مَتّی 8
8
شِفا پیا جِذامی
1وخدی عیسی اژ کوی هاتَ هُار، جیَمیَت فِرِه‌ی کَتِنیِ دُما. 2اِ ایی حِنَ پیا جِذامی هاتی اِرَه تک ئو زُنی دا اَر وَر ئو وِتی: «اِاِ خداون، اَرّ بِت مَتونین شِفام بِین.» 3عیسی دس ووژ دِریژ کِردی ئو دس نا اَر قِ‌آ، وِتی: «مِم؛ شِفا بِگِر!» هِرازِه، اژ جِذام شِفا گِرتی. 4اَسَه عیسی وِتون: «حُواسِت بو چیئی نوشینَ کس، مِنتائای بِچُ ووژِت نِشو کاهن معبد دَ ئو پیشکَشی‌ای گه موسی پِخَمَر فِربو داسی، تقدیم کَ تاگَه اَرِه اونَل شاتی‌ای بو گه تو شِفات گِرتیَ.»
ایمو افسر رومی
5وخدی عیسی هات اِنوم شیَر کَفَرناحوم، افسر رومی‌ای هاتی اِرَه تک ئو وَه لالکَ‌حُاس 6وِتون: «اِاِ آقا، خِلمتکارِم فِلج وِلائِرا بیَس اِنوم مال ئو فِرَه عذاوَ مَکیشی.» 7عیسی وِتون: «مِنَ مام ئو شِفاءَ میَمی.» 8افسرِهَه جوواوا داتی: «اِاِ آقا، لائق نیِم باینِ ژیر طاق مال مِنا. فَخَد قصه‌ی بوش گه خِلمتکارِم شِفاءَ مَگِری. 9اَرِیَگه مِه ووژِم پیای کِم گه هامِ ژیر فِربو کسی ئو سروازَل‌یشی ژیردسَه ووژِم دیرِم. موشِمَ یَکی ”بِچُ،“ مَچو، موشِمَ یَکی‌تِر ”بوری،“ مای. موشِمَ خُلُم ووژِم ”یَه بِهَه،“ مِهِیتی.» 10عیسی وخدی قصَه‌ل او شنَفتی، بِلُجوئی هاتی ئو وِتیَ کسَلی گه وَه دُما ماهاتِنی: «حخیختاً، موشِم‌ئونتو، هُنَ ایمونمی جُ‌جُ اِنوم اسرائیل‌یش نِئیَ. 11موشِم‌ئونتو گه فِرَه کسَل اژ شرق ئو غربَ مان ئو اِنوم پاتِشائی آسمونَ گَرد ابراهیم، اسحاق ئو یعقوبَ مَنیشِن اَرسر یِه سِفِرَه، 12مِنتائای آیلَل ایی پاتِشائیَ ماوژِن اِنوم تیَریکی در، جای گه گیری ئو دِنوریچَه هَس.» 13اَسَه عیسی وِتیَ افسرِهَه: «بِچُ! مِطابق ایمونِت اَرِنِت بو.» ئو هِرازِه خِلمَتکارِهِه شِفا گِرتی.
عیسی فِرَه کسَل شِفاءَ مِ
14وخدی عیسی چی اِرَه مال پطرس، هَسویرَه او دیتی گه تُو داشدی ئو کَتوئیِ ژیرجا. 15عیسی دس نا اَر قِ دَسا ئو تُو قط بیتی. اَسَه هیزگِرت ئو بِنیا نا اَر خِلمت کِردِن اژ عیسی.
16باایوارَه، فِرَه کسَل اژ مِلاکَت‌‌دارَلو آوِرد اِرَه تک عیسی ئو او وَه کلوم ووژ روحَل گَن اَژینو کِردیَ دِریر ئو کُل مریضَل شِفا داتی، 17هُنَ پیشگوئی اِشعیا پِخَمَر اَنجوم گِرتی گه:
«او ضیَفَل ایمَه گِرتی
ئو مِرَضَل ایمَه گِرتیِ کولا.»
نَسَخ وَه تُرّ عیسی‌آ چیئِن
18وخدی عیسی دیتی جیَمیَت فِرِه دورو گِرتیَ، فِربو داتی: «بِچیم اِرَه اَکو دریاچَه.» 19اَسَه یَکی اژ مَلِمَل تورات هاتی اَرِه تک ئو وِتی: «اِاِ استاد، هر جا بِچین، مامَ تُرّتا.» 20عیسی جوواوا داتی: «روائَل لونَه دیرِن ئو مَلَل‌یش لونَه، مِنتائای کُر اِنسو، جای اَرِه سِرا نائن نِری.» 21یَکی اژ شاگردَل وِتون: «اِاِ آقا، اول‌بار صِلا بِ‌ئونِم تاگَه بِچِم باوَه‌م بِنمِ قور، اَسَه بام اِرَه تک تو.» 22مِنتائای عیسی وِتون: «بورَ تُرّ مِنا ئو بِیل مِردیَل، مِردیَل ووژو بِنِنِ قور.»
آروما کِردِن رُحِیل دریاچَه
23اَسَه عیسی سُوار قائِقی بی ئو شاگردَل‌یش چِنیَ تُرّا. 24وَه یِگِل بیَ رُحِیل سخدی، جوری گه نزیک بی تافَل، قائِقِهَه غرخ کَن. مِنتائای عیسی اِ خاو بی. 25اَسَه شاگردَل هاتِن کِردونَ خَوَر ئو وِتو: «اِاِ آقا، نجادمو دَ! چیئی نَمَنیَ اژ بِن بِچیم.» 26عیسی جوواوا داتی: «اِاِ کم‌ایمونَل، اَرِه‌چَه هُنَ زِلَ‌تِراقا بینونَ؟» اَسَه هیزگِرتی ئو تُنا بی اَر وا ئو تافَل دریاچَه ئو کُل آرومون اِراگِرتی. 27اَ پیالَ بِلُجوئیو هاتوئی، اژ یَکتِریونَ مَپِرسیا: «یَه دیَر کیَ؟ گه جُ‌جُ وا ئو تافَل‌یش فِربون اَژینَ میَرِنی!»
شِفا دو پیا مِلاکَت‌دار
28وخدی گه عیسی رَسیَ وِلات جَدَریَل، اِ اَکو دریاچَه، دو پیا مِلاکَت‌دار گه اژ قورِسونَ ماهاتِنَ دِریر هاتِنیَ وَرپیری. اَ دوءَ اَخِنَ وَشی بین گه هُیچ کس نِمَتونستی اژ اَ رئیا رد بو. 29اونَل قارونو: «اِ ایمَت چا، اِاِ کُر خدا؟ یانی هاتینَس اَرِه ایرَه تاگَه وِر اژ زمونی گه مَیِّن بیَ عذاومو دِین؟» 30قِیلی دویرتِر اژ اونَل ریئَن کَلِنگی اژ خنزیلَل داشدو خوراکونَ مَهُارد. 31مِلاکَتَل لالکینَ عیسی وِتو: «اَرّ میا تارمو کِین، کِلمو‌کَ اَرِه نوم ریئَن خنزیلَل.» 32عیسی وِتی‌ئونو: «بِچِن!» اَسَه مِلاکَتَل چِنَ دِریر ئو چِن اِنوم خنزیلَل، ئو کُل ریئَنِهَه اژ سِرالیژی تپَه رَمو کِرد ویرِ نوم دریاچَه، ئو اِنوم آو توپین. 33اونَلی گه مِتیَه‌جی خنزیلَل بین حِیواین، چِن اَرِه نوم شیَر ئو کُل ایی چیئِلونَ تیَریف کِرد، مصقوصاً اَ چیئَه گه اَرِه اَ مِلاکَتِلَ اتفاق کَتوئی. 34اَسَه کُل مردِم شیَر هاتِن عیسی بوئینِن ئو وخدی اوُ دی، لالکینی‌ئون گه وِلات اونَل وِل کِ بِچو.
Atualmente selecionado:
مَتّی 8: LBT
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
@ 2024 Korpu Company