Lizsij dih Gaihcij 2
2
1Couh yienghneix, mbwnmbwn deihdeih sojmiz hih cungj cauh liux lo.
2Cangqdiq cauh sojmiz hih liux le, daengz ngoenz daixcaet, couh gijmaz cungj mbouj cauh lo. 3De caemh dawz ngoenz neix gek okdaeuj, guh ngoenz dwzbez he, soengq fuk hawj ngoenz neix, aenvih de youq ngoenz neix dingz roengzma, gijmaz cungj mbouj cauh lo. 4Couh yienghneix, Cangqdiq cauh liux mbwnmbwn deihdeih sojmiz hih lo.
Aen suen Ihdenq
Yehhozvaz#2:4 ‘Yehhozvaz’ couh dwg gij coh Cangqdiq, gij iqswh de dwg naeuz ‘boux gag miz.’ Cangqdiq cauh mbwn cauh deih mwhde, 5lajdeih faexfaex nywjnywj, ndaw reih byaekbyaek haeuxhaeux, cungj mij miz saek go, aenvih de mijyaengz hawj miz fwn doek, caemh mij vunz geng hah ndaem hah; 6hoeng, daj lajdoem miz fwi hwnj daeuj, hawj gij doem ndaej ywnh ndaej cumx.
7Gajlaeng Yehhozvaz Cangqdiq aeu doem ma baenj hwj cauh guh boux vunz he, gij coh de heuh Yaqdangh,#2:7 ‘Yaqdangh’ dwg ‘vunz’ dih iqswh. caiq boq gij heiq haeuj conghndaeng de bae, hawj de bienqbaenz boux vunz miz mingh he.
8Yehhozvaz Cangqdiq caiq youq baixdoeng mwnq Ihdenq mwnq guh aen suen he. De couh dawz de cauh hih boux vunz mwnq coengq youq ndaw suen mwnq. 9De caiq hawj doengh go faex gyaeugyaeu ndeindei he daj lajdoem did hwnjdaeuj, caemh giet gij mak ndei gw he. Youq cungqgyan suen caemh miz go faex hawj vunz mbouj rox rai he, caeuq miz go faex hawj vunz ndaej rox faenbied ndei caeuq yak he.
10Aen suen neix miz diuz dah he ndaej gag iemqraemx aen suen de. Diuz dah neix faen miz seiq nga riuz okbae. 11Diuz daixdaeuz heuh dah Bijsoenh; de riuz gvax goq Hahfeizlah. (Hahfeizlah mwnq dieg neix miz gim; 12gij gim he cwnz raixcaix. Caemh miz baujsig caeuq cungj iengfaex rang fwtfwt he.) 13Diuz daixngeih heuh dah Gihywnq; diuz de riuz gvax goq Gujsiz. 14Diuz daixsam heuh dah Dijgwzlijswh; diuz de riuz goq Yaqsuz dih baixdoeng. Diuz daixseiq heuh dah Youqfazlahdij.
15Yehhozvaz Cangqdiq dawz boux vunz mwnq coengq youq ndaw suen Ihdenq hwj, hawj de youq mwnq youq, caemh hawj de youq ndaw de dajgeng dajndaem caeuq guenjleix aen suen neix. 16Yehhozvaz Cangqdiq caemhcaiq hanh boux vunz mwnq, naeuz: “Ndaw suen neix hih mak maz, mwngz cungj ndaej seizbienh gw, 17caenhgag ndaek go ndaej hawj vunz rox faenbied ndei caeuq yak mwnq dawz hih mak, mwngz baenzbaenz cungj mbouj ndaej gw. Hauhnaeuz mwngz gw nex, dangjciengz ngoenz de gaengjdingq ngaiz rai lo.”
Daixit boux vunzbaz
18Yehhozvaz Cangqdiq naeuz: “Boux vunzsai dog gag youq mbouj daiq baenz geijlai; gou ij cauh bouxdoih he hawj de. Boux de caemh ndaej hab de, bang de cij ndaej.” 19Gajlaeng Yehhozvaz Cangqdiq couh aeu doem ma baenj cauh gak cungj doenghduz, duz vuenz cix miz, duz byaij cix miz, duz mbin cix miz, dawz daeuj hawj boux vunz mwnq, hawj de an coh hawj gyoengqde. Yiengq boux vunz mwnq couh an coh hawj sojmiz hih doenghduz. 20De an coh hawj doengh duz cukseng hah, duz roeg mbin gwnz mbwn he hah, caeuq doengh duz nyaen hah, hoeng, youq ndaw doengh duz neix, cungj mij saek duz ndaej hab hawj de guh doih.
21Yiengq, Yehhozvaz Cangqdiq couh hawj boux vunz mwnq ninz ndaekndaek hwj; ninz ndaekndaek hwj le, Yehhozvaz Cangqdiq couh daj gwnz ndang de aeu diuz ndoksej he, gajlaeng caiq doiqyungz hob gij noh de boiz. 22Yehhozvaz Cangqdiq couh yungh diuz ndoksej neix ma cauh boux vunzbaz he, caiq daiq de bae daengz dangqnaj boux vunz mwnq. 23Boux vunz mwnq raen le couh naeuz:
Ojx! Mbat neix ndaej miz boux he caeuq gou doxdoengz lo!
Boux vunz neix dwg ndaw ndok gou hih ndok, ndaw noh gou hih noh;
Gij ndok de dajlaeng gou daeuj, gij noh de caemh dwg dajlaeng gou daeuj.
Gou ij hawj de heuh guh ‘vunzbaz,’ aenvih de dajlaeng vunzsai ok daeuj he.
24Couh vih yienghneix, vunzsai ij biek boh biek meh, caeuq yah doxcaeuq youq, luj baenz aen ndang he, mbouj faen mwngz gou.
25Mwhde, gannaeuz gvanjbaz de cungj loxgenz loxgangh lah, hoeng, song boux de cungj mbouj rox najnyaenq.
Atualmente Selecionado:
Lizsij dih Gaihcij 2: YBNT
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© New Bridge Publishing Company Limited