मत्ती 11
11
यीशु ए यूहन्ना बपतिस्मा रंड्रा
(लूको 7:18-35)
1अपेहल यीशुज़ि एनोह सनी चेला तिंङ आज्ञा रेह योहच़तो, दंङ दोतु नगरंङ शिक्षा रंड्री ए प्रचार लेहई देरच़ी अच्च़ा इलि। 2यूहन्नाज़ि जेलंङ मसीहू कम्मो पाहठी थशातो दंङ दोई एनोह चेलारे दुह रुक्च़िमी थल्जी चरच़े च़रति 3“छि कांह ए दुह मसीह शुनाह, कि अच़ि च़रच़िमी वाईदा परमेश्वरे लहसी तोहई कि ञेंहच़ी ऊईदिऊ इंतज़ार लोहई?”
4यीशुज़ि जुबाब रहंदे, “केहच़ी छिल्ला रेड्रातंई ए खंमातंई, दुह भत्ते इलजे यूहन्नारंङ कंज़े रांई। 5कि काणे दोच़ी खमातोर, लट्टे दोरे जोज़ातोर, कोढ़ीरे शुद्ध शवाहतोर टंऊंणे दोच़ी थचातोर, सिए दोरे षीङमी लोहातोर, कंगालतिंङ रूठे खबर खोकसा। 6दंङ धन्य शुहरे दोरे अच़ि गिऊ टोहकठे विशवास लहज़ातोर।”
7अपेहल यूहन्नाओ चेलारे दोरच़ी इपि लेहकी तोईरे, दंङ यीशु यूहन्नाओ पाहठी मीहतिंङ कुट्री लेहती, “केरे सुनसान ठाहरीरिंङ छि खंड्री इलदेंई? छि लंहन ज़ि तुहरच़ा ब्रन्ज़ेर? 8दंङ केरे छि खंड्री इलदेंई? छि मंङे खमज़े लह्ची मीहबी? खंणुई, झांह ठ्रोह खमज़ेर लेह्चा मीहरे राजभवनंङ बंङज़ी? 9दंङ छिले इलदेंई? छि अरीआ भविष्यवक्ताबि खंड्रीआ? वेई! गेह केतिंङ कुट्रातग कि, दुह भविष्यवक्ताबे लाह मोह्ड़े तोह। 10पवित्रशास्त्रारिंङ परमेश्वरे यूहन्नाओ पाहठी दिह च़ेहसी तोह, ‘रेड्रु! गेह कांह तुईज़ी घेंङौ इच्च़ा दूता बि च़रपोग, अंऊ कांह अपिमी थल्जी मीहतिंङ त्यार लोहतो।’
11गेह केतंङ हेले कुट्रातग अंयों मीहरे दिह धरतीरिंङ तोतोर, दोतु बिचंङ यूहन्ना बपतिस्मा रंड्राबे मोह्ड़े अरीला माह; पर अरी स्वर्गो राजंङ भत्तेबे कवचि तोह दुह दुबे मोह्ड़े तोद। 12अपेहल बे यूहन्ना बपतिस्मा रंड्राए प्रचार लेह शुरू लहतो दोहथल बेहच़ी तोग तचेक स्वर्गो राज जोरारंङ साते तुंखा शुबी लेहकी तोह, दंङ ड्रकशी दोरे दिबी नाश लहज़िमी कोशिश लहज़ी लेहकी तोतोर। 13भविष्यवक्तातु भत्ते कताबरे ए मूसाऊ कानूना रिंङ यूहन्ना बपतिस्मा रंड्राऊ अबिमी तचेक, परमेश्वरो राज्यो पाहठी च़ेहसी तोह। 14दंङ अगर केहच़ी गिऊ गप्पा मनेक्च़ातंई ता, दिह दुह ए एलियाह शुह अतु अपिमी पाहठी भविष्यवाणी शुहचे तोहई। 15छि; गेह कुट्रातग दुह ध्यानारंङ साते रेड्रुंई।” 16“गेह दिह पीढ़ीऊ मीहतु बराबरी अतंङ साते लोहग? दोरे दुह कटुतु ठ्रोह तोतोर अरी बज़ारंङ बंङज़ा एनातु बिचंङ शिकायत लहज़ातोर। 17ञेंहच़ी केहतु थल्जी बेंज़ बजाएतिन, पर केरे माह गरछातेंई; ञेंहच़ी दुख लाहतंई पर केहरे क्रपतेनिए माह। 18छना कुचे यूहन्नाज़ि घड़ी-घड़ी ब्रत लहज़ाते दंङ सरा माह तुंङज़ते। दंङ मीहज़ी कुट्रातेर दोऊ अंद्रेग मांजी आत्मा तोह। 19पर अपेहल गेह मीहू योह ज़ेहे तुंङमातोग दंङ केहच़ी कुट्रातंई कि गेह महस ज़ज़ा ए सरा तुंङज़ा, दंङ चुंगी लेहप्च़ातु ए पापीतु साथी शुगाह, पर अच़ि परमेश्वरो शिक्षा मनेके जोज़ा दोऊ ज़िंदगीरिङ परमेश्वरो ज्ञान हेले साबित शोतो।”
अबिशवासो टोईच़ी हाय
20दंङ यीशुज़ि दुह मीहरे रैहति अरी दुह शहरंङ बंङज़ातेर, अंऊर दोई महस सामर्थो कम लहसी तहरे; छना कुचे दोच़ी एनातु सेहम पापो दोरच़ी माह यह्च़ा तेर। 21“धिक्कार शुह! खुराजीन शहरो मीहरे, दंङ धिक्कार शुह! बैतसैदा शहरो मीहरे, अंऊ हेरानी ऊ कम ए रूठे कम गेह केहतु बिचंङ लहज़ी तातग, अगर दुह कमाबि गेह ऊई इलाकारिंङ सोर ए सीदोन शहरारिंङ लांईया ता दोच़ी टाठ चोकसा दंङ तप चाह्सा अपेहल बे एनोह पाप छोड़ेके चरच़ि। 22पर गेह केतिंङ कुट्रातग न्याय ध्याड़ारिंङ केहतु हलात दुह सज़ा बे अंऊ परमेश्वरे सोर ए सीदोन शहरो मीहतिंङ रमतो दोबि ला महस शोतो। 23हे कफरनहूम शहरो मीहरे, छि कांह स्वर्ग तचेक रंगी शोना? कांह ताह अधलोक तचेक योंखा योन; अंऊ सामर्थो कमारे कांह दोरच़ी शुहचे तोतोर, अगर दोरे सदोम शहरंङ शुहचंङ ता, दुह तोग तचेक दोहरिंङ ए शुहबी तोहई। 24पर गेह केतिंङ कुट्रातग न्याय ध्याड़ारिंङ केहतु दशा दुह सज़ा बे अंऊ परमेश्वर सोर ए सीदोन शहरो मीहतिंङ रमतो दोबि ला महस शोतो।”
बोझे दबेके मीहतिंङ आराम
25दोहथर यीशुज़ि कुहतो, “हे बाह स्वर्ग ए धरतीऊ प्रभु गेह कांह धन्यवाद लहज़ातग कि केई दिह गप्पारे ञेंच़ाहरे ए समझकार मीहतु दोरच़ी प्याके त्याहतेन दंङ अंऊ मीहरे कटुतु ठ्रोह सीधे तोतोर दोतु टोईच़ी प्रगट लहतन। 26वेई हे बाह। छना कुचे कनिंङ दिए लहज़ी रूठे अति। 27गिऊ बाहे गिह्बी भत्तेधिर रांहषी ततो, बाह ए तोह अंऊ दोई योह बि सेहचा, सिर्फ इच्च़ाए योह तोह अंऊ दोई हेले बाहबि सेहचा, दंङ अंऊ मीहतिंङ गेह योह, अंङषातोग दोरे मीहरे बाहबि सेहपोर।
28ए भत्ते खरे कम लहज़ाए बोझे दबेकि (कुरची) मीहरे, गिऊ कछंङ अतंई; गेह केतिंङ नह्च़ी (आराम) रमोग। 29गिऊ जुम केनातु टोईच़ी उठातुंई, दंङ गिऊ दोरच़ी ञेंई। छना कुचे गेह शांत ए सेहमो रूठे तोतोग: दंङ केहच़ी केनातु सेहमरिंङ आराम खोकपोंई। 30छना कुचे गिऊ जुम योह्च़े तोह दंङ गिऊ कुर पोले तोह।”
Atualmente selecionado:
मत्ती 11: LBFNT
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.