यहून्ना 5
5
अड़तीस साल के रोग सै चंगाई
1इसके बाद यहूदिऔं को एक तौहार आओ, और ईसु ऐरूसलेम मै गओ। 2ऐरूसलेम मै भेड़ नाम के फाटक के धौंरे एक तलाब हो, जो इबरानी भासा मै “बैतसैदा” कैलाबै हो, जिसके किनार पाँच दैहरी जैसी जघै बनी पड़ी हीं। 3इनमै भौत से ऐंसे आदमी पड़े रैहबै हे, जो बेमार, अन्धे, लंगड़े और फालस बारे हे। 4#5:4 कुछ पुराने लेखौं मै जौ हिस्सा ना मिलै है जे पानी को हलनै को पैंड़ो देखै हे, कैसेकै परभु को एक सुरगदूत एक टैम मै आकै तलाब के पानी कै हलाबै है। पानी के हलतेई जो आदमी बामै पैले बर जावै हो, बाकी कोई बी बेमारी काए ना होए, बौ ठीक हो जावै ही। 5बहाँ एक आदमी हो जो अड़तीस साल सै बेमार हो। 6ईसु नै बाकै पड़ो भओ देक्कै और जौ जानकै कै बौ भौत दिनौ सै ऐंसेई पड़ो है, बासै पूँछी, “का तू ठीक होनो चाँहै है?” 7उस बेमार नै जबाब देओ, “हे परभु, मेरे धौंरे कोई आदमी ना है, कै जब पानी हलाओ जाऐ, तौ मैंकै तलाब मै बार दे, पर मेरे पौंचते पौंचते दूसरो मैंसै पैले बर जावै है।” 8ईसु नै बासै कैई, “उठ अपनो सितरो उठा, और चल फिर।” 9बौ आदमी तुरन्त ठीक हो गओ, और अपनो सितरो उठाकै चलल फिरल लगो और बौ आराम कन्नै को दिन हो। 10इसताँई यहूदी नेताऔं नै बासै, जो ठीक हो गओ हो कैई, “आज तौ आराम कन्नै को दिन है। तेरो सितरो उठानो हमरे नियम के खिलाप है।” 11बानै उनकै जबाब देओ, “जिसनै मैं ठीक करो, बाई नै मैंसै कैई, ‘अपनो सितरो उठा और चल फिर।’” 12उनौनै बासै पूँछी, “बौ कौन आदमी है जिसनै तेसै कैई, सितरो उठा और चल फिर?” 13पर जो ठीक हो गओ हो बौ ना जानै हो कै बौ कौन है। कैसेकै ईसु बा जघै मै भीड़ के संग चलो गओ हो। 14इन बातौं के बाद बौ ईसु कै मन्दर मै मिलो। ईसु नै बासै कैई, “देख तू ठीक हो गओ है, फिर सै पाप मत करिए, ऐंसो ना होए कै जिस्सै कोई भारी संकट तैमै आ पड़ै।” 15बा आदमी नै जाकै यहूदी नेताऔं सै कैई, “जिसनै मैं ठीक करो, बौ ईसु है।” 16कैसेकै बौ ऐंसे काम आराम के दिन करै हो, इसताँई यहूदी नेता ईसु कै सताल लगे। 17ईसु नै उनकै जबाब देते भए कैई, “मेरो अब्बा अब तक काम करै है, और मैं बी काम करौ हौं।” 18इस बात के कारन यहूदी नेता बाकै मार डान्नै के ताँई और बी जादा ताख मै रैहल लगे, कैसेकै बौ ना सिरप आराम के दिन के नियम कै तोड़ रओ हो पर परमेसर कै अपनो अब्बा कैह कै अपने आपकै परमेसर के बराबर बताबै बी हो।
लौंड़ा को अधकार
19ईसु नै उनसै कैई, “मैं तुमसै सच-सच कैरओ हौं, लौंड़ा खुद सै कुछ ना कर सकै है, बौ सिरप बौई करै है जो अब्बा कै करतो देखै है, कैसेकै अब्बा जो कुछ करै है लौंड़ा बी बैसोई करै है। 20कैसेकै अब्बा लौंड़ा सै पियार करै है और बौ उन सब कामौ कै बाकै दिखाबै है जिनकै बौ खुद करै है, और बौ इनसै बी बड़े कामौ कै बाकै दिखागो जिस्सै तुम अचम्बो करौगे। 21जैसे अब्बा मरे भएऔं कै जिन्दो करकै जिन्दगी देवै है, बैसेई लौंड़ा बी जिनकै चाँहबै है उनकै जिन्दगी देवै है। 22अब्बा किसी को नियाय ना करै है, पर नियाय कन्नै को सब काम लौंड़ा कै दे दओ है। 23कै जैसे सब आदमी अब्बा को आदर करैं हैं, बैसेई लौंड़ा को बी आदर करंगे। जो लौंड़ा को आदर ना करै, बौ अब्बा को जिसनै बौ भेजो है, आदर ना करै है।
24 “मैं तुमसै सच-सच कैरओ हौं, जो मेरे बचन सुनकै मेरे भेजनै बारे मै बिसवास करै है, हमेसा की जिन्दगी बाकी है, और बाके ऊपर सजा को हुकम ना है, पर मौत सै पार होकै बौ जिन्दगी मै पौंच चुको है। 25मैं तुमसै सच-सच कैरओ हौं, बौ टैम आ रओ है बलकन आई चुको है, जब बे जो मरे भए आदमी परमेसर के लौंड़ा की अबाज धियान सै सुनंगे, और जो सुनंगे बे जीयंगे। 26जिस तरै अब्बा अपने भीतर खुद जिन्दगी रखै है, बैसेई बानै लौंड़ा कै बी अपने भीतर खुद जिन्दगी रखनै कै देई। 27और उसनै बाकै नियाय कन्नै को बी अधकार देओ है, कैसेकै बौ आदमी को लौंड़ा है। 28इस्सै अचम्बो ना करौ, कैसेकै बौ टैम आ रओ है, कै बे सब जो कबरौं मै हैं, बाकी अबाज धियान सै सुनंगे। 29और बाहार आ जांगे जिनौनै अच्छे काम करे हैं बे फिर जी उठंगे और जिन्दगी पांगे पर जिनौनै बुरे काम करे हैं बे सजा पानै के ताँई जी उठंगे। 30मैं खुद अपनी ओर सै कुछ ना कर सकौ हौं। जैसो परमेसर की ओर सै मैं सुनौ हौं, बैसोई नियाय करौं हौं और मेरो नियाय सच्चो है, कैसेकै मैं अपनी ना, पर अपने भेजनै बारे की इच्छा चाँहबौ हौं।
ईसु मसी के बारे मै गभाई
31 “अगर मैं खुदई अपनी गभाई दौं तौ मेरी गभाई सच्ची ना है। 32एक और है जो मेरी गभाई देवै है, और मैं जानौ हौं कै मेरी जो गभाई बौ देवै है, बौ सच्ची है।
33 #
यहून 1:19–27; 3:27–30 “तुमनै यहून्ना सै पुछबाई और जो गभाई बानै देई बौ सच्ची है। 34पर मैं अपने बारे मै आदमी की गभाई ना चाँहबौ हौं, तौबी मैं जे बात इसताँई कैबौ हौं कै तुमकै मुक्ति मिलै। 35बौ तौ पजरतो और चमकतो भओ दिया हो, और तुमकै कुछ देर ताँई बाकी जोती मै खुस होनो अच्छो लगो।
36 “पर मेरे धौंरे जो गभाई है बौ यहून्ना की गभाई सै बड़ी है, कैसेकै जो काम अब्बा नै मैंकै पूरो कन्नै के ताँई सौंपो है, मतलब जौई काम जो मैं करौं हौं बे मेरे गभा हैं कै अब्बा नै मैं भेजो हौं। 37#मत्ती 3:17; मरकु 1:11; लूका 3:22और अब्बा जिसनै मैं भेजो हौं, बाई नै मेरी गभाई दई है, तुमनै ना बाकी अबाज सुनी, और ना बाको रूप देखो। 38और बाको बचन तुमरे मनौ मै बनो भओ ना रैहबै है, कैसेकै तुम उसमै बिसवास ना रक्खौ हौ जिसनै बौ भेजो है। 39तुम पबित्तर सास्तर मै ढूंड़ौ हौ, कैसेकै तुम सोचौ हौ कै बामै हमेसा की जिन्दगी मिलै है, पर जे सिगरे पबित्तर सास्तर मेरी गभाई देवै हैं। 40फिर बी तुम जिन्दगी पानै के ताँई, मेरे धौंरे आनो ना चाँहौ हौ।
41 “मैं आदमिऔ सै आदर ना चाँहौ हौं। 42पर मैं तुमकै जानौ हौं कै तुम्मै परमेसर को पियार ना है। 43मैं अपने अब्बा के नाम सै आओ हौं, और तुम मैंकै ना अपनाबौ हौ, पर अगर दूसरो कोई अपने नाम सै आय, तौ बाकै तुम अपना लोगे। 44तुम कैसे बिसवास कर सकौ हौ जबकि तुम एक दूसरे सै आदर पानो चाँहौ हौ, और बौ आदर जो एक मात्तर परमेसर की ओर सै आवै है पानो ना चाँहौ हौ? 45जौ ना सोचौ, कै मैं अब्बा के सामने तुम्मै दोस लगांगो, तुम्मै दोस लगानै बारो तौ मूसा है, जिसमै तुम भरोसो करौ हौ। 46कैसेकै अगर तुम मूसा को बिसवास करते, तौ मेरो बी बिसवास करते, इसताँई कै बानै मेरे बारे मै लिखो है। 47पर अगर तुम बाकी लिखी भई बातौं मै बिसवास ना करते, तौ मेरी बातौं मै कैसे बिसवास करौगे?”
Atualmente selecionado:
यहून्ना 5: TKB
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
New Life Compute Institute [NLCI] - CC BY-NC-ND 4.0