Genesis 1
1
Qanemci Cat Piurcimallratnek
1Nutem etellrani Agayutem ellarpak nuna-llu piliaqellruak. 2Nuna-llu eluciinani, imaunani-llu. Tan'gerem mer'em-llu caqumaluku. Agayutem-llu anernera pekluni mer'em qaingakun. 3Tua-llu Agayun alerquiguq, “Tanqigtangli” —tanqik-llu piurrluni. 4Agayutem-llu tanqik tangrramiu assikaa. Elliin-llu avtak tanqik tan'geq-llu. 5Aciraa-llu tanqik “Ernermek” tan'geq-llu “Unugmek.” Atakuq pelluggaartelluku unuakurtuq —tua-i tauna erenret ciuqliat.
6-7Tuamta-llu Agayun qanertuq, “Qilakutartangli tumarnermek mer'ek akuliik, avvlukek malruurrlukek mer'ek” —tuaten-llu ellirluni. Agayutem-llu piliaqaa qilakutaq mer'ek avvlukek, aipaa qilakutam acianun, aipaa-llu quliinun. 8Pagna-llu qilakutaq piliaqellni aciraa “Qilagmek.” Atakuq pelluggaartelluku unuakurtuq —waniwa erenrem aipaa.
9Tuamta-llu Agayun qanertuq, “Mer'et quyurrlit mer'em aciani ataucimun kinertellria-llu alairli” —tuaten-llu ellirluni. 10Kinertellria-llu aciraa “Nunamek.” Mer'et-llu quyungqalriit acirluki “Imarpignek.” Agayutem-llu tangrraa assirluni. 11Tua-llu Agayun qanertuq, “Nuna naugili, ayuqenrilngurnek naugiluni, naunrarnek naucetaarkalegnek, napanek atsangtulinek atsait qumilegnek naucetaarkameggnek, ayuqmeggnek naugiarkauluteng nunami” —tuaten-llu ellirluni. 12Nuna-llu naugiuq naunrarnek, napanek atsangtulinek naucetaarkalegnek ayuqmeggnek naugiarkauluteng. Agayutem-llu tangrraa assirluni. 13Atakuq pelluggaartelluku unuakurtuq —waniwa erenret pingayuat.
14Tuamta-llu Agayun qanertuq, “Qilak tanqigcetellrianek pitangli avegluku erneq unugmek. Nallunailkutaukilit uksumun, kiagmun, ernernun, allrakunun, yuut-llu ukvemeggnun cayaraita nallaitnun. 15Tanqiulit pagaani, nuna tanqigmek ciqinqerluku.” Tuaten-llu ellirluni. 16Agayun-llu piliuq malrugnek angtuagnek tanqiignek. Akerta piliaqaa tanqiusqelluku ernermun, iraluq-llu tanqiusqelluku unugmun. Agyat-llu cali piliaqluki. 17Tanqiusqelluku aipaa ernermun, aipaa-llu unugmun, 18avvlukek tan'geq tanqik-llu. Agayutem tangrraa assirluni. 19Atakuq pelluggaartelluku unuakurtuq —waniwa erenret cetamiit.
20Tuamta-llu Agayun alerquiguq, “Mer'et pitanglit amllernek ayuqenrilngurnek unguvalrianek, ella-llu yaqulegtangli.” 21Agayun piliuq angelrianek unguvalrianek allanek-llu imarpigmiutarnek, imarpik imangevkarluku ayuqenrilngurnek unguvalrianek. Agayun-llu piliuq ayuqenrilngurnek yaqulegnek. Agayutem tangrraa assirluni. 22Atawaqaasqai qanerluni, “Irnikici amlleriinarluci imarpiit imirluki, yaqulget-llu amllerilit nunam qaingani.” 23Atakuq pelluggaartelluku unuakurtuq —waniwa erenret tallimiit.
24Tuamta-llu Agayun qanertuq, “Nunam qaingani pitangli ayuqenrilngurnek unguvalrianek: kuluvagnek yuilqurmiutarnek-llu, angelrianek mikellrianek-llu ungungssinek” —tuaten-llu ellirluni. 25Agayutem tamalkuita piliaqai, tangrrai-llu assirluteng.
26Cali Agayun qanertuq, “Yugnek pililta wangkucicetun ayuqellrianek. Ataniumaciqait neqet mermi, yaqulget, allat-llu ungungssit kuluviit yuilqurmiutaat-llu, mikellriit angelriit-llu.” 27Agayun piliuq yugnek ellmitun ayuqelrianek arnauluki angutnguluki-llu elliin piliaqellrui. 28Agayutem-llu atawaqaasqai qanrulluki, “Irnikici amlleriinarluci nuna yirluku atanirturluku-llu. Ataniumakiciki-llu unguvalriari nunam, ellam, imarpiim-llu.” 29Tua-llu Agayutem yuut qanrutai, “Tangerrluku cikiramci naucetaarkalegnek naunrarnek, napanek atsangtulinek, atsait naucetaarkameggnek qumilegnek neq'akesqelluki. 30Tau͡gaam nunam ungungssii mikellriit angelriit-llu yaqulgi-llu cikiranka neqkaitnek makunek nunam naunrainek cuyalegnek” —tuaten-llu ellirluni. 31Agayutem tangrrai piliallni tamalkuita assikluki-llu cakneq. Atakuq pelluggaartelluku unuakurtuq —waniwa erenret arvinelgat.
Atualmente Selecionado:
Genesis 1: YPK
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Yupik Bible © 2012 American Bible Society. All rights reserved.