San Mateo 19
19
Jesusi jurajperakueri ambe arhijpesti
(Mc 10.1-12; Lc 16.18)
1Jesusi íni ambe uandarini, Galilea uéakuntaspti ka Judea, iurhekua Jordanirhu parhikutini isï niraspti. 2Uánekuaksï chúxapaspti ka jima ima p'amenchatichani ambakerantaaspti.
3Máruksï fariseuecha Jesusini andarheraspti ka ts'éjkunksï arhispti: “¿Sésekua jatsiski acheti témbani ísku ambe jimbo jurajkuni?” 4Ka Jesusi arhiantaaspti: “¿Andi nójtsï arhintaski karakatarhu eska uénakuarhutki uératini Diósï achetini ka uarhitini kueraaska? 5‘Ísï jimbosï, tataka jurajkuauati tátjembani ka amambani ka tembuchaati, ka temba jingunksï májkuentaati.’ 6Nóteruksï táchanistia, májkuentastiksïa, ísï jimbo, ambe enga Diósï kúndaka, ásï nema jarhangutpe.” 7Ka fariseuechaksï arhispti: “¿Ka andisï Moisesi juramutspe uarhitini karakata ma úkuni, enga arhiaka eska jurajkunhaxaka?” 8Ka Jesusi arhiaspti: “Jimbokajtsï cha mintsitani chuperatixaka, Moisesiksïni sésekua íntskusti uarhitini jurajkuni, k'óru urhetku no ísïspti. 9Jíksïni arhixaka eska ima enga témbani jurajkuaka ka máteruni tembuntani, ka jini témba no ísku jándikuni jarhani, ima ísku jándi úkorhexati.”
10Ka jurhengorherichaksï Jesusini arhispti: “Enga acheti ma tembani ísï jatsika kámani, sánderu sésisti no tembuchani.” 11Ka Jesusi arhiantaaspti: “Nóksï iámenduecha íni ambe kurhangusïndi, imechajku enga Diósï kurhangukua íntsaaka. 12Jimbokaksï jarhaska máru engaksï no újka tembuchani jimbokaksï ísï kóndenhaska, ka jarhastiksï máteru engaksï xájkunhajka, ka jarhastiksï máteru engaksï auandarhu anapu irechekua jimbo xáxekorhejka ka nóksï tembuchasïndi. Ne enga íni ambe újka kurhanguni, kurhangue.”
Jesusi sapichani újchakuraasti
(Mc 10.13-16; Lc 18.15-17)
13Jesusinksï sapirhatichani máru pákuaspti, eska ima p'ájtsïkuapiringa ka kómarhijpekuani. Ka Jesusiri jurhengorherichaksï xukaasïrempti imani engaksï sapichani páani jápka; 14ka Jesusi uandaspti: “Jurajkua je eskajtsïni sapirhaticha andarheraaka, ásï p'íngua je, jimboka auandarhu anapu irechekua imecheriska engaksï sapini járhaka.” 15Ka p'ájtsïkuaspti ka kéndikuspti.
Tumbi jatsikorheri Jesusi jinguni uandaxesti
(Mc 10.17-31; Lc 18.18-30)
16Tumbi ma Jesusini andarheraspti ka arhispti: “Jurhentpiri, ¿Ambesïni sési ambe ua engani jimbo úaka tsípekua méntkisï jatsini?” 17Ka Jesusi arhispti: “¿Andirinisï sési ambe kurhamarhejki? Diósïjkusï sési ambeti. K'óru engari uéjka tsípekuarhu inchani, janhanharhia arhistatsperakua juramukatechani.” 18Ka tumbi kurhamarhespti: “¿Nákichani?” Ka Jesusi arhintaspti: “Ásï uándikpe. Ásï ísku jándi. Ásï sïpajkurha. Ka ásï jáma chkuándiraparini máteruni nósesi úkuni. 19Janhanharhi táteni ka nándeni, ka xénhchpe ísï eskari t'u na xénhchakorhejka.” 20Ka tumbi arhispti: “Ideni ambe úskia, ¿Ambeterusïni kuerantachajki?” 21Ka Jesusi arhispti: “Engari k'amak'amasï kaxumbenhchajka, atarantsï ambe engarini xáni jatsikorheka ka kómu jándichani íntsaa, ka auandarhu jauati chéti jatsikorhekua ka xásïrini chúxapaaka.” 22Tumbi ísï kurharini kánekua kómu níntaspti jimboka kánekua jatsikorherispka.
23Tátsekua Jesusi jurhengorheri jémbechani arhiaspti: “Sési jimboksïni arhixaka eska auandarhu anapu irechekuarhu, jatsikorheri ma kánekua úkua jinguni inchaaka. 24Ménderuksïni arhixaka eska kameiu ma p'ikukueri p'orhojchakuarhu isï sánderu sóntku parhijchakuaaka, eska jatsikorheri ma Diósïri irechekuarhu inchani.”
25Jurhengorheri jémbechaksï íni ambe kurharini ískuksï pakareraspti ka uandasïremptiksï: “¿Jiájkani néjkusï p'ímutanhantaa?” 26Ka Jesusi erateaparini arhiaspti: “Parhakpeni anapuechanksï nómeni úati ísï úni, k'óru Diósïni jimbo iámendu ambe úsïndi úkorheni.”
27Ka Pédru arhispti: “Juchaksïni t'úngeni chúxaputini iámendu ambechi jurajkuska, ¿Ambechi p'iua?” 28Ka Jesusi arhiaspti: “Sési jimboksïni arhixaka, jiájkani enga iámendu ambe jimbanheranhantaaka, enga Acheti Uájpa t'íntskua jinguni uaxakatini jauaka, chánksïni engajtsïni chúxapuka, témbeni tsimani k'éri uaxantskuarhuksïni péraaka, témbeni tsimani Israeli anapu iretechani arhinharhikuani. 29Ka ima enga erachichani o pirenchichani, tátjembani o amambani o témbani, sapichani, ka echeri ambe jíndeni jimbo jurajkuaka, iúmu ukuatse sánderu intsïnhantaati, ka tsípekua méntkisï anapu andakorheati. 30Ka uánekua engaksï iásï k'éri ambeni jaka, xásïksï ísku nementaati ka engaksï iásï ísku nemeka, xásïksï k'éri ambeuati.”
Atualmente selecionado:
San Mateo 19: DKPJ
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Biblia en P´urhépecha, Michoacán, México © Sociedad Bíblica de México, A.C.