Matalikilo 10
10
Bamulunyungu lwa bana bakwe Nowa basankwa
(1 Maka 1:5-23)
1Ici ncikani capali Shemu, Amu alimwi aJafeti bana bakwe Nowa. Aba botatwe bakaba abana basankwa muyoba ndiwakamana.
2Bana bakwe Jafeti basankwa bakalinga Goma, Magogu, Medayi, Jafani, Tubali, Mesheki alimwi aTailasi. 3Bamulunyungu lwakwe Goma bakalinga Ashikenasi, Lifati alimwi aTogama. 4Bamulunyungu lwakwe Jafani bakalinga Elisha, Sipeeni, Saipulasi, aLodisi. 5Aba bakalinga mbobamashali bakulukulu ba bantu abo bekala muya loombe lwa lweenge apansumbu. Mbobantu bomwi bamulunyungu lwakwe Jafeti bekala mumishobo ipusenepusene ashishi. Bamwi abamwi balaamba mumulaka wabo.
6Bana bakwe Amu basankwa bakalinga Kushi, Ijipiti, Libya aKenani. 7Bamulunyungu lwakwe Kushi bakalinga Seba, Afila, Sabita, Laama aSabiteka. Bamulunyungu lwakwe Laama bakalinga Seba alimwi aDedani. 8Kushi wakashala mwaana musankwa wiitwa ayi Nimulodi uyo wakaba shikulwana mutaanshi wakalinga kwiindaawo cishi coonse. 9Nimulodi wakalinga mufwimi wiindaawo kwiinda mulucafwo lwa Mwaami Lesa. Nceceeco bantu ncebacitile mwaambo wakwaamba ayi, “Lesa aakulengeshe kuba mufwimi wiindaawo mbuli Nimulodi!” 10Pakutaanguna buleelo bwakwe bwakalinga kusenkanya Babiloni, Eleki, alimwi aAkadi, shoonse shotatwe kashili muBabiloniya. 11Kuswa mumusena ulya wakaya kuAsilya akuyaka ndabala inene ya Ninife, Lewoboti Ili, Kala, 12alimwi aLeseni, iyo ili pakati ka Ninife andabala inene iindaawo ya Kala.
13Bamulunyungu lwakwe Ijipiti bakalinga mbantu ba muLidiya, Anamu, Leabu, Nafutu, 14Patilusi, Kasulu, alimwi aKileti mushali mukulukulu wa bene Filisiti.
15Bana bakwe Kenani basankwa nguSidoni munenebantu, aEti. 16Alimwi Kenani wakalinga mushali mukulukulu wa bene Jebusi, bene Amo, bene Gegashi, 17bene Ifi, bene Aki, bene Sini 18bene Afadi, bene Semali, abene Amati. Mishobo ipusenepusene ya bene Kenani yakapalangana cakusenya manyinsa acishi cabo 19kutalikila kuSidoni kuya cakumalenge kushika kuGela pafwaafwi aGasa, kuya cakwicwe nkwiinda kuSodoma, Gomola, Adima, aSiboimi pafwaafwi aLasha. 20Aba mbobamulunyungu lwakwe Amu, bashiite mumishobo ipusenepusene ashishi. Bamwi abamwi balaamba mumulaka wabo.
21Shemu munenebantu kuli Jafeti, wakalinga ngomushali mukulukulu wa baEbulu boonse. 22Bana bakwe Shemu basankwa bakalinga Elamu, Ashuwa, Apakishadi, Ludi alimwi aAlamu. 23Bamulunyungu lwakwe Alamu mbantu bene Usi, Ulu, Geta, alimwi aMesheki. 24Apakishadi wakalinga ishi Shela, uyo wakalinga ishi Eba. 25Eba wakashala baana basankwa bobilo. Umwi wakalinga kwiitwa ayi Pelegi ceebo muciindi cakwe bantu ba mucishi ca panshi bakalinga kupanseene. Umwi wakalinga kwiitwa ayi Jokutani. 26Bamulunyungu lwakwe Jokutani mbantu bene Alimodadi, Shelefu, Aasamafeti, Jela, 27Adolamu, Usali, Dikila, 28Obali, Abimaeli, Sheba, 29Ofa, Afila alimwi aJobabi. Boonse bakalinga bamulunyungu lwakwe Jokutani. 30Musena ngobakalinga kwikalaamo wakalinga kutalikila kuMesha kushika kuSefali mushishi sha tulundu kwicwe. 31Boonse abo mbamulunyungu lwakwe Shemu bashiite mumishobo ipusenepusene ashishi alimwi bamwi abamwi balaamba mumilaka yabo.
32Alimwi boonse aba mbamulunyungu lwakwe Nowa mushobo amushobo, kweelana alunyungu lwa nguwo. Muyoba ndiwakamana mishobo yoonse ya pacishi ca panshi yakaswa kubana bakwe Nowa basankwa.
Atualmente selecionado:
Matalikilo 10: BBBLI
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Lenje Bible with Deuterocanon © Bible Society of Zambia, 2003.