Versículos bíblicos populares de Genesis 6

Partilhar

As ghow yn Chiarn arrys dy row eh er chroo dooinney er y thalloo, as v’eh seaghnit ayns e chree.

As honnick Jee dy row mee-chraueeaght dooinney trome er y thalloo, as dy row dy chooilley yeearree jeh smooinaghtyn e chree soit er olk dy kinjagh.

Agh hooar Noah foayr ayns shilley yn Chiarn.

Ad shoh sheelogheyn Noah, va Noah ny ghooinney cairagh as ynrick ayns e heelogheyn: as ren Noah e vea y leeideil myr ayns fenish Yee.

As dooyrt y Chiarn stroie-ym dooinney, ta mee er chroo veih eaghtyr y thallooin: chammah dooinney as baagh, as y cretoor snauee, as eeanlee yn aer: son ta arrys orrym dy vel mee er chroo ad.

As haink eh gy-kione, myr ghow deiney toshiaght dy vishaghey er eaghtyr y thallooin, as dy row inneenyn ruggit daue. Dy vaik mec Yee inneenyn gheiney dy row ad aalin; as ghow ad mraane jeu, lurg nyn yeearree. As dooyrt y Chiarn, Cha jean my spyrryd dy kinjagh streeu rish dooinney, fakin nagh vel eh hene myrgeddin agh foalley: foast bee e eash shey-feed bleïn. Va foawir ’sy theihll, ayns ny laghyn shen; as myrgeddin lurg shen, tra ghow mec Yee mraane jeh inneenyn gheiney, as dy dymmyrk ad cloan daue, haink yn sleih cheddin dy ve deiney niartal, va ’sy chenn earish, ard-hranlaasee.

Myr shoh ren Noah: cordail rish ooilley ny va Jee er harey da, myr shen ren eh.

As dooyrt Jee rish Noah, Te roym dy choyrt jerrey er ooilley sheelnaue; son ta’n seihll kyndagh roo lhieent lesh tranlaase: as cur-my-ner stroie-ym ad marish y thalloo.

Trog dhyt arg jeh fuygh Gopher: roomyn nee oo y yannoo ayns yn arg, as slaa eh cheu-sthie as cheu-mooie lesh pick.

As yeeagh Jee er y seihll, as cur-my-ner, v’eh slane peccoil: son va ooilley sheelnaue er n’gholl er-shaghryn veih Jee er y thalloo.

As jeh dagh nhee bio jeh dy chooilley eill, jees jeh dagh sorch ver oo lhiat stiagh ’syn arg, dy reayll ad bio mayrt: bee ad fyrrynagh as bwoirrynagh.