Blasi Sturka TÂ BÎLA NANI
TÂ BÎLA NANI
Baibil wauhkataya pas ba nina Blasi Sturka mâkan sa. Nina ba Grik bîla wina mâkan sa, bîla tânka ba wisa “diara nani tâ krikan ba baha tâura pali” baha “pas bal taki ba tânka”.
Bamna naha wauhkataya na sika, Baibil wauhkataya pas pali ba. Naha wauhkataya wan aisisa: Kasbrika pura ba, tasba mâyara ba, diara nani bilara ba sin nahki tâ kriki paskan ba tânka; upla sâtka nani sut ba sin nahki bal takan ba, bara sturi nani wali lâka ra iwi kan ba wina sin mahka tim taki kan ba, bara baha sut sturka tâka ba, Israel luhpia nani nahki bal takan ba tânka, bara Dawan sin upla dakni kum wal lâ daukan ba sturka. Baha piua nani ra upla nani ba, ai lukanka nani ba mita taibi bri kan. Witin nani gâd ailal ra kasak luki kan, witin nani luki kan paskanka dukia nani karnika bri ba baha ba Dawan wina sa luki kan. Blasi Sturka Wauhkataya ba lika, Gâd kumi baman ban kaia ra bâra ba dukiara baman aisisa. Witin sin diara nani sut bâra ba papaskrika. Naha wauhkataya sin aisisa, blasi pali ra Gâd ba witin mita upla paskan ba dukiara, bara witin sin upla nani wal diara nani daukan, lâ nani sin daukan ba baha tânka nani sut. Dawan bui upla kat ai lukanka ba mangki brin, tasba ra diara nani sut ba purara aimaki kaia, yamnika, liliaka nani sut sin briaia ba mata, bara pana ai bîla wali dauki kabia diara sut ra, dîa kasak wapni ba lâka kat dauki. Saurka lâka bal diman tâka ba sin aisin sa, baha wina upla ba latwan wahwaia lâka sakan, witin ai kupia lâka ba kat daukan bamna, bara Gâd kupia lâka ba daukaia ba daukras kan ba mita. Baha purkara sin aisisa, upla saura dauki Gâd mapara buan ba tânka. Gâd sin mahka diara daukaia buan, sturi nani ba tâ krikan, upla ba kli atki saki pri sakaia tânka ba.
Bamna wauhkataya na dukiara aman luki kaiki, sip sa baikanka tara wâl ra baikaia. Baikanka kumi ba 1—11 kat. Nâra aisisa: Tasba aiska paskan ba, bara upla paskan ba dukiara; saurka lâka tâ krikan ba, upla pât wahwan ba, Adam wina Noa kat upla nani takan ba, utla wihtka tara nani kulkan kan nani ba, lisamra tara sturka ba bara Babel tawer tara paskan ba sturka nani sut wan marikisa.
Baikanka wala ba 12—50 kat. Nahara tâ krikisa: Ebraham, Aisak bara Jekob sturka ba wina, Israel nahki wina bal takan ba; Jekob luhpia nani, Josep muihnika nani wal; Jekob ai taya nani wal Idsip ra wih iwan ba, bara Israel kiamka nahki baha kuntrika ra tâ krikan ba sturka nani sut aisisa. Naha sturka aiska ra, warkka daukan uplika pali ba sika Gâd, baha nani saura dauki banhwi ba witin bui lâka daukisa, klala yabisa, sakuna baha nani witin ra latwan kaiki ai bîla wali banhwi ba tâwan aimakisa, tapahkisa bara tâ baikisa sin. Bara baku naha wauhkataya na tâ krikan, lukanka nani sut bapan ba Gâd, witin tasba aiska na paskan, bara tnata prakisa. Gâd ai pramiska bîla ba ni, wisa: Witin ai uplika nani main kaiki ba ban kabia, lulki lika swibia apia.
Atualmente selecionado:
Blasi Sturka TÂ BÎLA NANI: MSKTU
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2010 Bible Society in Nicaragua