Chibkees 1
1
Tsid Ntajtes has Lus Ntuj
1Thaws chibkees Vaajtswb tsid lus ntuj has lus ntajtes.#1.1 Thaws chibkees … lus ntuj has lus ntajtes; lossis thaws chibkees Vaajtswb tsid lus ntuj has lus ntajtes; lossis Thaws Vaajtswb pib tsid lus ntuj has lus ntajtes. 2Lus ntajtes tsi taw muaj daastsi has nyos do cuas, tsaws ntuj nti thoos pliaz saw nplaid dej habtxwb, has Vaajtswb tuz ntsujplig#1.2 Vaajtswb tuz ntsujplig; lossis Vaajtswb lus fwjchid; lossis cob cua luz qhais Vaajtswb; lossis cob cua kwg txaws ntshai. yuz muz yuz luz saw nplaid dej. 3Vaajtswb has tas, “Ca ni muaj qhob pud keb,” ces txiad pud keb kaaj nrig tuaj.#2 Klt 4.6 4Vaajtswb txaws sas heeb tu qhob pud keb qhai. Ces Vaajtswb ha muas qhob pud keb cais tiad qhais qhob tsaws ntuj, 5Vaajtswb tis npe tu qhob pud keb hu ua “Nruas hnoos” has qhob tsaws ntuj hu ua “Hmo ntuj.” Muaj caij tsaws ntuj has muaj caij pud keb, yog hnoos is.
6-7Vaajtswb has tas, “Ca ni muaj lus ntuj luz quas dej has muas cais kuas nyaz nyos muaj nyaz chia.” Yog ni qhai, Vaajtswb ha tsid lus ntuj, has muas tej dej nyos hub qaas ntuj has tej dej saw nruas ntug cais nyaz nyos nyaz. Ces txiad muaj ni Vaajtswb has.#2 Pet 3.5 8Vaajtswb tis npe txheej saw hu ua “Ntuj.” Muaj caij tsaws ntuj has muaj caij pud keb, yog hnoos os.
9Vaajtswb has tas, “Tej dej kwg nyos hub qaas ntuj ca ni sissaw luz nyos is qhob chia ua ke, kuas aab tiad tuaj,” ces txiad muaj ni Vaajtswb has. 10Vaajtswb tis npe tu aab hu ua “Ntajtes,” has cob dej kwg luz sissaw ua ke qhai, hu ua “Habtxwb.” Has Vaajtswb pud tej kwg niz tsid taw luz qhai niz txaws sas heeb. 11Ces Vaajtswb has tas, “Lus ntajtes ca ni tuaj txhua yaad nroj tsuag, qoosloo, has tej xyoos ntoo, kuas tiag paaj txi txib rias ni nyaz yaad,” ces txiad muaj rias ni Vaajtswb has. 12Yog ni qhai, lus ntajtes ha muaj txhua yaad xyoos ntoo nroj tsuag, has qoosloo kwg txiaj tiaz paaj txi txib. Vaajtswb pud tej kwg niz tsid taw luz qhai, mas niz txaws sas heeb. 13Muaj caij tsaws ntuj has muaj caij pud keb, yog hnoos pes.
14Vaajtswb has tas, “Ca ni muaj tej lus ci ci tshwd tu saw ntuj, quas nruas hnoos has hmo ntuj, has quas caij nyoog, hnoos, hli, has xyoo; 15tej qhai yiad ci saw ntuj tuaj tu hub ntajtes na kuas pud keb,” ces txiad muaj ni Vaajtswb has. 16Yog ni qhai, Vaajtswb ha tsid kua os lus ci ci kwg luj heeb. Lus kwg ci tshaaj ca kaab nruas hnoos has lus ci tsi heeb ca kaab hmo ntuj; niz tsid tej hnoosqus hubtsig. 17Vaajtswb muas tej lus ci ci qhai tees tu saw ntuj kuas pud keb ci ntsaa as tuaj tu hub ntajtes, 18kuas kaab nruas hnoos has hmo ntuj, has muas qhob kaaj cais tiad qhais qhob tsaws. Has Vaajtswb pud tej kwg niz tsid taw luz qhai, niz txaws sas heeb. 19Muaj caij tsaws ntuj has muaj caij pud keb, yog hnoos plaws.
20Vaajtswb has tas, “Ca ni muaj txhua yaad tsaj muaj sa nyos hub nruas deg, has ca ni muaj noog yaa kuas pub saw nruas ntug.” 21Yog ni qhai, Vaajtswb ha tsid tej tsaj kwg luj tshaaj pliaz nyos hub habtxwb, has tsid txhua yaad tsaj nyos hub nruas deg, has txhua yaad noog hubtsig. Has Vaajtswb pud tej kwg niz tsid qhai, niz txaws sas heeb. 22Vaajtswb ha food kooshmoob tu tej tsaj qhai has has tu tej tsaj kwg nyos hub nruas deg kuas ca ni fuadvaad muz pub habtxwb, has niz has tej noog kuas fuadvaad pub ntajtes. 23Muaj caij tsaws ntuj has muaj caij pud keb, yog hnoos tsis.
24Vaajtswb has tas, “Ca ni muaj txhua yaad tsaj txhu: tsaj nyeg, tsaj qud, tsaj luj, tsaj yaw, naas, qaab, kaas has ntsawd rias ni nyaz yaad,” ces txiad muaj rias ni Vaajtswb has. 25Vaajtswb tsid tej tsaj nyeg, tsaj qud, tsaj luj, tsaj yaw, naas, qaab, kaas has ntsawd rias ni nyaz yaad, has Vaajtswb pud tej kwg niz tsid taw luz qhai, niz txaws sas heeb.
26Vaajtswb has tas, “Nizna pes yiad tsid neeg kuas muaj yaadntxwz zoo ni pes; has cud yiad muaj fwjchid kaab taaznrhiab tej ntsez hub habtxwb, tej noog saw nruas ntug, tej tsaj nyeg, tsaj qud, tsaj luj tsaj yaw, has kaab thoos pliaz lus ntajtes na.”#1.26 Tej phaw qus txhais has tas, tsaj txhu, tsaj nyeg, has tsaj qud; phaw Henplais has tas, tsaj nyeg has txhua yaad tsaj kwg nyos hub ntajtes na.#1 Klt 11.7 27Yog ni qhai, Vaajtswb ha tsid neeg kuas cud muaj yaadntxwz zoo ni Vaajtswb ntaag. Niz tsid muaj tuz yiag has tuz puj.#Mat 19.4; Mak 10.6; 1.27-28#Chk 5.1-2 28Vaajtswb food kooshmoob tu ostug has has tas, “Mej ca ni muaj tus muaj ki kuas coos, mej tej xeesntxwz yiad fuadvaad muz nyos thoos pliaz txhua qhob chia kuas pub ntajtes has cud yiad kaab taaznrhiab lus ntajtes. Kud tsaa mej kaab tej ntsez hub habtxwb, tej noog kwg yaa saw nruas ntug, has txhua tsaab yaad tsaj kwg nyos hub ntajtes na. 29Kud tsid kuas muaj txhua yaad qoosloo has txhua yaad txibntoo tu mej taw noj, 30tadsis kud tsid tej nroj tsuag xyoos ntoo, ua zaws tu tej noog has tej tsaj kwg muaj sa nyos hub lus ntajtes na taw noj.” Ces txiad muaj rias ni Vaajtswb has. 31Vaajtswb nuad is puas tsaab yaad kwg niz tsid qhai, has ua tu niz txaws sas heeb. Muaj caij tsaws ntuj has muaj caij pud keb, yog hnoos raw.
Atualmente selecionado:
Chibkees 1: CQD2024
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2024 Bible Society Vietnam. All rights reserved.