Mateus 4
4
ONTOPORUA 4.
Jesus ta makerua
1Jesus okue etua kOmbepo mombuga a ka makerue ku satana.
2Sho a ningi omasiku eemurongo iine i ikerera iikurja, h’ota s’ondjara.
3Po opue ja pu he omumakeri, ta ti: Nguee, ng’Omumua Karunga, rombuera ano eenkuuege dika di ninge oshima.
4Ndere he ta jamukura, ta ti: Opua tshangua: omuntu ku upicu’ike kokurja, aaue, ok’ohapu ahishe tahi zi mokana kua Karunga.
5Satana te ja te mu fara momukunda omujapuki, he te mu tura kombanda hontempeli.#4:5 omukunda omujapuki — Jerusalem.
6Nde ta ti ku he: Ngueje ano, ng’Omumua Karunga, ihumbira nduno poshi, oshoka opua tshangua: Karunga okue ku rombuerere aajengeli, jo taa ku umbata momooko, ku ipume nandoodiro keempadi dohe kemanja.
7Jesus h’ota ti: Opua tshangua uo: ino makera Muene Karunga kohe.
8Satana te mu kuca itshee, te mu fara mondundu ondeendeka, nde te mu urukire eembara adishe do muujuni aushe nuurenga uado.
9Ta ti: Ajishe mbi otii ku pe, ng’oua ts’eengoro, nde to injongamene ndje.
10Jesus ta ti ku he: Za po, satana, oshoka opua tshangua, aku ti: Injongamena ku Karunga kohe, h’ohike to karere.
11Ngashiingika satana okue mu cigi po, nde tara, aajengeli oje ja je mu karere.
Aarongua jotango.
12Jesus sho a huvu, Johannes a kuatua, okua tshuna ko Galilea.
13He ta zi mo mu Nazaret, nde ta kara mu Kafarnaum, omukunda gu ri pefuta, keengamba da Zabulon na Neftalin.
14Opo tshi guanicue, shi tsha popiua komuprofeti Isaias, ta ti:
15Otshirongo Zabulon notshirongo Neftalin, ojo ondjira pefuta haandijaka ha Jordan, oGalilea gaapagani.
16Ojo aantu mba je ri meemurema, nde taa mono uujerere uunene; na mba mokati keemudire dokusa, uujerere tau ja jerere.#4:16 Mba je ri meemurema … — Ojo aantu, mb’inaa dimburura natango Karunga nuujerere ue uujapuki.
17Okuza kesiku ndija Jesus a shimbike okuuvica, ta ti: Idirurureni, oshoka otshirongo tsheguru otshe ja popepi.
18Ano Jesus, sho a hende komukunkuro guefuta rja Galilea, okua mono aamuahina jaari, Simon, ngu a rukua uo Petrus, na Andreas, omumuahina, taa humbire iijurico jauo mefuta, oshoka oja ri aajuri.
19He ta ti ku jo: Randurii ndje, ngaje ndi mu ninge aajuri jaantu.
20Opo mpa oja cigi po iijurico, jo je mu randura.
21Okuza mpoka, sho a hi komesho, okua mono ko aamuahina jaari ji iri, Jakobus, omumua Zebedeus, na Johannes omumuahina, taa haandeke iijurico jauo mosikepa puamue na she Zebedeus; h’ote ji icana.
22Naanzija oja cigi po iijurico, nde taa mu randura.
23Jesus h’ote endahenda apeshe mu Galilea nokuronga aantu meesinagoga dauo, tu uvica evangelium rjotshirongo tshe, he ta panga uuvu aushe niigombo ajishe mokati kaantu.#4:23 Osinagoga — ontempeli, ongerka haajuda.
24Omurombo, ngu gue mu popirua, gu uvika apeshe mu Siria, jo je eta ku he ajeshe, mba je nuuhehame nuuvu u iri niigombo neendemoni noruidi niirema, he te ja panga.
25Naantu ojendjijendji oje mu randura, jo mu Galilea no jo mu Dekapolis no jo mu Jerusalem no jo mu Judea na mbo nduno ja haandijaka ha Jordan.
Atualmente selecionado:
Mateus 4: KWM
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Omission Heklesia Ekatolika, 1951. Namibian Catholic Bishops Conference.