Nguka omukuaniirua guaajuda.
39Gumue po paakorokoshi, mba ja arerua komutshigakano na he, te mu tsheke, ta ti: Nguee ng’oKristus, ikuaca muene, ngueje u tu kuace uo.
40Nde mukuauo ta jamukura, te mu ganda, he ta ti: Ku tira nani Karunga, nand’ongueje u ri megeero rja faacana?
41Sse otatu epekerua tshu uka, shi tui irongera miironga jetu, ndere nguk’ina ninga tsha otshineji.
42H’ota ti ku Jesus: Muene, ou dimburukua ndje, nge to ka ha muukuaniirua uohe!
43Jesus te mu jamukura: Tshiri, andi ku rombuere onena tuu ndjika nokuri to ka kara na ngaje moparadisa.
44Pouiri ontikanekamue eemurema da siikire uujun aushe sigo okouiri ontimugoji.#23:44 ouiri ontikanekamue haajuda opomusha hetu.
45Etango rjo otari ruuda, nd’omutshigo guontempel tagu tatuka pokati.
46Jesus h’oti igida neui enene: Tate, omuenjo guandje otandi gu ecere meenjara dohe. Mokupopja eehapu di nokua si.
47Erenga rjaakuiita shi rja mono shi tsha ningua orja amberere Karunga, rja ti: Otshotshiri guanene, omuntu nguka okua ri omujapuki.
48Nd’aantu ajeshe, mba je ja po okutara, sho ja mo no shi tsha ningua ko, oji idenge ponturo, nde taa tshuna momukunda.
49Jakuauo ja cikama ngaa ngahuija, nde itshee naa kiintu, mba je mu randura, ja zi ku Galilea, oje tshi mono shi.
Jesus ta fumbikua.
50Nde tara, omuntu gumue, edina rje Josef, erenga rjotshingongi, h’omuntu omuanaua a huka.
51Ngu ka ri a hiteera epanguro nekundacano rjotsira, a zi ku Aritmatea, omukunda mu Judea, onakutegerera otshirongo tsha Karunga.
52Ohe ngu a hi ku Pilatus, nde ti indire omudimba gua Jesus.
53Te gu kuca ko, he te gu dingire merapi etokere, nde te gu fumbike mombira h’okiua memanja, mu inamu turua natango omudimba.
54Uuna ruesiku rjerangero, rjo esiku rjesabata rja cika.
55Aakiintu, mba je ja na he ja za ku Galilea, oja radura ko ja tare ombira nomudimba sho tagu rangekua mo.
56Jo taa ka tshuna momukunda, nde taa rongikida iizimba iitoue nomagadi gokuguaja, jo ja vururukue mesiku rjesabata kompango.
Atualmente selecionado:
Lukas 23: KWM
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Omission Heklesia Ekatolika, 1951. Namibian Catholic Bishops Conference.