LUK 21
21
Kadə̄ karī yā dəyá̰ kə́ ngaa koy
(Á̰a̰ī Mark 12.41-44)
1Jeju ɔr̄ dɔn dɔɔ́ anī, a̰a̰ ngé kənge yá̰á̰ ngá̰ý gə̄ kə́ a ɓōkə́n̄ yá̰a̰ ndējə̄ yādə́ gə̄ loo ń a ɓōkə́n̄ nar tū tə́ kem kújə yā Kɔ́ɔ̄ɓē tə́ ní. 2Ni-a̰a̰ dəyá̰ kógə̄ḿ kə́ ngaa koy kə́ rɔ̄n tō ndoō, loo ɓōkə́ súū kə́ kum mbutə gə̄ jōó tū tə́ tə́. 3Anī əda na:
Ādə̄ m-ə́dásí najə̄ kə́ bo ngá̰ý, dəyá̰ kə́ ngaa koy kə́ nge ndoō ń toō ɓōkə́ mān̄ yādə́ gə̄ malang. 4Tɔdɔ̄ nin̄ malang ɔrə̄n̄ i dɔ yá̰a̰ yādə́ kə́ teē kə̄ ndágá gə̄ n ndējə̄n̄ ní, banī dəyá̰ ń toō ni ɓōkə́ i yá̰a̰ ndoō yān ń kadə̄ ni ndiń ní malang.
Jeju ɔr̄ najə̄ kə́ dɔ kújə yā Kɔ́ɔ̄ɓē ń a nujə tə́ ní
(Á̰a̰ī Mat 24.1-2; Mark 13.1-2)
5Dan ń noō tə́ ní, de kə́rēý gə̄ a ədan̄ na kújə yā Kɔ́ɔ̄ɓē ní na i kə́ súūnən̄ majə ngá̰ý kə mbal̄ kə́ majə gə̄ ō, kə yá̰a̰ gə̄ kə́ de gə̄ adə̄n̄ kə gō kənī ń ənīn̄ míndə́də́ dɔ tə́ ní ō. Anī Jeju ədadə́ na:
6Yá̰a̰ gə̄ ń á̰a̰ī malang toó ní, ndɔ̄ gə̄ a reēn̄ noó kadə̄ mbal̄ kógə̄ḿ kə́ a to dɔ mbal̄ madə̄ tə́ a gətóo: Yá̰a̰ gə̄ malang a nujən̄ kɔ̄ɔ́.
Yá̰a̰ gə̄ ń a rāān̄ yá̰á̰ kété no ndɔ̄ sarya tə́ ní
(Á̰a̰ī Mat 24.3-14; Mark 13.3-13)
7Anī nin̄-dəjenən̄ na:
Ngoljí, i ndɔ̄ kə́ rá tə́ n yá̰a̰ gə̄ ń noō a reēn̄neé ní? I yá̰a̰ kɔjə kə́ ba̰ý n a ɔjə kadə̄ yá̰a̰ gə̄ ń noō a reēn̄ ní?
8Ni ədadə́ na:
Ādə̄ kumsí ngan̄g, ba ə̄ndāī kum kedə̄ dɔ rɔ̄sí tə́, na ngá̰ý gə̄ a unən̄ rīḿ yā reēń, ba a ədan̄ na i mā ō, na ndɔ̄ na i ngɔr ō, ī-lōōī kun gōdə́. 9Dan ń ā ōōī kōō de gə̄ kə́ a rɔ̄ɔ̄n̄ naā ō, kə́ a tə́lān̄ ɓē gə̄ naā tə́ ō anī, ī-lōōī ɓōĺ, tām̄ i gáŕ kadə̄ yá̰a̰ gə̄ ń noō a rāān̄ yá̰a̰, banī i ta ngóy ndɔ̄ gə̄ aĺ ɓáý.
10Gō tə́ anī ədadə́ na:
Nápar de gə̄ a ḭḭn̄ yā rɔ̄ɔ̄ nápar de kə́ rang gə̄ ō, gíŕ ɓē ko̰o̰ gə̄ a ḭḭn̄ yā rɔ̄ɔ̄ ɓē ko̰o̰ kə́ rang gə̄ ō. 11Dɔ nang a yéȳ ngá̰ý. Loo kə́rēý gə̄ tə́ ní mo̰y ngāl̄bɔ̄gīí ō, ɓō ō, a əsōn̄ tū tə́. Yá̰á̰ kə́ to ɓōĺ ngá̰ý gə̄ a teēn̄ dɔ rā̰ tə́ ō, yá̰á̰ kə́ yáā ngá̰ý gə̄ kə́ yā kɔjə dɔ yá̰á̰ kə́ yā reē ɓáý gə̄ a teēn̄ ō. 12Ba kété no yá̰a̰ gə̄ ń toō tə́ malang ní, a əhɔn̄sí yā rāāsí ndoō tə́ ō, a əlan̄sí jī ngé sarya kə́ loo kán̄ naā gə̄ tə́ ō, yā kəlasí kújə dəngáy gə̄ tə́ ō. A aw̄n̄ sesí kə̄ ta mban̄g gə̄ tə́ ō, kə̄ ta ngé ko̰o̰ ɓē gə̄ tə́ ō, tām̄ yā rīḿ tə́. 13Ba yá̰a̰ gə̄ ń toō a reēn̄ dɔsí tə́ kadə̄ sḭḭ̄ ə́ngeī loo kɔr̄ najə̄ kə́ kum tə́ dɔḿ tə́. 14Ə̄ndāī kemsí tə́ majə kadə̄ yá̰á̰ ń i kə́ yā kadə̄ ā ə́daī yā nējəń najə̄ dɔsí tə́ ní, sḭḭ̄ n ā ī-rāāī loon kemsí tə́ kété ní alé. 15Tɔdɔ̄ mə̄kɔ́ m-ā m-ɔ́jə́sí loo kɔr̄ najə̄ kadə̄ ā ɔ̄rī ō, m-ā m-ādə̄sí kum kedə̄ ō, adə̄ deē kógə̄ḿ dan madə̄ ba̰ā̰sí gə̄ tə́ kə́ yā kadə̄ a dum̄sí kə najá gətóo ō, kə́ yā kɔsə najə̄ tasí tə́ kə̄ gogə́ a gətóo ō. 16Bɔbə̄sí sḭḭ̄ kɔ́ gə̄ ō, kó̰ó̰sí gə̄ ō, ngákó̰ó̰sí gə̄ ō, kə ngéésí gə̄ ō, madə̄ tasí gə̄ ō, a əlan̄sí jī ngé sarya gə̄ tə́. Ngá̰ý gə̄ dansí tə́ a tɔ̄lə̄n̄də́ kɔ̄ɔ́, 17tá de gə̄ malang a imə̄n̄sí tām̄ yā rīḿ tə́. 18Ba ngōn̄ nənga dɔsí kógə̄ḿ kə́ yā kadə̄ ta a tḭ̄ḭ̄ gətóo. 19I kəhɔ rɔ̄ tɔgə yāsí n a ajəsí.
Sarya ń a əsō dɔ ɓē kə́ Jerusalem tə́ ní
(Á̰a̰ī Mat 24.15-21; Mark 13.14-19)
20Ba dan ń ā á̰a̰ī áskar gə̄ a gīrə̄n̄ gidə ɓē kə́ Jerusalem anī, ā ī-gerī kadə̄ ndɔ̄ rɔ̄ tō ndoō yān i ngɔr kɔ̄ɔ́. 21Ndɔ̄ ń noō tə́ ní, kadə̄ ngé gə̄ ń nin̄ i gō nang kə́ Jude tə́ ní a̰ȳn̄ naā kə̄ dɔ mbal̄ gə̄ tə́ ō, ngé gə̄ ń nin̄ i kem ɓēé ní, teē aw̄n̄ sa̰y kɔ̄ɔ́ ō, kadə̄ ngé gə̄ ń nin̄ i kem ndɔr̄ gə̄ tə́ ní tél aw̄n̄ kem ɓēé aĺ ō. 22Tɔdɔ̄ i ndɔ̄ dal ba̰ā̰ kə́ yā tɔ̄l̄ń ta yá̰a̰ malang ń i kə́ ndang kété ní. 23Kem ndɔ̄ gə̄ ń noō tə́ ní rɔ̄ ndoō i kə kó kem gēé ō, kə ngáń kə́ ta mba tə́ gə̄ kə́ jīdə́ tə́ ō. Tɔdɔ̄ wur de gə̄ a ɔldə́ ngá̰ý ō, wōn̄g a əsō dɔ gír de gə̄ ń toō tə́ ō. 24A tɔ̄lə̄n̄də́ kə kaskaraá ō, a aw̄n̄ sedə́ ɓəloó dan nápar de gə̄ tə́ malang ō, adə̄ de gə̄ kə́ nin̄ i Jipə aĺ gə̄ a tə́ɓān̄ ɓē kə́ Jerusalem njadə́ tə́ bátə́ kadə̄ ndɔ̄ yā nápar de gə̄ təgāń.
Ndɔ̄ reē Ngōn̄ Deē
(Á̰a̰ī Mat 24.29-31; Mark 13.24-27)
25Yá̰á̰ kə́ yáā gə̄ ō, kə́ yā kɔjəń dɔ yá̰a̰ gə̄ ń a reēn̄ ní ō, a teēn̄ kum mbang tə́ ō, kum nāā tə́ ō, kum tə́yō̰ gə̄ tə́ ō. Adə̄ dɔ nang tə́ ní, kem gíŕ nápar de gə̄ a tetə man̄ ō, a sōlə̄n̄ kekəre tām̄ yā kōō bā bo kə́ a ɓār̄ tə́ ō, tām̄ yā bəngál bā bo tə́ ō. 26Ɓōĺ rāā de gə̄ ngá̰ý loo ngóō yá̰a̰ gə̄ ń a teēn̄ yā tə́sō dɔ loo kə́ dɔ nang tə́ ní, tɔdɔ̄ ngé tɔ́gə́ kə́ dɔ rā̰ tə́ gə̄ a ndewn̄ ō. 27Anī a a̰a̰n̄ Ngōn̄ Deē a reē dan kil̄ man̄ tə́ kə tɔ́gɔ́ ō, kə kɔsə gɔn kə́ ngá̰ý ō. 28Dan ń yá̰a̰ gə̄ ń noō a əlan̄ gír rāā yá̰á̰ ní anī, ḭ́ḭī dɔ rɔ̄sí tə́, ba ɔ̄rī dɔsí dɔɔ́, tɔdɔ̄ ndɔ̄ kə́ yā kadə̄ a gāngə̄n̄neé dɔsí i ngɔr.
Kum najə̄ yā kāgə̄ kótə̄
(Á̰a̰ī Mat 24.32-35; Mark 13.28-31)
29Ni ədadə́ kūjə́ najə̄ kógə̄ḿ na:
Á̰a̰ī kāgə̄ kótə̄ ō, kāgə̄ gə̄ malang ń noō ō. 30Dan ń á̰a̰īdə́ sitən̄ anī, ī-gerī kadə̄ dɔ ɓar i ngɔr. 31Adə̄ ré á̰a̰ī yá̰a̰ gə̄ ń noō rāān̄ yá̰a̰ anī, ī-gerī kadə̄ Ɓē ko̰o̰ yā Nə́ɓā dɔ i ngɔr. 32Ādə̄ m-ə́dásí najə̄ kə́ bo ngá̰ý, de gə̄ ń ndin̄ kə kumdə́ ngɔlaā ní a mānə̄n̄ malang aĺ n yá̰a̰ gə̄ ń noō malang a rāān̄neé yá̰á̰ ní. 33Dɔ rā̰ ō, dɔ nang ō a mānə̄n̄, ba najə̄ yāḿ mā a mān̄ aĺ bátə́.
Ī-ndiī dɔ rɔ̄sí tə́ majə
34Ī-ndiī já̰já̰ dɔ rɔ̄sí tə́, ba ī-lōōī kəya̰ kadə̄ rāā nāā gə̄, kə kasə rāā gə̄, kə sōlə̄m̄ kə́ dɔ nang tə́ gə̄, rāān̄ ndíĺsí adə̄ ɔȳ nding, na sōgə́ ndɔ̄ sarya ní əhɔsí dɔ jīsí tə́, 35tītə̄ réng beé. Tɔdɔ̄ ndɔ̄ ní a əsō dɔ de gə̄ malang ń ndin̄ dɔ nang tə́ ní. 36Ká i dan kə́ ba̰ý tə́ gə̄gē a, á̰a̰ī já̰já̰ ō, ī-ndɔ̄yī ō, yā kadə Nə́ɓā əndā ma̰ȳsí a̰a̰ń kadə̄ ásiī teē ta yá̰a̰ malang ń a reēn̄ tə́ ní ō, kadə̄ asiī ra dɔɔ́ ta kum Ngōn̄ Deē tə́ ō.
37Kadaá anī Jeju ndi kem kújə yā Kɔ́ɔ̄ɓē tə́ a ndóoń de gə̄ yá̰a̰, ba ndɔ̄ɔ́ anī ni-teē aw̄ dɔ mbal̄ ń a ɓārə́n̄ na i mbal̄ kāgə̄ olibə gə̄ tə́ ní yā ɓīī. 38Ba ta gír loo tə́ ɓáa ngán Israel gə̄ malang reēn̄ rɔ̄n tə́ kem kújə yā Kɔ́ɔ̄ɓē tə́ yā koō najə̄ kɔrə̄n.
Atualmente selecionado:
LUK 21: SARDC
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Bibəl ta Sar̄ © L'Alliance Biblique du Tchad, 2006, 2010.